Han 2017, 12 nga Saksi an nagbiyahe sakay hin lantsa tikang ha Mosquito (Miskito) Coast nga rehiyon han Nicaragua. Sturi Yamni an ngaran han ira lantsa. An usa nga tripulante nga an ngaran hi Stephen nagsiring, “Karuyag namon parig-unon an gutiay nga grupo hin mga Saksi nga naukoy ha usa nga hirayo nga lugar ngan buligan hira nga maisangyaw an maopay nga sumat ha ira daku hinduro nga teritoryo.”

 Gintikangan han 12 nga Saksi an ira 200 ka kilometro nga pagbiyahe tikang ha Pearl Lagoon ngadto ha Río Grande de Matagalpa. Diri hira maaram nga an ngaran han ira lantsa, nga an karuyag sidngon “Maopay nga Sumat” ha Miskito nga yinaknan, magkakaada espesyal nga kahulogan ha mga tawo nga naukoy ha ligid han salog. Katapos hin mga 12 ka oras nga pagbiyahe, diri pa upod an pagpalabay han gab-i ha usa nga lugar, nakaabot an mga Saksi ha ira destinasyon—an komunidad han La Cruz de Río Grande. Malipayon nga gin-welcome han unom nga Saksi didto an ira espirituwal nga kabugtoan.

 Hito nga gab-i nagkaada kalamidad. Tungod han makusog nga bagyo, nagkaada grabe nga bunok ha gintitikangan han katubigan han Río Grande de Matagalpa. Pipira la ka oras, naglapwas an tubig han salog ngan nagpadayon paghitaas ha sulod hin duha ka adlaw. Ginbaha an Kingdom Hall ngan an damu nga balay ha La Cruz. Ginbuligan han nabisita nga kabugtoan an mga taga-didto nga mag-ebakwit. An kadam-an ha ira nagpabilin hin duha ka gab-i ha duha ka andana nga balay han usa nga Saksi.

 Ha ikatulo nga gab-i, kinadto an meyor han La Cruz ha nabisita nga mga Saksi basi mangaro hin bulig. Tungod kay an Sturi Yamni la an marig-on nga lantsa nga puydi gamiton ha naglapwas nga salog, karuyag han meyor nga idul-ong han kabugtoan an usa nga grupo hin mga relief worker ha iba pa nga komunidad nga naapektohan han baha. Malipayon nga binulig an mga Saksi.

 Kinabuwasan han aga, tulo nga Saksi an linarga upod han relief team. “Hito nga panahon, makusog na gud an sulog han salog,” siring ni Stephen. “Naaanod an nagabot nga dagku nga kahoy, may naporma nga dagku nga liro, ngan sobra 18 ka kilometro kada oras an kalaksi han pag-agos han salog.” Bisan pa han magkuri nga sitwasyon, nakaabot an lantsa ha tulo nga komunidad.

 Gin-gamit han tulo nga Saksi an higayon basi makahatag han ginkikinahanglan gud nga pagliaw ha mga taga-baryo. Nanaltag liwat an mga Saksi han 2017 nga isyu han Pagpamata! nga an ulohan haom ha panhitabo, “Kon May Umabot nga Kalamidad—Paonan-o Makakatalwas?”

 An mga residente ha mga komunidad ha ligid han salog nagpasalamat gud han praktikal ngan espirituwal nga bulig nga iginhatag han mga Saksi. “Andam hira bumulig ha magkuri nga kahimtang,” siring han pipira nga taga-baryo. Siring liwat han iba, “May-ada hira tinuod nga gugma ha ira igkasi-tawo.” Katapos makita an pangalimbasog han mga Saksi nga buligan an ira mga igkasi-magsiringba ngan an iba, damu nga taga-baryo an mas andam na mamati ha nakakaliaw nga mensahe han Biblia.