An Isaias 60:1 nasiring: “Buhát, O babaye, pagpasanag hin kalamrag, kay an imo kalamrag inabot na. An himaya ni Jehova nasanag ha imo.” Iginpapakita han konteksto nga an “babaye” amo adto an Zion, o Jerusalem, an kapital han Juda hito nga panahon. a (Isa. 60:14; 62:​1, 2) An syudad nagrirepresentar han bug-os nga nasud. May duha nga pakiana nga aton babatunon mahitungod hini nga teksto: Siyahan, kakan-o ngan ha ano nga paagi an Jerusalem ‘binuhát’ ngan nagpasanag hin espirituwal nga kalamrag? Ikaduha, an mga pulong ba ha Isaias may-ada mas daku nga katumanan ha aton panahon?

Kakan-o ngan ha ano nga paagi an Jerusalem ‘binuhát’ ngan nagpasanag hin espirituwal nga kalamrag? An Jerusalem ngan an templo hito ruba samtang an mga Judio distyero ha Babilonya ha sulod hin 70 ka tuig. Pero katapos sakupon an Babilonya han mga Mediano ngan mga Persiano, an mga Israelita ha bug-os nga Imperyo han Babilonya may kagawasan na nga bumalik ha ira nasud ngan ipahiuli an tinuod nga pagsingba. (Ezra 1:​1-4) Ha tinikangan han 537 B.C.E., ito an ginbuhat han mga matinumanon nga nabibilin nga tikang ha ngatanan nga 12 nga tribo. (Isa. 60:4) Nagtikang hira paghalad kan Jehova, pagselebrar han mga piyesta, ngan pagtukod utro han templo. (Ezra 3:​1-4, 7-11; 6:​16-22) An himaya ni Jehova nagtikang na liwat sumanag ha Jerusalem—nga amo an iginpahiuli nga katawohan han Dios. Salit nagin simboliko nga kalamrag hira ha mga nasud nga diri nakilala kan Jehova.

Pero an mga tagna ni Isaias ha pagpahiuli may pipira la nga bahin nga natuman ha kadaan nga Jerusalem. An kadam-an han mga Israelita waray magpadayon ha pagsugot ha Dios. (Neh. 13:27; Mal. 1:​6-8; 2:​13, 14; Mat. 15:​7-9) Ha urhi, ira pa ngani ginsalikway an Mesias, hi Jesu-Kristo. (Mat. 27:​1, 2) Han 70 C.E., an Jerusalem ngan an templo hito ginbungkag utro.

Gintagna ni Jehova ito nga makasurubo nga mahitatabo. (Dan. 9:​24-27) Klaro nga diri niya katuyoan nga bug-os nga matuman ha Jerusalem, nga aadi ha tuna, an mga tagna han pagpahiuli ha Isaias kapitulo 60.

An mga pulong ba ha Isaias may-ada mas daku nga katumanan ha aton panahon? Oo, pero may kalabotan ito ha iba nga simboliko nga babaye—“an Jerusalem ha igbaw.” Hi apostol Pablo nagsurat mahitungod ha iya: “Iroy naton hiya.” (Gal. 4:26) An Jerusalem ha igbaw amo an langitnon nga bahin han organisasyon han Dios, nga ginkukompwesto han maunungon nga espiritu nga mga linarang. An iya mga anak nag-uupod kan Jesus ngan han 144,000 nga dinihogan han espiritu nga mga Kristiano, nga pariho kan Pablo may langitnon nga paglaom. An dinihogan nga mga Kristiano nagkukompwesto han “baraan nga nasud”—an “Israel han Dios.”​—1 Ped. 2:9; Gal. 6:16.

Ha ano nga paagi an Jerusalem ha igbaw ‘binuhát’ ngan ‘nagpasanag hin kalamrag’? Ginbuhat niya ito pinaagi ha paggamit ha iya dinihogan nga mga anak ha tuna. Ikompara an ira mga eksperyensya ha igintagna ha Isaias kapitulo 60.

An dinihogan nga mga Kristiano kinahanglan ‘bumuhát’ kay nahingadto hira ha espirituwal nga kasisidman han an igintagna nga mga banwa nga amo an apostasya nagsarang ha ikaduha nga siglo C.E. (Mat. 13:​37-43) Salit nagin mga bihag hira han Babilonya nga Gamhanan, an imperyo han buwa nga relihiyon ha kalibotan. An mga dinihogan nagpabilin nga bihag tubtob “ha ikatarapos han sistema han mga butang,” usa nga peryodo  nga nagtikang ha tuig han 1914. (Mat. 13:​39, 40) Waray pag-iha katapos hito, han 1919, ginpagawas hira tikang ha pagkabihag ngan nagtikang dayon pagpasanag han espirituwal nga kalamrag pinaagi han maduruto nga pakigbahin ha pagsangyaw nga buruhaton. b Ha sulod hin damu na nga katuigan, an katawohan tikang ha ngatanan nga nasud dinaop hito nga kalamrag, pati na an mga nabibilin han Israel han Dios—an “mga hadi” nga gin-uunabi han Isaias 60:3.​—Pah. 5:​9, 10.

Ha tiarabot, an dinihogan nga mga Kristiano magpapasanag hin kalamrag tikang kan Jehova ha mas daku nga paagi. Paonan-o? Kon matapos na an ira kinabuhi ha tuna, magigin bahin hira han “Bag-o nga Jerusalem,” o han maarasawa han Kristo nga amo an 144,000 nga mga igkasi-hadi ngan mga saserdote.​—Pah. 14:1; 21:​1, 2, 24; 22:​3-5.

An Bag-o nga Jerusalem may importante nga papel ha pagtuman han Isaias 60:1. (Ikompara an Isaias 60:​1, 3, 5, 11, 19, 20 ha Pahayag 21:​2, 9-11, 22-26.) Sugad la nga an Jerusalem ha tuna amo an sentro han gobyerno ha kadaan nga Israel, an Bag-o nga Jerusalem naman ngan an Kristo, magigin an gobyerno han bag-o nga sistema han mga butang. Ha ano nga paagi an Bag-o nga Jerusalem “nalusad tikang ha langit tikang ha Dios”? Pinaagi ha pagpanginano ha kahimtang ha tuna. An mga tawo tikang ha ngatanan nga nasud nga may kahadlok ha Dios “maglalakat pinaagi han lamrag hito.” Magkakaada na hira kagawasan tikang ha sala ngan kamatayon. (Pah. 21:​3, 4, 24) An magigin resulta amo an bug-os nga “pagpahiuli han ngatanan nga butang,” sugad han igintagna ni Isaias ngan han iba pa nga propeta. (Buh. 3:21) Ito nga daku nga pagpahiuli nagtikang han an Kristo nagin Hadi nga mahuhuman ha kataposan han iya Usa ka Yukot ka Tuig nga Pagmando.