ʼI te ʼaho 7 ʼo Oketopeli 2013, neʼe faʼu e te kau Fakamoʼoni ʼa Sehova te polokalama ʼae ʼe higoa ko te JW Library, ko he polokalama ʼe feala ai ke ke lau pea mo ako te Tohi-Tapu ʼi tau kiʼi telefoni toʼotoʼo. ʼI te polokalama ʼaia ʼae ʼe mole totogi, ʼe feala ke ke maʼu te ʼu Tohi-Tapu Fakapilitania ʼe ono, ohage ko te Bible du roi Jacques pea mo te Tohi-Tapu Les Saintes Ecritures. Traduction du Monde Nouveau 2013 ʼae neʼe toe vakaʼi. a

Ko te ʼu hahaʼi ʼe toko lauʼi miliona ʼe natou fakaʼaogaʼi te ʼu kiʼi telefoni toʼotoʼo pea mo te ʼu tablettes ki tanatou gaue pe ʼe moʼo felogoi mo ʼihi atu. Kua feala pe foki ke natou maʼu he ʼu tohi ke natou lau pea mo ako te Tohi-Tapu ʼi tatatou tuʼasila jw.org. Koia, he ko ʼe neʼe faʼu te JW Library?

ʼUluaki, ka kua ʼosi toʼo e he tahi mai te Neti ia te polokalama ʼaia, ʼe mole kei ʼaoga ke ina maʼu te Neti ke feala hona fakaʼaogaʼi. Lua, neʼe fai tafitō moʼo tokoni kia ia ʼae ʼe lau ke faigafua age tana maʼu te ʼu vaega pea mo ako fakalelei age te Tohi-Tapu. ʼO feafeaʼi?

Ka avahi e he tahi te polokalama JW Library, ʼe ha te lisi ʼo te ʼu tohi ʼo te Tohi-Tapu. Ka filifili he tohi ʼo te Tohi-Tapu, ʼe ha leva te ʼu kapite ʼo te tohi ʼaia. ʼE feala ai ke maʼu fakavilivili he vaega pe ʼe ko he koga Tohi-Tapu. Koʼeni te tahi ʼu faʼahi ʼe ʼaoga ki te ako ʼo te Tohi-Tapu ʼe feala ke tou maʼu ʼi te polokalama ʼaia:

• Te ʼu kiʼi nota ʼe fakaha ai te tahi age fakaliliu ʼo te kupu pe ʼe ko te kupusiga palalau, pea mo te ʼu vaega ʼi muʼa pe ʼe ki muli mai ʼo te vaega

• Te tahi age ʼu vaega ʼe tatau ai te ʼu manatu

• ʼE feala ke fai he fekumi ʼo ʼuhiga mo te ʼu lakaga fuli ʼae ʼe ha ai he kupu pe ʼe ko he falasisi

• He manatu fakanounou ʼi te kamata ʼo te ʼu tohi fuli ʼo te Tohi-Tapu

• He fakamatala ʼo ʼuhiga mo te tagata ʼae neʼe ina tohi te tohi, mo te koga meʼa ʼae neʼe ina tohi ai pea mo te taʼu, ʼo feia mo te loaloaga ʼo tana tohi ʼaia

• Te ʼu mape pea mo te ʼu pakī ʼe lanu matalelei

Ohage pe ko te ʼu tohi fuli ʼa te kau Fakamoʼoni ʼa Sehova, ʼe mole totogi te polokalama JW Library. Ko te polokalama ʼaia ʼe mole totogi pea neʼe faʼu ʼaki pe te ʼu meʼa ʼofa. Kua tuʼa miliona tupu te toʼo mai te Neti ia te polokalama ʼaia. (2 Kolonito 9:7) He koʼe ʼe mole ke vakaʼi muʼa te polokalama ʼaia ʼo ke maʼu ai te ʼu lelei ʼo te tanakiʼaga tohi ʼaia ʼae ʼe feala ke ke feʼaveʼaki?