An moderno nga organisasyon han mga Saksi ni Jehova nagtikang ha kataposan han ika-19 ka siglo. Hito nga panahon, an usa nga gutiay nga grupo han mga estudyante han Biblia nga naukoy hirani ha Pittsburgh, Pennsylvania, ha United States, nagtikang hin sistematiko nga pag-usisa han Biblia. Ira iginkompara an mga doktrina nga igintutdo han mga singbahan ha kon ano an igintututdo gud han Biblia. An ira nahibaroan iginpublikar nira pinaagi hin mga libro, dyaryo, ngan magasin nga gintatawag yana nga An Barantayan—Nagsasamwak han Ginhadian ni Jehova.

 Kaupod hi Charles Taze Russell hito nga grupo han maduruto nga mga estudyante han Biblia. Bisan kon hito nga panahon hi Russell an nanguna han buruhaton nga pagpanutdo parte ha Biblia ngan an siyahan nga editor han An Barantayan, diri hiya an founder hin usa nga bag-o nga relihiyon. Karuyag ni Russell ngan han iba pa nga estudyante han Biblia, nga ngaran han ira grupo hadto, nga ipahibaro ha mga tawo an katutdoan ni Jesu-Kristo ngan sundon an mga ginbuhat han siyahan-siglo nga Kristiano nga kongregasyon. Tungod kay hi Jesus an Founder han Kristianidad, hiya an ginkikilala namon nga founder han amon organisasyon.—Colosas 1:18-20.