Han natawo ako, an akon mga kag-anak may gutiay nga uma ha baryo han Galicia, ha norte-weste han Espanya. Ikaupat ako ha walo nga anak. Malipayon an amon pamilya. Hadto nga panahon ha Espanya, usa nga membro han haros kada pamilya an nasulod ha seminaryo o kombento. Ha amon pamilya tulo kami nga nagbuhat hito.

Han 13 anyos ako, sumunod ako ha akon magurang ha kombento ha Madrid. Diri makisangkayon an mga tawo didto. Puro la kami surundon, pangadi, ngan pagpuasa. Aga-aga pa la, nakadto na kami ha kapilya basi mamalandong, kondi agsob blangko an akon hunahuna. Katapos, nanganganta kami hin mga himno ngan natambong hin Misa—ha Latin nga pinulongan. Waray gud ako hinsabtan, ngan inabat ko nga hirayo an Dios ha akon. Natatapos an akon adlaw nga waray nakakaistorya. Bisan kon nagkakatapo kami han akon bugto, haros “Ave Maria purisima” la an amon nasisiring. Tunga la hin oras katapos han pangaon an igintutugot ha amon nga mag-istorya. Iba gud ito ha amon malipayon nga pamilya! Namimingaw ako salit agsob ako magtangis.

Bisan kon baga hin diri ako duok ha Dios, nagmadre ako ha edad nga 17. Ginhimo ko la an ginlalaoman ha akon. Kondi waray pag-iha, nagtikang ako magruhaduha kon tinawag gud ba ako han Dios. An mga madre pirme nasiring nga adton nagruruhaduha mahingangadto ha impyerno! Pero waray la gihap mawara an akon pagruhaduha. Maaram ako nga waray ibulag ni Jesu-Kristo an iya kalugaringon. Lugod, sagipo hiya ha pagpanutdo ngan pagbulig ha iba. (Mateo 4:23-25) Pag-abot ko hin 20 anyos, diri ko na karuyag magmadre. Nahipausa ako nga an madre superyora nagsiring nga kon nagruruhaduha ako, mas maopay nga bumaya dayon ako. Siguro nahadlok hiya nga maimpluwensyahan ko an iba. Katapos inuli ako.

Hinsabtan gud ako han akon mga kag-anak. Kondi tungod kay waray trabaho ha amon baryo, kinadto ako ha akon manghod  ha Alemanya. Membro hiya hin Komunista nga grupo han mga Katsila. Komportable ako ha pakig-upod ha mga nakikig-away para ha katungod han mga nagtatrabaho ngan han kababayin-an. Salit inapi ako ngan nag-asawa hin usa ha ira. Para ha akon, may nabubuhat ako nga maopay kay nananaltag ako hin barasahon mahitungod han Komunismo ngan naapi ha mga rali.

Pero ha urhi, nawarayan na liwat ako gana. Nahunahuna ko nga maopay la magyinakan an mga Komunista, pero waray buhat. Han 1971, nagduro an akon kawaray-gana han ginsunog han pipira nga batan-on han amon grupo an Konsulada han Espanya ha Frankfurt sugad nga protesta ha kawaray-hustisya han diktador nga pagmando han Espanya. Pero para ha akon, sayop ito nga paagi ha pagpahayag hin kasina.

Han manganak ako han akon suhag, ginsidngan ko an akon bana nga diri na ako matambong ha miting. Nasubo gud ako kay waray ko sangkay an binisita ha akon ngan ha akon anak. Nahunahuna ko kon ano an katuyoan han kinabuhi. May kapulsanan gud ba an pangalimbasog nga pauswagon an sosiedad?

Han 1976, may mag-asawa nga Saksi ni Jehova nga Katsila nga binisita ha akon. Nagtanyag hira hin barasahon nga basado ha Biblia nga akon ginkarawat. Ha ira pagbalik, ginpauranan ko hira hin pakiana mahitungod ha pag-antos, pagkadiri-patas, ngan kawaray-hustisya. Nahipausa ako nga ira gin-gamit an Biblia ha pagbaton han ngatanan ko nga pakiana! Kinarawat dayon ako hin pag-aram ha Biblia.

Ha tinikangan, interesado la ako mahibaro. Pero nabag-o ito han nagtikang kami nga mag-asawa tumambong ha katirok han mga Saksi ni Jehova ha Kingdom Hall. Hito nga panahon, duha an amon anak. Kon katirok, ginkukuha kami han mga Saksi ngan ginbubuligan pagbantay han amon mga anak. Tungod hito, nagin duok ako ha ira.

Bisan pa hito, may kalabotan ha relihiyon, nagruruhaduha la gihap ako. Salit nagdesisyon ako pagbisita ha akon pamilya ha Espanya. Nangalimbasog an akon batâ nga padi nga paundangon ako ha pag-aram han Biblia. Pero daku an naibulig han mga Saksi didto. Ira ginbaton an akon mga pakiana gamit an Biblia, sugad la han ginbuhat han mga Saksi ha Alemanya. Nagdesisyon ako nga ipadayon an akon pag-aram pagbalik ko ha Alemanya bisan kon inundang pag-aram an akon bana. Han 1978, nabawtismohan ako sugad nga Saksi ni Jehova.

Tungod han husto nga kahibaro ha kamatuoran ha Biblia, nagkaada matin-aw nga katuyoan ngan direksyon an akon kinabuhi. Pananglitan, an 1 Pedro 3:1-4 nag-aaghat ha mga asawa nga “magpasakop” ha ira bana “nga may daku nga respeto” ngan kultibaron an “malumo nga disposisyon, nga presyoso gud ha pagkita han Dios.” Ini nga mga prinsipyo nakabulig ha akon ha pagtuman han akon papel sugad nga asawa ngan iroy.

Mga 35 ka tuig na ako nga Saksi. Nalilipay ako pag-alagad ha Dios kaupod han akon mga kabugtoan ha pagtoo ha bug-os nga kalibotan, ngan han upat ha lima ko nga mga anak.