ʼI ʼAukusito 2013, neʼe fakaʼosi e te kau Fakamoʼoni ʼa Sehova te laga ʼo tanatou Fale Fono fakamuli, ʼo natou laga ai Fale Fono ʼe afe. Neʼe lava te fakatuʼutuʼu ʼaia ʼaki te polokalama laga fale makehe. Ohage pe ko te tahi atu fenua, ʼe mole maʼu e te ʼu kokelekasio ʼi Filipine he falā pea ʼe mole natou popoto ʼi te laga ʼo hanatou Fale Fono. Neʼe ʼaoga ke tokoni age kia natou. Lolotoga ni taʼu, neʼe fono ʼihi ʼi te ʼu loto fale pe ʼe ʼi he ʼu fale neʼe faʼu ʼaki he ʼu kauʼi kafo.

Ohage ko te tahi ʼu fenua, neʼe tuputupu vave te kaugā malie ʼa te kau Fakamoʼoni ʼa Sehova ʼi Filipine, pea mo te ʼaoga ʼae ke laga he tahi age ʼu Fale Fono. Koia, ʼi te taʼu 1999, neʼe fakatuʼu e te Kolesi Pule ʼa te kau Fakamoʼoni ʼa Sehova he polokalama laga ʼo te ʼu Fale Fono ʼi te ʼu fenua masisiva. ʼAki te fakatuʼutuʼu ʼaia, ʼe foaki e te kau Fakamoʼoni ʼo te fenua te ʼu meʼa ʼofa ʼae ʼe natou lavaʼi, pea hilifaki leva ki ai te falā mai te tahi age ʼu fenua. ʼE fakatuʼutuʼu fakakutuga leva te kau gaue laga fale, moʼo tokoni ki te ʼu kokelekasio ke natou laga tanatou Fale Fono. ʼI Novepeli 2001, neʼe fakahoko ʼi Filipine te polokalama ʼaia.

ʼE kau ia Iluminado ki te kokelekasio ʼo Marilao, ʼi Bulacan, ʼae neʼe laga ai te Fale Fono fakamuli, ʼo fakakatoa ai te ʼu Fale Fono e afe. Neʼe ina ui fenei: “Neʼe au sio moʼoni ki te gaue fakatahi ʼa te fale tau tehina Fakakilisitiano. Neʼe lahi ʼaupito te hahaʼi gaue: tagata, mo fafine, tupulaga mo hahaʼi matutuʼa. Neʼe matou gaue fakatahi ʼi te laʼa. Logo la tamatou gaʼegagaʼe hili te gaue kinakina ʼi te ʼaho katoa, kaʼe neʼe ko he toe fiafia lahi tamatou sisio ki te ʼu meʼa ʼae neʼe matou fakahoko fakatahi.”

Neʼe toe punamaʼuli foki mo te hahaʼi ʼae ʼe mole ko he kau Fakamoʼoni ʼa Sehova ʼi te gaue kinakina ʼa te kau gaue. Neʼe ui fenei e te tagata ʼae ʼaʼana te kamio ʼae neʼe fetuku te ʼone pea mo te kilikili: “ʼE kotou hage ko he ʼu lo, he ʼe kotou ʼi te ʼu potu fuli pe! ʼE kotou fia tokoni fuli ki te gaue. Neʼe heʼeki au sio ki he meʼa feia.”

Neʼe fakaʼosi e te kau gaue te laga ʼo te Fale Fono ia vahaʼa ʼe ono, talu mai te temi ʼae neʼe fakatuʼu ai te ʼu kaupa. ʼI tanatou laga ʼaia te Fale Fono ʼi he kiʼi temi nounou pe, neʼe feala ke haga lagolago katoa e te ʼu tehina mo tuagaʼane ki te gaue maʼuhiga ʼae ko te fakamafola ia te logo lelei ʼo te Puleʼaga ʼo te ʼAtua.—Mateo 24:14.

Ko Ellen, ʼe toe kau mo ia ki te kokelekasio ʼaia, neʼe ina ui fenei: “Neʼe mole matou hao fuli ʼi tamatou Fale Fono ʼafeā, pea tokolahi neʼe heheka ʼi tuʼa. ʼE matalelei ʼosi tamatou Fale Fono foʼou pea mo lelei mo te ʼu hekaʼaga. Koia, ʼe matou maʼu tatau fuli te ʼu lelei mai te ako pea mo te fakalotomalohi ʼae ʼe foaki mai ʼi ʼamatou fono.”