KONDI iba an panhunahuna han mga nasuporta han interfaith (pagtarampo han iba-iba nga relihiyon ha pagsingba) mahitungod hito. “Waray relihiyon nga diri nagpapakita hin kalooy . . . , nga diri nag-aataman han palibot . . . , nga diri nag-aabiabi,” siring ni Eboo Patel, an nag-organisar han Interfaith Youth Core.

Ha pagkamatuod, may mga okasyon nga an mga Budhista, Katoliko, Protestante, Hindu, Muslim, ngan iba pa nag-uurosa basi atohan an kapobrehan, mangalimbasog para ha katungod han tawo, magprotesta kontra ha mga land mine, o sulbaron an mga isyu ha aton natural nga palibot. Damu nga relihiyon an nagkakatirok basi paghisgotan kon paonan-o magkakaada pagkauruyon ngan pagdinasigay. Ira ginsiselebrar an ira pagkaiba-iba pinaagi ha pagdagkot hin mga kandila, pagkalipay, musika, pag-ampo, ngan iba pa.

An interfaith ba an solusyon han samok ha mga relihiyon? Ito ba an paagi han Dios basi magkaada mas maopay nga kalibotan?

An usa han pinakadaku nga organisasyon han interfaith nanhahambog nga may-ada ito membro nga sobra 200 nga relihiyon ha 76 nga nasud. Tumong hito an “padayon ngan adlaw-adlaw nga pagbinuligay ha mga relihiyon.” Kondi, diri ito masayon buhaton. Pananglitan, sumala ha mga nag-organisar hini, ginhunahuna nira hin maopay an mga pulong ha ira karta basi diri masina an mga relihiyon nga nagpirma hito. Kay ano? An usa nga rason, kay waray hira pagkauyon kon angay ba iapi an Dios ha karta. Salit, ginlikyan nira an pag-unabi o paghisgot mahitungod ha Dios.

Kon diri iaapi an Dios, ano man an papel han relihiyon? Dugang pa, ano an kaibahan han interfaith nga mga organisasyon tikang ha mga organisasyon nga nanhahatag hin ayuda? Ini an rason kon kay ano nga an nag-organisar han interfaith nasiring nga diri hira relihiyoso nga organisasyon, kondi “organisasyon nga nag-aaghat hin pagbinuligay.”

“An ngatanan nga nangunguna nga tradisyon han relihiyon uusa la an mensahe: gugma, kalooy ngan pagpasaylo,” siring han Dalai Lama, usa nga prominente nga parasuporta han interfaith. Hiya nagdugang: “An importante amo an pagpakita hito ha aton adlaw-adlaw nga kinabuhi.”

Oo, importante an gugma, kalooy, ngan pagin mapinasayloon. Ha Bulawanon nga Surundon ni Jesus, hiya nagsiring: “Salit, an ngatanan nga karuyag  niyo buhaton ha iyo han mga tawo, buhata liwat niyo ha ira.” (Mateo 7:12) Kondi tungod la ba kay an usa nga relihiyon nag-aaghat ha pagbuhat hin maopay, masisiring na nga tinuod ito?

Ha panahon ni apostol Pablo, damu an nag-aangkon nga nag-aalagad ha Dios kondi mahitungod ha ira, hiya nagsiring: “Mapapamatud-an ko nga aktibo gud hira ha pag-alagad ha Dios, pero diri uyon ha husto nga kahibaro.” Kay ano nga nakasiring hiya hito? Hi Pablo nagsiring: “Kay diri hira maaram han basihan han Dios ha katadongan . . . nangangalimbasog hira pag-establisar han ira kalugaringon nga paagi.” (Roma 10:2, 3) Kawang la an ira kadasig ngan pagtoo tungod kay waray hira husto nga kahibaro kon ano an karuyag han Dios nga buhaton nira.—Mateo 7:21-23.

“Malipayon an mga nakikigmurayaw,” siring ni Jesus. (Mateo 5:9) Ginbubuhat ni Jesus kon ano an iya iginsasangyaw pinaagi ha pagin diri madarahog ngan pagsumat han mensahe han kamurayawan ha mga tawo nga iba-iba an relihiyon. (Mateo 26:52) An mga kinarawat nahiusa ha marig-on nga bugkos han gugma. (Colosas 3:14) Kondi an tumong ba ni Jesus amo la an pag-usa han mga tawo nga iba-iba an gintikangan basi hira magkaurosa nga may kamurayawan? Inabuyon ba hiya ha ira mga paagi ha pagsingba?

An relihiyoso nga mga lider han mga sekta han mga Pariseo ngan Saduseo nagkontra gud kan Jesus. Iginkaparatay pa ngani nira hiya. Ano an iya ginhimo? Iya ginsugo an iya mga disipulo: “Pabay-i hira. Mga buta hira nga paratugway.” (Mateo 15:14) Waray niya hira kilalaha sugad nga espirituwal nga kabugtoan.

Paglabay hin panahon, naestablisar an usa nga Kristiano nga kongregasyon ha Corinto, Gresya—syudad nga may damu nga relihiyon. Ano an angay buhaton han mga Kristiano didto? Hi apostol Pablo nagsurat ha ira: “Diri kamo magpas-an hin yugo upod han mga diri-tumuroo.” Kay ano? Hiya nagsiring: “Paonan-o magkakauyon hi Kristo ngan hi Belial [o Satanas]? O ano an kaparihoan han tumuroo ngan han diri-tumuroo?” Katapos, hiya nagsagdon: “Salit gawas kamo tikang ha ira, ngan bulag kamo.”—2 Corinto 6:14, 15, 17.

Matin-aw, diri gin-uuyonan han Biblia an interfaith. Pero bangin ka magpakiana, ‘Kondi, paonan-o man makakab-ot an tinuod nga pagkaurosa?’

An International Space Station—usa nga urusahon nga imbensyon nga nalibot ha tuna—resulta han pagbinuligay han mga 15 nga nasud. Maglalampos ba ini nga proyekto kon ito nga mga nasud waray magkauruyon kon ano nga blueprint o disenyo an gagamiton?

Ito liwat an kahimtang han interfaith nga organisasyon yana. Bisan kon igin-aaghat an kooperasyon ngan pagtahod, waray ito ginkauyonan nga blueprint nga susundon ha pagparig-on han ira pagtoo. Sugad nga resulta, waray la gihap hira magkaurosa ha moral ngan doktrinal nga mga isyu.

An Biblia nagsusulod han mga suruklan han Dios nga iginpapariho hin blueprint. Mahimo naton ipahiuyon an aton kinabuhi ha kon ano an ginsisiring hito. Adton kinarawat hito waray na ginpapasulabi nga nasyonalidad, ngan nagkaada kamurayawan ngan pagkaurosa. An Dios nagtagna hini: “Akon pakakadaon ha mga katawohan an uray nga yinaknan, nga hira ngatanan makatawag han ngaran ni Jehova, ha pag-alagad ha iya ha usa nga pagkahiringyon.” An pagkaurosa resulta han “uray nga yinaknan,” an suruklan han Dios ha pagsingba.—Sepania 3:9; Isaias 2:2-4.

An mga Saksi ni Jehova nag-aaghat ha imo nga bumisita ha Kingdom Hall nga hirani ha iyo lugar basi imo personal nga makita an ira waray kapariho nga kamurayawan ngan pagkaurosa.—Salmo 133:1.