KAPITE 03
ʼE Ke Tui Koa Ki Te Tohi-Tapu?
ʼE lahi te ʼu tokoni mo te ʼu fakapapau ʼe tou maʼu ʼi te Tohi-Tapu. Pea ʼe lagi ʼe ke fia iloʼi te ʼu manatu ʼae ʼi ai peʼe ke feʼekeʼaki fenei: ʼE au tui koa ki ai logo la tona kua ʼafea? ʼE kei ʼi ai koa hona ʼaoga ia ʼaho nei? ʼE au tui koa ki te meʼa ʼae ʼe ui ai ʼo ʼuhiga mo te ka haʼu? Ko te toko lauʼi miliona ʼe natou ʼio ki te faʼahi ʼaia. Kae ʼe feafeaʼi kia koe? ʼE lelei ke ke vakaʼi tonu ia te faʼahi ʼaia.
1. ʼE moʼoni koa te ʼu hisitolia ʼae ʼi te Tohi-Tapu?
ʼE maʼu ʼi te Tohi-Tapu ‘he ʼu palalau ʼo te moʼoni ʼe totonu.’ (Ekelesiasi 12:12) ʼE talanoa ki he ʼu aluʼaga neʼe hoko moʼoni pea mo ni hahaʼi neʼe maʼuʼuli moʼoni. (Lau ia Luka 1:3; 3:1, 2.) Tokolahi te ʼu tagata popoto mo faifekumi ʼe natou fakamoʼoni ki te moʼoni ʼo te Tohi-Tapu. Ohage la moka talanoa ai ki ni taʼu mo ni hahaʼi mo ni koga meʼa pea mo ni aluʼaga.
2. ʼE kei ʼaoga koa te Tohi-Tapu ia ʼaho nei?
ʼE lahi te ʼu aluʼaga neʼe kua fakaha fakatomuʼa ʼi te Tohi-Tapu. Ohage la, ʼe totonu mo moʼoni te ʼu manatu ʼae ʼe tuʼu ai ʼo ʼuhiga mo te sienesia. Kae neʼe mole tui ki ai ʼihi tagata faisienesia ʼi te temi ʼae neʼe tohi ai te Tohi-Tapu. Neʼe hoki natou fakamoʼoni ki ʼamuli, ʼe moʼoni te Tohi-Tapu. Koia, ʼe ‘moʼoni tuʼumaʼu te Tohi-Tapu ʼi te temi nei pea ʼo talu ai.’—Pesalemo 111:8.
3. He koʼe ʼe tonu ke au tui ki te ʼu aluʼaga ka hoko ʼi te ka haʼu?
ʼE maʼu ʼi te Tohi-Tapu he ʼu lea fakapolofeta. a Pea ʼe fakakikite ai ‘he ʼu meʼa ʼe heʼeki hoko.’ (Esaia 46:10) ʼE lahi te ʼu aluʼaga neʼe kua fualoa tona fakakikite. Pea ʼe ina toe fakaha ia te ʼu aluʼaga fuli ʼe hoko ʼi totatou temi. Pea ʼe tou vakaʼi anai ʼi te kapite ʼaeni ʼihi lea fakapolofeta. ʼE ke tokagaʼi ai anai te moʼoni ʼo te ʼu lea fakapolofeta ʼaia.
TA FAKALOLOTO
Ta vakaʼi ʼihi aluʼaga fakasienesia ʼe talanoa ki ai te Tohi-Tapu pea mo ʼihi lea fakapolofeta.
4. ʼE alu tahi te Tohi-Tapu mo te sienesia
ʼI te temi muʼa, tokolahi neʼe natou manatu ʼe hilihili te kele ʼi he meʼa. Vakaʼi te ʼATA VITEO.
Ta vakaʼi te meʼa ʼae neʼe ui ʼi te tohi ʼo Sopo kua hili ki ai taʼu ʼe 3 500. Lau ia Sopo 26:7, pea fai te ʼu fehuʼi ʼaeni:
-
Kotea ʼe ui ʼi heni ʼo ʼuhiga mo te kele? Pea kotea ʼae ʼe ha mai ai?
Neʼe hoki mahino lelei te kau sienesia ki te faʼahiga maʼu ʼo te vai ʼi te ʼu taʼu 1800. Kae neʼe kua fakaha ʼi te Tohi-Tapu te aluʼaga ʼaia kua hili ki ai taʼu ʼe lauʼi afe. Lau ia Sopo 36:27, 28, pea fai te ʼu fehuʼi ʼaeni:
-
ʼE feafeaʼi te faʼahiga maʼu ʼo te vai? Pea kotea la tau manatu ki te faʼahi ʼaia?
-
ʼI te ʼu vaega ʼaeni neʼe ta lau, ʼe ke tui koa ki te ʼu manatu ʼae ʼe ui ʼi te Tohi-Tapu?
5. Neʼe fakakikite ʼi te Tohi-Tapu he ʼu aluʼaga maʼuhiga
Lau ia Esaia 44:27–45:2, pea fai te fehuʼi ʼaeni:
-
Kotea te ʼu aluʼaga neʼe fakakikite ʼi te Tohi-Tapu ʼi te ʼu taʼu ʼe 200 ʼi muʼa ʼo te tauʼi ʼo Papiloni?
ʼE fakamoʼoni e te kau popoto neʼe maʼu e Silusi mo tana kautau ia Papiloni ʼi te taʼu 539 I.M.T.S. b Neʼe natou fakamamaha te vai tafe ʼae neʼe ina puipui te kolo mo ulufi he neʼe tuku ava te ʼu matapa. Kae neʼe mole hoko he tau. Pea ia ʼaho nei, hili ki ai taʼu ʼe 2 500 ʼe tuʼu maumau ia Papiloni. Ta vakaʼi te meʼa ʼae neʼe tala ʼi te Tohi-Tapu.
Lau ia Esaia 13:19, 20, pea fai te fehuʼi ʼaeni:
-
Neʼe hoko feafeaʼi te lea fakapolofeta ʼaeni?
Te ʼu toega ʼo Papiloni, ʼi Ilakia
6. Neʼe fakakikite ʼi te Tohi-Tapu te ʼu aluʼaga ʼae ʼe tou sio ki ai
ʼE ui ʼi te Tohi-Tapu ʼe tou maʼuʼuli ʼi “te ʼu ʼaho fakamuli.” (2 Timoteo 3:1) Pea koʼeni te ʼu aluʼaga ʼae neʼe fakakikite:
Lau ia Mateo 24:6, 7, pea fai te fehuʼi ʼaeni:
-
ʼE ke tokagaʼi ʼi heni, kotea ʼae ka hoko anai ʼi te ʼu ʼaho fakamuli?
Lau ia 2 Timoteo 3:1-5, pea fai te ʼu fehuʼi ʼaeni:
-
ʼE feafeaʼi anai te aga ʼa te hahaʼi ʼi te ʼu ʼaho fakamuli?
-
Pea ʼe ke sio koa ki te ʼu aga ʼaia ia ʼaho nei?
ʼE UI E ʼIHI: “Ko te Tohi-Tapu ʼe ko he tohi fagana.”
-
ʼE ke fakaha feafeaʼi ʼe ke tui moʼoni ki te Tohi-Tapu?
MANATU TAFITO
ʼE ha ʼi te ʼu hisitolia mo te sienesia pea mo te ʼu lea fakapolofeta, ʼe feala hau tui ki te Tohi-Tapu.
Fehuʼi Fakamanatu
-
ʼE moʼoni koa te ʼu hisitolia ʼae ʼi te Tohi-Tapu?
-
Kotea ʼae ʼe ha ai ʼe alu tahi te Tohi-Tapu mo te sienesia?
-
ʼE feala koa ke fakakikite ʼi te Tohi-Tapu te ka haʼu? He koʼe ʼe ke ui te faʼahi ʼaia?
TE TAHI ʼU MANATU
ʼE faihala koa te Tohi-Tapu moka talanoa ki ni manatu fakasienesia?
“’E Manatu Tahi Koa Te Sienesia Mo Te Tohi-Tapu?” (Alatike ʼi te jw.org)
Kotea te ʼu aluʼaga ʼe hoko, ʼe ha ai ʼe tou maʼuʼuli ʼi te ʼu ʼaho fakamuli?
Kotea ʼe ha ai neʼe hoko moʼoni te ʼu lea fakapolofeta ʼo ʼuhiga mo te puleʼaga Keleka?
Neʼe fetogi te faʼahiga manatu ʼa he tagata ʼo ʼuhiga mo te Tohi-Tapu ʼuhi ko te ʼu lea fakapolofeta.
“Ki Au, Neʼe Mole Au Tui ʼe ʼi Ai He ʼAtua” (Ko Te Tule Leʼo N° 5 2017)
Te Tahi ʼu Manatu
FEHUʼI ʼE FAI TUʼUMAʼU
Kotea Te Ako Tohi-Tapu?
Kotou ma’u te ’u tali ki te ’u fehu’i ’o ’uhiga mo he ako Tohi-Tapu ’e mole totogi.
