1 Timotiu 1:1-20
1 Wa hã Paulu, Cristu Zezusihi zadawa wasuꞌuꞌwa, ꞌRe ihâimana uꞌâsi mono Waꞌanhoꞌreptuiꞌwa te te iꞌruzéb zarina duré Cristu Zezusi te te iropisutuzéb zô wasiwawãi ãna ꞌre iwanhimipari zaꞌra mono te te iꞌruzéb zarina,
2 wa ãma aima robꞌuiꞌéré Timotiu, ĩꞌra uptabi ne ĩma ꞌre iꞌaihâimana mono, isazeiꞌwai wa.
Wamama ꞌRe ihâimana uꞌâsi mono duré Wanhibꞌapito Cristu Zezusihi zama, isimizawi zahuré zé duré daꞌãma ꞌre isiba zahuré mono zé duré ite rowẽ uꞌâsi zahuré hã, aiꞌãma ꞌre ihâimana uꞌâsi zaꞌra mono da si, iwẽ hã.
3 Wa ãma aiwi waptẽ, tô aꞌâ aihâimana Éfézu ãma hã. Masédonia na danhiptiꞌa nhoꞌõmo nhisi u ĩmorĩ wa, te aꞌâ aiꞌãma iropti ne, wa aiꞌãma ropti. Tame ꞌri nhoꞌõmo ꞌremhã, niꞌwam norĩ hã te te dama ꞌre roti zaꞌra, roti aimawi senaiꞌõ na. Ta norĩ ma, maꞌãpé aimreme tãma pẽtẽ zaꞌra na, te te sahâri zaꞌra da.
4 Tãma nharĩ zaꞌra na, ta norĩ ma, dahiꞌrata hawi robꞌrãzarõtõ na si ꞌre ꞌrãzaꞌõtõ zaꞌra mono tõ da, duré dahiꞌrata norĩ nhisi ahâ uptabi na ꞌre ihâimana zaꞌra mono na zama ꞌre rĩtĩ nhoꞌõmo zaꞌra mono tõ da. E marĩ wa. Taha zarina taré ãma ꞌre dasisadaꞌâbâ zaꞌra mono wa. Ta norĩ hã ꞌRe ihâimana uꞌâsi mono te te ꞌre irowaꞌõtõ mono zarinai õ di. Te te ꞌre iꞌarowaꞌõtõ mono zé hã, da te dasina ꞌre iꞌumnhasi zaꞌra mono zarina si te za da te ꞌre waihuꞌu zaꞌra.
5 Ãne, wa ãma aima roti, da te ꞌre waihuꞌu zaꞌra mono da, ã hã: Niꞌwai ma ipẽꞌẽ ꞌre duré isimirosaꞌrata ꞌremhã marĩ iwasédé tãma ꞌre hâimana mono õ wamhã, duré sena na ꞌRe ihâimana uꞌâsi mono te te sina ꞌre umnhasi mono wamhã, taha zarina te za te te ꞌre daꞌazawi pese, ta hã.
6 Niꞌwam norĩ hã, ãne nhiti ma tô sina tipahâ zaꞌra, marĩ dai õ na si ꞌre sisadaꞌâbâ zaꞌra mono da.
7 Ta norĩ hã te te sima ꞌre wẽ pese zaꞌra, ꞌRe ihâimana uꞌâsi mono nhimiroti zahi na dama rowahutuꞌwa na ꞌre hâimana zaꞌra mono da. Tane nherẽ, ꞌre sisadaihuꞌu zaꞌra mono õ di ꞌrâwimhã, te te ꞌre irowahutu zaꞌra mono zém na, duré sima hã sena newa te te ꞌre irowahutu zaꞌra mono zéb zama, siwawãi ãna.
8 Wa waihuꞌu zaꞌra ni, ꞌRe ihâimana uꞌâsi mono nhimiroti zahi iwẽ uptabi na hã, iꞌuwaibaba na ãma ꞌre dahâimana zaꞌra mono wamhã.
9 Wa duré waihuꞌu zaꞌra ni, iꞌuwaibaba na ꞌre ihâimana zaꞌra mono norĩ ma rotizéb da, ꞌre ihâimana mono õ na hã. Tazahã, ꞌRe ihâimana uꞌâsi mono nhimiroti te te ꞌre iwẽꞌõ zaꞌra mono norĩ ma si rotizéb da, te ꞌre hâimana, duré dama ipire norĩ te te ꞌre iwazéb zaꞌra mono õ norĩ ma duré ꞌRe ihâimana uꞌâsi mono zazeiꞌõꞌwa norĩ ma duré tiwasété si te te ꞌre iꞌmanharĩ zaꞌra mono norĩ ma duré ꞌRe ihâimana uꞌâsi mono wazéb õ ꞌwa norĩ ma, duré marĩ te te ꞌre iꞌmanharĩ wasété zaꞌra mono ꞌRe ihâimana uꞌâsi mono wazéb ãna, duré timama tina zama te te ꞌre isimroi mono norĩ ma, duré te te ꞌre idanhimroi mono norĩ ma zama.
10 Duré siséb ãna dasina dahâimana na ꞌre ihâimana zaꞌra mono norĩ ma rotizéb da hã duré aibâ siꞌuiwa sina ꞌre ihâimana zaꞌra mono piꞌõ siꞌuiwa zama, duré dawadaꞌuri zarina dama romhuriꞌwa da, te te dama ꞌre idawede zaꞌra mono norĩ ma, duré isadawa nhipese norĩ ma duré daꞌãma rowairébézéb ãma daꞌãma rowairébéꞌwai ma senaiꞌõ nherẽ, te te ꞌre idawasuꞌu wasété zahi zaꞌra mono norĩ ma duré siwaꞌru marĩ te te ꞌre iꞌmanharĩ zaꞌra mono norĩ ma rotizéb da hã, tô sena ꞌRe ihâimana uꞌâsi mono nhimiroti zada.
11 Ã hã roti, ꞌRe ihâimana uꞌâsi mono te te ĩma isõmri te dama ꞌre ꞌmahârâ mono da, ta hã Rowasuꞌuwẽ ité ꞌRe ihâimana uꞌâsi mono iwẽ uptabi hawimhã.
Paulu hã Wanhibꞌapito ãma iwatazé, ãma ꞌre isiwamri mono zém na
12 Wanhibꞌapito Cristu Zezusihi ãma wa ĩwata, ĩnhiptede te te ĩma ꞌre isõmri mono zém na, ĩnhimiromhuri te ꞌre iꞌmanharĩ mono da hã. Tãma ĩꞌumnhasi na te te ꞌre ĩꞌmadâꞌâ mono wa, wa duré ãma ĩwata, duré te te sima ĩpisutu wa, te tãma ꞌre romhuri mono da hã.
13 Ãne hã ma tô Õ hã ꞌmanha, duréihã te ãma ꞌre wasété mono nherẽ, duré iꞌuꞌâbâ isazeiꞌwa norĩ ma, te ꞌre arobꞌmanharĩ wasété mono nherẽ, duré ĩzahi na sada ꞌre ĩhâimana zaꞌra mono nherẽ. Tane nherẽ, ꞌRe ihâimana uꞌâsi mono hã ma tô ĩꞌãma aiwamri, te ĩsina ꞌre iꞌumnhasi mono zé hã ĩma ꞌre hâimana mono õ wa aré. Tahawa ĩsisãmri ãna wa tô marĩ te ꞌre abꞌmanharĩ, iꞌuwaibaba newa.
14 Wanhibꞌapito nhimizawizé hã saꞌẽtẽ uptabi na ma tô ĩꞌãma tihâiba. Duré isimizawizép siré ma tô oto ĩꞌãma tihâiba, te ĩsina ꞌre iꞌumnhasi mono zé hã duré ĩnhimizawizé Cristu Zezusihi ãma ꞌre ihâimana mono hã.
15 Ã hã iwasuꞌu hã tô sena uptabi. Duré tô sena na te ꞌre hâimana, da te ꞌre isaze zaꞌra mono da hã, ã hã: Cristu Zezusi hã tiꞌai u ma tô wei mo, wasété na ꞌre inomro mono norĩ hã te te ꞌre anhoꞌreptui mono da. Wa hã, wasété na ꞌre ihâimana zaꞌra mono norĩ nhipai u, wa ꞌre ĩhâimana, ĩwasété uptabi na.
16 Tane nherẽ, ãne zarina ma tô ꞌRe ihâimana uꞌâsi mono hã ĩꞌãma aiwamri, Cristu Zezusi hã daꞌãma waꞌa suꞌu ãna ꞌre ihâimana mono zé hã te te ĩꞌãma hâiꞌré da. Tahawa te za ã hã ꞌre hâimana, romhutuꞌõ te te ꞌre isaze zaꞌra mono norĩ, Cristu hã daꞌãma iwaꞌa suꞌu õ na te te ãma ꞌre iwaihuꞌu zaꞌra mono zéb da hã, ĩꞌãma iwaꞌa suꞌu õ ne, dahâimanazé isiꞌutõrĩꞌõ za te te sina ꞌre iꞌuwaimrami zaꞌra mono norĩ hã.
17 Tahawa Apito isiꞌutõrĩ waihuꞌuꞌõ ãma duré idâꞌâ waihuꞌuꞌõ ãma duré ꞌmadâꞌâ waihuꞌu ãna ꞌre ihâimana mono ãma, misi pese ꞌRe ihâimana uꞌâsi mono ꞌre ihâimana mono ãma, wa za ãma ꞌre wawata zaꞌra, pire uptabi wa duré wẽ uptabi wa, õne uꞌâsi! Tane tô!
18 Timotiu, ĩꞌra uptabi ne ĩma ꞌre iꞌaihâimana mono, ã hã ĩnhimiroti wa aima tisõ. Ã hã ꞌRe ihâimana uꞌâsi mono Pẽꞌẽzani hawi, da te aiꞌãma iwaihuꞌu siromo zéb zarina, duréihã. Ã hã aimapazéb da, aima ꞌre ihâimana mono da si, ãma ꞌre aiꞌwapéi wẽ mono da!
19 Maꞌãpé ꞌRe ihâimana uꞌâsi mono asina ꞌre iꞌumnhasi mono zé hã asima ꞌre ꞌmadâꞌâ pese mono. Duré asimirosaꞌrata ꞌremhã marĩ iwasédé te te aiwi ꞌre roꞌwaꞌré mono tõ, ꞌre iꞌaimorĩ wẽ zéb zarina. Niꞌwam norĩ hã isimirosaꞌrata ꞌre marĩ te te tiwi ꞌre roꞌwaꞌré zaꞌra mono nherẽ, te te ꞌre wapari zaꞌra mono õ di. Tihâimanazém na te ta norĩ hã te te ãma ꞌre uzusi zaꞌra. Tahawa te tiwi ꞌre siꞌutõrĩ zaꞌra, ꞌRe ihâimana uꞌâsi mono te te sina ꞌre iꞌumnhasi zaꞌra mono zé hã.
20 Isiré zaꞌra hã te tihâimana zahuré Imeneu norĩ hã Alesãdrihi me, Satanasihi ma, te ihâiba nhomri zahuré hã te te waihuꞌu zahuré da, ꞌRe ihâimana uꞌâsi mono ãma te te oto ꞌre wasété zahuré mono tõ da.
