Ko Te Tohi-Tapu ʼe Ko Te Folafola ʼe Haʼu Moʼoni Mai Te ʼAtua

KOTEĀ te fakaʼuhiga moʼoni ʼo te ʼui ʼaē ʼa te ʼapositolo ko Paulo, ko te Tohi-Tapu ʼe “haʼu mai te ʼAtua”? (2 Timoteo 3:16) Ko Paulo, ʼi tana faitohi ʼi te lea Fakakeleka, neʼe ina fakaʼaogaʼi ia te kupu ko tona fakaʼuhiga “neʼe pupuhi e te ʼAtua.” Neʼe fia ʼui e Paulo ko te ʼAtua ʼaki tona laumālie māʼoniʼoni, neʼe ina takitaki ia te ʼu tagata faitohi ʼo te Tohi-Tapu ke natou tohi pē ia tana ʼu manatu.

Ohagē ko tona ʼui e te ʼapositolo ko Petelo, ko te ʼu tagata faitohi ʼo te Tohi-Tapu ʼaia neʼe natou “palalau . . . ʼaki te  fakatotonu ʼa te ʼAtua, he neʼe taki nātou e te laumālie māʼoniʼoni.” (2 Petelo 1:21) Koia, neʼe feala ai ke toe ʼui e te ʼapositolo ko Paulo ko te ʼu tohi ʼo te Tohi-Tapu ʼe ko “te ʼu tohi taputapu, ʼaē ʼe feala ke natou fakaliliu koutou ke kotou popoto ki te fakamaʼuli, ʼaki te tui ʼaē ʼo ʼuhiga mo Kilisito Sesu.”—2 Timoteo 3:15.

Tokolahi te hahaʼi ʼe natou fakafihiʼi mālohi ia te ʼui ʼaē, ʼe ko te ʼAtua ʼaē neʼe ina tohi ia te Tohi-Tapu. Ko te hahaʼi fakafifihi ʼaia, ohagē ko tona ʼui e te tagata fai ʼalekeolosia ko Charles Marston, ʼe natou “fehihiʼa ki te fakamatala ʼo te Tohi-Tapu,” pea ʼe natou tauʼi mālohi ia te moʼoni ʼo te Tohi-Tapu. Ko ʼihi neʼe mole natou tokagaʼi ia te Tohi-Tapu, heʼe ʼi tanatou ia manatu ʼe ko “he tānakiʼaga ʼāfea ʼo he ʼu fāgana pea mo he ʼu hisitolia maʼa te ʼu kihiʼi tamaliki.”

Kotou Tokagaʼi Ia Te ʼu Fakamoʼoni

ʼE feala koa ke tou falala ki te Tohi-Tapu? ʼE maʼuhiga ke kotou fai he tonu ʼe lelei ʼo ʼuhiga mo te faʼahi ʼaia. Koteā tona tupuʼaga? Koteʼuhi, kapau ʼe palalau mai te ʼAtua ʼi te Tohi-Tapu, kae ʼe mole tou tokagaʼi, pea ʼe ko he aga ʼe mole fakapotopoto, pea ʼe feala ke fua kovi kiā tātou. ʼE mole feala anai ki te Tohi-Tapu ke mālohi ia tana takitaki ʼo takotou ʼu gāue pea mo fakatafito kiai ia te ʼu akonaki ʼaē ʼe kotou tui kiai, mo kapau ʼe kotou fakaʼuhiga ia te Tohi-Tapu ohagē pē ko he folafola ʼa he tagata, kae mole ko te Folafola ʼa te ʼAtua.—1 Tesalonika 2:13.

Koteā ʼaē ʼe feala ke kotou fai moʼo ʼiloʼi ai peʼe tonu ke kotou falala ki te Tohi-Tapu? Ohagē lā, ʼe feafeaʼi hakotou ʼiloʼi peʼe kotou falala anai peʼe kailoa ki te hahaʼi ʼaē ʼe kotou felāveʼi mo nātou? ʼE ʼi ai te faʼahi kua tou ʼiloʼi lelei pē. ʼE faigataʼa hakotou falala moʼoni ki he tahi ʼe mole kotou ʼiloʼi lelei. ʼE hoki kotou ʼiloʼi lelei pē he tahi, pea ʼaki te temi ʼe kotou ʼiloʼi ai peʼe agatonu moʼoni pea mo tāu mo feʼauga ke kotou falala ki ai. ʼE kotou lava ʼiloʼi ia te Tohi-Tapu mo kapau ʼe kotou fai fēia. ʼAua naʼa kotou tali fakavilivili he ʼu manatu fakaʼapē lua peʼe ko he ʼu palalau ʼe mole hona ʼu fakamoʼoni ʼe feala ai ke mole kei kotou falala ki te Tohi-Tapu. Kotou toʼo he temi moʼo vakaʼi te ʼu fakamoʼoni ʼaē ʼe lagolago ki te ʼui ʼaē ko te Tohi-Tapu ʼe “haʼu mai te ʼAtua.”

 Te ʼu Fakafifihi Mai Iā Nātou ʼAē ʼe ʼUi Ko “He ʼu Kaumeʼa” ʼo Te Tohi-Tapu

ʼAua naʼa kotou lotovaivai mo kapau ko ʼihi, māʼia mo nātou ʼaē ʼe natou ʼui ʼe natou “kaumeʼa” mo te Tohi-Tapu, ʼe natou fakafihiʼi ia te moʼoni ʼo te Tohi-Tapu pea mo te ʼui ʼaē ʼe tāu mo te Tohi-Tapu ke tou falala kiai. Iā ʼaho nei, tokolahi ʼi te hahaʼi fakamahino Tohi-Tapu, logolā tanatou ʼui ʼaē ʼe natou Kilisitiano, kae ohagē ko tona ʼui ʼi te tohi New Dictionary of Theology: “ ʼE natou palalau anai ʼo ʼuhiga mo te Tohi-Tapu ohagē ko he tohi ʼa he tagata.”

Tokolahi te hahaʼi fakamahino Tohi-Tapu ʼe natou fakafihiʼi ia te ʼu tagata ʼaē neʼe natou tohi ia te ʼu tohi ʼo te Tohi-Tapu. Ohagē lā, ʼe ʼui e ʼihi ko te polofetā ko Isaia neʼe mole ina tohi ia te tohi ʼo Isaia. ʼE natou ʼui ko te tohi ʼaia ʼo te Tohi-Tapu neʼe tohi ia fualoa ki muli age ʼo te temi ʼo Isaia. ʼI te tohi Concise Bible Commentary, ʼaē neʼe fai e te tagata ko Lowther Clarke, ʼe tala ai ko te tohi ‘neʼe tohi ia e te hahaʼi tokolahi lolotoga ia te ʼu taʼiake kehekehe.’ Kae ʼaki te ʼu taʼi manatu ʼaia, ʼe natou meʼa noaʼi ia te fakamoʼoni tuʼa lahi ʼaē ʼa Sesu Kilisito pea mo tana ʼu tisipulo ko Isaia ʼaē neʼe ina fai ia te tohi ʼaia.—Mateo 3:3; 15:7; Luka 4:17; Soane 12:38-41; Loma 9:27, 29.

Ko te faʼahi ʼaē ʼe kovi age, heʼe ko te hahaʼi fakafifihi ʼo te Tohi-Tapu, ohagē ko te tagata fai fakamahino ko J. R. Dummelow, ʼe natou ʼui ko te ʼu lea fakapolofetā ʼaē ʼi te tohi ʼo Taniela “ ʼe ko he ʼu hisitolia ia neʼe kua hoko ʼi te temi ʼaē neʼe ina tohi ai pea ina fakamatala leva ia ʼe ko he lea fakapolofetā.” ʼAki tanatou ʼu palalau ʼaia, ʼe natou meʼa noaʼi ai te fakamoʼoni ʼaē neʼe fai e Sesu Kilisito totonu. Neʼe fai e Sesu te fakatokaga ʼo ʼuhiga mo te meʼa ʼaē ʼe ina higoaʼi ko “te meʼa fakalialia ʼaē ʼe ina fakatupu te maumau, ʼaia neʼe palalau kiai te polofetā ko Taniela, ʼe tuʼu ʼi he potu tapu.” (Mateo 24:15) ʼE fakapotopoto koa ki he Kilisitiano ke tui ko Sesu Kilisito ʼe lagolago anai ki he loi, ki he hisitolia ʼe ʼui ʼe ko he lea fakapolofetā, kae mole koia ia? Kailoa ia.

ʼE Maʼuhiga Koa Ke ʼIloʼi Pe Ko Ai ʼAē Neʼe Ina Tohi Te ʼu Tohi ʼo Te Tohi-Tapu?

ʼE lagi kotou feʼekeʼaki anai: “Kae ʼe maʼuhiga koa ke ʼiloʼi pe ko ai ʼaē neʼe ina tohi moʼoni te ʼu tohiʼo te Tohi-Tapu?” ʼEī, ʼe maʼuhiga ia te faʼahi ʼaia. ʼE kotou falala anai koa ki he pepa ʼe ʼui neʼe tohi kiai te finegalo fakamuli ʼo hokotou kaumeʼa, kae neʼe mole ko ia totonu ʼaē neʼe ina tohi? Kapau lā ʼe ʼui atu e ni hahaʼi popoto neʼe ko he pepa neʼe tohi e hona ʼu kaumeʼa tanatou ʼu manatu, heʼe kiā nātou neʼe ko te finegalo ʼaia ʼo tokotou kaumeʼa. ʼE kei maʼuhiga anai koa kiā koutou ia te pepa? ʼE feala anai koa ke kotou falala kātoa neʼe ko te finegalo moʼoni ʼaia ʼo tokotou kaumeʼa ʼaē ʼe tohi ʼi te pepa?

ʼE toe fēia mo te Tohi-Tapu. ʼE mole tou punamaʼuli ki te tokolahi ʼo te hahaʼi, māʼia mo nātou ʼaē ʼe natou ʼui ko he kau Kilisitiano, ʼe natou meʼa noaʼi ia te ʼu meʼa ʼaē ʼe ʼui ʼi te Tohi-Tapu, ʼo ʼuhiga mo te maʼuli fakahagatonu, mo te ʼu felāveʼi fakasino, pea mo te tahi atu ʼu faʼahi. Neʼe tuʼa fia takotou logo ki te ʼui fēnei ʼa te hahaʼi: “Oi, ʼe ko te ʼu palalau ʼo te Tauhi ʼĀfea!” Ohagē kiā nātou ʼe mole faʼa maʼuhiga ia. Pea ʼe natou palalau fēia logolā te ʼui ʼaē ʼa te ʼapositolo ko Paulo ko te koga ʼaē ʼe natou fakahigoa ko te Tauhi ʼĀfea, ʼe ko “te ʼu tohi taputapu” neʼe “haʼu mai te ʼAtua.”

ʼE lagi kotou ʼui anai: “ ʼE mole feala hakotou meʼa noaʼi ia te ʼu fakamoʼoni ʼa te hahaʼi popoto pea mo sivi Tohi-Tapu.” ʼE mahino ia! Ohagē lā, ʼe tou fakafetaʼi ki te hahaʼi sivi Tohi-Tapu agatonu ʼaē neʼe natou tokoni ke ʼiloʼi ia te ʼu ʼuluaki tohi ʼaē neʼe fai ʼo te Tohi-Tapu. ʼE mahino  ia, ko he ʼu kiʼi hala neʼe fai ʼi te tohi ʼo te Tohi-Tapu ʼuhi ko tona hiki tuʼa lahi ʼi te fakalaka ʼo te ʼu sēkulō. Kae kotou manatuʼi: ʼE kehekehe ʼaupitō ia te ʼiloʼi ʼaē ʼo te ʼu kiʼi hala neʼe fai ʼi te hiki ʼo te Tohi-Tapu pea mo te ʼui ʼaē ko te Tohi-Tapu kātoa ʼe ko he tohi neʼe haʼu mai te tagata.

Kotou Haga Tui Ki “Te ʼu Tohi Taputapu”

ʼI muʼa ʼo tana ʼui ko te Tohi-Tapu ʼe haʼu mai te ʼAtua, neʼe ʼui e Paulo kiā Timoteo pe koʼē neʼe maʼuhiga ia te fakamatala ʼaia neʼe haʼu mai te ʼAtua. Neʼe ina ʼui fēnei: “ ʼI te ʼu ʼaho fakamuli . . . ko te ʼu tagata agakovi pea mo te ʼu hahaʼi kākā ʼe natou tuputupu anai ki te kovi ʼaupitō, ʼo natou fakahēʼi pea mo natou hēʼia.” (2 Timoteo 3:1, 13) ʼI te temi ʼo Paulo, neʼe kua fakaʼaogaʼi e te ʼu ‘tagata popoto pea mo ʼatamai’ ia te ʼu ‘manatu fakaoloolo’ moʼo kākāʼi te hahaʼi pea mo fakavaivaiʼi tanatou tui ʼaē kiā Sesu Kilisito. (1 Kolonito 1:18,19; Kolose 2:4, 8) Moʼo puipui ia ia mai tanatou ʼu manatu, neʼe fakalotomālohiʼi e te ʼapositolo ko Paulo ia Timoteo, ke ‘hoko atu ʼi te ʼu meʼa ʼaē neʼe ina ako talu mai tana kei veliveli ʼaki ia te ʼu tohi taputapu’ ʼaē neʼe foaki e te ʼAtua.—2 Timoteo 3:14, 15.

ʼE toe maʼuhiga mo koutou ke kotou fai fēia ʼi te ʼu “ ʼaho fakamuli” ʼaenī. ʼAua naʼa kotou meʼa noaʼi ia te tuʼutāmaki ʼaē ʼo te kākāʼi ʼo tātou ʼaki te ʼu ‘manatu fakaoloolo’ ʼe fai e te ʼu hahaʼi ʼe popoto ʼaupitō. Kae ohagē ko te kau Kilisitiano ʼo te ʼuluaki sēkulō, kotou puipui ia koutou ʼo kotou falala kātoa ki te ʼu manatu ʼaē ʼe kotou ako mai te ʼu pāsina ʼo te Tohi-Tapu, ʼaē ʼe ko te Folafola ʼe haʼu moʼoni mai te ʼAtua.

ʼE fiafia anai ia te kau Fakamoʼoni ʼa Sehova ʼi te tokoni atu ke kotou tui ki te Tohi-Tapu. Ohagē lā, ʼe feala ke natou fakahā atu pe neʼe liliu feafeaʼi ʼaki te temi ia te ʼu pelesepeto ʼo te Tohi-Tapu ʼo tuha mo te falala; peʼe felōgoi feafeaʼi ia te Tohi-Tapu mo te poto fakatagata; pe manatu tahi feafeaʼi ia te Tohi-Tapu kātoa mai tona kamataʼaga ʼo kaku ki tona fakaʼosi; pe neʼe hoko moʼoni feafeaʼi tana ʼu lea fakapolofetā, pea mo te tahi atu ʼu faʼahi. Kapau ʼe kotou loto kiai, kotou faitohi ki te kau fai fakamafola ʼo te nusipepa ʼaenī ke kotou maʼu he tahi ʼu manatu ʼaē neʼe tokoni ki te ʼu lauʼi miliona hahaʼi loto moʼoni ke natou fakaʼuhiga ia te Tohi-Tapu ohagē ko te Folafola ʼe haʼu moʼoni mai te ʼAtua.

[Fakamatala ʼo te pasina 5]

ʼE feafeaʼi hakotou ʼiloʼi peʼe kotou falala anai peʼe kailoa ki te hahaʼi ʼaē ʼe kotou felāveʼi mo nātou?

[Fakamatala ʼo te pasina 6]

ʼE tou fakafetaʼi ki te hahaʼi sivi Tohi-Tapu agatonu ʼaē neʼe natou tokoni ke tou ʼiloʼi ia te ʼu ʼuluaki tohi ʼaē neʼe fai ʼo te Tohi-Tapu