Hi Jesus nagsiring: “An usa nga nasud makikig-away ha lain nga nasud, ngan an usa nga ginhadian makikig-away ha lain nga ginhadian. Magkakaada magkusog nga mga linog, ngan ha iba-iba nga mga lugar magkakaada kakulang hin mga pagkaon ngan mga epidemya.” (Lucas 21:10, 11) Pariho han mga bagis nga nagkukompwesto ha fingerprint, ito nga mga panhitabo nagkukompwesto han usa nga matin-aw nga tigaman. Ngan sugad la nga an fingerprint nagpapakilala han usa nga tawo, ito nga mga panhitabo nga durungan nga mahitatabo pangirilal-an nga “hirani na an Ginhadian han Dios.” Durungan na ba ito nga nahitatabo yana? Kitaa an ebidensya.

1. GIRRA

Han 1914, nagkaada girra nga waray pa gud mahitabo ha bug-os nga kasaysayan han tawo! Agsob ihulagway han mga historyador an 1914 sugad nga diri mangangalimtan nga tuig ha kasaysayan kay hito nga panahon nahitabo an pinakasiyahan nga girra nga apektado an bug-os nga kalibotan. Dida hito nga girra gumamit hin damu hinduro nga mga tangke de girra, bomba, machine gun, makahirilo nga mga gas, ngan iba pa nga makamaratay nga armas. Ginsundan ito han ikaduha nga girra ha kalibotan, diin naimbento ngan siyahan nga gin-gamit an nuklear nga mga armas. Tikang han 1914, nagkaada na damu nga girra ha iba-iba nga lugar, ngan tungod hito minilyon na an namatay.

2. LINOG

Kada tuig, may-ada mga 100 nga linog nga an kakusgon kaya “makaguba hin mga istraktura,” siring han Britannica Academic. Ngan an United States Geological Survey nagsiring nga “sumala ha maiha na nga mga rekord (tikang pa han mga 1900), mga 16 nga magkusog nga linog an ginlalaoman nga maabot ha bisan ano nga tuig.” Bangin may maghunahuna nga waray man magdamu an mga linog, sugad hin nagdamu la ito yana kay masayon na ito ma-detect. Pero ini an kamatuoran, tungod han magkusog nga linog ha bug-os nga kalibotan damu gud an nag-aantos ngan namamatay.

 3. KAKULANG HIN PAGKAON

An kakulang hin pagkaon resulta han girra, korapsyon, krisis ha ekonomiya, diri maopay nga pagdumara ha agrikultura, o kakulang hin plano para ha diri normal nga kahimtang han panahon. An “2018 Year in Review” han World Food Programme nagsiring: “Ha bug-os nga kalibotan, 821 ka milyon nga tawo an nagugutom ngan 124 ka milyon ha ira an waray gud ginkakaon.” An malnutrisyon usa nga hinungdan han kamatay han mga 3.1 ka milyon nga kabataan kada tuig. Han 2011, malnutrisyon an hinungdan han kamatay han mga 45 porsyento nga kabataan ha bug-os nga kalibotan.

4. SAKIT NGAN EPIDEMYA

Usa nga publikasyon han World Health Organization an nasiring: “An ika-21 ka siglo nakilala tungod han grabe nga mga epidemya. Binalik an daan nga mga sakit​—kolera ngan yellow fever—​ngan nagkaada pa bag-o nga mga sakit​—SARS, pandemic influenza, MERS, Ebola ngan Zika.” An pinakabag-o, an COVID-19 nga pandemya. Bisan pa han pagtikadamu han nahibabaroan han mga syentista ngan doktor mahitungod ha mga sakit, waray hira nadidiskobrehan nga tambal ha ngatanan nga sakit.

5. BUG-OS-KALIBOTAN NGA PAGSANGYAW

Gin-unabi ni Jesus an usa pa nga bahin han tigaman han hiya nagtagna: “Inin maopay nga sumat han Ginhadian isasangyaw ha bug-os nga inuukyan nga tuna sugad nga pamatuod ha ngatanan nga nasud, ngan katapos hito maabot an kataposan.” (Mateo 24:14) Bisan pa han magkuri nga problema han mga tawo yana, sobra walo ka milyon tikang ha ngatanan nga nasud an nagpapasamwak han maopay nga sumat han Ginhadian han Dios ha 240 nga nasud ngan ha sobra 1,000 nga yinaknan. Yana la ini nahitabo ha kasaysayan han tawo.

An ngatanan nga bahin han tigaman nga iginhatag ni Jesus nahitatabo na yana. Kay ano nga angay kita magin interesado hini? Tungod kay hi Jesus nagsiring: “Kon makita na niyo nga nahitatabo ini nga mga butang, hibaroi nga hirani na an Ginhadian han Dios.”​—Lucas 21:31.

An tigaman nga iginhatag ni Jesus, pati na an kronolohiya ha Biblia, nabulig ha aton nga masabtan nga gin-establisar han Dios an iya Ginhadian ha langit han 1914. a Hito nga panahon, ginpalingkod niya an iya Anak nga hi Jesu-Kristo sugad nga Hadi. (Salmo 2:2, 4, 6-9) Diri mag-iiha, magmamando na an Ginhadian han Dios ha tuna, ngan wawad-on hito an ngatanan nga gobyerno han tawo ngan hihimoon an tuna nga paraiso basi ukyan han mga tawo ha kadayonan.

Diri mag-iiha, matutuman na an mga pulong ha modelo nga pag-ampo nga igintutdo ni Jesus: “Kumanhi unta an imo Ginhadian. Matuman unta an imo kaburut-on dinhi ha tuna sugad han ha langit.” (Mateo 6:10) Kondi ano na an ginbubuhat han Ginhadian tikang han nagtikang ito pagmando han 1914? Ngan ano an aton malalaoman kon mandoan na hin bug-os han Ginhadian an katawohan?