ʼI te ʼu mahina ʼae neʼe hoa mai ki ai, neʼe lotomamahi ia Hitoshi ki tana faiga ʼae ke ina maʼu hana gaue. Ohage la, lolotoga tana talaga gaue, neʼe fakaha e Hitoshi ʼe mole fia kau ia ki he gaue kakā. Neʼe ui age e te tagata ʼae neʼe talaga mo ia ki he gaue, “ ʼE au keheʼia tau faʼahiga manatu.” Neʼe fakalotomalohiʼi Hitoshi e tona famili mo ʼona kaumeʼa ke ina taupau maʼu tana fakatotonu ʼae ke agafakahagatonu, kaʼe neʼe kua kamata lotolotolua ia. Ohage la, neʼe ina ui, “Neʼe au feʼekeʼaki pe neʼe lelei ke au agafakahagatonu ʼuhi ko taku tui.”

Ko te aluʼaga ʼae neʼe hoko kia Hitoshi ʼe ina fakamanatuʼi mai, ko te agafakahagatonu ʼe mole maʼuhiga ki te hahaʼi. Koia, ʼe ui e ʼihi ko te agafakahagatonu ʼe fakatupu kovi ki te haʼele lelei ʼo te ʼu matani gaue. Neʼe ui fenei e te fafine ʼe gaue ʼi Afelika Saute: “Ko te hahaʼi ʼi ʼoku tafaʼaki ʼe agafakakakā, pea ʼi ʼihi temi ʼe lahi ʼaupito te ʼu fakaneke ʼe tau mo au.”

Ko te tahi faʼahiga agafakakakā kua mafola ia ʼaho nei, ko te gutu loi. Kua hili ki ai ni taʼu, neʼe fai te sivi e Robert S. Feldman, ko te toketa psychologue ʼi te Univelesite ʼo Massachusetts ʼi Amherst. Neʼe ina maʼu, ia minuta pe ʼe hogofulu ko te toko 60 ki te teau ʼo te hahaʼi kua loi ʼi ʼanatou faipalalau. Neʼe mole matou ʼamanaki ko te gutu loi ʼe ko he agamahani ʼa te hahaʼi ʼi te ʼaho fuli. ʼE mata faikehe foki te iita ʼa te tokolahi ki tonatou lohiʼi, kaʼe ko he agamahani kua teitei fai pe e te hahaʼi fuli.

He koʼe kua mafola ia ʼaho nei, te loi, mo te kaihaʼa pea mo ʼihi atu faʼahiga agafakakakā? Kua aʼu kifea te agafakakakā ʼa te tagata? Pea tafitō, ʼe feafeaʼi tatatou tekeʼi te ʼu agafakakakā ʼaia?