1 Corĩtu 13:1-13
13 Tiꞌai ãma hâiwa ãma zama, uburé damreme mono bâ te dama ꞌre arowasuꞌu wẽ mono nherẽ, ĩnhimizawi pese zé hã ĩma ꞌre hâimana mono õ wamhã, pizaꞌa ꞌre baihâ ꞌmanharĩ tede hã, da te ꞌre tataꞌa zaꞌra mono wa, ꞌre wamreme ꞌrãihâ zaꞌra mono wa, da te ꞌre iwapari a zaꞌra mono ne, wa aré taré te dama ꞌre arowasuꞌu. Ãne wamhã, marĩ dai õ di aré tô, dama ꞌre ĩnhimirowasuꞌu mono zé hã.
2 ꞌRe ihâimana uꞌâsi mono hã te dama ꞌre sadawa wasuꞌu wẽ mono nherẽ, duré uburé roti hã ĩma waihuꞌu pese nherẽ, duré uburé rowaihu hã dama iwaihuꞌuꞌõ hã ĩma waihuꞌu pese nherẽ, ĩnhimizawi pese zé hã ĩma ꞌre hâimana mono õ wamhã tarére, wa aré ꞌre ĩhâimana, ꞌRe ihâimana uꞌâsi mono ma hã. Marĩ dai õ di tô aré, ꞌre ĩhâimana mono zé hã. Ãté ĩma waihuꞌu pese di aré, te tãma nharĩ da, ẽtẽ ꞌrãihâ ma, siꞌré da, tizabzém nhiti, ꞌRe ihâimana uꞌâsi mono si, te ꞌre umnhasi mono wa. Ãne da, ꞌRe ihâimana uꞌâsi mono te ꞌre umnhasi mono nherẽ, ĩnhimizawi pese zé hã ĩma ꞌre hâimana mono õ wamhã, aré marĩ dai õ di tô duré, ꞌre ĩhâimana mono zé hã.
3 Duré uburé ĩnhibro hã isibrobꞌõ norĩ ma, te tãma ꞌre anhomri mono nherẽ, ĩnhimizawi pese zé hã ĩma ꞌre ihâimana mono zarinai õ wamhã, aré tô tarére hã, dama ãma ꞌre ĩnhoprub mono zé hã. Duré isazeiꞌwa ꞌre ĩhâimana mono wa, da te ꞌre ĩꞌruiwapari mono zéb zarina, da te dasiwi ĩzata da, duré dawi ĩsihâiba zawi õ nherẽ, tane nherẽ, aré duré tarére, ĩnhimiꞌmanharĩ wẽ zé hã, ĩnhimizawi pese zé ĩma ꞌre hâimana mono õ wamhã.
4 E niha tawamhã, danhimizawi pese na, Cristuhu ãma za ꞌre idahâimana zaꞌra mono zé hã. Isazeiꞌwa norĩ hã simizawi pese na ꞌre hâimana zaꞌra mono wamhã, marĩ na daꞌãma ꞌre waꞌa suꞌu zaꞌra mono õ di za. Daꞌãma ꞌre ipẽꞌẽzé zaꞌra mono zarina, te za tô te te ꞌre dapawaptob uꞌâsi zaꞌra, daꞌãma ꞌre isiwãrĩ zaꞌra mono na hã. Duré marĩ na ꞌre siꞌruiwapari zaꞌra mono õ di za. Duré tiwẽ na sina ꞌre wata zaꞌra mono õ di za. Duré danhipai u pire na ꞌre ihâimana zaꞌra mono na, ꞌre siꞌmadâꞌâ ze zaꞌra mono õ di za.
5 Duré hâimana nhiséb ãna, daꞌãma ꞌre to zaꞌra mono õ di za. Duré ꞌrâwi tihâimanazéb da si, te te siꞌãma ꞌre rosaꞌrata zaꞌra mono õ di za. Duré wara sina, dazada ꞌre sitiꞌru zaꞌra mono õ di za. Duré da te tãma ꞌre robꞌmanharĩ wasété zaꞌra mono wamhã, dawasédé te te daꞌãma ꞌre ꞌmadâꞌâ uꞌâsi zaꞌra mono õ di za. Ãne isazeiꞌwa norĩ, simizawi pese na ꞌre ihâimana zaꞌra mono zéb da hã.
6 Isazeiꞌwa norĩ, simizawi pese na ꞌre ihâimana zaꞌra mono zéb da hã. Dahâimana wasété na ꞌre idahâimana zaꞌra mono zé wasuꞌu hã te te ꞌre wapari zaꞌra mono wamhã, te te ãma sima ꞌre rowẽ zaꞌra mono õ di za, isazeiꞌwa norĩ hã. ꞌRe idanomro wẽ mono zé wasuꞌu na si, te za ãma ꞌre toi uptabi zaꞌra, sena na.
7 Duré, da te tãma ꞌre robꞌmanharĩ wasété uꞌâsi zaꞌra mono nherẽ, tiwi ꞌre robzeiꞌõ zaꞌra mono õ di za. Duré dawasété wasuꞌu hã te te ꞌre wapari zaꞌra mono wamhã, awaꞌawi te te siwi ꞌre dawẽꞌõ zaꞌra mono õ di za. Iwẽ si, da te ꞌre ꞌmanharĩ uꞌâsi zaꞌra mono da si, te za te te sima ꞌre dawẽ zaꞌra. Duré da te tãma ꞌre robꞌmanharĩ wasété zaꞌra mono nherẽ, duré te te ꞌre robzépata zaꞌra mono nherẽ, te za siptete sina ꞌre hâimana uꞌâsi zaꞌra, simiꞌẽ na. Ãne isazeiꞌwa norĩ hã simizawi pese uptabi na, ꞌre ihâimana zaꞌra mono zé hã za.
8 Isazeiꞌwa norĩ hã, ꞌRe ihâimana uꞌâsi mono te te dama ꞌre isadawa wasuꞌu zaꞌra mono zé hã, niwapsi te za te te tiwi ꞌre anhihâri, ꞌRe ihâimana uꞌâsi mono hã, ta norĩ hã te te dama ꞌre sadawa wasuꞌu zaꞌra mono tõ da oto. Duré isazeiꞌwa norĩ hã timreme nai õ nherẽ, damreme amo na te te dama ꞌre irowasuꞌu zaꞌra mono zé hã, te za duré te te tiwi ꞌre anhihâri. Duré ꞌRe ihâimana uꞌâsi mono Pẽꞌẽzani na, da te ꞌre irowaihuꞌu zaꞌra mono zé hã, niwapsi te za duré te te dawi ꞌre anhihâri. Isazeiꞌwa norĩ nhimizawi pese zép si, siꞌutõrĩ waihuꞌu õ di za. Taha si, te za õne uꞌâ ꞌre hâimana uꞌâsi.
9 Wa norĩ hã ꞌRe ihâimana uꞌâsi mono Pẽꞌẽzani na, wa te ꞌre irowaihuꞌu zaꞌra mono zé hã, wama waihuꞌu pese zaꞌra õ di, uburé hã. Suru na, wa tô wa te ꞌre waihuꞌu zaꞌra. Duré ꞌRe ihâimana uꞌâsi mono zadawa wasuꞌu hã, uburé wama waihuꞌu pese zaꞌra õ di. Taha zama, wa tô duré suru na wa te ꞌre waihuꞌu zaꞌra.
10 Tane nherẽ, nimahã bâtâ na Zezusi hã apâ wei morĩ wamhã, isine za oto ꞌre wahâimana zaꞌra mono wa, tâibâ za oto suru na ꞌRe ihâimana uꞌâsi mono zadawa wasuꞌu, wa te ꞌre iwaihuꞌu zaꞌra mono zé hã. Duré tâibâ za oto suru na Ipẽꞌẽzani na, wa te ꞌre irowaihuꞌu zaꞌra mono zé hã.
11 Wa hã aiꞌuté na ꞌre ĩhâimana mono ré hã, aiꞌuté mreme na, wa tô ꞌre ĩmreme aré. Duré aiꞌuté nhimirosaꞌrata na, wa tô te ꞌre rosaꞌrata aré, ĩpẽꞌẽ ꞌremhã. Tane nherẽ, oto ĩprédu wamhã, aiꞌuté hâimanazém ne na, ꞌre ĩhâimana mono õ di oto. Wa tô oto rẽme pese, aiꞌutére ré ꞌre ĩhâimana mono zé hã.
12 Tane duré, wa norĩ hã dasiꞌmadâꞌâzé iꞌuzurire na ãma ꞌre idasiꞌmadâꞌâ pibui prã zaꞌra mono ne, ꞌRe ihâimana uꞌâsi mono hâimanazé hã wama waihuꞌu prã zaꞌra di, tiꞌai ãma ꞌre wahâimana zaꞌra mono ré hã. Tane nherẽ, nimahã na si, wa za ꞌrâwi wa te ꞌre ꞌmadâꞌâ zaꞌra oto, ꞌRe ihâimana uꞌâsi mono hã. Tawapsi wama waihuꞌu pese zaꞌra di za oto, ꞌRe ihâimana uꞌâsi mono hâimanazé hã. ꞌRe iwahâimana zaꞌra mono zém na, te te ꞌre iwaꞌawaihuꞌu pese mono ne, wama waihuꞌu pese zaꞌra di za oto duré.
13 Ãne, wa za oto aima ãma ꞌrãsutu zaꞌra waꞌwa, isazeiꞌwa norĩ nhimizawi pese hâimanazém na hã. ꞌRe ihâimana uꞌâsi mono hã da te dasina ꞌre iꞌumnhasi pese zaꞌra mono zé hã, siꞌutõrĩ õ di za. Duré ꞌRe ihâimana uꞌâsi mono umnhasi sina, iwẽ zô dasina ꞌre idanhimipari zaꞌra mono zé hã, siꞌutõrĩ õ di za. Duré ꞌre idanhimizawi pese zaꞌra mono zéb zama hã, siꞌutõrĩ õ di za. E ma hã tawamhã, danhipai u ipire uptabi. ꞌRe idanhimizawi pese zaꞌra mono zé, ta hã danhipai u, ipire uptabi na te za ꞌre hâimana.
