2 Corĩtu 6:1-18
6 Wa norĩ hã ꞌRe ihâimana uꞌâsi mono siré, wa te tãma ꞌre iromhuri zaꞌra mono norĩ hã, wa za oto aima ãma roti pese zaꞌra waꞌaba ni. ꞌRe ihâimana uꞌâsi mono, ma tô tinhimizawi pese zéb zarina, aima ꞌre sõprub zaꞌra waꞌwa, iwẽ na hã. Tahawa, isazeiꞌwa na taré dama ꞌre asiwasuꞌu zaꞌra waꞌaba mono õ di za. ꞌRe aihâimana zaꞌra waꞌaba mono zém na, te za asa iwaꞌrãmi asina tãma ꞌre iꞌuwaimrami uꞌâsi zaꞌra waꞌaba mo, ꞌRe ihâimana uꞌâsi mono ma hã.
2 Duréihã Izaias hã ma tô ꞌRe ihâimana uꞌâsi mono mreme na robꞌuiꞌéré, ãne:“Aiꞌãma ĩpẽꞌẽzézéb da, bâdâ te ĩsima ipisutuzém na, wa tô aiwapa. Te iꞌasõꞌreptuzéb da, bâdâ hã iwa waptãꞌã wamhã, wa tô aipawapto tô.”
Maꞌãpé, ĩwapari pese zaꞌra waꞌaba. Bâdâ ma tô oto iwa waptãrã, ꞌRe ihâimana uꞌâsi mono nhimizawi pese zé hã asiꞌuihâ na asima tiwi waptẽrẽ zaꞌra waꞌaba da, duré te te asõꞌreptu zaꞌra waꞌaba da.
3 Wa norĩ hã wa tô ꞌrâwi ꞌre wasiꞌmadâꞌâ zaꞌra, ꞌre iwanomro wẽ mono zéb zô, niꞌwam norĩ hã wahâimanazém na te te ꞌre waꞌmadâꞌâ zaꞌra mono wa, taha zarina, tiwasété na oto ꞌre siꞌmarõpãrĩ zaꞌra mono tõ da, Cristuhu wasuꞌuwẽ hã duré te te siwi ꞌre wẽꞌõ zaꞌra mono tõ da. Wa te dama ꞌre iromhuri zaꞌra mono zé hã, da te dasiwi ꞌre wẽꞌõ zaꞌra mono tõ da, wa ãne na ꞌrâwi wapẽꞌẽ ꞌremhã ꞌre wasiꞌmadâꞌâ zaꞌra, wa norĩ hã.
4 A norĩ waꞌwa hã, ꞌRe ihâimana uꞌâsi mono ma, wa te ꞌre iromhuri zaꞌra mono zém na si, asiwi wawaihuꞌu zaꞌra waꞌaba da, wa uburé marĩ hã wẽ na wa te ꞌre ꞌmanharĩ zaꞌra. E niha tawamhã, ꞌre iwahâimana zaꞌra mono zé hã. Uburé marĩ na, wa te ꞌre robzépata zaꞌra mono nherẽ, duré rowasédé hã wazada ꞌre wairébé uꞌâsi mono nherẽ, wa wanhiptete sina ãma ꞌre wanomro uꞌâsi, wa te ꞌre sazeiꞌõ utõrĩ zaꞌra mono ãna.
5 ꞌRe ihâimana uꞌâsi mono zadawa ꞌmahârâꞌwa oto ꞌre wahâimana zaꞌra mono wa, ma tô da te dasiwi ꞌre wahâ zaꞌra. Ma tô duré dasiwi da te ꞌre wanheme, dazazéb ꞌre. Wazada ꞌre dahâimana wasété zaꞌra mono wa, te da te wawi ꞌre roꞌwaꞌrutu uꞌâsi zaꞌra, Wanhibꞌapito, wa te dama ꞌre sadawa wasuꞌu zaꞌra mono ré hã. Wanhimiromhuri na, wa duré dama ꞌre wasiwasutu zaꞌẽtẽ uꞌâsi zaꞌra, Wanhibꞌapito wasuꞌuwẽ na hã. Ãne wamhã, wanhotõ ãna ma tô duré waꞌãma ꞌre awẽ zaꞌra, nimahã mara na hã. Wasai ãna, wa duré nimahã bâtâ na hã ꞌre wasiꞌubumro.
6 Ãne na, wa te ꞌre robzépata zaꞌra mono nherẽ, wa tô ꞌre wanomro wẽ uꞌâsi. ꞌRe ihâimana uꞌâsi mono nhimirowaihuꞌu si, wa tô oto wa te ꞌre waihuꞌu pese zaꞌra. Tahawa, wawara sina hã duré oto dazada ꞌre wazahi zaꞌra mono õ di oto. Wanhimizawi pese na si hã, wa oto duré ꞌre wahâimana zaꞌra. ꞌRe ihâimana uꞌâsi mono Pẽꞌẽzani nhimipawaptobzéb zarina si, wa duré wa te dama ꞌre romhuri zaꞌra. Wazadawa nhipese ãna, wa sena na si, wa te ꞌre dazawi pese zaꞌra. Ãne zarina, te za asiwi iwawaihuꞌu zaꞌra waꞌwa, sena na ꞌRe ihâimana uꞌâsi mono zadawa ꞌmahârâꞌwa, dama ꞌre iwahâimana zaꞌra mono na hã.
7 Iwasuꞌuwẽ hã wa tô, tô sena na hã wa te dama ꞌre wasuꞌu zaꞌra. ꞌRe ihâimana uꞌâsi mono waihuꞌu pese zarina si, wa tô ãne na wa te dama ꞌre romhuri zaꞌra. ꞌRe iwanomro wẽ mono zém na si, wa tô wanhitobꞌru norĩ da, ꞌre wahâimana zaꞌra, ta norĩ ãma, wa te ꞌre aiꞌuté zaꞌra mono da. Taha na, wa duré ta norĩ ãma ꞌre wasimanawawi uꞌâsi zaꞌra, wanhitobꞌru norĩ ãma hã.
8 Ãne na te za tô asiwi iwawaihuꞌu zaꞌra waꞌwa, sena na ꞌRe ihâimana uꞌâsi mono zadawa ꞌmahârâꞌwa, dama ꞌre iwahâimana zaꞌra mono na hã. Tahawa, te niꞌwam norĩ hã ꞌre iwanomro wẽ mono zém na te te waꞌãma ꞌre rosaꞌrata zaꞌra. Te te duré dama ꞌre wawasuꞌu wẽ zaꞌra. Tane nherẽ, te niꞌwam norĩ hã te te waꞌãma ꞌre wasété zaꞌra taré. Te duré te te dama ꞌre wawasuꞌu wasété zaꞌra. Sena na dama ꞌre wasiwasuꞌu uꞌâsi zaꞌra mono nherẽ, te wazadawa nhipe hã te te waꞌãma ꞌre saꞌra uꞌâsi.
9 Wa norĩ hã daro mono bâ isazeiꞌwa norĩ ma, wawaihuꞌu pese zaꞌra nherẽ, te niꞌwam norĩ hã tarére na si te te waꞌãma ꞌre rosaꞌrata zaꞌra. Wa te wasina ꞌre romnhimimnhasi uꞌâsi zaꞌra mono wa, aré ꞌre wadâꞌâ zaꞌra mono da nherẽ, wa zahadu wahâiba ré ꞌre wahâimana zaꞌra. Da te ꞌre wahâ zaꞌra mono nherẽ, da te dasiwi waꞌuprosi waihuꞌu õ di.
10 Nimahã bâtâ na, da te dasina ꞌre wapẽꞌẽzé zani zaꞌra mono nherẽ, wa watoi uꞌâsi ꞌre wahâimana zaꞌra, ꞌRe ihâimana uꞌâsi mono ãma si. Duré wanhibrobꞌõ na ꞌre wahâimana zaꞌra mono nherẽ, wa wa te ꞌre dapawaptob zaꞌra, iwasuꞌuwẽ na si, danhibro pese ne, rowẽ na ꞌre dahâimana uꞌâsi zaꞌra mono da, ꞌRe ihâimana uꞌâsi mono siré. Wa norĩ hã wanhimarĩ õ nherẽ, ꞌRe ihâimana uꞌâsi mono, uburé te te wama ꞌre iꞌanhomri mono ré si, wa oto ꞌre wanomro, iwẽ uptabi ré si.
11 6:11-12 Corĩtu ãma ꞌre aihâimana zaꞌra waꞌaba mono norĩ, sõꞌawi wa tô aima ꞌre wasiwasuꞌu zaꞌra waꞌwa, ꞌre iwahâimana zaꞌra mono zém na hã. Aiwi ꞌre wasiꞌudâ waihuꞌu zaꞌra waꞌaba mono õ di. Wanhimizawizém na, wa te duré ꞌre aiꞌmararé zaꞌra waꞌaba mono õ di. A norĩ waꞌaba si te asimizawizém na ꞌre iwaꞌmararé zaꞌra waꞌaba mo.
12 ꞌMadâꞌâ 6:11
13 Tahawa, ĩꞌra ne oto ĩma ꞌre aihâimana zaꞌra waꞌaba mono wa, wa za ãne na aima roti zaꞌra waꞌwa, te asawi pese zaꞌra waꞌaba sina: Maꞌãpé, aipẽꞌẽ na asiwi ꞌre wazawi pese zaꞌra waꞌaba mono, wa norĩ hã wapẽꞌẽ na, wa te ꞌre iꞌasawi pese zaꞌra waꞌaba mono ne.
Aiwab õ na ꞌre idahâimana zaꞌra mono zé wasuꞌu
14 Cristuhu zazeiꞌwa na ꞌre aihâimana zaꞌra waꞌaba mono norĩ, isazeiꞌõꞌwa norĩ hâimanazéb zu, ꞌre aihâimana zaꞌra waꞌaba mono õ di za oto. Rowaꞌa na ꞌre idanomro wẽ mono zé hã, duré robra na ꞌre idanomro wasété mono zé hã, e aiwa bâ. Mare di. Aiwab õ di. Tahawa, isazeiꞌõꞌwa norĩ siré, ꞌrâwi ꞌre aihâimana zaꞌra waꞌaba mono õ di za oto. Tôꞌã.
15 Cristu hã bété. E Satanasihi me, te siré ꞌre hâimana zahuré, aiwa. E tinhimirosaꞌrata na te duré ꞌre sisaze zahuré, ꞌre siwẽꞌõ zahuré mono ãna. Mare di. Tane duré, isazeiꞌwa norĩ hã aiwa ꞌre hâimana zaꞌra mono õ di, isazeiꞌõꞌwa norĩ me hã. Ãne hã baba uptabi di, wama hã.
16 Romhâiba ꞌmanharĩ hã ãma ꞌre idawata zaꞌra mono zé hã, e ꞌRe ihâimana uꞌâsi mono nhorõwa ꞌri ꞌre, te aré da te ꞌre saꞌra, ꞌri wa. Mare di. E marĩ wa. Aiwab õ wa, dama hã. Tane duré, wa norĩ hã ꞌRe ihâimana uꞌâsi mono ãma ꞌre iwata zaꞌra mono õ norĩ siré, ꞌre wahâimana waihuꞌu zaꞌra mono õ di za oto. E marĩ wa. ꞌRe ihâimana uꞌâsi mono hã wapẽꞌẽ ꞌre, waꞌãma ꞌre sõrõwa zaꞌra mono wa oto. Tahawa, ꞌRe ihâimana uꞌâsi mono nhorõwa ne, wa oto ꞌre wahâimana zaꞌra wasiré isazeiꞌwa norĩ hã, ꞌri ꞌrãihâ wam ne, wapẽꞌẽ ꞌre, ꞌre sãmra mono wa oto. Duréihã ꞌRe ihâimana uꞌâsi mono zadawa ꞌmahârâꞌwa norĩ hã ma tô imreme na robꞌuiꞌéré zaꞌra, romhâ ré isibꞌaꞌuwẽ norĩ ãma hã, ãne:“Ĩnhibꞌaꞌuwẽ norĩ siré, wa za oto ꞌre ĩhâimana uꞌâsi zaꞌra, ꞌrâwi iꞌrata. Wa za duré tô isiré ꞌre ĩmorĩ uꞌâsi zaꞌra.Isibꞌapito, wa za oto tãma ꞌre ĩhâimana zaꞌra.Tawamhã ĩnhibꞌaꞌuwẽ te za duré ĩma ꞌre hâimana zaꞌra.”
17 Ãne duré Uburé Danhibꞌapito mreme na robꞌuiꞌéré wasuꞌu amo hã:“Dapoꞌre ãna ꞌre idanomro mono norĩ hã, te za oto asiwi ꞌre irẽme zaꞌra waꞌaba mo, ta norĩ hâimana wasété zém nhiti, ꞌre aihâimana zaꞌra waꞌaba mono da oto.Dapoꞌreꞌõ norĩ hã uburé marĩ hã te te siwi ꞌre iꞌmanharĩ wasété zaꞌra mono zé hã, tiwi ꞌre upi zahu zaꞌra waꞌaba mono õ di za oto. Tawapsi, wa za oto ĩsitẽme te ꞌre aiwaibui wẽ waꞌwa.
18 Tawapsi, wa za duré Aimama zaꞌra waꞌaba na hã aima ꞌre ĩhâimana ꞌwa. Tawamhã ĩꞌra te za duré oto ĩma ꞌre aihâimana zaꞌra waꞌaba mo.”
