Mai te ʼaho 6 ki te ʼaho 16 ʼo Sunio 2013, ko te ʼu lauʼi miliona hahaʼi mai te ʼu potu fuli ʼo te kele neʼe natou fakatahitahi ki te ʼuafu ʼo Rouen, ʼi te potu noleto ʼo Falani, he neʼe ʼomai ki ai te ʼu foʼi vaka ʼae ʼe lalahi pea mo matalelei ʼaupito i te kele. ʼE higoa te fakatahi ʼaia ko te Armada.

Hili tanatou folau ia kilometa ʼe 120 ʼi te vai tafe ko te Seine, ʼi Normandie, neʼe tau leva te ʼu foʼi vaka la lalahi pea mo matalelei ʼi te ʼuafu ʼae ʼe kilometa fitu pea neʼe teuteuʼi ki te faʼahi ʼaia. Lolotoga ʼaho ʼe hogofulu, neʼe maʼu e te hahaʼi te faigamalie ke natou kake pea mo mamata ki te ʼu foʼi vaka ʼe 45.

Kotea ʼae neʼe ina uga ai te hahaʼi taʼu kehekehe ke natou ʼomai ki te Armada? ʼE ui e te tagata ʼae neʼe ina fakatuʼutuʼu ia te ʼaho lahi ʼaia, ʼe foaki ʼi te fakatahi ʼaia, te Armada, te faigamalie ke “natou fakaovi ki te ʼu foʼi vaka lalahi ʼaia, ʼae ʼe tou moemisi kiai.” Koia, maʼa te tokolahi, tupulaga pea mo matutuʼa, ʼi tanatou sisio ki te ʼu foʼi vaka lalahi ʼaia ʼe natou manatu ai ki te ʼu faifolau mamaʼo pea mo te ʼateaina.

Neʼe toe maʼu e te ʼu lauʼi afe hahaʼi ʼae neʼe ʼomai te faigamalie ke natou logo ki he tahi age faʼahiga ʼateaina, ʼae ʼe foaki e te ʼu moʼoni ʼi te Tohi-Tapu. (Soane 8:31, 32) ʼI tanatou foli te kolo ʼafeā mo matalelei ʼo Rouen pea mo ʼana kiʼi ala fonu ʼi te hahaʼi, neʼe natou sisio ki te ʼu laupapa ʼa te kau Fakamoʼoni ʼa Sehova. Ka neʼe fakaovi age he tahi peʼe ko he kau vaka ki tanatou laupapa ʼaia, neʼe fakaafe natou ke natou toʼo noa hanatou tohi Fakatohi-tapu. Tokolahi neʼe natou fia lau te alatike ʼo Te Tule Leʼo ko tona kupu tafitō: “Ko ʼAfea ʼAe Ka Pulihi Ai ʼi Te Malamanei Te ʼu Manatu Fakapalatahi?” pea neʼe fakaafe ai natou ke natou ʼomai ʼo fakalogo ki te akonaki ʼe fakatafito ki te Tohi-Tapu ʼe fai ʼi te Fakafalani, mo te Fakapilitania pea mo te Fakasepania.

Neʼe fakaha ʼe ʼihi tanatou loto fakafetaʼi ʼo ʼuhiga mo te faʼahi ʼaia. Neʼe punamaʼuli te tagata ʼi tana sio ki te tutuʼu ʼi te ala ʼa te kau Fakamoʼoni mo te laupapa. Neʼe ina ui fenei: “ʼE au fiafia ʼi taku sio atu kia koutou ʼi te ʼu ala. ʼE lelei takotou fakaha feia takotou tui, logo la ʼe mole au tui ki ai.” Neʼe ui e te ʼu tagata kua matuʼatuʼa ki te ʼu tupulaga ʼe toko lua neʼe nā tutuʼu ovi ki te laupapa, ʼe “ko he meʼa lelei tanā fiameʼameʼa ʼi tona ʼuhiga Fakamoʼoni ʼa Sehova.”