Zenezi 2:1-25
2 Ãne ꞌRe ihâimana uꞌâsi mono, ma tô te te apoto ꞌrãsutu, hâiwa duré tiꞌa hã, duré uburé marĩ iwab zahuré siꞌuiwa na ꞌre ihâimana zaꞌra mono da hã.
2 7 bâtâ ãma hã ma tô tinhimipodo hã te te apoto ꞌrãsutu. Tawamhã ma tô oto waꞌudu, taha bâtâ na.
3 Tawamhã bâdâ 7 ãma, ma tô iwẽ na hã pisutu, aimawi wazéb zahi na dama ꞌre hâimana mono da hã. E marĩ wa. Taha bâtâ na waꞌutu wa, uburé te te aropoto mono pari.
4 Ãne ma tô hâiwa duré uburé iwa ꞌre isimasa mono da hã tiꞌai me hã poto zaꞌra.
Édẽ na robꞌre nhisi wasuꞌu
— Uburé Danhibꞌapito ꞌRe ihâimana uꞌâsi mono, hâiwa duré uburé iwa ꞌre isimasa mono da hã tiꞌai me hã, te te poto zaꞌra wamhã,
5 tiꞌai ꞌremhã zahadu roꞌwanhipré hã duré robꞌre mono hã hâimana zaꞌra õ di. E marĩ wa. Zahadu Uburé Danhibꞌapito, tã ꞌre taꞌa mono da hã te te tãma robꞌrui mono õ wa, duré zahadu tiꞌai ꞌremhã, niꞌwa hã te te ꞌre irobꞌre mono da hã, hâimana õ wa.
6 Tane nherẽ, te tiꞌai hawimhã ubꞌre hã ꞌre praba zaꞌra, te te ꞌre itiꞌa tiꞌi mono da hã.
7 Tawamhã Uburé Danhibꞌapito, tiꞌa zaprum na ma tô aꞌuwẽ hã ꞌmanha, aibâ na*. Tahawa, isisiꞌre ãma ma tô saꞌu, pẽꞌẽzani ré oto ꞌre hâimana mono da. Ãhã wa, te oto ipẽꞌẽzani ré na hã ꞌre hâimana, hâiba ré.
8 Taha pari Uburé Danhibꞌapito ꞌRe ihâimana uꞌâsi mono, ma tô robꞌre hã ꞌmanha, Édẽ na romnhisi bâtâ pusizém niwĩ ro ꞌre ihâimana mono ãma. Tame ma tô aibâ te te ipodo hã iwap tisã.
9 Tawamhã tame Uburé Danhibꞌapito, rowede iꞌmadâꞌâ ze iwẽ uptabi sipuꞌu pese na iꞌrãi mono bâ iwẽ, isi da hã, ma tô ꞌre prédub zaꞌra mono da hã abꞌmanha. Tane nherẽ, te robꞌre waꞌwamhã rowede ꞌre idahâimana uꞌâsi zaꞌra mono zém nhomriꞌwa da hã ꞌre sa. Te duré ihâiba amo rowede hã ꞌre sa, iwẽ hã, iwasédé hã da te ãma ꞌre iwaihuꞌu zaꞌra mono zéb da hã.
10 Tawamhã Édẽ hawi robꞌre te te ꞌre diꞌi mono da, pa nhoꞌu ꞌre ipraba mono hã ma tô ta hawi maparane siꞌuiwa na sima ꞌre sipé.
11 Imorĩꞌrata nhisi hã Pisõ na, Havira na romnhisi ãma tipraba na te te ꞌre isaꞌoto mono hã, ẽtẽ waipo pré oru ꞌre ihâimana zaꞌra mono zéb ãma hã.
12 Taha tiꞌai ãma oru uptabi si hã te ꞌre hâimana zaꞌra, aimawi na wazari ãna. Duré wedewaꞌu to isadazei wẽ hã, duré ẽtẽꞌubuzi ĩwaꞌâbâ zaꞌẽtẽ uptabi zama hã, te tamemhã ꞌre hâimana zaꞌra.
13 Tawamhã duré maparane ãma pa nhoꞌõmo nhisi hã, Ziõ na. Ta hã Cuxe na romnhisi ãma hã tipraba na te te ꞌre isaꞌoto mono.
14 Duré siꞌubdatõ ãma pa nhoꞌõmo nhisi Tigre hã, te Asiria na romnhisi bâtâ pusizém niwĩmhã ꞌre praba. Duré maparane siꞌuiwa na ãma pa nhoꞌõmo nhisi hã Eufrati na.
15 Tawamhã Uburé Danhibꞌapito ꞌRe ihâimana uꞌâsi mono, ma tô Édẽ na robꞌre nhisi ãma aibâ hã tisã, te te ꞌre ꞌmadâꞌâ mono da, duré te te iwa ꞌre robꞌre mono da oto.
16 Tahawa ma tô ãne tãma waihuꞌu:
— Robꞌre ãma rowede ꞌre isimasa mono ꞌrã, te za siwaꞌru uburé ꞌre iꞌaꞌmasi uꞌâsi mo.
17 Iwẽ hã iwasété me, za da te ãma ꞌre iwaihuꞌu zaꞌra mono wede ꞌrã si hã ꞌre ꞌmaiꞌrẽne mono õ di za. E marĩ wa. Nimahã bâtâ na ꞌmaiꞌrẽne wamhã, õne haré za atâꞌâ na dâꞌâsina.
18 Taha pari te duré Uburé Danhibꞌapito hã tinha ãne:
— Aibâ siwaprosi ꞌre ihâimana mono da hã wẽ õ di. Tahawa niꞌwa te te ꞌre ipawapto mono ꞌwa da hã wa za tãma ꞌmanha, ihâiba aꞌâriꞌwa hã.
19 Tawamhã uburé abaze norĩ hã duré si norĩ hã tiꞌa na te te apoto mono pari, ma tô aibâ tẽmemhã te te anhimro, te te anhisi da. Tahawa, aibâ te te iꞌanhisi mono zéb zarina, te oto isisi mono bâ ãma ꞌre hâimana zaꞌra.
20 Si norĩ hã, uburé abaze da te ꞌre itébré zaꞌra mono norĩ hã duré rom na ꞌre ihâimana zaꞌra mono norĩ hã ma tô te te anhisi, imono bâ. Tane nherẽ, zahadu ihâiba aꞌâriꞌwa ipawaptoꞌwa da hã tãma ꞌmaihâimana õ di.
21 Tahawa Uburé Danhibꞌapito ꞌRe ihâimana uꞌâsi mono, ma tô aibâ ma aptâꞌâ uptabi hã tãma tisõ, ãma sõtõ pese da. Tahawa sõtõ pese ré, ma tô iwaihi zati hã misi tiwi waze. Duré te te iwazerezéb ãma hã ma tô apâ inhi na ãma ato.
22 Tawamhã taha waihi na ma tô piꞌõ ꞌmanha. Taha pari, te aibâ tẽmemhã oto saprõ.
23 Tawamhã te aibâ tinha, ãne te te ꞌmadâꞌâ wa:“Ãhãta tô, piꞌõ nhi hã, ĩnhi uptabi ꞌmanharĩ, duré ihi hã, tô ĩhi uptabi ꞌmanharĩ.Tahawa, isisi hã za, piꞌõ na.E marĩ wa. ꞌRe ihâimana uꞌâsi mono, aibâ hâiba hawi te te iwazere na dâꞌâsina.”
24 Ãne wa, te za aibâ, timama tina me te te ꞌre rẽme zahuré, timro me si, sina sihâiba sitom haré ꞌre hâimana zahuré mono da oto. Tawamhã te za maparane ihâiba nherẽ, misi dahâiba ne oto siré ꞌre hâimana zahuré.
25 Tawamhã aibâ norĩ, timro me hã aiꞌuréiwi ꞌre nem nherẽ, sima ꞌre siséb zahuré mono õ di.
Ĩwaꞌõtõ piꞌreba watsuꞌu mono
^ 2:7 Ebreu norĩ mreme na damreme “terra” (adama), “aꞌuwẽ” (adam) aiwa prã na ne iwapari na hã.
