1 Corĩtu 10:1-33
10 Ĩsisãnawã norĩ, ãne hã wa za oto aima ãma robꞌrãzarõtõ zaꞌra waꞌwa, aima ãma ĩpoꞌre puꞌu zaꞌra waꞌaba zém na, ãma ꞌre aipoꞌre simrami zaꞌra waꞌaba mono tõ da. Duréihã wahiꞌrata norĩ Mozési hã Ezitu hawi te te sani zaꞌra wamhã, ꞌRe ihâimana uꞌâsi mono hâiwaꞌa na te isõwab zaꞌra hã mo, bâdâdi te te tãma wasuꞌu zaꞌra mono da, te te ꞌmadâꞌâ pese zaꞌra mono sina. Â pré na puꞌu nhisi waꞌwaibaba, ma tô duré te te simro, robꞌré na, zara u te te saprĩ zaꞌra da, ezipsiu norĩ wi hã, te te sõꞌreptu zaꞌra da.
2 Ãne na hâiwaꞌa ꞌrowi ꞌre danomro mono wa, duré â waꞌwaibaba robꞌré na da te saprĩ zaꞌra wa, ma tô Mozésihi ãma uburé da te ãma ꞌre sasõmri zaꞌra, wa norĩ hã â dawabzuri, wa te ꞌre ꞌmanharĩ zaꞌra mono wa, Cristuhu ãma, wa te oto ꞌre isasõmri zaꞌra mono ne.
3 Duré aꞌubuni wi ꞌre danomro mono ré, ꞌRe ihâimana uꞌâsi mono, hâiwa hawi te te ꞌre idapawapto mono na, ma tô dasa da te ꞌre huri, aihĩni.
4 Â hã ꞌRe ihâimana uꞌâsi mono te te dama iꞌõb zaꞌra mono na ma tô duré da te ꞌre âhuri, aihĩni pese. Ẽtẽ zahâbâ itõmo wawẽ sipoꞌozém hawi ꞌre ipuꞌu mono na, ma tô da te ꞌre âhuri, isimipawaptobzéb zarina. Ẽtẽ zahâbâ hã aꞌubuni wi ꞌre isa mono na, â hã da te ãma ꞌre iꞌâhuri mono ne, ma tô Cristu hã ꞌrâwi dasiré ꞌre hâimana, te te ꞌre daꞌapawapto mono da.
5 Tane nherẽ, ãne na ꞌRe ihâimana uꞌâsi mono te te ꞌre dapawapto mono nherẽ, ma tô daꞌahâ na siwi daꞌawẽꞌõ, dapoꞌre ãna ꞌre danomro mono ꞌru te. Tahawa, aꞌubuni wi ꞌre danomro mono ré, ma tô te te ꞌre daꞌaꞌuprosi, danhimizahâri mono sidâpâsi.
6 E marĩ, te tawamhã wama wasuꞌu zaꞌra, ãne na wahiꞌrata norĩ wasuꞌu hã. Ta norĩ ne, wawasété si, wa te wasima ꞌre ꞌruiwapari zaꞌra mono tõ da, te wama wasuꞌu zaꞌra.
7 Duré ta norĩ ne, romhâiba ꞌmanharĩ ãma waihuꞌu pese newa, ãma ꞌre idawata zaꞌra mono ãma, ꞌre wawata zaꞌra mono tõ da, te duré wama wasuꞌu zaꞌra. ꞌRe ihâimana uꞌâsi mono mreme na Ibaihâ iwazé pese na robꞌuiꞌéré hã, ãne:“Tawamhã dato hã ma tô dasiwi ꞌmanharĩ ni, powawẽ hâiba ne, oru ꞌmanharĩ ãma idawata zaꞌra zéb da hã. Tahawa, ma tô duré siwaꞌru ãma apese zaꞌra ni, dahâimana wasété si dama wẽ zaꞌra wa.”
8 Ta wahiꞌrata norĩ hã ahâ na ma tô duré aibâ norĩ piꞌõ na tiwasédé hã ꞌmanharĩ zaꞌra. Ãne wa, ma tô duré ꞌRe ihâimana uꞌâsi mono hã daꞌuprosi, 23 miu na dahâiba na. Tahawa, wa norĩ wawasédé hã ãne na wa te ꞌre ꞌmanharĩ zaꞌra mono õ di za, wahiꞌrata norĩ ne.
9 Ta norĩ hã ma tô duré tiwasédé hã ꞌmanharĩ zaꞌra, ꞌRe ihâimana uꞌâsi mono hã niha te te tãma robꞌmanharĩ zaꞌra õ zô, te te pibu zaꞌra da. Ãne ꞌru te, ma tô duré wahi nhipsari na hã daꞌahâ na daꞌuprosi, ꞌRe ihâimana uꞌâsi mono hã. Ãne na hã wa norĩ zama, wa te ꞌre pibu zaꞌra mono õ di za, Wanhibꞌapito hã, wawasédé wa te ꞌre ꞌmanharĩ zaꞌra mono nherẽ, niha te te wama ꞌre arobꞌmanharĩ mono õ zô.
10 Wahiꞌrata norĩ hã ma tô duré Mozésihi ma nharĩ wasété zaꞌra. Ma tô duré taha wamhã tãma aiwapsari zaꞌra. Tahawa, ma tô ꞌRe ihâimana uꞌâsi mono hã hâiwa ãma tãma iromhuriꞌwa hã we satõ, Dapãrĩꞌwa na isisi hã, ta hã te te daꞌuprosi da. Ãne õꞌumnhasite, wa norĩ zama hã ꞌRe ihâimana uꞌâsi mono ma, wa te tãma ꞌre nharĩ wasété zaꞌra mono õ di za.
11 Ãne ma tô wahiꞌrata norĩ ma tiromhâiba duréihã, tiwasédé te te ꞌre iꞌmanharĩ zaꞌra mono zéb zarina, ꞌRe ihâimana uꞌâsi mono te te ꞌre ihâ zaꞌra mono zém na, da te ꞌre waihuꞌu zaꞌra mono da. Ma tô duré ãne na niꞌwa hã ãma robꞌuiꞌéré, ãma ꞌre iwasipoꞌre puꞌu zaꞌra mono zéb da hã, isine wa te ꞌre ꞌmanharĩ zaꞌra mono tõ da. Romhuture di oto, waré zaꞌra irobꞌrãsutuzéb u hã. Tahawa, wa za wanhimizaꞌrese ꞌre wahâimana uꞌâsi zaꞌra.
12 Tahawa, Cristuhu ãma asiptete sina ꞌre aihâimana zaꞌra waꞌaba mono na, ꞌre asiꞌmadâꞌâ ze zaꞌra waꞌaba mono wamhã, te za asimizaꞌrese sina pé ꞌre aihâimana zaꞌra waꞌaba mo, aiwasété u apâ ꞌre airereꞌe aba mono tõ da.
13 Tô sena, asiptete sina ãma ꞌre anomro uꞌâsi aba mono zô, ꞌRe ihâimana uꞌâsi mono hã te te ꞌre aipibu zaꞌra waꞌaba mono wamhã, aimawi na te te ꞌre aipibu zaꞌra waꞌaba mono õ di za, ipire uptabi na hã. Tô õhõ na si te te ꞌre idaꞌapibui mono zém na si, te za tô te te ꞌre aipibu zaꞌra waꞌwa. ꞌRe ihâimana uꞌâsi mono hã uburé wama umnhasi zaꞌra di, marĩ na uburé te te wama ꞌre iꞌaropisutu mono zém na hã. E tawamhã, asiptetezém nhipai u, te za ipire uptabi na te te aipibu na ꞌre sahu zaꞌra waꞌwa, aiwasété u apâ tiwi ꞌre airereꞌe aba mono da. Mare di. Tô sena, asiptete sina ãma ꞌre anomro uꞌâsi aba mono zô, te te ꞌre aipibu zaꞌra waꞌaba mono wamhã, te za niha te te aima ꞌre pisutu zaꞌra waꞌwa, rowẽ ré ihawi ꞌre aiwairébé aba mono zéb da hã, õne haré asiptete sina ãma ꞌre anomro uꞌâsi aba mono da.
14 Tahawa, ĩsisãnawã norĩ, ĩma iꞌasawi pese zaꞌra waꞌaba norĩ hã, waihuꞌu pese newa romhâiba ꞌmanharĩ ãma ꞌre idawata zaꞌra mono zém na, daꞌãma ꞌre sasõmri zaꞌra waꞌaba mono õ di za. Taha nhiti te za ꞌre aihâimana uꞌâsi zaꞌra waꞌaba mo.
15 A norĩ waꞌwa hã te oto asimizaꞌrese ꞌre aihâimana zaꞌra waꞌaba mo, tô. Tahawa, ãhã na te aima ãma irowasuꞌu zaꞌra waꞌaba zém na, te za ãma ꞌre irosaꞌrata pese zaꞌra waꞌaba mo, iꞌuwaibaba te ãma aima ꞌre iꞌaꞌuwaimrami aba mono zô.
16 Zezusi hã wazada idâꞌâzém na ꞌre iwasipoꞌre puꞌu zaꞌra mono zéb da, wasiré ꞌre wasiꞌrãꞌõtõ mono wa, ꞌRe ihâimana uꞌâsi mono ãma ꞌre wawata zaꞌra mono pari, wa za hâsizém na uva ꞌrãi waꞌu isé hã wa te ꞌre âhuri. Ãne hã wasiré, wa te ꞌre âhuri mono wamhã, Cristuhu wi iwapru hã tiwi puꞌu wa, wazada idâꞌâzéb zarina, te rowẽzé hã wahâiba mono bâ wama ꞌre hâimana zaꞌra. Duré iꞌuꞌẽne hã wasiré, wa te ꞌre huri mono da, wa te wasima ꞌre wẽꞌẽ zaꞌra mono wamhã, Cristu hã da te dasiwi hâibapru wa, wazada idâꞌâzéb zarina, te duré wahâiba mono bâ rowẽzé hã wama ꞌre hâimana zaꞌra.
17 Zezusi hã wazada idâꞌâzém na ꞌre wasipoꞌre puꞌu zaꞌra mono da, wasiré ꞌre wasiꞌrãꞌõtõ mono wamhã, waꞌahâ nherẽ, wa za iꞌuꞌẽne hã wa te wasima ꞌre wẽꞌẽ zaꞌra, misi nherẽ, wa te ꞌre ihuri mono da hã. E marĩ te wama wasuꞌu zaꞌra, misi iꞌuꞌẽne hã. Wa norĩ hã wasiré isazeiꞌwa norĩ hã waꞌahâ nherẽ, simisutu Cristuhu siré ꞌre iwahâimana zaꞌra mono zé, te wama wasuꞌu zaꞌra. Misi dahâiba ne oto ꞌre iwahâimana zaꞌra mono zé, te duré wama wasuꞌu zaꞌra.
18 Izaraéu nhihudu norĩ hã bété. Ta norĩ hã ꞌRe ihâimana uꞌâsi mono ma, ꞌre sõprub zaꞌra mono da, tinhimizama te te ꞌre simroi mono wa, wedeza ne na tãma danhoprubzé nomrizé nhisiwi, da te ꞌre zata zaꞌra mono õ ré, te za suru na te te sima ꞌre poꞌo zaꞌra, inhi hã, ãma ꞌre saihuri mono da. Ãne wamhã, ꞌRe ihâimana uꞌâsi mono siré te za ꞌre hâimana zaꞌra. Tane duré, a norĩ waꞌwa hã waihuꞌu pese newa, romhâiba ꞌmanharĩ ãma ꞌre dawata zaꞌra mono da, danhimizama da te tãma ꞌre isõmri zaꞌra mono nhi na, dasiré ãma ꞌre asaihuri aba mono wamhã, te duré dasiré ãma ꞌre aiwata zaꞌra waꞌaba mo, romhâiba ꞌmanharĩ ãma. E ãne hã aima wẽ zaꞌra waꞌaba di. Mare di. Ta hã wẽ õ di, ãma ꞌre iꞌaiwata zaꞌra waꞌaba mono hã, dame.
19 Ãne na te aima ãma irowaihuꞌu zaꞌra waꞌaba mono zé hã, e marĩ te wama wasuꞌu zaꞌra. E romhâiba ꞌmanharĩ hã, ꞌRe ihâimana uꞌâsi mono, waihuꞌu pese na ꞌre ihâimana mono ne, ꞌre ihâimana zaꞌra mono zé, te wama wasuꞌu zaꞌra. Mare di. Duré dasa hã romhâiba ꞌmanharĩ ma, da te ꞌre isõmri zaꞌra mono hã, e pire na te wama ꞌre hâimana zaꞌra. Mare di. Ta hã wama zaꞌra hã, tarére hã.
20 Ãne si, wa za duré aima ãma rowaihuꞌu zaꞌra waꞌwa. Isazeiꞌõꞌwa norĩ hã wedeza ne na dasa te te ꞌre zata zaꞌra mono wamhã, ꞌRe ihâimana uꞌâsi mono ma, ta norĩ hã ãma ꞌre sõprub zaꞌra mono õ di. Waꞌuburé norĩ ma si, te ta norĩ hã tãma ãma ꞌre sõprub zaꞌra, ãma ꞌre iwata zaꞌra mono da hã. Tahawa, a norĩ waꞌwa hã dasa, ta norĩ ma, da te ꞌre isõmri zaꞌra mono na ãma ꞌre asaihuri aba mono wamhã, waꞌuburé norĩ ãma si hã te za ãhã wamhã ꞌre aihâimana zaꞌra waꞌaba mo. Tahawa, ãne hã dame ꞌre ꞌmanharĩ zaꞌra waꞌaba mono da, wa hã te aiꞌãma ꞌre rosaꞌrata zaꞌra waꞌaba mono õ di. Mare di.
21 A norĩ waꞌwa hã Cristuhu zazeiꞌwa oto ꞌre anomro aba mono wa, te tô asiré ꞌre asiꞌrãꞌõtõ aba mo, uva ꞌrãi waꞌu isé hã asiré ꞌre âhuri aba mono da, hâsizém na, Wanhibꞌapito wi, iwapru tiwi puꞌu wa, wazada idâꞌâzém na ãma ꞌre iꞌasipoꞌre puꞌu uꞌâsi zaꞌra waꞌaba mono zéb da hã. Tahawa, waꞌuburé norĩ ãma ꞌre dawata zaꞌra mono da, marĩ hã dasiré da te ꞌre âhuri mono wamhã, ãma dame ꞌre aihâimana waihuꞌu zaꞌra waꞌaba mono õ di za, ta norĩ nhimihâsizém na isiré ꞌre âhuri aba mono tõ da. Duré Wanhibꞌapito hâiba, da te dasiwi hâibapru wa, wazada idâꞌâzém na ãma ꞌre asipoꞌre puꞌu zaꞌra waꞌaba mono da, te duré iꞌuꞌẽne hã asiré ꞌre ihuri aba mo. E tawamhã iꞌuwaibaba, te za tô dame ꞌre iꞌmanharĩ zaꞌra waꞌaba mo, isazeiꞌõꞌwa norĩ siré ꞌre asaihuri aba mono wamhã, waꞌuburé norĩ ãma ꞌre dawata zaꞌra mono da, dasa hã da te dasima ꞌre ꞌmanharĩ zaꞌra mono wamhã. E tô iꞌuwaibaba ãne hã aima zaꞌra waꞌaba hã.
22 Ãne hã ꞌre ꞌmanharĩ zaꞌra waꞌaba mono wamhã, Uburé Danhibꞌapito hã te za asada ꞌre hâimana zaꞌra waꞌwa, iꞌupana waꞌuburé norĩ ãma si ꞌre aiwata zaꞌra waꞌaba mono wa. Ãne zarina, wazada ꞌre hâimana zaꞌra mono wamhã, e Uburé Danhibꞌapito nhiptetezém nhipai u, wanhiptetezé hã wama ꞌre hâimana zaꞌra mono bâ, wa za isimihâzé wi ꞌre wawairébé. Mare di. Tiwi ꞌre wawairébé waihuꞌu mono õ di za.
23 Niꞌwam norĩ hã asiré isazeiꞌwa ꞌre ihâimana zaꞌra mono norĩ hã, te ãne na te te sima ꞌre nharĩ zaꞌra: “Marĩ hã wa te ꞌre ꞌmanharĩ zaꞌra mono tõ da, ꞌRe ihâimana uꞌâsi mono te te wawi ꞌre awẽꞌõ mono õ nherẽ, wa norĩ zama, wa te wasiwi ꞌre wẽꞌõ zaꞌra mono õ di za, wa te ꞌre ꞌmanharĩ zaꞌra mono tõ da. Wa za tô wa te ꞌre ꞌmanharĩ zaꞌra, wa te wasima ꞌre iwẽ zaꞌra mono zéb uwaibaba si.” Ãne ma tô niꞌwam norĩ hã te te sima ꞌre waihuꞌu zaꞌra. Tane hã wẽ di tô. Tane nherẽ, marĩ hã ꞌRe ihâimana uꞌâsi mono te te wawi ꞌre awẽꞌõ mono õ nherẽ, ãté wa te ꞌre ꞌmanharĩ zaꞌra mono wa, wa za wasiré isazeiꞌwa norĩ wi, wa te ãma ꞌre ꞌwaꞌrutu zaꞌra. Tahawa, marĩ hã dazu wa te ꞌre ꞌmanharĩ zaꞌra mono õ di za, wasiré isazeiꞌwa norĩ wi, wa te ãma ꞌre ꞌwaꞌrutu tõ zaꞌra mono da. Duré wasiré isazeiꞌwa norĩ hã, Cristuhu ãma si siptete sina ꞌre nomro mono da, wa te ꞌre ipawaptob zaꞌra mono da si, wa za tô uburé marĩ hã iwẽ si wa te ꞌre ꞌmanharĩ zaꞌra.
24 ꞌRâwip si ꞌre asipawaptob zaꞌra waꞌaba mono da, asina ꞌre rosaꞌrata zaꞌra waꞌaba mono õ di za. Asiré isazeiꞌwa norĩ hã ꞌre pawaptob zaꞌra waꞌaba mono da si, te za ta norĩ ãma ꞌre irosaꞌrata uꞌâsi zaꞌra waꞌaba mo.
25 Romnhi hã da te dasima ꞌre iwede zaꞌra mono zéb ãma, da te ꞌre iꞌuipra zaꞌra mono hã, te za asina aihâtâꞌâ ãna ꞌre ihuri aba mo, nima hawib zô ꞌre asimnhasi zaꞌra waꞌaba mono ãna. Romhâiba ꞌmanharĩ ma, da te ꞌre isõmri zaꞌra mono na, ꞌre rosaꞌrata zaꞌra waꞌaba mono ãna aipẽꞌẽ ꞌre, ãma ꞌre asiwẽꞌõ zaꞌra waꞌaba mono õ di za.
26 E marĩ wa. ꞌRe ihâimana uꞌâsi mono mreme na Ibaihâ iwazé pese na robꞌuiꞌéré hã, ãne:“Uburé tiꞌa hã, Uburé Danhibꞌapito te hã. Duré uburé marĩ hã tiꞌai ãma ꞌre ihâimana zaꞌra mono hã, Uburé Danhibꞌapito te hã. Tahawa, uburé dasazé hã wẽ di, ãma ꞌre iwasaihuri mono zéb da hã.”
27 Isazeiꞌõꞌwa isiré aiꞌmasai waꞌaba da, asô ꞌmaihârâ aba wamhã, te za tô isiré aiꞌmasai waꞌwa, asima ꞌmaiwẽ waꞌaba wamhã. Tawamhã uburé dasazé hã da te aima iꞌa zaꞌra waꞌwa hã te za tô ihuri ꞌwa, nima hawi, da te ꞌmaiꞌãwisi zô, daꞌmazadanharĩ aba ãna, ꞌrâwi aipẽꞌẽ ꞌre, asiwi iꞌmaiwẽꞌõ aba zarina.
28 10:28-29 Tane nherẽ, ãté niꞌwa hã te za ãne na aima ꞌmaiwaihuꞌu ꞌwa: “Ã hã dasazé hã romhâiba ꞌmanharĩ ma, da te ꞌre isõmri zaꞌra mono.” Ãne hã niꞌwa te te aima wasuꞌu zaꞌra waꞌaba wamhã, taha na aiꞌmasai waꞌaba õ di za. E ꞌrâwi aipẽꞌẽ na asiwi ꞌmaiwẽꞌõ aba tõ da, wa ãne aima waihuꞌu zaꞌra waꞌwa. Mare di. Taré dasa hã te te aima iꞌmaiwasuꞌu waꞌaba wi, rosaꞌrada hã siꞌwaꞌrutu tõ da, wa ãne na aima roti zaꞌra waꞌwa, taha na asaihuri aba tõ da.
E tawamhã, romnhi hã romhâiba ꞌmanharĩ ma, da te ꞌre isõmri zaꞌra mono na, wa za ꞌre ĩsa, romhâiba ꞌmanharĩ ãma dame ꞌre ĩwata mono õ nherẽ. Ãne, wa ꞌrâwi wa hã te ĩsima ãma ꞌre rosaꞌrata uꞌâsi.
29 ꞌMadâꞌâ 10:28
30 ꞌRe ihâimana uꞌâsi mono hã sõpru wa, ãma ꞌre wawata zaꞌra mono sina, wasa hã wa te ꞌre huri mono wamhã, e iꞌuwaibaba te za niꞌwa hã te te dama ꞌre wawasuꞌu wasété zaꞌra, tô õ hã wa te ꞌre ihuri mono na hã. Mare di. Taré te za niꞌwa hã te te dama ꞌre wawasuꞌu wasété zaꞌra, tô sena newa.
31 Ãne, wa za duré aima ãma ꞌrãsutu zaꞌra waꞌwa, ã ĩnhimirowasuꞌu na hã. Uburé marĩ hã te za ꞌre iꞌmanharĩ wẽ uꞌâsi zaꞌra waꞌaba mo, ꞌre asaihuri aba mono wamhã, duré ꞌre âhuri aba mono wamhã, duré marĩ aimawi hã ꞌre ꞌmanharĩ zaꞌra waꞌaba mono wamhã, taha zarina si, ꞌRe ihâimana uꞌâsi mono ãma ꞌre dawata zaꞌra mono da.
32 Marĩ hã ꞌre ꞌmanharĩ zaꞌra waꞌaba mono õ di za oto, da te ãma ꞌre aiꞌmadâꞌâ zaꞌra waꞌaba mono wa, dawasété u ꞌre darereꞌe mono tõ da. Ãne hã dazada ꞌre ꞌmanharĩ zaꞌra waꞌaba mono õ di za, Zudeu norĩ da, duré zudeuꞌõ norĩ da, duré ꞌRe ihâimana uꞌâsi mono nhibꞌaꞌuwẽ ꞌre ihâimana zaꞌra mono norĩ da.
33 Wa hã bété. E niha dama ꞌre ĩhâimana mono zé hã. Ãne si, wa tô te ĩsima ꞌre daꞌawẽ, uburé marĩ hã te ꞌre iꞌabꞌmanharĩ wẽ mono zém na, te ãma ꞌre daꞌapawapto mono da. Ĩsima si, ãne na ꞌre ĩhâimana mono õ di. Uburé, wa dama ꞌre ĩhâimana, ꞌRe ihâimana uꞌâsi mono te te ꞌre idaꞌanhoꞌreptui mono zé hã da te dasina ꞌre uwaimrami zaꞌra mono da, ĩnhimipawaptobzéb zarina.
