HA PANAHON han Biblia, gindudumara han usa nga tinaporan an panimalay o propyedad han iba nga tawo. An Hebreo ngan Griego nga mga pulong nga iginhubad nga “tinaporan” usahay nagtutudlok ha paramangno o paradumara han panimalay.

Han hi Jose nga anak han patriarka nga hi Jacob uripon ha Ehipto, ginhimo hiya nga tinaporan ha panimalay han iya Ehiptohanon nga agaron. Ngani, “hi Jose na an iya ginpaasikaso han ngatanan niya nga gintatag-iya.” (Gen. 39:2-6) Ha urhi, han hi Jose nagin gamhanan nga magmarando ha Ehipto, nagpili hiya hin tinaporan para ha iya panimalay.​—Gen. 44:4.

Ha panahon ni Jesus, an mga tag-iya han tuna kasagaran nga naukoy ha syudad hirayo ha ira kaumhan. Salit an mga tag-iya nagpipili hin mga tinaporan nga manginginano ha adlaw-adlaw nga buruhaton han mga trabahador ha ira mga uma.

Hin-o an kwalipikado nga magin tinaporan? An Romano nga parasurat han siyahan nga siglo nga hi Columella nagsiring nga an usa nga uripon nga ginpipili sugad nga paramangno, o tinaporan, kinahanglan “eksperyensyado na.” Usa hiya nga indibiduwal nga “naabat hin responsabilidad ha pagsiguro nga ginbubuhat han mga trabahador an ira trabaho pero diri ha paagi nga waray konsiderasyon.” Nagsiring liwat hiya: “Ini an pinakaimportante nga kinahanglan ha iya​—nga diri hiya maghunahuna nga maaram hiya han ngatanan, ngan kinahanglan pirme gud hiya andam mahibaro.”

An Pulong han Dios nagamit han ehemplo han usa nga tinaporan ngan han iya trabaho basi iilustrar an pipira han mga buruhaton ha Kristiano nga kongregasyon. Pananglitan, gindasig ni apostol Pedro an mga Kristiano nga gamiton an mga abilidad nga iginhatag ha ira han Dios “ha pagserbi ha usa kag usa sugad nga mag-opay nga mga tinaporan han diri matupngan nga pagkabuotan han Dios.”​—1 Ped. 4:10.

Hi Jesus mismo naggamit han ehemplo han usa nga tinaporan ha ilustrasyon nga nakarekord ha Lucas 16:1-8. Dugang pa, ha usa nga tagna mahitungod ha tigaman han iya presensya sugad nga Hadi, ginpasarig ni Jesus an iya mga sumurunod nga magpipili hiya hin “matinumanon ngan maaramon nga uripon,” o “matinumanon nga tinaporan.” An nangunguna nga toka hito nga tinaporan amo an pagtagana hin regular nga espirituwal nga pagkaon ha mga sumurunod han Kristo ha panahon han kataposan. (Mat. 24:45-47; Luc. 12:42) Mapasalamaton gud kita nga usa kita han mga nakakakarawat han makaparig-on ha pagtoo nga mga publikasyon nga igin-aandam han matinumanon nga tinaporan ngan iginpupublikar ha bug-os nga kalibotan.