1 Corĩtu 1:1-31
1 1:1-2 Wa hã Paulu, wa ãma aima robꞌuiꞌéré zaꞌra waꞌwa, Corĩtu na ꞌri nhoꞌõmo nhisi ãma, ꞌRe ihâimana uꞌâsi mono nhibꞌaꞌuwẽ ꞌre iꞌaihâimana zaꞌra waꞌaba mono norĩ ma. Wasisãnawã Sosteni hã te duré ãma asawi zaꞌra waꞌwa.
ꞌRe ihâimana uꞌâsi mono hã ma tô ĩpisutu, te te sima iwẽzéb zarina, Cristu Zezusihi zadawa wasuꞌuꞌwa, ꞌre ĩhâimana mono da, isadawa para. A norĩ waꞌaba zama, ma tô te te ꞌre aipisutu zaꞌra waꞌwa, isibꞌaꞌuwẽ si oto ãma ꞌre anomro wẽ waꞌaba mono da, Cristu Zezusihi ãma. Daro mono bâ, Wanhibꞌapito Zezu Cristuhu ãma ꞌre aiwata zaꞌra waꞌaba mono norĩ ma zama, wa ãne aima robꞌuiꞌéré zaꞌra waꞌwa. Aiwa, wa tô Wanhibꞌapito na wa te ꞌre sisi zaꞌra, simisutu.
2 ꞌMadâꞌâ 1:1
3 Wamama ꞌRe ihâimana uꞌâsi mono nhimizawi pese zé hã duré ihawi rowẽ uꞌâsi zé, Wanhibꞌapito Zezu Cristuhu ma zama ꞌre ihâimana mono, aiꞌãma ꞌre ihâimana uꞌâsi zaꞌra waꞌaba mono da si.
ꞌRe ihâimana uꞌâsi mono, tinhoprubzéb zarina, iwẽ si te te dama ꞌre iꞌanhomri mono zé wasuꞌu
4 ꞌRe ihâimana uꞌâsi mono ãma, wa ꞌre ĩwata uꞌâsi, iwẽ hã te te aima ꞌre sõmri zaꞌra waꞌaba mono wa, Cristu Zezusihi ãma si oto ꞌre iꞌanomro aba mono zéb zarina.
5 Cristuhu ãma ꞌre anomro aba mono wa, ma tô ꞌRe ihâimana uꞌâsi mono hã iwẽ si te te aima ꞌre sõmri zaꞌra waꞌwa. Ma tô duré te te ꞌre aipawaptob zaꞌra waꞌwa, iwasuꞌuwẽ na dama ꞌre rowasuꞌu zaꞌra waꞌaba mono da, duré ꞌre ihâimana mono zém na, ꞌre waihuꞌu pese zaꞌra waꞌaba mono da.
6 Cristuhu wasuꞌuwẽ hã ma tô ꞌre isazei pese zaꞌra waꞌaba mo. Taha zarina, te oto asiptete sina ãma ꞌre anomro aba mo.
7 Tahawa, Wanhibꞌapito Zezu Cristu apâ we imorĩzéb zô, ꞌre asimipari zaꞌra waꞌaba mono ré, ꞌRe ihâimana uꞌâsi mono, tinhoprubzéb zarina iwẽ hã te te aima ꞌre isõmri zaꞌra waꞌaba mono zéb zô, aiwi ꞌre rowaptâꞌâ zaꞌra waꞌaba mono õ di za oto.
8 Wanhibꞌapito Zezu Cristu te za duré te te ꞌre aipawaptob uꞌâsi zaꞌra waꞌwa, asiptete sina ãma ꞌre anomro aba mono da. Nimahã bâtâ na za we apâ imorĩzéb u, tiwi ꞌre aipizari zaꞌra waꞌaba mono tõ da, te za te te ꞌre aipawaptob uꞌâsi zaꞌra waꞌwa, tiꞌab ré Zezusi hã ꞌre udâ zaꞌra waꞌaba mono wa, tô taha bâtâ na aiwasédé hã te te aiꞌãma saꞌra zaꞌra waꞌaba tõ da.
9 ꞌRe ihâimana uꞌâsi mono hã wama umnhasi zaꞌra di, uburé te te wama ꞌre iꞌaropisutu mono zéb zarina, te te wama ãma ꞌre iꞌaꞌuwaimrami mono zéb da hã. Ta hã ma tô te te ꞌre aipisutu zaꞌra waꞌwa, iꞌra siré ꞌre anomro aba mono da, Wanhibꞌapito Zezu Cristuhu siré.
Isazeiꞌwa norĩ, siwanhizari ꞌre ihâimana zaꞌra mono zé wasuꞌu
10 1:10-11 Ĩsisãnawã norĩ, Corowihi nhorõwa ãma ꞌre ihâimana zaꞌra mono norĩ hã ma tô we ĩma aiwasuꞌu zaꞌra waꞌwa, ꞌre asisadaꞌâbâ uꞌâsi zaꞌra waꞌaba mono na hã, asiwanhizari ãma ꞌre aihâimana zaꞌra waꞌaba mono da. Tahawa, Wanhibꞌapito Zezu Cristuhu zadawa para, wa za oto aima ãma roti pese zaꞌra waꞌwa, simisutu ãma ꞌre asisazei pese zaꞌra waꞌaba mono da, asiwanhizari, ãma ꞌre aihâimana zaꞌra waꞌaba mono tõ da. Misi haré te za oto ꞌre ipisutu zaꞌra waꞌaba mo, simisutu asiré ãma ꞌre aihâimana zaꞌra waꞌaba mono da oto.
11 ꞌMadâꞌâ 1:10
12 Ãne wa za aima waihuꞌu zaꞌra waꞌwa. Niꞌwam norĩ me asiré ꞌre aihâimana zaꞌra waꞌaba mono nherẽ, te ãne dama ꞌre asiwasuꞌu zaꞌra waꞌaba mo: “Wa norĩ hã Pauluhu nhimiroti si, wa za wa te ꞌre ꞌmadâꞌâ zaꞌra.” Duré niꞌwam norĩ hã te ꞌre siwasuꞌu zaꞌra, ãne: “Wa norĩ hã Apoluhu nhimiroti si, wa za wa te ꞌre ꞌmadâꞌâ zaꞌra.” Duré niꞌwam norĩ hã te ꞌre siwasuꞌu zaꞌra, ãne: “Wa norĩ hã Pedruhu nhimiroti si, wa za wa te ꞌre ꞌmadâꞌâ zaꞌra.” Duré niꞌwam norĩ hã te ãne ꞌre siwasuꞌu zaꞌra: “Wa norĩ hã Cristuhu nhimiroti si, wa za wa te ꞌre ꞌmadâꞌâ zaꞌra.” Ãne te dama ꞌre asiwasuꞌu zaꞌra waꞌaba mo, aimreme siꞌahâ zaꞌra waꞌaba na.
13 Tane nherẽ, Cristuhu zazeiꞌwa norĩ hã te oto simisutu ꞌre hâimana zaꞌra. Siwanhizari ãma ꞌre hâimana waihuꞌu zaꞌra mono õ di. Baba uptabi di. E wa hã Paulu, wa tô asada ĩdâꞌâ zaꞌra waꞌwa, wedepoꞌo nhonhiꞌrãmi na. Mare di. Wa hãi õ di. E ĩnhisi na ma tô â dawabzuri hã da te aima ꞌre ꞌmanharĩ zaꞌra waꞌwa, Zezusihi nhisi upana. Mare di. Ĩnhisi na hãi õ di.
14 1:14-15 Aiꞌrata ꞌre ĩhâimana zaꞌra waꞌaba mono ré, aiꞌãma ꞌre ĩnhibꞌaꞌuwẽ zaꞌra waꞌaba mono da, te ĩsima ꞌre aiwẽ zaꞌra waꞌaba mono ꞌwaꞌâhã, aiꞌahâ na wa aré â dawabzuri hã te aima ꞌre ꞌmanharĩ zaꞌra waꞌwa, ĩnhisi na. Tane nherẽ, aiꞌahâ na te aima ꞌre abꞌmanharĩ aba mono õ di. Crispu norĩ ma si, wa tô â dawabzuri hã tãma ꞌmanharĩ zahuré, Gaiuhu me. Ãne wa, wa tô ꞌRe ihâimana uꞌâsi mono ãma ꞌre ĩwata uꞌâsi. Tahawa, a norĩ waꞌwa hã ĩnhisi na â dawabzuri hã te aima ꞌre iꞌmanharĩ zaꞌra waꞌaba mono na, dama ꞌre asiwasuꞌu zaꞌra waꞌaba mono õ di za.
15 ꞌMadâꞌâ 1:14
16 Ãne na wa tô duré ĩsina poꞌre puru, Estéfanasihi ma zama, â dawabzuri te iꞌmanharĩzém na hã. Duré isõrõwa ãma isiré ꞌre ihâimana zaꞌra mono norĩ ma zama, wa tô tãma ꞌmanharĩ zaꞌra isiré. Ãma ĩpoꞌre puꞌu zaꞌra õ di oto, niꞌwam norĩ ãma hã, â dawabzuri te tãma ꞌre iꞌmanharĩ zaꞌra mono zém na hã. Ta norĩ ma si, wa tô ꞌmanharĩ zaꞌra.
17 Â dawabzuri hã te dama ꞌre abꞌmanharĩ mono da, te te datẽme ĩzatõrĩ õ di, Cristu hã. Iwasuꞌuwẽ si te dama ꞌre wasuꞌu mono da, ma tô datẽme ĩzatõ. Tahawa, tiꞌai ãma danhimirowaihuꞌu na da te dama ꞌre iroti zaꞌra mono nei õ di wa hã, te dama ꞌre irowasuꞌu mono zé hã. Tiꞌai ãma danhimirowaihuꞌu na Cristu te dama ꞌre wasuꞌu mono ꞌwaꞌâhã, wedepoꞌo nhonhiꞌrãmi na dazada idâꞌâzé wasuꞌu hã te aré wapu na dama ꞌre hâimana. Tane ꞌwaꞌâhã, Cristuhu wasuꞌuwẽ hã marĩ dai õ di aré, da te ãma ꞌre saze zaꞌra mono wa, ꞌRe ihâimana uꞌâsi mono te te ãma ꞌre idaꞌanhoꞌreptui mono da hã.
ꞌRe ihâimana uꞌâsi mono waihuꞌu pese na rowasuꞌu
18 ꞌRe ihâimana uꞌâsi mono, za te te iꞌuprosi zaꞌra norĩ hã, wedepoꞌo nhonhiꞌrãmi na Cristuhu dâꞌâzé wasuꞌu na te te ãma ꞌre rosaꞌrata upa zaꞌra, sima, taré newa. Wa norĩ si uburé ꞌRe ihâimana uꞌâsi mono te te ꞌre iwaꞌanhoꞌreptui mono norĩ si, wa tô wa te ꞌre waihuꞌu zaꞌra, Cristuhu dâꞌâzé hã ipire na hã. Taha wasuꞌu hã, ꞌRe ihâimana uꞌâsi mono waihuꞌu pe, te wasuꞌu. Taha si waihuꞌu pese uptabi di, te te ꞌre idaꞌanhoꞌreptui mono da hã, Cristu hã dazada idâꞌâzéb zarina.
19 E marĩ wa. Ãne ꞌRe ihâimana uꞌâsi mono mreme na Ibaihâ iwazé pese na robꞌuiꞌéré hã:“Niꞌwam norĩ hã ĩnhimirowaihuꞌu pese na te ꞌre pawaptob zaꞌra mono õ nherẽ, tinhimirowaihuꞌu pese na ꞌrâwi ꞌre siꞌmadâꞌâ ze zaꞌra mono wamhã, wa za isimirowaihuꞌu pese zé hã te tiwi ꞌre aꞌuprosi, ta norĩ wi, tiꞌab ré danhimirosaꞌrata waihuꞌu pese na ꞌre idahâimana zaꞌra mono zé hã marĩ dai õ na ꞌrâwi da te dasina ꞌre iwaihuꞌu pese zaꞌra mono zéb da hã oto.”
20 E niha tawamhã tiꞌai ãma rowaihuꞌu pese ꞌwa norĩ nhimirowaihu hã. Ta hã ꞌRe ihâimana uꞌâsi mono ma hã tarére. Duré danhimiroti waihuꞌu nhipese na, ꞌrâwi da te dasima ãma ꞌre iroti zaꞌra mono zé hã tarére tãma hã. Uburé danhimirowaihuꞌu nhipese na dahâimanazé hã wapure di tãma hã, ꞌRe ihâimana uꞌâsi mono waihuꞌu pese ma hã. Ãne, ꞌRe ihâimana uꞌâsi mono hã tiwaihuꞌu pese na te te dama ꞌre iꞌabꞌmanharĩ mono zéb zarina, wa tô waihuꞌu zaꞌra ni.
21 Tinhimirosaꞌrata waihuꞌu pese na ma tô ꞌRe ihâimana uꞌâsi mono hã sima pisutu, dasiꞌuihâ na danhimirosaꞌrata waihuꞌu pese na ꞌrâwi da te ꞌre waihuꞌu zaꞌra mono tõ da, ꞌRe ihâimana uꞌâsi mono hã. Zezusi hã dazada idâꞌâzé wasuꞌu hã, wa te dama ꞌre iwasuꞌu zaꞌra mono hã taré newa te dasima da te ãma ꞌre rosaꞌrata upai uꞌâsi zaꞌra. Tane nherẽ, ꞌRe ihâimana uꞌâsi mono, ma tô sima pisutu, taha wasuꞌu na si te te ꞌre anhoꞌreptui mono da, te te sina ꞌre iꞌumnhasi zaꞌra mono norĩ hã.
22 Zudeu norĩ hã marĩ dama iꞌmanharĩ waihuꞌuꞌõ hã, ꞌRe ihâimana uꞌâsi mono te te ꞌre iꞌabꞌmanharĩ mono zéb zô si, te ꞌre sõpré. Duré zudeuꞌõ norĩ hã uburé marĩ te te ꞌre iwaihuꞌu pese zaꞌra mono zéb da si, te sima te te ꞌre wẽ uꞌâsi zaꞌra.
23 Tane nherẽ, wa norĩ hã Cristu, wedepoꞌo nhonhiꞌrãmi na dazada idâꞌâzé wasuꞌu si, wa tô wa te dama ꞌre wasuꞌu zaꞌra. Tane nherẽ, ma tô taha wasuꞌuwẽ hã Zudeu norĩ hã te te siwi ꞌre wẽꞌõ zaꞌra. Zudeuꞌõ norĩ zama ma tô duré te te sima ãma ꞌre rosaꞌrata upai uꞌâsi zaꞌra, taré newa, marĩ da ihâimana õ newa, iwasuꞌuwẽ hã.
24 Niꞌwam norĩ si ma tô ꞌRe ihâimana uꞌâsi mono hã te te sima ꞌre pisutu zaꞌra, tinhibꞌaꞌuwẽ da, niꞌwam norĩ hã Zudeu, duré niꞌwam norĩ hã zudeuꞌõ. Ta norĩ si te Cristuhu dâꞌâzé wasuꞌu, te te ꞌre wapari zaꞌra. Tawamhã ãne hã, e marĩ te tãma wasuꞌu zaꞌra, Cristu, wedepoꞌo nhonhiꞌrãmi na idâꞌâzé wasuꞌu hã. Danhipai u ꞌRe ihâimana uꞌâsi mono waihuꞌu pe, te tãma wasuꞌu zaꞌra. Duré isimiroti wẽ uptabi, te tãma wasuꞌu zaꞌra.
25 ꞌRe ihâimana uꞌâsi mono nhimiroti si, danhipai u iwẽ uptabi hã tô. Duré danhipai u waihuꞌu pese uptabi di.
26 Ĩsisãnawã norĩ, maꞌãpé asina aipoꞌre puꞌu zaꞌra waꞌaba, ꞌRe ihâimana uꞌâsi mono, tinhibꞌaꞌuwẽ da, te te ꞌre aipisutu zaꞌra waꞌaba mono õ ré, ꞌre aihâimana ꞌrata zaꞌra waꞌaba mono zém na. Aiꞌumro waꞌaba na si ma tô asiré norĩ ma, asimirosaꞌrata waihuꞌu pese na si, aré ꞌre aihâimana zaꞌra waꞌaba mo. Aiꞌumro waꞌaba na si, ma tô asima aipire na aré ꞌre aihâimana zaꞌra waꞌaba mo. Aiꞌumro waꞌaba na si, ma tô dama ipire norĩ ꞌra na ꞌre aihâimana zaꞌra waꞌaba mo aré. Aiꞌahâ waꞌaba na ma tô dama aiwapu na dama ꞌre aihâimana zaꞌra waꞌaba mo.
27 Tane nherẽ, niꞌwam norĩ hã dama hâimana nhimizaꞌreseꞌõ na, isazeiꞌõꞌwa norĩ te te ãma ꞌre irosaꞌrata zaꞌra mono norĩ hã ta norĩ si ma tô ꞌRe ihâimana uꞌâsi mono hã te te sima ꞌre pisutu zaꞌra, isibꞌaꞌuwẽ si ꞌre nomro mono da. E marĩ da, ma tô ta norĩ si te te sima ꞌre pisutu zaꞌra, ꞌRe ihâimana uꞌâsi mono hã. Isazeiꞌõꞌwa norĩ hã simirosaꞌrata waihuꞌu pese newa ꞌre isiꞌmadâꞌâ ze zaꞌra mono norĩ hã, oto sisém na ꞌre hâimana zaꞌra mono da. Duré isazeiꞌõꞌwa norĩ ma iwapu zaꞌra hã, ma tô duré te te ꞌre pisutu zaꞌra, isibꞌaꞌuwẽ ꞌre nomro mono da. Isazeiꞌõꞌwa norĩ ma, ipire zaꞌra hã oto sisém na ꞌre hâimana zaꞌra mono da, ma tô dama iwapu norĩ si te te ꞌre pisutu zaꞌra, isibꞌaꞌuwẽ ꞌre nomro mono da.
28 Isazeiꞌõꞌwa norĩ ma ꞌre ihâimana wapu zaꞌra mono norĩ hã ma tô ꞌRe ihâimana uꞌâsi mono hã te te ꞌre pisutu zaꞌra, isibꞌaꞌuwẽ si ꞌre nomro mono da, isazeiꞌõꞌwa norĩ te te siwi ꞌre iwẽꞌõ pese zaꞌra mono norĩ hã. Isazeiꞌõꞌwa norĩ ma, pire na ꞌre ihâimana zaꞌra mono zé hã te te tiwi ꞌre aꞌuprosi mono da, ma tô dama iwapu norĩ si te te ꞌre pisutu zaꞌra, isibꞌaꞌuwẽ si oto ꞌre nomro mono da.
29 E marĩ da, ma tô ãne hã te te dama ꞌre abꞌmanharĩ, ꞌRe ihâimana uꞌâsi mono hã. Niꞌwam norĩ hã tinhimirosaꞌrata waihuꞌu pese na ꞌrâwi isõꞌa, sina ꞌre wata tõ zaꞌra mono da, ma tô ãne te te dama ꞌre abꞌmanharĩ, duré dama pire wẽ te, ꞌrâwi dama sina ꞌre wata tõ zaꞌra mono da.
30 ꞌRe ihâimana uꞌâsi mono nhimipisutuzéb zarina si, te oto Cristu Zezusihi ãma ꞌre anomro aba mo. Cristuhu ãma si oto ꞌre anomro aba mono wa, te tinhimirowaihu iwẽ hã te te aima ꞌre waihuꞌu uꞌâsi zaꞌra waꞌwa. Cristuhu dâꞌâzém na si, ma tô ꞌRe ihâimana uꞌâsi mono hã te te ꞌre waꞌawẽsãmri, wawasédé hã te te oto waꞌãma ꞌre iꞌaꞌmadâꞌâ mono õ zarina. Taha zarina si, ma tô duré te te ꞌre waꞌapisutu, isibꞌaꞌuwẽ si oto tãma ꞌre wahâimana wẽ zaꞌra mono da. Taha zarina si, ma tô duré wawasété hawi waꞌanhoꞌreptu, sitẽme te te ꞌre waꞌawaibui mono da.
31 Tahawa, wa norĩ hã isazeiꞌwa oto ꞌre wanomro mono wa, wato sina ꞌre iwahâimana zaꞌra mono zém na dama ꞌre wasiwasuꞌu zaꞌra mono wamhã, Wanhibꞌapito nhimipawaptobzém na si, wa za tô dama ꞌre wasiwasuꞌu wẽ zaꞌra, wato sina ꞌre iwahâimana zaꞌra mono na hã. Tahawa, te ꞌRe ihâimana uꞌâsi mono mreme na Ibaihâ iwazé pese na robꞌuiꞌéré hã tihâiba, ãne:“Niꞌwam norĩ hã to sina oto ꞌre hâimana zaꞌra mono wamhã, Uburé Danhibꞌapito te te ꞌre ipawaptob zaꞌra mono zém na si, te za tô dama ꞌre siwasuꞌu wẽ zaꞌra, to sina oto ꞌre ihâimana zaꞌra mono zém na hã.”
