Zenezi 39:1-23
39 Tawamhã Zuzé, Ezitu u ma tô dasiwi saprõni ni. Tame ezipsiu Potifa na isisi, Ezitu ãma apito ꞌmadâꞌâꞌwa norĩ nhibꞌihâꞌa hã ma tô Zuzé uipra, Ismaeu nhihudu norĩ wi.
2 Tame Uburé Danhibꞌapito, Zuzéhé siré ꞌre hâimana uꞌâsi mono wa, te uburé marĩ hã te te ꞌre abꞌmanharĩ wẽ uꞌâsi. Tawamhã te oto tinhibꞌihâꞌa nhorõwa ãma ꞌre sãmra, ezipsiu nhorõwa ãma.
3 Ãne wa, Zuzéhé nhibꞌihâꞌa ma tô ãma waihuꞌu, ꞌRe ihâimana uꞌâsi mono isiré ꞌre hâimana mono wa, uburé marĩ te te ꞌre iꞌabꞌmanharĩ wẽ mono na te te ꞌre ipawapto mono na hã.
4 Ãne zarina ma tô Zuzé, isibꞌihâꞌa hã wẽsã. Tahawa, ma tô pisutu, õhõ ma si ipawaptoꞌwa na ꞌre hâimana mono da. Isõrõwa te te ꞌre ꞌmadâꞌâ mono da, duré uburé isimarĩ hã te te tãma ꞌre aꞌmadâꞌâ mono da ma tô tãma tisõ, isibꞌrata.
5 Tawamhã ta hawimhã haré ma tô Zuzéhé hâiba uꞌâbâ, Uburé Danhibꞌapito ezipsiu nhorõwa ꞌre, isimarĩ tãma ꞌre hâimana wẽ zaꞌra mono da hã, duré isimizama zama rom na tãma ꞌre simasa wẽ mono da hã, iwẽ na te te ꞌre pawapto.
6 Tahawa Potifa, Zuzéhé nhibꞌrata ma tô uburé tinhimarĩ te te tãma ꞌre aꞌmadâꞌâ mono da hã tãma saꞌré zaꞌra. Ãhã wa, te hâtâꞌâ ãna sima iwẽ na ꞌre hâimana. Duré ãhã wa, ma tô tisazéb zô si sima te te oto ꞌre rosaꞌrata.
Zuzé aibâ iwẽ na ihâiba, duré iꞌmadâꞌâ ze na ihâiba.
7 Tahawa, nimahã na isibꞌihâꞌa Potifa mro, ma tô sima ꞌmadâꞌâ zei upta, te te ꞌruiwapari wa. Tahawa, te Zuzéhé ma tinha ãne:
— Oto we aimorĩ, waptâ wa, wazaꞌwari da.
8 Tawamhã tiwi sisawi wa, te ãne tãma tinha:
— Ma, ĩwapari! Ĩnhibꞌihâꞌa aimro, uburé ꞌri ꞌre tinhimarĩ na ꞌre hâtâꞌâ mono õ di oto, ãme wa hã ꞌre ĩhâimana mono wa. Uburé marĩ te tãma ꞌre aꞌmadâꞌâ mono da hã ma tô ĩpisutu.
9 Niꞌwa ã hã ꞌri ꞌremhã ĩnhipai u hã hâimana õ di. Duré marĩ hã te te ĩwi piꞌuri õ di. Aiwétési te ĩwi aihâiba zawi, a hã imro na wa. Ãne nherẽ, e niha wa za bété ĩwasédé hã ꞌRe ihâimana uꞌâsi mono wi ꞌmanha.
10 Tawamhã sadahutu ãna te bâtâ sidâpâsi nasi waptẽ, waptâ wa iré nomro da hã. Tane nherẽ, te Zuzé nasi tiwi sisawi, iré nomro tõ da. Duré ꞌrâwi iꞌrata hâimana tõ da ma tô tiwi siꞌmadâꞌâ pese.
11 Tawamhã Zuzé nimahã bâtâ na ma tô ꞌri para u ãzé, tinhimiromhuri te te ꞌmanharĩ da, ꞌre izasi uꞌâsi mono zéb zarina. Romhuriꞌwa ꞌri paramhã ꞌmanhamra õ di.
12 Tahawa, Potifaha mro, ma tô Zuzéhé siꞌubuzé ihâ pa na hã tiꞌâ. Taha sina te ãne tãma tinha:
— Oto wazaꞌwari, waptâ wa.
Tane nherẽ, piꞌõ te te sima âri pese õ ré, ma tô tiwi siwaze. Tiwi siwazere wamhã, ma tô rob u tiwi wara. Tahawa, ma tô tisiꞌubuzé ihâ pa ma hã isibꞌrata tãma marẽ.
13 Tawamhã tiwi isiwazere zarina tisiꞌubuzé ihâ pa ma isibꞌratam haré tãma isimirẽme na te te waihuꞌu wa,
14 ma tô ꞌri ꞌre tãma zahuré romhuriꞌwa norĩ zô tihârâ zaꞌra. Tahawa, te ãne tãma siwasuꞌu zaꞌra:
— Ãhãta maꞌãpé asiwi ꞌmadâꞌâ aba! Ã hã Ebreu, ĩmro, wanhorõwa ꞌmadâꞌâꞌwa da, we te te iꞌãwi hã ma tô rowazé wama waze. Ĩnhibꞌri ꞌre waꞌwa u, ma tô we ĩtẽme ãzé, ĩꞌãma hâimana da. Tane nherẽ, wa tô tiwi ꞌre ĩzadari, ĩzadari ꞌrãihâ na hã.
15 Ĩzadari ꞌrãihâ na tiwi ꞌre ĩzadari mono wi, ma tô rob u hã watobro, wara sina. Tahawa ãhãta tiꞌubuzé ihâ pa ĩzababa sisaꞌu te te irẽme.
16 Tawamhã Zuzéhé nhibꞌihâꞌa, imro iwisizéb u ma tô isiꞌubuzé ihâ pa hã sô tihi.
17 Tawamhã tite romhuriꞌwa norĩ ma, te te iwasuꞌu zaꞌra ne, ma tô duré timro ma hã wasuꞌu ãne:
— Wama romhuriꞌwa Ebreu, wanhorõwa u we iꞌãwi hã, ma tô ĩnhibꞌri ꞌre waꞌwa u ãzé, tiha te te ĩꞌãma ꞌmanharĩ wasété da hã.
18 Tane nherẽ, saꞌẽtẽ tiwi ꞌre ĩzadari mono wa, ma tô rob u wara sina watobro. Tahawa tisiꞌubuzé ihâ pa ĩzababa sisaꞌu ma te tirẽ.
19 Tawamhã ãne na timro siwasuꞌuzé te te wapari wamhã, ma tô Zuzéhé da isibꞌihâꞌa hã sada tinhitiꞌrui pese.
20 Tahawa, Potifa ma tô dama tiꞌru, dazazéb ꞌre, Zuzé da te sẽrẽ da, Ezitu ãma apito nhimiwadaꞌuri zarina da te ꞌre idanheme mono zéb ꞌre, sab da. Tawamhã tame te oto za Zuzé hã.
21 Tane nherẽ, tame ꞌRe ihâimana uꞌâsi mono, isiré ꞌre hâimana mono wa, ma tô iwẽ hã te te tãma ꞌre apisutu. Taha zarina, ma tô oto dazazé ꞌmadâꞌâꞌwa Zuzé hã wẽsã.
22 Tahawa, Zuzéhé ma, ma tô oto pisutu, dazazéb ꞌre, ꞌre idasimasa mono norĩ te te ꞌre aꞌmadâꞌâ mono da hã, duré te te oto ꞌre robꞌmadâꞌâ mono da, uburé marĩ ꞌmanharĩ na hã dazazéb ꞌre.
23 Tawamhã dazazé ꞌmadâꞌâꞌwa hâtâꞌâ waihuꞌu õ di, Zuzéhé ma, siꞌupana daꞌmadâꞌâzé hã te te sõmri wa. E marĩ wa. Uburé Danhibꞌapito isiré ꞌre hâimana mono wa, duré iwẽ na te te ꞌre ipawapto mono zarina, uburé marĩ hã te te dama ꞌre abꞌmanharĩ wẽ mono wa, dazazéb ꞌremhã.
