1, 2. Paonan-o gintagad han usa nga nagbibiyahe nga paramangno an matinumanon nga mga tawohan ha Biblia, ngan kay ano nga makalilipay nga magin sangkay hira?

“NAG-IISTORYA hiya mahitungod ha mga tawohan ha Biblia nga sugad hin maiha na niya hira nga sangkay.” Ini an siring han usa nga sister katapos mabatian an pahayag han edaran na nga nagbibiyahe nga paramangno. Diri ito urusahon kay ito nga brother damu ka dekada na nga nag-aaram ha Pulong han Dios ngan nagtututdo tikang hito, salit kon nag-iistorya hiya mahitungod ha mga tawohan ha Biblia nga may daku nga pagtoo, sugad hin maiha na niya hira nga sangkay.

² Diri ba makalilipay nga magin sangkay an damu nga tawohan ha Biblia? Totoo gud ba hira ha imo? Handurawa an imo aabaton kon makaupod ngan makaistorya mo an pipira ha ira, sugad kanda Noe, Abraham, Ruth, Elias, ngan Ester. Hunahunaa an mahimo nira magin epekto ha imo—an birilhon nga mga sagdon ngan pagparig-on nga ira maihahatag ha imo!—Basaha an Proberbios 13:20.

3. (a) Paonan-o kita makakapahimulos ha paghibaro mahitungod ha mga tawohan ha Biblia nga may daku nga pagtoo? (b) Ano nga mga pakiana an aton tatagdon?

³ Syempre, ha panahon nga ‘banhawon an mga matadong,’ magigin posible gud iton makalilipay nga pakigsangkay. (Buh. 24:15) Kondi, bisan yana pa la makakapahimulos na kita ha paghibaro mahitungod ha mga tawohan ha Biblia nga may daku nga pagtoo. Paonan-o? Hi apostol Pablo nagsiring: “Magsubad kamo ha mga nakakarawat han mga saad tungod han pagtoo ngan pagpailob.” (Heb. 6:12) Ha pagtikang naton ha pag-aram mahitungod ha ira, tagdon naton an pipira nga pakiana may kalabotan ha ginsiring ni Pablo: Ano an pagtoo, ngan kay ano nga kinahanglan naton ito? Paonan-o naton masusubad an matinumanon nga mga tawo nga gin-unabi ha Biblia?

4. Ano an ginhuhunahuna han mga tawo mahitungod ha tinuod nga pagtoo, ngan kay ano nga sayop hira?

⁴ An pagtoo usa nga makaruruyag nga kalidad—kalidad nga ginpabilhan gud han kalalakin-an ngan kababayin-an nga pag-aadman naton hini nga libro. Damu yana an diri maaram kon ano an tinuod nga pagtoo, naghuhunahuna hira nga pagtoo ito ha mga butang nga waray basihan o ebidensya. Pero sayop hira. An tinuod nga pagtoo diri kay basta la pagtoo ha usa nga butang nga waray basihan, kay an pagbuhat hito peligroso. Diri ito basta pagbati la, kay an pagbati mahimo magbag-o-bag-o. Ngan  kon may kalabotan ha Dios, diri igo an pagtoo la kay bisan an “mga demonyo natoo liwat ngan nangungurog.”—San. 2:19.

5, 6. (a) An aton pagtoo nakasentro ha ano nga duha nga butang nga diri nakikita? (b) Mationan-o sadang karig-on an aton pagtoo? Iilustrar.

⁵ An tinuod nga pagtoo labaw pa hito. Tagda kon paonan-o ito gintagan hin kahulogan ha Biblia. (Basaha an Hebreo 11:1.) Hi Pablo nagsiring nga an pagtoo nakasentro ha duha nga butang nga diri naton nakikita. Siyahan, ha “diri nakikita” nga mga kamatuoran. Diri nakikita han aton mata an mga kamatuoran nga aadto ha langit—sugad kan Jehova nga Dios, an iya Anak, o an Ginhadian nga nagmamando na yana ha langit. Ikaduha, ha mga butang nga aton “ginlalaoman”—an mga butang nga waray pa mahitabo. Diri naton nakikita yana an bag-o nga kalibotan nga hirani na ipahinabo han Ginhadian han Dios. Iginpapasabot ba hito nga waray basihan an aton pagtoo hito nga mga kamatuoran ngan an aton mga ginlalaoman?

⁶ Diri gud! Hi Pablo nagsaysay nga an tinuod nga pagtoo may marig-on nga basihan. Han gin-unabi niya an pagtoo sugad nga “marig-on nga pagsarig nga matutuman,” ginamit hiya hin pulong nga mahimo liwat ihubad nga “titulo.” Handurawa nga may naghatag ha imo hin balay. Bangin ihatag niya an titulo hito ngan magsiring, “Ini an imo bag-o nga balay.” Syempre, diri niya iginpapasabot nga maukoy ka dida hito nga papel; lugod, iton legal nga dokumento marig-on nga pamatuod nga ikaw an tag-iya han balay, kay an pagtag-iya hito nga dokumento sugad hin pagtag-iya mismo han balay. Ha pariho nga paagi, an ebidensya han aton pagtoo makakombinse gud ngan marig-on, nga sugad hin ito mismo an aton pagtoo.

7. Ano an nahiuupod ha tinuod nga pagtoo?

⁷ Salit, an tinuod nga pagtoo nag-uupod hin marig-on nga pagsarig ngan kombiksyon nga nakasentro kan Jehova nga Dios. An pagtoo nagpapahinabo ha aton nga tagdon hiya sugad nga mahigugmaon nga Amay ngan sumarig nga an ngatanan niya nga saad sigurado nga matutuman. Kondi labaw pa hito an tinuod nga pagtoo. Sugad hin buhi nga butang, sadang ito atamanon basi mabuhi. Sadang liwat ito ipakita ha buhat, kay kon diri, mamamatay ito.—San. 2:26.

8. Kay ano nga importante hinduro an pagtoo?

⁸ Kay ano nga importante hinduro an pagtoo? Hi Pablo naghatag hin makakombinse nga baton. (Basaha an Hebreo 11:6.) Diri kita makakadaop kan Jehova o makakapalipay ha iya kon waray kita pagtoo. Salit importante ito basi matuman an pinakahitaas ngan pinakadungganon nga katuyoan han intelihente nga mga linarang: an pagin duok ngan an paghimaya ha aton langitnon nga Amay, hi Jehova.

9. Paonan-o iginpakita ni Jehova nga maaram hiya nga kinahanglan naton an pagtoo?

⁹ Maaram hi Jehova nga kinahanglan gud naton an pagtoo, salit nagtagana hiya hin mga susbaranan basi magtutdo ha aton kon  paonan-o magkakaada hin pagtoo ngan maipapakita ito. Nagtagana hiya ha Kristiano nga kongregasyon hin susbaranan han magtinumanon nga kalalakin-an nga nangunguna dida hito. An iya Pulong nasiring: “Subara an ira pagtoo.” (Heb. 13:7) Ngan may-ada pa hiya igintagana. Hi Pablo nagsurat mahitungod ha “madakmol nga dampog hin mga saksi,” an kalalakin-an ngan kababayin-an ha kadaan nga panahon nga nagpakita hin susbaranan ha pagtoo. (Heb. 12:1) Pero damu pa an matinumanon nga surugoon ni Jehova labot han mga gin-unabi ni Pablo ha kapitulo 11 han Hebreo. An Biblia may-ada totoo nga mga istorya mahitungod ha kalalakin-an ngan kababayin-an, batan-on ngan lagas, nga iba-iba an kahimtang han kinabuhi, nga nagpakita hin daku nga pagtoo ngan damu an maitututdo ha aton hini nga panahon nga an mga tawo waray na pagtoo.

10. Paonan-o an personal nga pag-aram makakabulig ha aton nga masubad an matinumanon nga kalalakin-an ngan kababayin-an ha Biblia?

¹⁰ Diri mo masusubad an usa nga tawo kon diri mo anay hiya kikilal-on hin maopay. Samtang ginbabasa mo ini nga libro, maoobserbaran mo nga damu nga pagsaliksik an ginhimo basi mabuligan ka nga makilala an kalalakin-an ngan kababayin-an nga may pagtoo. Kay ano nga diri magsaliksik hin dugang pa? Ha imo personal nga pag-aram, admi hin maopay an Biblia gamit an mga garamiton ha pagsaliksik nga may-ada ka. Samtang ginpapamalandong mo an imo gin-aadman, handurawa an kahimtang ngan an iba nga detalye han asoy. Handurawa nga imo nakikita an lugar, nababatian an aringasa, ngan naaamyon an alimyon—nga sugad hin aadto ka mismo. Labaw ha ngatanan, pangalimbasugi nga maabat an inabat han mga tawohan. Samtang ginbubuhat mo ito, magigin mas totoo ha imo iton matinumanon nga kalalakin-an ngan kababayin-an, ngan magigin mas pamilyar ka ha ira—bangin an iba ha ira magin sugad pa ngani hin maiha mo na nga sangkay.

11, 12. (a) Paonan-o mo mahimo abaton nga duok ka kanda Abram ngan Sarai? (b) Paonan-o ka makakapahimulos ha ehemplo nira Hana, Elias, o Samuel?

¹¹ Kon makilala mo na gud hira, maruruyag ka ha pagsubad ha ira ehemplo. Pananglitan, kon naghuhunahuna ka hin bag-o nga toka. Pinaagi han organisasyon ni Jehova, gin-aaghat ka nga pauswagon an imo ministeryo. Bangin ginhangyo ka nga bumalhin ha lugar nga nagkikinahanglan hin mas damu nga magwarali, o gin-aghat nga sarihan an pipira nga paagi han pagsangyaw nga iba ha imo nahiaraan o waray mo pa masarihi. Samtang ginhuhunahuna mo ito ngan igin-aampo, makakabulig ba an pagpamalandong ha ehemplo ni Abram? Hira ni Sarai andam bumaya ha ira mahimyang nga kinabuhi ha Ur ngan ginbendisyonan gud hira sugad nga resulta. Samtang ginsusubad mo an ira ginbuhat, sigurado nga aabaton mo nga mas kilala mo gud hira yana.

 ¹² Kumusta man kon diri maopay an pagtratar ha imo han usa nga duok ha imo ngan tungod hito nanluya ka—bangin nagdesisyon pa ngani nga diri na tumambong ha mga katirok? Kon ginpamalandong mo an ehemplo ni Hana ngan an iya diri pagtugot nga mapugngan ni Penina an iya pag-alagad kan Jehova, mabulig ito ha imo nga makahimo hin husto nga desisyon—ngan magigin sugad hin duok mo liwat nga sangkay hi Hana. Sugad man, kon naabat ka nga waray ka pulos, mahimo ka magin duok kan Elias samtang gin-aadman mo an iya kinabuhi ngan kon paonan-o hiya ginliaw ni Jehova. Ngan an mga batan-on nga naatubang hin mga pagsulay tikang ha ira imoral nga mga kaeskwela mahimo umabat nga duok hira kan Samuel katapos pag-adman kon paonan-o niya nalamposan an magraot nga impluwensya han mga anak ni Eli ha tabernakulo.

13. An pagsubad ba ha pagtoo han mga tawohan ha Biblia nakakaiban han bili han imo pagtoo? Isaysay.

¹³ An pagsubad ba ha pagtoo hito nga mga tawohan ha Biblia nakakaiban han bili han imo pagtoo? Diri gud! Hinumdumi nga an Pulong ni Jehova nag-aaghat ha aton nga subaron an mga tawo nga may pagtoo. (1 Cor. 4:16; 11:1; 2 Tes. 3:7, 9) Dugang pa, an pipira nga tawo nga aton pag-aadman nagsubad liwat ha mga matinumanon nga nabuhi antes ha ira. Pananglitan, makikita naton ha Kapitulo 17 hini nga libro nga an ginyakan ni Maria ginkotar niya ha ginyakan ni Hana, matin-aw nga gintagad niya hi Hana sugad nga susbaranan. Nakaiban ba ito ha karig-on han pagtoo ni Maria? Waray! Lugod, an susbaranan ni Hana nakabulig nga maparig-on an pagtoo ni Maria basi magkaada hiya maopay nga ngaran kan Jehova nga Dios.

14, 15. Ano an pipira nga materyal nga igindugang hini nga libro, ngan paonan-o naton ito magagamit hin maopay?

¹⁴ Ini nga libro gindisenyo basi makabulig nga maparig-on an imo pagtoo. An masunod nga mga kapitulo gintirig-ob nga mga artikulo ha “Subara an Ira Pagtoo” nga serye han An Barantayan tikang han 2008 tubtob 2013. Pero may pipira nga materyal nga igindugang. Kada kapitulo, may mga pakiana nga mabulig ha aton ha paghisgot ngan ha pag-aplikar han mga impormasyon. Damu liwat an igindugang nga makaruruyag ngan detalyado nga retrato, ngan an daan nga mga retrato ginpadaku ngan ginpaopay pa. May makikita liwat nga mga mapa ngan lista han importante nga mga hitabo. Ini nga libro nga Subara an Ira Pagtoo gindisenyo para ha personal nga pag-aram, pagsingba han pamilya, ngan pag-aram han kongregasyon. Damu nga pamilya an bangin malipay liwat ha pagbasa han mga istorya ha daku nga tingog.

¹⁵ Hinaot ini nga libro makabulig ha imo nga subaron an pagtoo han maunungon nga mga surugoon ni Jehova ha naglabay. Hinaot makabulig liwat ini ha imo nga maparig-on an imo pagtoo samtang nagigin mas duok ka ha imo langitnon nga Amay, hi Jehova!