Elike: ʼE au ui fakahagatonu atu, ko au ʼe mole ko he tahi ʼe tauhi lotu lelei. Pea ʼe lagi mole feala anai ke ta palalau fualoa ki te faʼahi ʼaia.

Tani: ʼE au fiafia ʼi tau fakaha mai tau manatu. Kaʼe fakalelei age siʼi ʼou loto ko toku higoa ko Tani. Pea ko ai la tou higoa?

Elike: Ko toku ko higoa ko Elike.

Tani: ʼE au fiafia ʼi taku felaveʼi mo koe, Elike.

Elike: Pea mo au foki la.

Tani: ʼE au fia fehuʼi atu, pe neʼe tauhi lotu lelei ʼau matuʼā?

Elike: ʼEi. Kaʼe ʼi taku mavae ʼi toku loto fale ʼo alu ʼo hoko atu ia taku ako, neʼe mole kei au alu ʼo misa.

Tani: ʼE au mahino. Kaʼe kotea ʼae neʼe ke ako ʼi te univelesite?

Elike: Neʼe au ako ia te maʼuli fakasosiale ʼa te tagata pea mo te hisitolia. Neʼe au leleiʼia tuʼumaʼu ia te hisitolia tafitō pe neʼe fakaalualu feafeaʼi ia te hisitolia ʼa te tagata talu mai te kamata.

Tani: ʼEi, ʼe moʼoni ʼe tou leleiʼia te hisitolia ʼa te tagata. ʼE lagi kua ke iloʼi pe, ko te Tohi-Tapu ʼe ko he tohi fakahisitolia. Neʼe kau koa ia te Tohi-Tapu ki te ʼu fekumi ʼae neʼe ke fai?

Elike: Kailoa. ʼE au iloʼi e ko te Tohi-Tapu e ko he tohi ʼe lelei, kaʼe neʼe mole au manatu e ko he tohi fakahisitolia.

Tani: ʼE au sio ko koe ko he tahi e ke tali ia te ʼu faʼahiga manatu kehekehe. Kapau ʼe maʼu hou kiʼi temi, ʼe au fia fakaha atu he ʼu faʼifaʼitaki ʼe maʼu ʼi te Tohi-Tapu, ʼe ko he ʼu hisitolia moʼoni.

Elike: ʼIo. Kaʼe ʼe mole ʼi ai haku Tohi-Tapu.

Tani: ʼE mole meʼa ia. ʼE feala pe taku fakaha atu ʼi taku Tohi-Tapu. Ko te ʼuluaki faʼifaʼitaki ʼe tuʼu ia 1 Koloniko kapite 29, ʼi te ʼu vaega 26 mo te 27. ʼE ui fenei ai: “Nee hau leva ia Tavite, foha o Isaia, i Iselaele katoa. Nee hau ia ia ki Iselaele, ia tau e fagofulu: nee hau ia ia ia tau e fitu i Hepelone, pea nee hau ia ia i Selusalemi ia tau e tolugofulu ma tolu.”

Elike: ʼEa koa, ʼe mole koa la ko he fakamatalatala lelei ʼaia ʼo he hisitolia?

Tani: ʼEi, neʼe valoki e ʼihi takoa neʼe mole maʼuli moʼoni ia te Hau ko Tavite.

Elike: Ko tau moʼoni? He koʼe ʼe natou ui ia te faʼahi ʼaia?

Tani: ʼE mole he ʼu fakamoʼoni ʼi te Tohi-Tapu neʼe ko he tahi neʼe maʼuli moʼoni. Kaʼe ʼi te taʼu 1993, neʼe maʼu e te alekeolosia ia te foʼi lauʼi maka ʼafeā neʼe tohi ai “Te ʼApi ʼo Tavite.”

Elike: ʼIo.

Tani: Neʼe ʼi ai te tahi tagata ʼe palalau ki ai ʼi te Tohi-Tapu, neʼe natou fia iloʼi pe neʼe maʼuli moʼoni. Neʼe ko Posio Pilato, ia te kovana ʼae neʼe pule ʼi te temi ʼo Sesu. ʼE talanoa ki ai ia Luka kapite 3  vaega 1, pea mo te tahi ʼu hahaʼi maʼuhiga ʼo te temi ʼaia.

Elike: ʼEi. ʼE ui fenei ai: “Nee kovana ia Posio Pilato i Sutea, pea nee hau ia Helote i Kalilea.”

Tani: Malō. Lolotoga ni taʼu, tokolahi te hahaʼi faifekumi neʼe natou feʼekeʼaki pe neʼe maʼuli moʼoni ia Posio Pilato. Pea kua hili ki ai teitei taʼu ʼe 50, neʼe maʼu ia te foʼi maka ʼi te potu Esite ʼo te kele, neʼe tohi lelei ai tona higoa.

Elike: ʼIo. Ko taku hoki logo ʼae ki te faʼahi ʼaia.

Tani: ʼE au fiafia ʼi te vaevae mo koe ia te faʼahi ʼaia.

Elike: Sio koe, maʼa ʼaku ko te Tohi-Tapu ʼe ko he tohi fakahisitolia pe ia. Kaʼe neʼe mole au manatu ʼe ʼi ai tona ʼaoga kia tatou ʼi totatou temi. ʼE feala pe ke maʼu ai he ʼu fakamatala ʼe moʼoni kaʼe neʼe mole au manatu ʼe ʼi ai tona ʼaoga kia tatou.

Tani: Tokolahi ʼe natou manatu feia. Kaʼe ʼe mole ko taku manatu ʼaia. Koteʼuhi, talu mai te kamataʼaga, neʼe heʼeki fetogi ia te ʼu meʼa ʼae ʼe ʼaoga ki te tagata. Ohage la, ʼe ʼaoga ki te tagata ia te meʼa kai, mo te ʼu mutuʼi meʼa pea mo tona nofoʼaga. ʼE tou logoʼi ia te ʼaoga ʼae ke tou felogoʼi mo ni ʼihi pea ke tou fiafia ʼi totatou maʼuli fakafamili. ʼE mole moʼoni koa la?

Elike: ʼE moʼoni.

Tani: ʼE foaki mai ʼi te Tohi-Tapu ia te ʼu tokoni ʼo ʼuhiga mo te ʼu faʼahi ʼaia. Koia, ʼe feala ke tou ui ʼe ko he tohi ʼafeā kaʼe ʼe toe ʼaoga ki totatou temi.

Elike: ʼO feafeaʼi?

Tani: Ohage la, ʼe tou maʼu ʼi te Tohi-Tapu ia he ʼu pelesepeto maʼuhiga ʼae neʼe ʼi ai tona ʼaoga ʼi te temi muʼa pea ʼe toe ʼaoga ʼi totatou temi.

Elike: ʼIo. Ohage la kotea?

Tani: Ohage la, ko te fakapotopoto ʼo ʼuhiga mo te falā, peʼe ko te fiafia ʼo te maʼuli fakafamili, peʼe ko te liliu ʼae ko he kaumeʼa lelei. ʼE takitaki tatou e te ʼu pelesepeto Fakatohi-tapu. ʼE hage te tohi ʼaeni ko he mape, ʼe tokoni mai ke fua lelei totatou maʼuli. Ki tau manatu la, ʼe faigataʼa koa hatatou liliu ʼi te temi nei, ko he ʼohoana pea mo he pule famili ʼe lelei?

Elike: ʼEi ʼe ke moʼoni. Neʼe au ʼohoana kua hili ki ai he taʼu katoa, kaʼe ʼe mole ma logo tahi tuʼumaʼu.

Tani: ʼE ke moʼoni. Kaʼe ʼe tou maʼu ʼi te Tohi-Tapu ia he ʼu pelesepeto lelei ʼo ʼuhiga mo te faʼahi ʼaia. Ohage la ko Efeso kapite 5, te ʼu vaega 22, 23, mo te 28. ʼE feala la ke ke lau mai.

Elike: ʼIo. ʼE ui fenei: “U fafine ohoana, ke kotou tahi fakalogo ki tona ohoana, o fakatatau ki te Aliki; koteuhi ko te tagata ko te pule ia o te fafine, o hage ko Kilisito ko te pule ia o te [kokelekasio], ae ko tona sino, pea ko ia foki ko tona Fakamauli.” Pea ko te vaega 28: “E tonu ke ofa fena te tagata ki tona ohoana o hage ko tona sino totonu. Ko te tagata ae e ofa ki tona ohoana e ofa kia ia totonu.”

Tani: Malō. Ki tau manatu la, kapau ʼe mulimuli ia he taumatuʼa ki te ʼu tokoni ʼaeni ʼe mole liliu anai koa la ia tonā maʼuli fakafamili ʼo lelei?

Elike: ʼE au mahalo. Kaʼe ʼe mole ko he faʼahi ʼe faigafua tona fai.

Tani: ʼE ke moʼoni. ʼE mole ʼi ai he tahi ʼe haohaoa. Kaʼe ʼe ʼi ai te tahi vaega ʼi te kapite pe ʼaia ʼe tokoni mai ke tou sio fakapotopoto. * Ko te ʼu felogoʼi fuli ʼe tonu ke tou fakapotopoto pea ke ʼaua naʼa tou faiga tuʼumaʼu ke tuʼu ʼatatou tonu. Neʼe au tokagaʼi mo toku ʼohoana neʼe tokoni mai te Tohi-Tapu ʼo ʼuhiga mo te faʼahi ʼaia.

Elike: ʼE moʼoni.

Tani: ʼE maʼu e te kau Fakamoʼoni ʼa Sehova ia tanatou pasina ʼi te Neti, ʼe maʼu ai te ʼu tokoni ʼaoga ʼo ʼuhiga mo te nofo ʼohoana pea mo te maʼuli fakafamili. Kapau ʼe maʼu hou temi ʼe feala ke au fakaha atu pe he ʼu manatu ʼe maʼu ai.

Elike: ʼIo, ʼe feala pe ia.

Tani: ʼIo malō. Ko te tuʼasila ʼi te Neti ʼe ko te www.pr2711.com /wls. Koʼeni te ʼuluaki pasina.

 Elike: ʼE matalelei te ʼu pāki.

Tani: ʼE ko te ʼu pāki ʼo te kau Fakamoʼoni ʼa Sehova ʼe natou faifakamafola ʼi te malamanei katoa. Koʼeni leva te faʼahi ʼae ʼe maʼu ai te ʼu tokoni ʼo ʼuhiga mo te ʼu taumatuʼa pea mo te ʼu matuʼā. ʼE ke maʼu ai te ʼu alatike nounou ʼe palalau ki he ʼu aluʼaga kehekehe. ʼE ʼi ai koa he alatike ʼe ke fia lau?

Elike: ʼEi. Ko te alatike ʼae ʼe talanoa ʼo ʼuhiga mo te fakatokatoka ʼo te ʼu fihifihia ʼi te nofo ʼohoana. Heʼe ʼaoga kia au.

Tani: ʼE ke maʼu ʼi te alatike ʼaeni ia tokoni ʼe fa moʼo fakatokatoka te ʼu fihifihia. ʼE ke fia lau la Elike?

Elike: ʼEi. ʼE ui fenei: “Kapau ʼe maʼuhiga kia koutou te ʼu felogoi ʼi te nofo ʼohoana, pea ʼe tonu ke kotou fakamaʼuhigaʼi ia te ʼofa pea mo te fakaʼapaʼapa.” ʼE au leleiʼia ʼosi tanatou faʼahiga fakamahino.

Tani: Fakamalō atu ki tau lautohi. ʼE ʼi ai te vaega Tohi-Tapu ʼe tuʼu ai. ʼE feala la ke ke lau mai.

Elike: ʼEi. Ko Efeso 5:33. ʼE ui fenei ai: “Ke tahi ofa te tagata ki tona ohoana o hage kia ia totonu, pea ke fakaapaapa te fafine ki tona ohoana.”

Tani: Neʼe ke tokagaʼi, ʼe ui mai ʼi heni ʼe tonu ke tou tahi foaki ia te meʼa ʼae ʼe fakaʼamu ki ai totatou hoa.

Elike: ʼE mole au mahino lelei.

Tani: Sio koe, ko te tagata fuli ʼe loto ke fakaʼapaʼapaʼi ʼe tona ʼohoana. ʼO toe feia pe mo te fafine, ʼe ina fia logoʼi ʼe ʼofa tona ʼohoana ki ai.

Elike: ʼIo, ʼe moʼoni.

Tani: Kapau ʼe fakaha e te tagata ʼe ʼofa ki tona ʼohoana, ʼe faigafua leva ki te fafine tana fakaʼapaʼapa ki tona ʼohoana.

Elike: ʼE mahino ia.

Tani: Koia, ko te vaega ʼaeni neʼe tohi kua hili ki ai taʼu ʼe 2 000 tupu. Pea ʼe toe ʼaoga pe te ʼu tokoni ʼaia ʼi te temi nei ki te ʼu taumatuʼa. Kapau ʼe natou maʼuliʼi pea ʼe fua lelei kia natou.

Elike: Neʼe mole au manatu au ʼe feia te Tohi-Tapu.

Tani: ʼE au fiafia mo au Elike. ʼE au toe fia liliu mai pea mo vakaʼi pe kotea la tau manatu ʼo ʼuhiga mo te kupu tafitō ʼo te alatike ʼaeni ʼi te Neti: “Te ʼu tokoni ʼe fa moʼo fakatokatoka te ʼu fihifihia.” *

Elike: Io ta fai ʼaki. ʼE au vakaʼi anai mo toku ʼohoana.