Zenezi 6:1-22
6 Tawamhã duré oto tiꞌai mono bâ dasina dahâꞌâ wamhã, daꞌra sipiꞌõ norĩ, dama ꞌre poto zaꞌra mono wamhã,
2 ma tô ꞌRe ihâimana uꞌâsi mono ꞌra norĩ, piꞌõ wẽ uptabi na ꞌre ihâimana zaꞌra mono na te te sima ꞌre ꞌmadâꞌâ ze zaꞌra. Tahawa ma tô duré te te sima ꞌre iwẽ zaꞌra mono zéb zarina te te sima ꞌre pisutu zaꞌra, ãma ꞌre mro zaꞌra mono da.
3 Tahawa te Uburé Danhibꞌapito tinha ãne:
— Aꞌuwẽ, wasété na ꞌre ihâimana zaꞌra mono zarina, õne uꞌâ ꞌre ihâimana zaꞌra mono da hã, mare di za. Tahawa te za duré oto ã hawim haré 120 na ãma iwahum na si ꞌre hâimana zaꞌra.
4 Tô taha wamhã, te aꞌuwẽ poto ꞌrãihâ norĩ hã ꞌre hâimana zaꞌra. Duré ronomro pari, te zahadu õ norĩ hã ꞌre hâimana zaꞌra, hâiwa ãma isãmriꞌõ norĩ, daꞌra sipiꞌõ norĩ na ꞌre sapaꞌa zaꞌra mono wa, iꞌra norĩ hã tãma ꞌre poto zaꞌra mono ré. Tawamhã aꞌuwẽ ipoto ꞌrãihâ norĩ, te duréihã siptete na, duré dama wasuꞌu zaꞌẽtẽ na hã ꞌre hâimana zaꞌra.
5 Tawamhã Uburé Danhibꞌapito, ꞌre idawasété pese uptabi zaꞌra mono zé ma tô te te ꞌre aꞌmadâꞌâ, õne uꞌâ dawasété si da te ꞌre ꞌmanharĩ zaꞌra mono da, da te dasima ãma ꞌre irosaꞌrata zaꞌra mono zé hã.
6 Tahawa aꞌuwẽ te te ꞌre ꞌmanharĩ zaꞌra mono wa, ma tô ꞌRe ihâimana uꞌâsi mono wi hã tiwi tirobzeiꞌõ pese. Duré pẽꞌẽ pire na ꞌre hâimana mono wa,
7 te ãne sima tinha:
— Ã hã aꞌuwẽ norĩ te ipoto zaꞌra hã, tiꞌai hawi sô irobaba zaꞌra da hã, wa za niha hã tãma robꞌmanharĩ zaꞌra. Duré uburé abaze norĩ zama, diꞌi na dawaprã ꞌre inomro mono norĩ zama, duré si norĩ zama wa za uprosi. E marĩ wa. Ĩwi robzeiꞌõ pese wa, ĩnhimipoto norĩ nhimiꞌmanharĩzé zabâdâ.
8 Tane nherẽ, Uburé Danhibꞌapito, Noé ꞌre ihâimana wẽ mono zéb zabâdâ si tãma ꞌre toi uꞌâsi mono di.
Noé, ubaꞌre isaꞌẽne te te iꞌmanharĩzé wasuꞌu
9 6:9-10 Ã hã Noéhé wasuꞌu. Ta hã ãne siꞌubdatõ iꞌra norĩ nhisi mama na ma tô ꞌre hâimana: Sẽ, Cã, Zafé. Noé, sena na iꞌuwaibaba na si, duré õne uꞌâ ꞌRe ihâimana uꞌâsi mono mreme te te ꞌre iwapari pese mono na si ma tô ꞌre hâimana. Duré isiré ꞌre idahâimana zaꞌra mono norĩ nhimiꞌmanharĩ siwaprã, ma tô siwaprosi ꞌRe ihâimana uꞌâsi mono ãma si ꞌre mo.
10 ꞌMadâꞌâ 6:9
11 Tane nherẽ, te ꞌRe ihâimana uꞌâsi mono tõmo nhoꞌa, uburé dawasété na si daro mono bâ ꞌre dahâimana zaꞌra. Tahawa, te uburé dazaꞌrui mono na da te dasina ꞌre rowamnarĩ uꞌâsi zaꞌra.
12 Tawamhã ꞌRe ihâimana uꞌâsi mono, tiꞌai ãma uburé ꞌre idahâimana zaꞌra mono te te daꞌaꞌmadâꞌâ wamhã, ma tô ꞌre idawasété zaꞌẽtẽ zaꞌra mono zép si abꞌmadâ. E marĩ wa. Marĩ iwasété si da te ꞌre ꞌmanharĩ zaꞌra mono wa.
13 Tahawa te ꞌRe ihâimana uꞌâsi mono, Noéhé ma tinha ãne:
— Uburé te daꞌuprosi da, wa tô ĩsima daꞌãma rowairébé. Tahawa wa za uburé pese tô daꞌuprosi. Duré tiꞌai wa, uburé marĩ ꞌre ihâimana zaꞌra mono zama wa za uprosi. E marĩ wa. Tiꞌai ãma da te dasina ꞌre irowamnarĩ zaꞌra mono zé te te sina rosaꞌréi uꞌâsi mono wa, hâimo.
14 Tahawa maꞌãpé wede iwẽ ꞌmaiꞌâri mono, ubaꞌre isaꞌẽne hã ãma asima ꞌmanharĩ da. Tawamhã ꞌri ꞌre waꞌwa hã te za iꞌremhã iꞌawaꞌõtõ mo. Duré te za wedewaꞌu tom na isiꞌriti mono hã uburé iꞌanhito mo iꞌremhã, duré imana wawi rowi hawimhã.
15 Ãne za tawamhã ubaꞌre ꞌmanharĩ pibuzé hã: 133 metru na isadarata pibuzéb zaꞌrata na, duré 22 metru na iꞌaꞌre siꞌuiwa pibuzéb zaꞌrata na, duré 13 metru na iꞌmanharĩ pibuzéb zaꞌrata na hâimo hã.
16 Tawamhã te za duré ubaꞌre upsibizé hã iꞌmanha. Tahawa, duré saꞌo hâ prã na te za ipibuzé aiwa ãma isipoꞌo na iꞌupsibizé hã iꞌatété mo. Siꞌubdatõ na ꞌri ne ꞌmanharĩ ꞌrãihâ pibuzé hã te za duré iꞌmanha. Tawamhã te za duré nimame isadarata ãma ꞌridawa nhoꞌu iꞌmanha.
17 Tiꞌa te te upsibi mono da, wa za â puꞌu, uburé pẽꞌẽzani ré ꞌre ihâimana zaꞌra mono hã te ãma uprosi da. Tawamhã uburé tiꞌai ãma ꞌre ihâimana zaꞌra mono hã te za siꞌutõrĩ.
18 Tane nherẽ, aima si wa za ĩnhimiropisutu zahi hã ꞌmanha. Tahawa te za a hã ubaꞌre zaꞌẽtẽ ꞌremhã asé. Asébré wamhã, te za aimro, duré aiꞌra siꞌaibâ norĩ, duré asaniꞌaba norĩ asiré iꞌmazasi zaꞌra za, ubaꞌre zaꞌẽtẽ u hã.
19 6:19-20 Tawamhã duré ubaꞌre zaꞌẽtẽ u abaze norĩ sipuꞌu pese na te za iꞌanheme mo, uiwada pese na; si norĩ, duré uburé diꞌi na ꞌre inomro mono norĩ, uburé pese ihâiba ré siré hâimana zaꞌra da hã.
20 ꞌMadâꞌâ 6:19
21 Duré te za asa zaꞌra waꞌaba zéb da, duré uburé abaze norĩ sazéb da hã ibâ na iꞌaꞌrãꞌõ, ãma iꞌasaihuri aba mono zéb da hã siꞌuiwa na.
22 Tawamhã Noé, uburé ꞌRe ihâimana uꞌâsi mono te te tãma iwaihuꞌuzéb zarina ma tô ꞌmanha.
