Te Evaselio ʼa Luka 1:1-80

LAU

ʼE palalau ia Luka kia Teofile (1-4)
ʼE fakakikite e Kapeliele te tupu ʼa Soane Patita (5-25)
ʼE fakakikite e Kapeliele te tupu ʼa Sesu (26-38)
ʼE alu ia Malia ʼo fakasiosio ia Elisapeta (39-45)
ʼE fakavikiviki ia Malia kia Sehova (46-56)
Te tupu ʼa Soane mo te foaki ʼo tona higoa (57-66)
Te faifakakikite ʼa Sakalia (67-80)

1 Tokolahi neʼe natou faigaʼi ke natou tanaki mo tohi te ʼu fakamatala ʼo ʼuhiga mo te ʼu meʼa fuli ʼae neʼe hoko pea mo tou tui papau ki ai.+ ² Pea ko te ʼu meʼa ʼaia neʼe fakaha mai kia tatou e ʼihi neʼe sisio mata ki ai+ pea neʼe natou tala te logo ʼa te ʼAtua.+ ³ Koia siʼi Teofile, neʼe au kumikumi ia meʼa fuli ʼae neʼe hoko talu mai te kamataʼaga. Pea neʼe au fakatotonu ke au tohi atu te ʼu meʼa ʼaia ʼo fakahoahoa lelei,+ ⁴ ke ke iloʼi papau ai ʼe moʼoni te ʼu meʼa ʼae neʼe akoʼi gutu atu.+ ⁵ ʼI te temi ʼo Helote,*+ te hau ʼo Sutea, neʼe ʼi ai te pelepitelo neʼe higoa ko Sakalia mai te kalasi ʼa Apisa.+ Neʼe ʼohoana mo te fafine mai te hologa ʼo Alone, neʼe higoa ko Elisapeta. ⁶ Neʼe nā faitotonu ia muʼa ʼo te ʼAtua, he neʼe nā fakalogo fakalelei ki te ʼu fakatotonu fuli pea mo te ʼu lao fuli ʼa Sehova.* ⁷ Kae neʼe mole maʼu hanā fanau he neʼe paʼa ia Elisapeta, pea kua nā matutuʼa. ⁸ Neʼe hoko mai leva te temi ʼae ke gaue fakapelepitelo ai ia Sakalia mo tana kalasi+ ia muʼa ʼo te ʼAtua. ⁹ Pea neʼe to kia ia te filifili ʼae ke hu ki te sagatualio ʼo Sehova*+ pea mo momoli te iseso, ʼo mulimuli ki te fai mahani ʼo te gaue fakapelepitelo.+ ¹⁰ Pea neʼe faikole te hahaʼi tokolahi ʼi tuʼa ʼi te hola ʼae neʼe momoli ai te iseso. ¹¹ Neʼe ha age ai te ʼaselo ʼa Sehova* kia Sakalia, ʼo tuʼu ʼi te faʼahi mataʼu ʼo te ʼaletale ʼo te iseso. ¹² Kae neʼe hoha ia Sakalia ʼi tana sio ki ai, pea neʼe mataku ai. ¹³ Kae neʼe ui age e te ʼaselo: “ ʼAua naʼa ke mataku, Sakalia, koteʼuhi neʼe logoʼi e te ʼAtua tau kole mamahi. ʼE fanauʼi anai e tou ʼohoana ko Elisapeta hou foha, pea ʼe ke fakahigoaʼi anai ko Soane.+ ¹⁴ ʼE ke fiafia lahi anai, pea ʼe fakafiafia anai te tokolahi ʼuhi ko tana tupu,+ ¹⁵ he ʼe maʼuhiga anai kia mata ʼo Sehova.*+ ʼE mole tonu anai ke inu ki te vino peʼe ki ni kava,+ pea ʼe fonu anai ʼi te laumalie maʼoniʼoni ʼi muʼa ʼo tana tupu.+ ¹⁶ Pea ʼe ina fakatafoki mai anai te tokolahi ʼo te ʼu foha ʼo Iselaele kia Sehova,* tonatou ʼAtua.+ ¹⁷ Pea tahi ʼae, ʼe haʼele anai ia muʼa ʼo te ʼAtua ʼaki te malohi ʼo Elia,+ moʼo teuteuʼi he hahaʼi maʼa Sehova,*+ ʼo ina fakatafoki anai te loto ʼo te ʼu tamai ki te ʼu fanau,+ pea mo tokoni ki te kau talagataʼa ke natou agapoto ohage ko te hahaʼi faitotonu.” ¹⁸ Neʼe ui e Sakalia ki te ʼaselo: “ ʼE feafeaʼi haku iloʼi papau ʼe hoko moʼoni anai te faʼahi ʼaia? He ʼe kua au matuʼa, pea kua toe finematuʼa mo toku ʼohoana.” ¹⁹ Pea neʼe tali age e te ʼaselo: “Ko au ia Kapeliele,+ pea ʼe au tuʼu ia muʼa ʼo te ʼAtua, ʼo ovi kia te ia.+ Neʼe ina fekauʼi mai au ke au haʼu ʼo palalau mo koe pea mo fakaha atu te logo lelei ʼaeni. ²⁰ Kae ʼe ke nofo fakalogologo anai, mole ke lava palalau ʼo kaku ki te ʼaho ʼae ka hoko ai te ʼu meʼa ʼaia, he neʼe mole ke tui ki ʼaku folafola, ʼae ka fakahoko anai ʼi tona temi totonu.” ²¹ Pea lolotoga te temi ʼaia, neʼe talitali te hahaʼi kia Sakalia, neʼe natou punamaʼuli ʼi tana nofo fualoa ʼi te sagatualio. ²² Pea ʼi tana hu mai ki tuʼa, neʼe mole lava palalau, pea natou mahino ai neʼe hoki ʼosi age pe tana sio ki he meʼa fakaofoofo* ʼi te sagatualio. Neʼe palalau fakatuli kia natou kae neʼe nofo fakalogologo. ²³ Pea ʼi te ʼosi leva ʼo tana gaue taputapu, neʼe liliu ai ki tona ʼapi. ²⁴ Hili ki ai he kiʼi temi pea faitama leva ia tona ʼohoana ko Elisapeta, ʼo nofo ai ʼi tona ʼapi ia mahina ʼe nima, ʼo ina ui: ²⁵ “ ʼE ko te gaue ʼa Sehova* ʼo ʼuhiga mo au ʼi te temi ʼaeni. Neʼe ina tokagaʼi au pea mo toʼo toku ufiufi.”+ ²⁶ ʼI tona mahina ono, neʼe fekauʼi e te ʼAtua ia te ʼaselo ko Kapeliele+ ke alu ki te kolo ʼo Kalilea ʼe higoa ko Nasaleti, ²⁷ ki he taʼahine taupoʼou+ neʼe fakapapau ke ʼohoana mo te tagata ʼe higoa ko Sosefo mai te hakoga ʼo Tavite. Pea neʼe higoa te taʼahine ko Malia.+ ²⁸ ʼI te hu mai ʼa te ʼaselo, neʼe ina ui kia Malia: “Fakamalo atu, ia koe ʼae ʼe ʼofainaʼi ʼaupito, ʼe nofo ia Sehova* mo koe.” ²⁹ Neʼe hoha ʼaupito ʼi ʼana palalau pea neʼe ina faigaʼi ke mahino pe kotea te fakaʼuhiga ʼo te taʼi fakamalo ʼaia. ³⁰ Koia neʼe ui age e te ʼaselo: “ ʼAua naʼa ke mataku Malia, koteʼuhi kua ke maʼu te ʼofa ʼo te ʼAtua. ³¹ ʼE ke faitama anai, pea ʼe ke fanauʼi anai he tama.+ ʼE ke fakahigoaʼi anai ko Sesu.+ ³² ʼE maʼuhiga anai+ pea ʼe fakahigoa anai ko te ʼAlo ʼo te Maʼoluga.+ Pea ʼe foaki age anai e Sehova* ʼAtua te hekaʼaga fakahau ʼo Tavite tana tamai.+ ³³ ʼE hau anai ia ki te hakoga ʼo Sakopo ʼo talu ai, pea ʼe mole he gataʼaga anai ʼo tona Puleʼaga.”+ ³⁴ Kae neʼe tali e Malia ki te ʼaselo: “ ʼE hoko feafeaʼi anai te faʼahi ʼaia, koteʼuhi neʼe heʼeki au momoe mo he tagata?”+ ³⁵ Neʼe tali age e te ʼaselo: “ ʼE hifo mai anai te laumalie maʼoniʼoni kia koe,+ pea ʼe maluʼi anai koe e te malohi ʼo te Maʼoluga. Ko te tupuʼaga la ʼaia ʼo te maʼoniʼoni+ ʼo ia ʼae ka tupu mai pea ʼe fakahigoaʼi anai ko te ʼAlo ʼo te ʼAtua.+ ³⁶ Pea ko Elisapeta tou kaiga, kua ina fuafatuʼi mo ia he tama, kae kua finematuʼa. Ko tona mahina ono ʼaeni, ia ia ʼae neʼe ui ʼe ko he fafine paʼa, ³⁷ he ʼe mole he meʼa ʼe faigataʼa ki te ʼAtua.”+ ³⁸ Neʼe tali leva e Malia: “Ko au ko te kaugana ʼa Sehova!* Ke hoko kia au ʼo mulimuli pe ki tau folafola.” Pea neʼe mavae ai te ʼaselo. ³⁹ ʼOsi ʼaia, neʼe alu atu aipe ia Malia ki te fenua moʼugaʼia, ki he kolo ʼo Suta. ⁴⁰ Neʼe hu ki te ʼapi ʼo Sakalia ʼo fakamalo kia Elisapeta. ⁴¹ Pea ʼi te logo ʼa Elisapeta ki te fakamalo ʼa Malia, neʼe gaugaue te kiʼi tamasiʼi ʼi tona fatu. Pea neʼe fonu ai ia Elisapeta ʼi te laumalie maʼoniʼoni. ⁴² Neʼe kalaga malohi ai: “Manuʼia ia koe ʼi te fafine fuape! Pea manuʼia te tamasiʼi ʼae ʼe ke fuafatuʼi! ⁴³ He koʼe ʼe fakamaʼuhigaʼi au ’i toku ʼaʼahi e te faʼe ʼo toku ʼAliki? ⁴⁴ ʼI taku logo ki tau fakamalo, neʼe hopohopo fakafiafia te kiʼi tamasiʼi ʼi toku fatu. ⁴⁵ Manuʼia mo ia ʼae neʼe tui ki te ʼu folafola fuli ʼa Sehova* ʼae neʼe tala age, he ʼe hoko moʼoni anai.” ⁴⁶ Pea neʼe ui e Malia: “ ʼE au* fakavikiviki kia Sehova,*+ ⁴⁷ pea ʼe fiafia toku loto ʼi te ʼAtua toku Fakamaʼuli,+ ⁴⁸ koteʼuhi neʼe sio ifo kia au, tana fafine kaugana masiva.+ Pea ʼe fakamatala anai e te ʼu taʼiake fuli toku fiafia,+ ⁴⁹ koteʼuhi ʼe lahi te ʼu gaue neʼe fai maʼaku e te Mafimafi, pea ʼe maʼoniʼoni tona huafa.+ ⁵⁰ Pea ʼe manavaʼofa kia natou ʼae ʼe manavasiʼi kia te ia mai he taʼiake ki he tahi taʼiake.+ ⁵¹ Neʼe ina fai he gaue malohi ʼaki tona nima. Pea neʼe ina fakamavetevete te kau fialahi.+ ⁵² Neʼe ina fakahifo te ʼu tagata malolohi mai ʼonatou hekaʼaga fakahau,+ pea mo hikihiki ia natou ʼae neʼe malalo.+ ⁵³ Neʼe ina fakafimalie katoa ia natou ʼae neʼe pakupaku ʼaki he ʼu meʼa lelei,+ kae neʼe ina fakaliliu ʼatea ia natou ʼae neʼe maʼu koloa. ⁵⁴ Neʼe tokoni ia ki tana kaugana ko Iselaele, ʼi tana manatuʼi tona manavaʼofa ʼo talu ai,+ ⁵⁵ ohage ko tana fakaha ki ʼatatou kui, ko Apalahamo pea mo tona hakoga.”+ ⁵⁶ Neʼe nofo ia Malia mo Elisapeta ia teitei mahina ʼe tolu pea toe liliu leva ki tona ʼapi. ⁵⁷ Pea neʼe hoko mai leva te temi fanau ʼa Elisapeta, ʼo ina fanauʼi ai he tama. ⁵⁸ Neʼe logo te ʼu vahaʼa fale mo ʼona kaiga ki te manavaʼofa ʼae neʼe fakaha ki ai e Sehova* pea mo natou fakafiafia ai mo ia.+ ⁵⁹ Pea ʼi te valu ʼaho, neʼe natou ʼomai ai ke silikosisioʼi* te kiʼi tamasiʼi,+ neʼe natou fia fakahigoaʼi ki tana tamai, ia Sakalia. ⁶⁰ Kae neʼe tali age e tana faʼe: “Kailoa! ʼe higoa anai ko Soane.” ⁶¹ Neʼe natou ui age: “ ʼE mole he tahi ʼi tou famili ʼe higoa feia.” ⁶² Pea neʼe natou fakalavelave fakatuli ki tana tamai pe ʼe ko te higoa fea ʼe loto ki ai. ⁶³ Neʼe ina kole age he lauʼi papa ʼo ina tohi ai: “Ko tona higoa ko Soane.”+ Neʼe natou punamaʼuli fuli ai. ⁶⁴ ʼI te lakaga pe ʼaia, neʼe toe maʼuli tona ʼalelo pea neʼe lava palalau,+ ʼo fakavikiviki ai ki te ʼAtua. ⁶⁵ Pea neʼe manavasiʼi ai ia natou fuli ʼae neʼe nonofo ʼi ʼonatou tafaʼaki. Pea neʼe palalauʼi ʼi te fenua moʼugaʼia katoa ʼo Sutea te ʼu meʼa fuli ʼaia. ⁶⁶ Neʼe fakakaukauʼi e natou fuli ʼae neʼe logo ki te faʼahi ʼaia, ʼo feuiʼaki: “ ʼE feafeaʼi anai te kiʼi tamasiʼi ʼaeni moka lahi ake?” Koteʼuhi neʼe nofo moʼoni te malohi ʼo Sehova* mo ia. ⁶⁷ Pea neʼe fonu ai tana tamai ko Sakalia ʼi te laumalie maʼoniʼoni, ʼo ina fakakikite: ⁶⁸ “Ke vikiʼi ia Sehova,* te ʼAtua ʼo Iselaele,+ koteʼuhi neʼe ina tokagaʼi tana hahaʼi pea mo fakaʼateainaʼi natou.+ ⁶⁹ Pea neʼe ina fakatupu maʼa tatou he fakamaʼuli malohi*+ mai te famili ʼo tana kaugana ko Tavite,+ ⁷⁰ ohage pe ko tona tala mai ʼaki tana kau polofeta maʼoniʼoni ʼo te temi muʼa.+ ⁷¹ Neʼe ina fakapapauʼi mai ʼe ina haofaki anai tatou mai ʼotatou fili pea mai ia natou fuli ʼae ʼe fehihiʼa ia tatou.+ ⁷² ʼE manavaʼofa anai te ʼAtua kia tatou ohage ko tana fakapapau ki ʼatatou kui pea mo ina manatuʼi anai tana fuakava maʼoniʼoni.+ ⁷³ ʼE ko te fakapapau ʼaia neʼe ina fai ki tatatou kui ko Apalahamo.+ ⁷⁴ ʼI tana ʼosi haofaki tatou mai ʼotatou fili, ʼe ina fakafealagia mai anai ke ʼaua naʼa tou tuʼania ʼi te fai ʼo he tauhi taputapu, ⁷⁵ ʼaki te agatonu pea mo te faitotonu ʼi ʼona muʼa ʼi te ʼaho fuli. ⁷⁶ Kae ko koe, kiʼi tamasiʼi, ʼe fakahigoaʼi anai koe ko he polofeta ʼo te Maʼoluga, koteʼuhi ʼe ke haʼele anai ia muʼa ʼo Sehova* ʼo fakatokatoka tona ala,+ ⁷⁷ ke iloʼi e tana hahaʼi ʼe haofaki anai natou ʼaki te fakamolemole ʼo ʼanatou agahala,+ ⁷⁸ ʼuhi ko tona manavaʼofa lahi. Ko te manavaʼofa ʼaia mai te lagi ʼe hage anai ko te mafoa ʼo te ʼaho, ⁷⁹ moʼo foaki te malama kia natou ʼae ʼe nonofo ʼi te fakapoʼuli pea mo te koga fenua ʼo te mate+ pea mo taki ʼotatou vaʼe ʼi te ala ʼo te tokalelei.” ⁸⁰ Pea neʼe tuputupu te kiʼi tamasiʼi ʼi te faʼahi fakasino mo te faʼahi fakalaumalie.* Neʼe maʼuli leva ʼi te toafa ʼo kaku ki te ʼaho ʼae neʼe ha ai ki te hahaʼi ʼo Iselaele.