2 Timotiu 2:1-26
2 Tahawa, a hã Timotiu ĩꞌra uptabi ne ĩma ꞌre iꞌaihâimana mono, maꞌãpé ꞌre asiptete mono, ꞌRe ihâimana uꞌâsi mono rowaihu te te aima isõmri na, Cristu Zezusihi ãma ꞌre wahâimana zaꞌra mono wa, wama ꞌre ihâimana zaꞌra mono na.
2 Maꞌãpé ĩnhimirowahudu daꞌahâ nhoꞌa ãma ĩwapari hã, aibâ norĩ iꞌumnhasi norĩ ma, ãma ꞌre rowahutu mono, ta norĩ ma zama duré tãma ꞌre ihâimana zaꞌra mono da si iꞌrãiwaihu hã, te te ãma dama ꞌre rowahutu zaꞌra mono da.
3 Maꞌãpé ĩsiré ꞌre aihâimana mono, te ꞌre irobzépata mono na, Cristu Zezusihi te dasiꞌwapéi ꞌmanharĩꞌwa iwẽ ne.
4 Dasiꞌwapéi ꞌmanharĩꞌwa hã dasiꞌwapéi ꞌmanharĩꞌwa na ꞌre hâimana mono ré hã, rowi tihâimanazém na aꞌâ te te rosaꞌrata õ di za, isibꞌapito hã ihâimanazém na te te wẽsãmri da wamhã.
5 Tane duré dawara na iwaraꞌwa hã, dawara na roti zarina hâimana õ nherẽ, da te sõpre õ di za, dawi watobro nherẽ.
6 Duré buru na romhuri pire na romhuriꞌwa hã amnho tehâri parimhã, imorĩꞌrata na tô te te waibu, tite iꞌapo hã.
7 Te aima irotizém na, maꞌãpé ãma ꞌre rosaꞌrata uꞌâsi mono. Ãne wamhã, Wanhibꞌapito te za aima hâiꞌré, uburé marĩ ꞌre awaihuꞌu mono da.
8 Zezu Cristuhu ãma ꞌre aipoꞌre puꞌu uꞌâsi mono, dâꞌâ nherẽ, Imama te te ihâiwaꞌudu, duré Davihi nhihudu. Ã hã Rowasuꞌuwẽ ité, te dama ꞌre iꞌmahârâ mono.
9 Ã hã te dama ꞌre iwasuꞌu mono uꞌâbâ, wa te te ꞌre robzépata. Wa duré dazazéb ꞌremhã za, isiꞌuwazi nhorõ rutu na ĩpawasisi ré, rowasété ꞌmanharĩꞌwa ne. Tane nherẽ, ꞌRe ihâimana uꞌâsi mono nhimiroti hã pawasisi ré hâimana õ di.
10 Tahawa, wa uburé marĩ hã ĩnhimiꞌẽ na te ꞌre aꞌwapéi hâ, ꞌRe ihâimana uꞌâsi mono tinhibꞌaꞌuwẽ da, te te sima ipisutu zaꞌra norĩ zawi te. Ãne hã wa te te ꞌre ꞌmanharĩ, õ norĩ zama tinhoꞌreptuzé te te waibu da, Cristu Zezusihi ãma ꞌre ihâimana mono, duré rowẽ isiꞌutõrĩꞌõ zama.
11 Tô sena uptabi ã hã rowasuꞌu hã:“Cristuhu siré ꞌre wadâꞌâ zaꞌra mono wamhã*, isiré wa za duré ꞌre wahâimana zaꞌra.
12 Wanhimiꞌẽ na robzépada, wa te ꞌre ꞌwapéi hâ zaꞌra mono wamhã, Cristuhu siré wa za wapire na dama ꞌre wahâimana zaꞌra, apito na.Wa te ꞌre udâ zaꞌra mono wamhã, Õhõ zama te za duré te te ꞌre waꞌaꞌudâ.
13 Wa norĩ hã Cristuhu ma, sena na ꞌre wahâimana zaꞌra mono õ nherẽ, te ta hã sena uꞌâsi ꞌre hâimana. E marĩ wa. Õ hã hâimana siꞌahâ na sima hâimana waihuꞌu õ wa.”
14 Ã norĩ na ãma ꞌre apoꞌre puꞌu uꞌâsi mono, uburé ꞌre iꞌaꞌmadâꞌâ mono hã. Duré uburé ma ꞌre aꞌrui mono ꞌRe ihâimana uꞌâsi mono nhoꞌa, marĩ wasuꞌu uꞌâbâ ꞌre sisadaꞌâbâ zaꞌra mono tõ da. Dasisadaꞌâbâ hã marĩ dai õ uptabi di. Taré te za dawi roꞌwaꞌrutu, iwapariꞌwa norĩ wi hã.
ꞌRe ihâimana uꞌâsi mono, romhuriꞌwa te te ꞌre iꞌawẽsãmri mono
15 Asima sô ꞌre airĩtĩ mono, ꞌRe ihâimana uꞌâsi mono te te iꞌaiwẽsãmri na isõꞌre asab da, romhuriꞌwa hã te te upai õ wa, marĩ ma siséb ãna ihâimana ne, duré iꞌuwaibaba na si tô sena ꞌRe ihâimana uꞌâsi mono nhimiroti na te te dama ꞌre rowahutu mono wa.
16 Robzanhamri iwasété wi romhâ na ꞌre aihâimana mono, tiꞌai ꞌre marĩ na da te dasima ꞌre irobzanhamri zaꞌra mono wi. E marĩ wa. Ta norĩ hã ꞌRe ihâimana uꞌâsi mono nhiti dasina ꞌre dapahâ zaꞌra mono da, te te dama ꞌre ꞌmanharĩ zaꞌra mono wa.
17 Rowahutuꞌwa senaiꞌõ norĩ te te ꞌre irowahutu zaꞌra mono zé hã te waptu na te te ꞌre ropé, gangrena na daꞌwaꞌre isisi ne. Maparane rowahutuꞌwa senaiꞌõ norĩ dasiré ihâimana zahuré nhisi hã, Imineu duré Filetuhu me.
18 Ta norĩ hã ma tô apa zahuré, tô sena ꞌRe ihâimana uꞌâsi mono nhimiroti wi hã. Ta norĩ hã te te ꞌre rowahutu zahuré, ꞌre idahâiwaꞌutu pari zaꞌra mono na. Ãne na te niꞌwam norĩ wi te te ꞌre aꞌuprosi zahuré, Wanhibꞌapito te te sina ꞌre iꞌumnhasi zaꞌra mono zé hã.
19 Tane nherẽ, ꞌri naꞌrata nhanaꞌrada ꞌRe ihâimana uꞌâsi mono te te isãrĩ hã marĩ te te rési waihuꞌu õ di. Ãhã ꞌri naꞌrata nhanaꞌrata nhisiwi te ãne robꞌuiꞌéré hã nomro, ã hã: “Uburé Danhibꞌapito hã te te waihuꞌu pese di, tite norĩ hã.” Duré ãne ihâiba amo hã: “Uburé Danhibꞌapito nhibꞌaꞌuwẽ na ꞌre isiwasuꞌu zaꞌra mono norĩ hã, tiwasédé te te ꞌre rẽme pese zaꞌra mono.”
20 ꞌRi zaꞌẽtẽ ꞌri ꞌremhã, piza hã ẽtẽ waipo pré oru ꞌmanharĩ na si duré ẽtẽ waipo prã prata ꞌmanharĩ na si ꞌre simasa mono õ di. Tazahã, wede ꞌmanharĩ na zama duré zéꞌa ꞌmanharĩ na zama te ꞌre simasa, piza hã. Nima norĩ hã bâdâ ipire na da si hã duré nima norĩ, bâtâ sidâpâ da hã.
21 Tane duré, niꞌwa hã marĩ iwasédé te te ꞌre iꞌaꞌmanharĩ mono zé wi sihâiba pese wamhã, ta hã te za romhuri iwẽ uptabi da, aimawi ꞌre hâimana, piza iwẽ uptabi ne, tite Rowahutuꞌwai ma sena na duré wẽ uptabi na ꞌre hâimana mono wa, duré simizaꞌrese ꞌre hâimana mono wa, marĩ iwẽ te te ꞌre iꞌaꞌmanharĩ mono da hã.
22 Maꞌãpé, dahâiba téb ré marĩ iwasédé da te dasima iwẽ zarina dahâimanazém nhiti ꞌre aihâimana mono. Iꞌuwaibaba na ꞌre iꞌaihâimana mono zéb zô si asima sô ꞌre airĩtĩ uꞌâsi mono, duré ꞌRe ihâimana uꞌâsi mono asina ꞌre iꞌumnhasi uꞌâsi mono zô duré asimizawizéb zô duré rowẽ na si dasiré ꞌre iꞌaihâimana mono zéb zô, pẽꞌẽ wẽ na Uburé Danhibꞌapito zô ꞌre ihãsi mono norĩ siré.
23 Marĩ dai õ na duré iwasété na ꞌre idasisadaꞌâbâ zaꞌra mono nhiti ꞌre aihâimana mono. E marĩ wa. Aima waihuꞌu pese wa, taha zarina dasiꞌahâri pusizém na hã.
24 Uburé Danhibꞌapito ma romhuriꞌwa hã simihâ zei uꞌâsi tô ꞌre morĩ õ di za. Simiwazé wẽ na si te za tô uburé dama ꞌre hâimana. Rowahutuꞌwa iwẽ na si te za tô ꞌre hâimana, duré simiꞌẽi hâ na.
25 Duré ta hã atãma na te te tô ꞌre apawapto mono tinhimiroti wẽ na, sada ꞌre ihâimana zaꞌra mono norĩ hã. Ãté tawamhã te za ꞌRe ihâimana uꞌâsi mono hã te te tãma ꞌre awaprosi, iwasété wi ꞌre sipizari zaꞌra mono da, tô sena isimiroti ꞌre ihâimana mono, te te oto ꞌre waihuꞌu zaꞌra mono da.
26 Ãne wapsi, te za apâ isimirosaꞌrata ꞌre tãma ꞌre romnhoꞌa zaꞌra. Waꞌuburé nhimimramizém hawi te za duré ꞌre wairébé, ta hã marĩ te te sima ꞌre iwẽ mono zép si te te ꞌre ꞌmanharĩ zaꞌra mono da, te te aré ꞌre iꞌawaibui mono hã.
Ĩwaꞌõtõ piꞌreba watsuꞌu mono
^ 2:11 Cristuhu siré ꞌre wadâꞌâ zaꞌra mono wamhã Isazeiꞌwa norĩ hâimanazéb ꞌrada, tãma ꞌre idâꞌâ zaꞌra mono zé, te wasuꞌu.
