Sopo 18:1-21
18 Neʼe tali e Pilitate+ te tagata Suake:
2 “ ʼE kotou* fakagata anai ʼafea ʼakotou palalau?
Kotou ʼatamai la ke feala ai hatatou felogoi.
3 He koʼe ʼe fakaʼuhigaʼi anai matou ko ni manu?+He koʼe ʼe kotou ui anai ʼe matou vavale?*
4 Tatau aipe pe ʼe ke fakamamahiʼi ia koe totonu ʼuhi ko tou ita,ʼE siʼakina anai koa te kele ʼuhi ko koe,Peʼe to kehe anai koa te fuʼu maka ʼi tona tuʼuʼaga?
5 ʼEi, ʼe puli anai te malama ʼo te tagata agakovi,Pea ʼe mole toe ulo anai tona afi.+
6 ʼE fakapoʼuli moʼoni anai te malama ʼi tona fale la,ʼEi, ʼe mate anai te malama ʼi tona fale la.
7 ʼE vaivai anai tana haʼele malohi,Pea ʼe tukia anai ʼuhi pe ko tana fakatuʼutuʼu.+
8 ʼE haʼele anai ʼi he kupega,Pea ʼe ʼefihia ai anai ʼona vaʼe.
9 ʼE maʼua anai tona mulivaʼe ʼi he hele,ʼEi, ʼe to anai ki he hele.+
10 ʼE fufu he maea ʼi te kele ke to ki ai,Pea ʼe tuku te hele ʼi tona ala.
11 ʼI te ʼu faʼahi fuli, ʼe ʼa takai ia ia e ni meʼa fakamataku,+ʼO tuli ai ia ia ʼi ʼona lakaʼaga fuli.
12 ʼE puli tona malohi,Pea ʼe ketu anai ʼuhi ko te malaʼia.+
13 ʼE kaina tona kili,ʼEi, ʼe kaina ʼona koga sino ʼuhi ko he mahaki fakatupu mate.
14 Neʼe toʼo mai tona fale la ʼae neʼe fimalie ai,+ʼO taki ki he mate fakamataku.
15 ʼE nofoʼi anai tona fale la e ni hahaʼi ʼe mole ina iloʼi,*Mo laku anai te sulifa ki tona ʼapi.+
16 ʼE moamoa anai ʼona aka,Mo ʼona vaʼa.
17 ʼE mole toe manatuʼi anai ia ia ʼi te kele,Pea ʼe mole toe toʼo anai tona higoa ʼi te ala.
18 ʼE fakamavae anai mai te malama ʼo ʼave ki te fakapoʼuli,Pea ʼe kapu anai mai te kele maʼuli.
19 ʼE mole ina maʼu anai ni fanau peʼe ko he hakoga ʼi tana hahaʼi,ʼE mole hao anai he tahi mo ia ʼi te koga meʼa ʼae ʼe nofo ai.*
20 ʼE matataku anai te hahaʼi ʼo te potu Uesite, ʼi te ʼaho ʼae ʼe maumauʼi ai,Pea ʼe toe matataku anai mo te hahaʼi ʼo te potu Esite.
21 Koʼena la te meʼa ʼae ʼe hoko ki te ʼu fale la ʼo te tagata agakovi,Pea mo te nofoʼaga ʼo ia ʼae ʼe mole ina iloʼi te ʼAtua.”
Nota
^ ʼE lagi fakaʼuhiga kia Sopo pea mo natou ʼae ʼe hage ko ia peʼe ko natou ʼae ʼe manavaʼofa kia ia.
^ Peʼe lagi “heʼe maʼa.”
^ Hep. “he meʼa ʼe mole ʼaʼana.”
^ Peʼe “ ʼi tona nofoʼaga fakatemi.”
