POSIBLE nga mga 800 ka tuig na an naglabay han an mga tribo han Maori nagbiyahe hin yinukot ka kilometro ha kadagatan ngan inukoy ha New Zealand. Didto, nabilngan nira an lugar nga naiiba gud ha ira ginbayaan nga tropikal nga mga isla han Polynesia. May-ada ito kabukiran, dagku nga mga yelo, mga hot spring, ngan niebe. Paglabay hin mga lima ka siglo, inabot an usa pa nga grupo hin mga dayo tikang ha hirayo nga Europa. Yana, ginkakarawat han kadam-an nga taga-New Zealand an mga tradisyon tikang ha Anglo-Saxon ngan Polynesia. Haros 90 porsyento han populasyon an naukoy ha syudad. An Wellington amo an kapital nga syudad nga nahimumutang ha pinakasur nga bahin han tuna.

Tungod han pagkaiba-iba ngan makaruruyag nga palibot han New Zealand, diri urusahon nga naabot hin  tulo ka milyon nga turista an nabisita hito nga nasud kada tuig bisan kon nahibubulag ito.

Ha New Zealand makikita an damu kalain nga hayop, ngan mas damu dinhi an klase han tamsi nga diri nakakalupad kay ha iba nga dapit han tuna. Makikita liwat dinhi an tuatara, nga usa nga reptilya nga mahimo mabuhi tubtob 100 ka tuig! An mga hayop nga dinhi la makikita amo an pipira nga klase hin kulalaknit ngan pipira nga dagku nga mga isda, upod na an balyena ngan lumod.

An mga Saksi ni Jehova aktibo ha New Zealand hin haros 120 ka tuig na. Nagtututdo hira han Biblia ha diri maminos 19 nga linggwahe, upod na an mga dialekto ha Polynesia nga Niuean, Rarotongan, Samoan, ngan Tongan.