Zuã 13:1-38
13 Tawamhã misi bâdâ oto iꞌawẽzéb u hã, Pascoa na dato nhisi ihâimanazéb da hã. Tawamhã Zezusihi ma waihuꞌu pese uptabi di, bâdâ tãma iwisi na hã, za oto tiꞌai hawi imorĩzé hã apâ, Timama u. Tite norĩ hã ma tô te te ꞌre azawi pese, tiꞌai ãma dawazari ꞌre ihâimana zaꞌra mono hã. Tiꞌai ãma tihâimanazé te te iꞌrãsutuzéb u, ma tô te te ꞌre azawi pese.
2 Tawamhã Zezusi hã duré isiré re inomro mono norĩ me ma tô barana tisa hã siré tihu. Waꞌuburé hã Zudasi, Simau Iscarioti ꞌra ma hã duréi, ma tô rosaꞌrada iꞌrãi ꞌre tãma tisẽ, Zezusi hã te te dama hâiba nhomri da hã.
3 Tawamhã Zezusi hã te te waihuꞌu pese di, Imama hã te te ipisutu na, uburé marĩ ma, pire na ꞌre hâimana mono da. Te te duré waihuꞌu pese di, ꞌRe ihâimana uꞌâsi mono hawi we imorĩ na hã, duré apâ za itẽme imorĩ na hã.
4 Tawamhã saihuri ré, ma tô wahudu, Zezusi hã. Tiꞌuza ihâpa hã ma tô waze. Dasiꞌuꞌõzé hã ma tô duré ꞌmaiꞌâ. Taha na ma tô siꞌawasisi.
5 Taha parimhã, â ma tô azaꞌwa, pizaꞌa ꞌre nhoꞌa wa. Tawamhã isiré ꞌre inomro mono norĩ te te oto iꞌapara upsõ na ma tô sãnaꞌrata. Taha pari dasiꞌuꞌõzém na ma tô nasi apara uꞌõ.
6 Tawamhã Simau Pedruhu u oto wisi wamhã, ta hã ma tô ãne sina sadanha:
— Wanhibꞌapito, e te za ĩpara upsõ.
7 Tahawa Zezusi hã ma sadaꞌâ, ãne:
— Ãhã na hã sadaihuꞌu õ di aima hã, te iꞌmanharĩzé hã. Zahadu wapsi te za iwaihu.
8 Tawamhã Pedru hã te duré tãma nharĩ na sahu, ãne:
— Mare di. Niwamhã ĩpara upsõi õ di za.
Ãne wa, ma tô Zezusi hã tãma tinha, ãne:
— Te aipara upsõi õ wamhã, ĩnhibꞌaꞌuwẽ õ di za, a hã.
9 Tawamhã Simau Pedru te duré tãma tinha, ãne:
— Wanhibꞌapito, tane wamhã, ĩpara si upsõi õ di za. Ĩnhibꞌrata zama te za iꞌupsõ, duré ĩꞌrã zama.
10 Tahawa, te Zezusi hã duré tãma tinha, ãne:
— Mare di. Niꞌwa hã siꞌupte wamhã, uburé te za ihâiba hã rã na tihâiba. Tahawa sina simnhasi, apâ sipara upsõ da si. A norĩ waꞌwa hã aihâiba rã zaꞌra waꞌaba di oto. Tane nherẽ, misi niꞌwa hã hâiba rã na hâimana õ di.
11 Zezusi hã te te waihuꞌu pese di, za niꞌwa te te dama ihâiba nhomri da hã. Tahawa ma tô ãne tinha: “Tane nherẽ, misi niꞌwa hã hâiba wẽ na hâimana õ di.”
12 Tawamhã Zezusi hã isiré ꞌre inomro mono norĩ te te apara upsõi parimhã, ma tô tiꞌuza ihâpa hã apâ sima tisẽ. Apâ ma tô duré nhamra isiꞌubumrozéb u, sa da, meza ãma. Tahawa te ãne sadanharĩ zaꞌra:
— E ma tô isadaihuꞌu zaꞌra waꞌwa, te aima iꞌmanharĩ zaꞌra waꞌaba zé hã.
13 “Rowahutuꞌwa” na te asiwi ꞌre ĩnhisi aba mo, duré “Wanhibꞌapito” na. Tô isarina, wa hã tô.
14 Wa hã Asibꞌapito waꞌaba nherẽ, duré ate zaꞌra waꞌwa Rowahutuꞌwa nherẽ, te aipara upsõ zaꞌra waꞌaba wamhã, tane te za duré ꞌre asipara upsõ zaꞌra waꞌaba mo.
15 Wa ãma aima asanho zaꞌra waꞌwa, ĩsine ꞌre ꞌmanharĩ zaꞌra waꞌaba mono da.
16 Tô sena wa za aima waihuꞌu zaꞌra waꞌwa, ãne: Wadaꞌuri zarina titedeꞌwai ma romhuriꞌwa hã pire na hâimana waihuꞌu õ di, tinhibꞌihâꞌa nhipai u hã. Tane duré romreme ꞌwapéiꞌwa hã pire na hâimana waihuꞌu õ di, tizatõrĩꞌwa nhipai u hã.
17 Ã hã ĩnhimiroti hã oto aima waihuꞌu pese zaꞌra waꞌaba wa, aima ꞌre rowẽ uptabi zaꞌra waꞌaba mono di za, ãma ꞌre aihâimana zaꞌra waꞌaba mono wa, ꞌre ꞌmanharĩ zaꞌra waꞌaba mono wamhã.
18 — Uburé te aiꞌãma nharĩ zaꞌra waꞌaba õ di. Te ĩsima ipisutu zaꞌra norĩ hã ĩma waihuꞌu pese di. Ãne hã ma tô tiromhâiba, ꞌRe ihâimana uꞌâsi mono mreme na Ibaihâ iwazé pese na robꞌuiꞌéré ãne inomro hã te te sina uwaimrami da: “Niꞌwa hã ĩꞌuiwada ꞌre sai uꞌâsi mono nherẽ, te oto ĩzada tihâiba.”
19 Romhâimana wana ré, wa ãne aima waihuꞌu siromo zaꞌra waꞌwa, romhâimana wamhã, ĩzaze zaꞌra waꞌaba da, “Wa hã Tô Wa hã” na hã.
20 Tô sena wa za duré ãne hã aima waihuꞌu zaꞌra waꞌwa: Niꞌwa hã za te datẽme ꞌre iꞌazatõrĩ mono zô ꞌre tobꞌuzui mono wamhã, ta norĩ uꞌâbâ te za ĩzô ꞌre tobꞌuzu. Duré niꞌwa hã ĩzô tobꞌuzui wamhã, ĩꞌuꞌâbâ te za we ĩzatõrĩꞌwa zô titobꞌuzu.
Zezusi hã, tihâiba zaꞌréiꞌwa da hã te te iwasuꞌuzé
21 Tawamhã Zezusi hã ãne na te te nharĩ parimhã, ipẽꞌẽzé hã ma tô azâ, saꞌẽtẽ uptabi na. Tahawa, ma tô sõꞌawi tinha, isiré ꞌre inomro mono norĩ ma, ãne:
— Tô sena, wa za ãne hã aima waihuꞌu zaꞌra waꞌwa: Niꞌwa hã misi, asiré zaꞌra waꞌaba hã te za dama ĩhâiba nho.
22 Tahawa isiré ꞌre inomro mono norĩ hã ma tô siꞌmadâꞌâ zaꞌra, te te waihuꞌu zaꞌra õ wa, niꞌwai ãma te te inharĩzé hã.
23 Tawamhã isiré ꞌre inomro mono norĩ siré hã, Zezusi te te ꞌre isawi pese mono hã te isababa nhamra.
24 Ta hã ma tô Simau Pedru hã Zezusihi ãma wadaꞌu, te te sadanharĩ da, ãne:
— Maꞌãpé sadanharĩ. E ꞌwai ãma ma tô tinha, za te te dama ihâiba nhomri na hã.
25 Tahawa ta hã isiré ꞌre imorĩ hã ma tô Zezusihi u sina rotété pese. Ãne ma tô sadanha:
— Wanhibꞌapito, e ꞌwa hã te za dama aihâiba nho.
26 Tawamhã Zezusi hã ma sadaꞌâ, ãne:
— Iꞌuꞌẽtẽ wapu idiꞌizém na pratu wa, za te tãma idi, te tãma sõmri da hã.
Tawamhã iꞌuꞌẽtẽ wapu hã ma tô diꞌi. Taha pari ma tô tisõ, Zudasihi ma, Simau Iscariotihi ꞌra ma.
27 Zudasi hã iꞌuꞌẽtẽ wapu te te âri wi, ma tô Satanasi hã iwab ãzé. Tahawa Zezusi hã ma tô Zudasihi ma tinha, ãne:
— Marĩ hã iꞌmanharĩ da hã, ꞌmanharĩ suꞌu pé!
28 Tane nherẽ, saihuri da, isiré isiꞌubumro norĩ, niꞌwa hã te te sadaihuꞌu õ di, e marĩ wa, ma tô Zezusi hã ãne tãma tinha.
29 Zudasi hã, robꞌuiprazé ꞌmadâꞌâꞌwa na te ꞌre hâimana. Tahawa, ma tô nima norĩ hã ãma rosaꞌrata zaꞌra, Zezusi hã te te tãma ꞌru newa, marĩ te te ꞌmaiꞌuipra da, dato za ihâimana u da hã, niwamhã marĩ hã isibrobꞌõ norĩ ma, za te te sõmri da newa.
30 Tawamhã Zudasi hã iꞌuꞌẽtẽ wapu te te âri pari, ma tô rob u hã watobro. Barana oto.
Zezusihi nhimiroti ité
31 Tawamhã Zudasi hã rob u watobro zaꞌu hã, ma tô Zezusi hã ãne sina tinha:
— Ãhã na hã Tiꞌai ãma Dasiré Ipodo hã wẽ uptabi na ꞌre ihâimana mono zé hã te za oto Imama hã hâiꞌré. Taha ãma te za duré sihâiꞌré, ꞌRe ihâimana uꞌâsi mono hã wẽ uptabi na ꞌre ihâimana mono zé hã.
32 Taha ãma, ꞌRe ihâimana uꞌâsi mono, wẽ uptabi na ꞌre ihâimana mono zém na sihâiꞌré wamhã, tawamhã ꞌRe ihâimana uꞌâsi mono hã te za duré sihawimhã Tiꞌai ãma Dasiré Ipodo hã wẽ uptabi na ꞌre ihâimana mono zé hã dama hâiꞌré. Tawamhã ꞌRe ihâimana uꞌâsi mono hã romhutu na te za tô wẽ uptabi na ꞌre ihâimana mono zé hã hâiꞌré.
33 Ĩno norĩ, suru na wa za oto aiꞌrata ĩnhamra ꞌwa. Tawamhã te za ĩzô asõpré waꞌwa za. Tahawa, wa za ãne aima nharĩ zaꞌra waꞌwa, Zudeu norĩ ma, te inharĩ ne, ãne: Nimomo ĩmorĩzéb u hã ãma aiꞌabaꞌréi waihuꞌu aba õ di za aꞌâ.
34 Ĩnhimiroti itém na, wa za oto aima roti zaꞌra waꞌwa, ãne: ꞌRe asisawi pese zaꞌra waꞌaba mono. Te ꞌre iꞌasawi pese zaꞌra waꞌaba mono ne, aihâiba mono bâ te za ꞌre asisawi pese zaꞌra waꞌaba mo.
35 Ãne hã ꞌre asisawi pese zaꞌra waꞌaba mono wamhã, te za da te ꞌre aiwaihuꞌu zaꞌra waꞌwa, ĩsiré ꞌre iꞌanomro aba mono na hã.
Zezusi hã Pedru te te ipoꞌre puꞌuzé, za te te iꞌudâzém na hã
36 Tawamhã Simau Pedru hã ma tô Zezusi sadanha, ãne:
— Wanhibꞌapito, e momo te za aimo.
Zezusi hã ma asa sadaꞌâ, ãne:
— Ĩmorĩzéb u hã ãma aimorĩ waihuꞌu õ di za aꞌâ. Nimahã na si te za ãma aimo ĩzarina.
37 Tawamhã Pedru te duré apâ sina sadanharĩ zahu, ãne:
— Wanhibꞌapito, e niha bâ ãhã na hã asarina ãma ĩmorĩ waihuꞌu õ di. Aiꞌuꞌâbâ ĩdâꞌâ da wamhã, wa za ĩsisõ.
38 Tahawa Zezusi hã ma tô ãne tãma tinha:
— E te za tô asisõ, ĩzawi te, atâꞌâ da hã. Tô sena wa za ãne hã aima waihuꞌu: Siꞌa hã hârâ wana ré, siꞌubdatõ te za dawi ĩꞌudâ, aima ĩwaihuꞌu õ na hã.
