Hi Daiane usa han mga Saksi ni Jehova ngan bug-os-panahon nga ebanghelisador ha Brazil. Usa ka adlaw, han nagsasangyaw hiya han mensahe han Biblia pinaagi hin telepono, nakaistorya niya an usa nga batan-on nga mag-asawa nga nagpakita hin interes. Ginsidngan nira hi Daiane nga mabalhin hira ha hirayo nga baryo nga waray koryente o Internet. Dugang pa, waray mga Saksi ni Jehova nga naukoy didto. Basi maipadayon an ira mga paghisgot parte ha Biblia, an mag-asawa naghatag kan Daiane han numero han panpubliko nga telepono hito nga baryo, ngan hira nga tulo nagkauyon han adlaw ngan oras kon san-o hira mag-iistorya.

 Ha ira ginkauyonan nga oras, gintawagan ni Daiane an panpubliko nga telepono ngan binaton an mag-asawa! Han sumunod nga duha ka semana, tulo ka beses pa nga naghisgot hira parte ha Biblia kaupod ni Daiane pinaagi ha telepono.

 Pero katapos hito, waray na batona han mag-asawa an iya mga tawag. Bisan pa hito, waray manluya hi Daiane ngan padayon nga gintawagan niya an panpubliko nga telepono tulo ka beses ha usa ka semana, ngan ginhisgotan niya an Biblia ha tawo nga nabaton ha iya tawag. Sugad nga resulta, nakagtikang hi Daiane hin pipira nga pag-aram ha Biblia ha mga tawo hito nga baryo.

 Usa ka adlaw, han hi Daiane ngan an iya bana nagdudumara hin pag-aram ha Biblia ha usa nga batan-on nga lalaki pinaagi ha panpubliko nga telepono, usa nga lider han singbahan hito nga baryo an nakabati han ira paghisgot. Tinindog hiya sapit han estudyante ha Biblia basi mabatian hin maopay an ira pag-istorya. Katapos, naghangyo an lider han singbahan nga makiistorya kan Daiane ngan ha iya bana. Naruyagan gud niya an iya nabatian salit karuyag niya nga magpa-Bible study liwat!

 Ha urhi, hi Daiane ngan an iya bana nagdudumara hin unom nga pag-aram ha Biblia pinaagi hin telepono dida hito nga hirayo nga baryo, upod na an usa nga lider han singbahan. An iba nga estudyante nakatambong na ha Kristiano nga mga katirok pinaagi ha pag-tie-in ha telepono, gamit an amo gihapon nga panpubliko nga telepono. An usa ha ira naghimo pa ngani hin lingkoran basi may malingkoran an mga estudyante ha ira pag-aram.

 Mapasalamaton hi Daiane ngan an iya bana nga nagkaada hira han oportunidad nga maipasarang an mensahe han Ginhadian dinhi hini nga hirayo nga baryo. Hi Daiane nagsiring, “Mahimo hikayon ni Jehova nga makaabot ha bisan hin-o an maopay nga sumat, bisan pa kon aadto hiya naukoy ha hirayo nga lugar.”