Alayon sumati kami mahitungod han imo kalugaringon.

Natawo ako ha Italya han 1943. Nagtubo ako kaupod han akon kabugtoan ha gutiay nga baryo. An akon tatay parauma ngan panday. Debotado nga Katoliko an amon pamilya.

Kay ano nga nagpadi ka?

Han bata pa ako, naruruyag ako pagpinamati ha mga padi ha singbahan. Naoopayan ako han ira tingog pati han magarbo nga mga rituwal. Salit nag-ambisyon ako magpadi. Han 13 anyos ako, ginpaeskwela ako ni Nanay ha usa nga boarding school nga nag-aandam ha kabataan nga kalalakin-an para ha hitaas nga pag-aradman ha pagin padi.

Kaupod ba ha iyo pagbansay an pag-aram ha Biblia?

Diri. Han 15 anyos ako, gintagan ako han akon usa nga titser hin kopya han mga Ebanghelyo—an kasaysayan han kinabuhi ngan ministeryo ni Jesus—ngan makadamu ko ito basaha. Han 18 anyos ako, kumadto ako ha Roma basi mag-eskwela ha Katoliko nga mga unibersidad nga direkta nga gindudumara han papa. Nag-aram ako hin Latin, Griego, kasaysayan, pilosopiya, sikolohiya, ngan teolohiya. Bisan kon nagbabasa kami hin mga teksto ha Biblia ngan namamati hin mga pagbasa ha Biblia ha mga sermon kon Domingo, pero waray namon pag-admi hin aktuwal an Biblia.

Nagin usa ka nga rektor. Kaupod ba ha imo trabaho an pagtutdo?

An akon trabaho nakapokus ha pagdumara. Kondi nagtutdo liwat ako mahitungod ha mga dekreto han Second Vatican Council.

Kay ano nga nagtikang ka magruhaduha ha imo relihiyon?

May tulo nga hinungdan. An akon relihiyon nakikigbahin ha politika. Ginkukonsinter hito an sayop nga mga buhat han mga klero ngan mga parokya. Ngan baga hin sayop an pipira nga katutdoan han Katoliko. Pananglitan, mahihimo ba han mahigugmaon nga Dios nga sirotan an mga tawo ha kadayonan kamatay nira? Dugang pa, karuyag gud ba han Dios nga uroutruhon naton hin ginatos ka beses an mga pangadi gamit an rosaryo? *

Ano man an imo ginbuhat?

Nagtatangis nga nag-ampo ako ha Dios para hin giya. Pinalit liwat ako hin Jerusalem Bible han Katoliko nga kapupublikar pa la ha Italyano nga yinaknan hito nga panahon, ngan gintikangan ko ito pagbasa. Usa ka Domingo nga aga, samtang iginsasab-it ko an akon sotana katapos han Misa, may duha nga lalaki nga binisita ha seminaryo. Nagpakilala hira nga mga Saksi ni Jehova. Sobra usa ka oras kami nga nag-iristorya mahitungod ha Biblia ngan kon ano an ginsisiring hito may kalabotan  ha pangirilal-an han tinuod nga relihiyon.

Ano an imo impresyon ha ira?

Bilib ako han ira kombiksyon ngan han ira kaaram ha pagbiling han ira gin-uunabi nga mga teksto ha Katoliko nga edisyon han Biblia. Ha urhi, may usa pa nga Saksi nga binisita ha akon. Mario an iya ngaran. Pasensyoso hiya ngan pirme niya gintutuman an iya saad. Kada Sabado nga aga, mauran man o masirak, naabot hiya ha seminaryo pagkakaalas-noybe.

Ano an reaksyon han iba nga padi hito nga mga pagbisita?

Gin-imbitar ko hira nga umapi ha amon mga paghisgot, kondi waray nira seryosoha an pag-aram ha Biblia. Pero ako, naruyagan ko ito. Nahibaro ako hin maopay nga mga butang. Pananglitan, nahibaroan ko kon kay ano nga gintutugotan han Dios an karaotan ngan pag-antos—usa nga butang nga maiha ko na nga ginhihinunahuna.

Gindid-an ka ba han imo mga superyor nga mag-aram ha Biblia?

Han 1975, damu ka beses nga kumadto ako ha Roma basi isaysay an akon gintotoohan. Nangalimbasog an akon mga superyor nga bag-uhon an akon panhunahuna, pero waray bisan usa ha ira an gumamit han Biblia. Han Enero 9, 1976, nagsurat ako ha Roma nga diri ko na karuyag magin Katoliko. Paglabay hin duha ka adlaw, binaya ako ha seminaryo ngan sinakay hin tren basi tumambong ha katirok han mga Saksi ni Jehova ha siyahan nga higayon. Usa ngay-an adto nga asembleya nga gintatambongan hin damu nga kongregasyon. Iba gud ito ha mga katirok nga akon nahiaraan! An kada Saksi may-ada Biblia, ngan ginsusundan nira an ginsisiring han mga mamumulong samtang ginhihisgotan an iba-iba nga topiko.

Ano an nagin reaksyon han imo pamilya?

Kadam-an ha ira nasina gud ha akon. Kondi hinbaroan ko nga usa han akon manghod an nag-aaram ha Biblia kaupod han mga Saksi ha Lombardy, ha norte nga Italya. Kumadto ako ha iya, ngan ginbuligan ako han mga Saksi didto nga makabiling hin trabaho ngan urukyan. Hito nga tuig, nabawtismohan ako sugad nga Saksi ni Jehova.

May ginbabasolan ka ba?

Waray! Inabat ko nga duok gud ako ha Dios tungod kay maaram ako nga an akon hinbabaroan mahitungod ha iya basado ha Biblia, diri ha pilosopiya o tradisyon han singbahan. Yana, sinsero ngan may kombiksyon na ako nga nakakagtutdo ha iba.