ĨWAꞌÕNO 3
E niha te dza ãma aiꞌuté roꞌwaꞌrutu norĩ.
‘ꞌRe atsitsawi petse dzaꞌra waꞌaba mono. E marĩ wa. Dadzawidzé hã dama ꞌre höimana dzaꞌra mono wamhã, dawatsédé hã da te daꞌãma ꞌre ꞌmadöꞌö dzaꞌra mono õ di dza.’ — 1 Pedro 4:8
Aimro wamhã ãté marĩ hã roꞌwaꞌrutu te dza atsô watobro waꞌwa. E marĩ wa. Atsimirotsaꞌrata waꞌwa aimawi, aipẽꞌẽ ꞌremhã atsimirotsaꞌrata waꞌwa aimawi, duré aihöimanadzé waꞌwa aimawi wa. Ãté marĩ hã höiba amo te dza atsô watobro waꞌwa, ãma ĩtsimiré: datsa tsuru di dza, ãté robꞌruti dza, niwamhã niꞌwa ate família ꞌremhã te dza tsépu.
Bíblia nhimirowahudu wapari wamhã te dza ãma ꞌre ĩꞌaiꞌuté mono roꞌwaꞌrutu norĩ na hã pire nherẽ. — Mateus 5:23, 24.
1 ATSIRI ꞌRIDAWA
BÍBLIA DZARINA: ‘Damreme ĩwẽ hã aiwa bötö uwaibaba na da te dama ꞌre ĩroti dzaꞌra mono dzé hã, aiwa ẽtẽ waipo pré oru na ropodo ẽtẽ waipo prã prata ꞌmanharĩ na da te ãma ĩtsaꞌra ne hã.’ (Provérbios 25:11) Roꞌwaꞌrutu watobro wamhã, robdzanhamri taha na. Aimreme tô tsena aimro ma hã atsimirotsaꞌrata na duré e niha te aihöiba aipẽꞌẽ ꞌremhã. ‘Taha wa, tãma ꞌre atsadawa nhipetse mono õ di dza oto.’ (Efésios 4:25) Aipẽꞌẽdzé nherẽ, atsahi nherẽ, robdzeiꞌõ nherẽ, ãma umnhatsi nherẽ, atsiptete ãma ꞌre watsété mono tõ da. Tsadaꞌöbö atãma aimreme na, ãne atsiꞌwapéi aba õ di dza. — Provérbios 15:4; 26:20.
Marĩ hã aima wẽꞌõ wamhã, atãma aimreme, duré höiꞌré na atsimidzawi duré atsimiwadzé aimro ma hã. (Colossenses 4:6) Natsi robdzanhamri uꞌötsi aimro ma hã duré atsiptete roꞌwaꞌrudu hã tsadzöri da waptu na. — Efésios 4:26.
TAHA DA ATSIPTETE:
-
Bödö atsima pitsutu aba atsima watsuꞌu aba roꞌwaꞌrutu na hã atsima robdzanhamri aba da hã.
-
Aimro te te robdzanhamri wamhã, dzahadu aimreme tõ, ariꞌiwi wapari petse. Aimro te te robdzanhamri pariptsi a hã te dza ĩrobdzanha.
2 ATSIMIPARI PETSE
BÍBLIA DZARINA: ‘ꞌRe atsitsawi petse dzaꞌra waꞌaba mo . . . duré ꞌre atsiwadzé petse dzaꞌra waꞌaba mo.’ (Romanos 12:10) Atsimipari petse dzé hã ĩpire uptabi. Tsiptete aimro nhimirotsaꞌrada hã waihuꞌu da daꞌãma datsibadzém na duré dahöimana wapum na. (1 Pedro 3:8; Tiago 1:19) Marĩ ꞌmanharĩ ré hã aimro marĩ hã te te tsima ĩwẽdzém na hã te te aima robdzanhamri da, tsadzöri marĩ ĩꞌmanharĩ hã wapari petse da, mare di taré wapari ne hã, niwamhã atsima watsuꞌu aba robdzanhamri aba da apötsi. Ĩmro ré norĩ ꞌre höimana dzahuré wamhã datsiwaihuꞌu ne hã, mare di danhitobꞌru ne hã, te dza tsima rowẽ dzaꞌra. — Provérbios 29:11.
TAHA DA ATSIPTETE:
-
Marĩ aima wẽꞌõ nherẽ aimro wamhã te te aima robdzanhamri wamhã, wapari petse.
-
Wapari õ di dza damreme na tsi, atsimipari petse aimro höiba na, duré ubudzém na, duré ĩmremedzém na, waihuꞌu da hã ĩtsimirotsaꞌrada hã.
3 MAꞌÃPÉ TSADA ꞌRE ATSIPTETE UꞌÖTSI MONO
BÍBLIA DZARINA: ‘Niꞌwa hã tsimiꞌẽ na te te ꞌre romhuri petse mono wamhã, te dza tihöimanadzéb da hã te te tsima ꞌre adzani. Tane nherẽ, niꞌwam norĩ robdzanhamri ma tsi ꞌre höimana dzaꞌra mono wamhã, te dza marĩ dzô tiwi ꞌre ĩrowaptöꞌö dzaꞌra mono dzé hã te te tsitsô ꞌre tsani dzaꞌra.’ (Provérbios 14:23) Ĩrobdzanhamri aba dzém na tsadzöri aba da marĩ roꞌwaꞌrudu hã ĩpire hã, tadzahã taha tsi õ di. Tsada ꞌre ĩꞌatsiptete uꞌötsi mono da tsi ꞌre aihöimana mono da atsima ĩpitsutu aba dzém na hã, ãne wamhã te dza ĩꞌuwaimrami waꞌwa. (Provérbios 10:4) Atsiré tsada ꞌre atsiptete aba mono wamhã, ‘te dza ꞌRe ĩhöimana uꞌötsi mono hã aipawaꞌöbö waꞌwa, ĩwẽ uptabi na.’ — 1 Coríntios 3:8, 9.
TAHA DA ATSIPTETE:
-
Atsiwi pitsutu aba ĩꞌmanharĩ aba dzém na roꞌwaꞌrutu tsadzöri aba da.
-
Niwam na hã te dza atsiꞌmadöꞌö waꞌwa e niha te aihöimana waꞌwa.
