KON NAABOT AN MGA TRAHEDYA, NAHUHUNAHUNA MO BA KON ‘NAKAIN AN DIOS?’ O KON MAY MAKASURUBO NGA PANHITABO, NAKAKAGPAKIANA KA BA KON NAGTATAGAD AN DIOS HA IMO?

Bangin naeksperyensyahan mo an inabat ni Shiela nga taga-Estados Unidos nga nagdaku ha relihiyoso nga pamilya. Hiya nagsiring: “Tikang ha kabata, interesado ako ha Dios kay hiya an aton Maglalarang. Pero waray ko abata nga duok ako ha iya. Maaram ako nga nagbabantay hiya ha akon, pero ha hirayo la. Diri ako naghuhunahuna nga nangangalas an Dios ha akon, pero diri liwat ako natoo nga napaid hiya ha akon.” Kay ano nga nagruruhaduha hi Shiela? Hiya binaton: “Sunod-sunod nga trahedya an umabot ha amon pamilya, ngan baga hin diri gud kami ginbubuligan han Dios.”

Pariho kan Shiela, bangin sigurado ka nga naeksister an Makagarahum-ha-ngatanan nga Dios. Pero, bangin nagruruhaduha ka kon nagtatagad gud ba an Dios ha imo. Ito liwat an gin-abat han matadong nga hi Job, bisan kon may pagtoo hiya ha gahum ngan kinaadman han Maglalarang. (Job 2:3; 9:4) Katapos mag-antos hi Job hin sunod-sunod nga trahedya ngan waray nakikita nga katalwasan, nagpakiana hiya ha Dios: “Kay ano nga igintatago mo an imo nawong ngan gintatagad ako nga imo kaaway?”​—Job 13:24.

Ano an ginsisiring han Biblia? An Dios ba an angay basulon kon naabot an mga trahedya? May pamatuod ba nga napaid an Dios ha mga tawo ha kabug-osan ngan ha kada tagsa ha aton? Mahibabaroan gud ba naton kon nakikita ngan nasasabtan kita han Dios, kon napaid hiya ha aton, o nabulig kon may-ada kita mga problema?

Ha masunod nga mga artikulo, hihisgotan naton kon ano an igintututdo han mga linarang mahitungod ha pagtagad han Dios ha aton. (Roma 1:20) Ngan aton uusisahon kon ano an siring han Biblia mahitungod hito. Kon mas “kilala naton hiya” pinaagi han iya mga linarang ngan han iya Pulong, mas magmamarig-on an aton pagsarig nga ‘nagtatagad hiya ha aton.’​—1 Juan 2:3; 1 Pedro 5:7.