1 Timotiu 2:1-15
2 Uburé marĩ nhipai u wa za ãma waptẽ, ãne: ꞌRe ihâimana uꞌâsi mono wi uburé da te ꞌre rowaptẽrẽ zaꞌra mono, uburé marĩ dawi sô ꞌre irowaptâꞌâ zaꞌra mono na duré ãma ꞌre dawata zaꞌra mono da, marĩ te te ꞌre iꞌabꞌmanharĩ mono zém na, uburé dama.
2 Duré da te ꞌre rowaptẽrẽ zaꞌra mono, apito norĩ daro mono bâ ꞌre ihâimana zaꞌra mono ãma duré uburé dama ipire na ꞌre ihâimana zaꞌra mono norĩ ãma, wasima iwẽ na rowẽ sina duré rowẽ zaꞌẽtẽ uꞌâsi ré, ꞌRe ihâimana uꞌâsi mono ma si ꞌre wahâimana zaꞌra mono da, duré uburé dawazép sina.
3 Ã hã iwẽ uptabi. Duré ꞌRe ihâimana uꞌâsi mono Wanhoꞌreptuiꞌwai ma, te te ꞌre irowẽ zani mono.
4 Te te sima ꞌre wẽ, uburé danhoꞌreptuzé da te dasina ꞌre uwaimrami zaꞌra mono da, duré tô sena isimiroti hã da te ꞌre waihuꞌu zaꞌra mono da zama.
5 E marĩ wa. Misire te ꞌRe ihâimana uꞌâsi mono hã ꞌre hâimana. Duré misire daꞌãma isitoꞌwa, ꞌRe ihâimana uꞌâsi mono siré ꞌre dahâimana zaꞌra mono da hã. Ta hã Cristu Zezusi tiꞌai ãma aꞌuwẽ na ipodo.
6 Ta hã ma tô dazada sisõ, dawasété hawi uburé te te ꞌre daꞌawaꞌâbâ mono da. Ã hã ãma iwaihuꞌuzé, bâdâ iꞌuwaibaba na ꞌRe ihâimana uꞌâsi mono te te sima iwẽ uptabi na hã, uburé danhoꞌreptuzé da te dasina ꞌre uwaimrami zaꞌra mono da.
7 Taha da, ꞌRe ihâimana uꞌâsi mono hã ma tô ĩpisutu, Cristuhu zadawa wasuꞌuꞌwa da, duré Zudeuꞌõ norĩ ma rowahutuꞌwa na ꞌre ĩhâimana mono da, da te dasina ꞌre iꞌumnhasi mono zém na rowasuꞌuwẽ hã duré tô sena isimiroti hã te tãma ꞌre ꞌmahârâ zaꞌra mono da. Ĩzadawa nhipese õ di. Tô sena wa ĩsiwasuꞌu.
8 Tahawa, wa ĩsima wẽ, uburé aibâ norĩ ropâ ꞌre ihâimana zaꞌra mono hã te te ꞌre rowaptẽrẽ zaꞌra mono da, hâimo ꞌre simiwẽ zaꞌra mono sina, ꞌRe ihâimana uꞌâsi mono ma si ꞌre sisõmri zaꞌra mono sina, ꞌre sitiꞌru zaꞌra mono ãna duré te te ꞌre dawasu zaꞌra mono ãna.
9 Tane, wa duré ĩsima wẽ, piꞌõ norĩ hã iꞌuza uburé ihâiba te te ꞌre iꞌubu zaꞌra mono na ꞌre siꞌuza zaꞌra mono da, aibâ norĩ hã te te sima ꞌre ꞌmadâꞌâ ze zaꞌra mono zô ꞌre siꞌuza wamnarĩ zaꞌra mono ãna. Duré ꞌre siséré tété wamnarĩ pese zaꞌra mono õ di za, da te ꞌre ꞌmadâꞌâ ze zaꞌra mono zô. Duré ẽtẽ waipo pré oru na ꞌre siwamnarĩ pese zaꞌra mono õ di za, duré ẽtẽ waipo perola na isisi na. Duré daꞌuza iwaꞌâbâ zaꞌẽtẽ na ꞌre siꞌuza zaꞌra mono õ di za.
10 Tazahã, tihâimana wẽ na si ꞌre siwamnarĩ zaꞌra mono, ꞌRe ihâimana uꞌâsi mono ma si ꞌre ihâimana wẽ zaꞌra mono na, ꞌre isiwasuꞌu zaꞌra mono norĩ ne.
11 Piꞌõ norĩ hã ariꞌiwi na te za te te ꞌre rowaihuꞌu zaꞌra, isazeiꞌwa norĩ siré ꞌre isiꞌrãꞌõtõ mono ꞌremhã, rowahutuꞌwa norĩ zahâpâ ꞌre isiꞌmadâꞌâ zaꞌra mono zarina.
12 Te ꞌrui õ di, piꞌõ norĩ hã te te ꞌre irowahutu zaꞌra mono da hã. Duré aibâ norĩ ma, simiroti pire na ꞌre ihâimana zaꞌra mono da hã, te ꞌrui õ di. Ariꞌiwi te za tô ꞌre hâimana zaꞌra, da te ꞌre rowahutu zaꞌra mono ré hã.
13 E marĩ wa. Adãhã uimrehẽne ꞌRe ihâimana uꞌâsi mono hã te te poto naꞌrata wa. Taha parip si Eva hã te te duré poto wa.
14 Duré Adãhã ma, Waꞌuburé hã te te robꞌrãmi õ di. Piꞌõi ma si ma tô sadawa hapese. Tahawa ta hã ma tô ꞌRe ihâimana uꞌâsi mono nhimiroti zahi hã tirẽ.
15 Tane nherẽ, piꞌõ norĩ hã ꞌRe ihâimana uꞌâsi mono te za te te ꞌre anhoꞌreptu, iꞌra tãma ꞌre rereꞌe mono da, iwasã ãma ꞌre sépuꞌu zaꞌra mono wamhã. Ãne hã te za tãma ꞌre romhâimana zaꞌra, Cristu hã te te ꞌre isaze zaꞌra mono zém na te te ãma ꞌre uzusi zaꞌra mono wamhã, duré te te ꞌre idazawi zaꞌra mono zém na duré ꞌRe ihâimana uꞌâsi mono te te sima ꞌre iwẽ mono zé te te ꞌre iꞌmanharĩ zaꞌra mono zém na duré iꞌuwaibaba na ꞌre ihâimana zaꞌra mono na, da te ꞌre iꞌmadâꞌâ ze zaꞌra mono zém na zama.
