’E fakapa’aga tamatou gaue faifakamafola ’aki te ’u me’a ’ofa ’ae ’e foaki e te kau Fakamo’oni ’a Sehova. ’E mole fai he tae falā ’i ’amatou fono, pea ’e mole fakama’ua mai ke matou foaki te vahe hogofulu ’o tomatou totogi. (Mateo 10:7, 8) Ka’e, ’e ma’u ’i ’amatou Fale Fono te ’u kesi me’a ’ofa ma’a natou ’ae ’e fia foaki honatou me’a ’ofa.

’E mole hamatou kau takitaki lotu ’e tonu ke totogi. Pea ’e mole totogi tamatou gaue faikakamafola ’i te ’u ’api pea ’e fakafaigafua te teuteu’i ’o ’amatou Fale Fono. Ko te ’u me’a ’ofa ’ae ’e momoli ki te ’u filiale ’a te kau Fakamo’oni ’a Sehova ’e faka’aoga’i mo’o tokoni ki te ’u fenua ’ae ne’e hoko ai he tu’utamaki fakanatula, mo’o lagolago ki ’amatou kau misionea pea mo te ’u taupau fe’olo’aki, mo’o totogi te laga ’o ’amatou Fale Fono ’i te ’u fenua masisiva, pea mo ta mo momoli te ’u Tohi-Tapu pea mo te ’u tohi Fakatohi-tapu.

’E feala ke tou tahi foaki he me’a ’ofa mo’o lagolago ki te totogi ’o te ’u ma’ua ’o te kokelekasio pea mo ’ae ’o te gaue fakamalamanei. ’E fakaha ki te kokelekasio ’i te mahina fuli te lahi ’o te falā ’ae ne’e ma’u.