Sopo 20:1-29
20 Neʼe tali e Tesofale+ te tagata Naamati:
2 “ ʼE au tali atu ʼuhi ko toku lotohoha,He ʼe mole kei feala ke au taʼofi te meʼa ʼae ʼi toku loto.
3 Neʼe au logo ki he manuki ʼo ʼuhiga mo au,Pea ʼe tonu ke au tali he ʼe au ʼatamai.
4 Lagi kua ke iloʼi pe te faʼahi ʼaeni,He ʼe talu mai te fakatupu ʼo te tagata* ʼi te kele, ʼe fenei:+
5 ʼE fakatemi te kalaga fakafiafia ʼa te tagata agakovi,Pea ʼe toe fakatemi pe mo te fiafia ʼa te tagata ʼae ʼe mole fakaʼapaʼapa ki te ʼAtua.*+
6 Tatau aipe pe ʼe kaku tona maʼoluga ki te lagi,Pea mo kaku tona ʼulu ki te ʼu ʼao,
7 ʼE puli anai ia ʼo talu ai, ohage ko ʼona faifekau.ʼE ui anai e natou ʼae neʼe sisio ki ai: ‘ ʼE ʼifea ia ia?’
8 ʼE galoʼi anai ohage ko he moemisi, ʼe mole toe maʼu anai.Pea ʼe puli anai ohage ko he meʼa neʼe ha ʼi te poʼuli.
9 ʼE mole toe sio anai ki ai ia ia ʼae neʼe sio ki ai ʼi muʼa atu,Pea ʼe mole toe sio anai ki ai tona loto fale.+
10 ʼE faiga anai e ʼana fanau ke ʼofainaʼi natou e te kau masisiva,Pea ʼe ina liufaki anai ʼona koloa.+
11 Neʼe malohi ʼona hui ohage ko tona temi tupulaga,Kae ʼe mate anai ia mo tona malohi.
12 Kapau ʼe malie te meʼa ʼae ʼe kovi ʼi tona gutu,Pea mo ina taupau ʼi tona lalo ʼalelo,
13 Kapau ʼe ina kai ʼo mole ina puʼaki mai ki tuʼa,Kae ʼe ina taupau ʼi tona gutu,
14 ʼE kona anai tana meʼa kai ʼi tona fatu,ʼE kona anai ki tona sino ohage ko te kafokona ʼo te gata.
15 Neʼe ina folo he koloa, kae ʼe ina luaʼi mai anai,ʼE ko te ʼAtua ʼae ka ina toʼo mai ki tuʼa mai tona fatu.
16 ʼE ina mihi anai te kafokona ʼo te gata.ʼE ʼuʼusi anai ia ia e te gata pea ʼe mate ai anai.
17 ʼE mole toe sio anai ia ʼi he temi ki te tafe ʼo te ʼu liuʼa,Ko ni vai tafe ʼe tafe ai te meli mo te huʼa pipi.
18 ʼE ina liufaki anai ʼona koloa kae neʼe mole ina maʼu ʼona lelei,ʼE mole ina fakaʼaogaʼi anai te ʼu koloa ʼae neʼe ina maʼu mai tana gaue.+
19 Neʼe ina laliki mo liʼakina te kau masisiva.Neʼe ina kaihaʼa he ʼapi neʼe mole ina laga.
20 Kae ʼe mole tokalelei anai tona loto,ʼE mole haofaki anai ia ia e ʼona koloa.
21 ʼE mole kei toe he meʼa ke ina puke,Koia ʼae ʼe mole tologa anai ʼona koloa.
22 ʼE hoha anai ʼuhi ko te lahi ʼaupito ʼo ʼona koloa,ʼE to anai te malaʼia kia ia.
23 ʼE kai anai ke makona,Pea ʼe fakato anai e te ʼAtua* tona hauhau kia ia,ʼE to anai ki ai ni malaʼia ohage ko te to ʼo te ʼua.
24 Ka hola mai te ʼu mahafu ukamea,ʼE lavea anai ia ia ʼi ni kauʼi nahau neʼe fana ʼaki he nahau kapa.
25 ʼE ina tohoʼi mai tona tuʼa te kauʼi nahau,Mai tona ʼate te mahafu gigila,Pea ʼe mataku ai.+
26 ʼE puli anai ʼona koloa ʼi te fakapoʼuli gaogao,ʼE vela anai ʼi he afi neʼe mole hokohokoʼi e he tahi,ʼE hoko anai te malaʼia ki he tahi pe ʼe hao ʼi tona fale la.
27 ʼE fakaha anai e te lagi tana hala,Pea ʼe fakafeagai anai te kele kia ia.
28 ʼE tafea anai tona ʼapi ʼi he lomaki,ʼE ko he lomaki ʼe hoko anai ʼi te ʼaho ʼo te hauhau ʼo te ʼAtua.*
29 Koʼena la te vahe ʼe tuku e te ʼAtua ki te tagata agakovi,Te tofiʼa ʼae ʼe fakatuʼutuʼu e te ʼAtua ke ina foaki age.”
Nota
^ Peʼe “te malamanei,” peʼe “Atama.”
^ Peʼe “tagata aposita.”
^ Hep. “ ʼe ina fakato anai.”
^ Hep. “tona hauhau.”
