Ha naglabay nga 30 ka tuig, damu an naghunahuna nga marig-on an relasyon han iba-iba nga nasud ngan nagtitikaopay pa ngani. Pero, an bag-o pa la nga mga panhitabo nagpapakita nga posible diri ito tinuod.

•   “Damu an nababaraka nga posible makaapekto an girra ha Gaza ha kahigrani nga mga nasud tungod kay an Israel ngan Hezbollah nagtikang pag-away ha border han Lebanon.”—Reuters, Enero 6, 2024.

•   “An mga grupo nga kontrolado han Iran nag-atake ha iba-iba nga lugar, ngan an Iran tigda nga naghimo utro hin bag-o nga mga nuklear nga armas. Dugang pa, kaalyado na yana han Iran an Russia ngan China. Ini ngatanan nagpapakita hin bag-o nga tarhog ha western nga mga nasud.”—The New York Times, Enero 7, 2024.

•   “An mga pag-atake han Russia padayon nga nagriresulta hin duro nga kadaot ha iba-iba nga bahin han Ukraine.”—UN News, Enero 11, 2024.

•   “An nag-uuswag nga ekonomiya ngan pwersa militar han China, an paghingyap han Taiwan nga magin independente nga nasud, ngan an tensyon han China ngan U.S puydi magin hinungdan han tigda nga pagkasaramok.”—The Japan Times, Enero 9, 2024.

 May ginsisiring ba an Biblia parte ha diri maopay nga sitwasyon nga nakikita naton yana ha kalibotan? Magriresulta ba ito hin girra ha kalibotan?

 Waray igtagna han Biblia an bisan ano nga espisipiko nga girra nga nakikita naton yana. Kondi, igintagna hito an kalyap nga pakiggirra nga komon na gud ha aton panahon ngan nagkukuha “han kamurayawan ha tuna.”—Pahayag 6:4.

 An libro han Daniel nagtagna nga “ha panahon han kataposan,” an nakikigkompetensya nga mga gahum han kalibotan “makikigdusoay,” o makikig-away ha usa kag usa basi magin pinakagamhanan. Ito nga pakig-away mag-uupod hin pagpakita hin daku nga pwersa militar ngan paggasto hin damu nga mga “bahandi,” o kwarta.—Daniel 11:40, 42, 43.

 An Biblia nagsusumat nga an sitwasyon han kalibotan mas magtitikagrabe pa antes ito magtikaopay. Igintagna ni Jesus nga “magkakaada daku nga kasakitan nga waray pa mahitabo tikang ha tinikangan han kalibotan.” (Mateo 24:21) Ito nga “daku nga kasakitan” magtutugway ha girra nga gintatawag nga Armagedon, nga ginhuhulagway sugad nga “[girra] ha daku nga adlaw han Dios nga Makagarahum-ha-ngatanan.”—Pahayag 16:14, 16.

 Pero an Armagedon diri magbubungkag, kondi magtatalwas ha katawohan. Pinaagi hito nga girra, tatapuson han Dios an pagmando han tawo, nga nagin hinungdan han damu nga nakakadaot nga girra. Basi mahibaroan kon paonan-o an Armagedon maghahatag hin nagpapadayon nga kamurayawan, basaha an masunod nga mga artikulo:

•   “Ano an Girra han Armagedon?”

•   “An Armagedon Maopay nga Sumat!”