Zuã 18:1-40
18 Tawamhã Zezusi hã Timama ma mreme parimhã, ma tô watobro isiré ꞌre inomro mono norĩ ré. Cedrõ na ẽtẽ siwaꞌaba nhisi na ma tô roꞌrazâ. Tamemhã te ꞌre simasa, olivera na wede nhisi, da te iꞌre zaꞌra hã. Tamomo ma tô iré tizébré zaꞌra.
2 Zudasi, Zezusihi hâiba nhomriꞌwa da hã, ta hã ro hã tãma waihuꞌu pese di. E marĩ wa. Zezusi hã isiré ꞌre inomro mono norĩ hã tame te te ꞌre ꞌrãꞌõtõ mono wa.
3 Tahawa Zudasi hã tamomo ma tô nima norĩ Roma ꞌre dasiꞌwapéi ꞌmanharĩꞌwa norĩ hã te te simro, duré nima norĩ Zeruzalẽ ãma ꞌRe ihâimana uꞌâsi mono nhorõwa ꞌri ꞌrãihâ ꞌmadâꞌâꞌwa norĩ hã, sasedoti ipire norĩ duré farizeu norĩ zama te te isatõrĩ zaꞌra hã. Ta norĩ hã siwãi ré te sô aiꞌabaꞌré, duré robꞌuiwẽzéb ré, ꞌrãsitõ ré zama.
4 Tawamhã sô sihutu wamhã, Zezusi hã te te waihuꞌu pese uptabi di, uburé za tãma iromhâimanazé hã. Tahawa ma tô itẽme tiwatobro zaꞌra. Ãne ma tô sadanharĩ zaꞌra:
— E ꞌwa sô, te we airĩtĩ zaꞌra waꞌaba mo.
5 Tawamhã ma tô ãne siwi sadaꞌâ:
— Zezusi, Nazaré ãma aré ꞌre isãmra mono zô.
Zezusi hã ma sadaꞌâbâ zaꞌra, ãne:
— Ãhãta, wa hã. (Tame te Zudasi dama ihâiba zaꞌréiꞌwa da hã dasiré za)
6 Tawamhã Zezusi hã ãne tãma siwasuꞌu zaꞌra wamhã, “Ãhãta, wa hã”, ma tô tãma aiꞌré zaꞌra. Ma tô duré tãma aiꞌmõrõpãrĩ zaꞌra.
7 Te duré apâ sadanharĩ zaꞌra, ãne:
— E ꞌwa sô, te we airĩtĩ zaꞌra waꞌaba mo.
Ma duré siwi sadaꞌâ, ãne:
— Zezusi, Nazaré ãma aré ꞌre isãmra mono zô.
8 Tahawa, te Zezusi hã duré tãma nharĩ zaꞌra, ãne:
— Wa tô aima ĩsiwasuꞌu pari zaꞌra waꞌwa, wa hã na hã. We ĩzô airĩtĩ zaꞌra waꞌaba mono wamhã, maꞌãpé ã norĩ hã satõrĩ waré zaꞌra waꞌaba, siꞌabaꞌré da.
9 Tawamhã Zezusi hã ãne hã ma tô tinha, te te sina uwaimrami da, Timama ma mreme wa, te te inharĩzé hã, ãne: “Ĩmama, ĩma ipisutu zaꞌra hã te ꞌmanhimini õ di.”
10 Tawamhã Simau Pedru ma tô sibꞌézé ꞌwapa te te siré iꞌâri hã waze. Taha na ma tô sasedoti ipire uptabi ma romhuriꞌwa hã poꞌre nhizâ, ipoꞌre nhimire niwĩ. (Romhuriꞌwa nhisi hã, Maucu na.)
11 Tane nherẽ, Zezusi hã ma tô Pedruhu ma tinha, ãne:
— Maꞌãpé, apâ sẽrẽ, sibꞌézé ꞌwapa hã. E za te pibui ãna, Ĩmama te te ĩꞌãma irotizé, te irobzépata da hã.
Zezusi hã isabzé Anasihi nhoꞌre
12 Taha pari, dasiꞌwapéi ꞌmanharĩꞌwa norĩ hã tinhibꞌihâꞌa norĩ me duré ꞌRe ihâimana uꞌâsi mono nhorõwa ꞌri ꞌrãihâ ꞌmadâꞌâꞌwa norĩ me, ma tô oto siwi tiꞌâ, Zezusi hã. Ma tô duré siwi pawasisi.
13 Tawamhã uimrehẽne ma tô siwi saprõ, Anasihi u. Ta hã Caifasihi maprewa, sasedoti tisiré norĩ nhipai u, pire na ꞌre ihâimana mono, taha wahub ꞌremhã.
14 Caifasi hã Zudeu norĩ ipire norĩ ma, te te inharĩ, aibâ hã misi dâꞌâ da, iwẽ na hã, uburé aꞌuwẽ norĩ zada.
Pedru hã Zezusi te te iꞌudâzé
15 Tawamhã Simau Pedru hã Zezusihi zarina ma tô mo, duré ihâiba amo isiré ꞌre imorĩ zama. Ta hã sasedoti tisiré norĩ nhipai u ipire ma, waihuꞌu pese di. Tahawa ma tô sima iwẽ na ãzé, isõrõwa ãma ꞌri ꞌwawi waꞌra u hã, Zezusihi siré.
16 Tazahã, Pedru hã rowi te za, ꞌridawa ꞌrata. Tawamhã ihâiba amo isiré ꞌre imorĩ, sasedoti tisiré norĩ nhipai u ipire ma iwaihuꞌu pe hã ma tô rob u watobro. Romhuriꞌwa ꞌridawa ꞌmadâꞌâꞌwa sipiꞌõi ma, ma tô tinha, Pedru hã sébré da, te te tãma rowairébé da. Tahawa ma tô piꞌõ hã Pedru ꞌmazé.
17 Tawamhã piꞌõ ꞌridawa ꞌmadâꞌâꞌwa hã ma tô Pedru hã sadanha, ãne:
— E azama te Zezusihi siré ꞌre aimo.
Pedru hã ma sadaꞌâ, ãne:
— Mare di. Wa hã isiré ꞌre ĩmorĩ õ di.
18 Rowahâzé wa, romhuriꞌwa norĩ hã duré ꞌRe ihâimana uꞌâsi mono nhorõwa ꞌri ꞌrãihâ ꞌmadâꞌâꞌwa norĩ zama ma tô sima pré zaꞌra, hâiꞌro zaꞌra da. Tame te unhama dawa aimasa. Pedruhu zama te dame tihâiꞌro.
Sasedoti ipire uptabi hã, Zezusi te te isadanharĩzé
19 Taha ré, sasedoti dama ipire uptabi hã, ma tô Zezusi sadanha, isiré ꞌre inomro mono norĩ na duré isimiroti na zama.
20 Tawamhã Zezusi hã ma tô ãma sadaꞌâ, ãne:
— Sõꞌawi wa tô te dama ꞌre rowasuꞌu, uburé ma. Rowahutuzé mono na, duré ꞌRe ihâimana uꞌâsi mono nhorõwa ꞌri ꞌrãihâ ãma zama, wa tô te ꞌre rowahutu uꞌâsi, Zudeu norĩ ꞌre isiꞌrãꞌõtõ mono zéb ãma hã. Niwa piꞌuriwi te rowahutu õ di.
21 Tahawa, e marĩ da, te tane na ĩzadanha. Ĩwapariꞌwa norĩ hã sadanharĩ zaꞌra na. Ta norĩ hã te te waihuꞌu pese zaꞌra di, te tãma ꞌre irowasuꞌu zaꞌra mono zé hã.
22 Tawamhã Zezusi hã ãne te te tãma nharĩ wamhã, misi dasiꞌwapéi ꞌmanharĩꞌwa iꞌrata isa hã ma tô iꞌubu wi azâ. Ãne te tãma tinha:
— E tane, sasedoti dama ipire uptabi zadaꞌâbâzé hã.
23 Tahawa, te Zezusi hã asa tãma tinha, ãne:
— Ĩmreme na te ãma upai wamhã, maꞌãpé dama ĩwasuꞌu na, nimame te ãma iꞌupazém na. Tazahã, tô sena te nharĩ wamhã, e marĩ da, ma tô ĩꞌazâ.
24 Tawamhã Anasi hã ma tô tiꞌru, Zezusi hã pawasisi ré, Caifasi sasedoti dama ipire u, da te dasiwi saprõni da.
Pedru hã, Zezusi te te duré dawi iꞌudâzé
25 Tawamhã Simau Pedru hã hâiꞌro da, unhama dawa zahadu zab ré, te duré siwi sadanha, ãne:
— E a zama te ã hã aibâ siré ꞌre aimo.
Pedru hã ma duré dawi aiꞌudâ. Tahawa ma tô ãne sadaꞌâbâ zaꞌra:
— Mare di. Wa hã isiré ꞌre ĩmorĩ õ di.
26 Tawamhã aibâ hã te duré Pedru hã sadanha, sasedoti tisiré norĩ nhipai u ipire uptabi ma, romhuriꞌwa norĩ siré hã. Taha siwadi, ma tô Pedru hã poꞌre nhizâ. Ãne te sadanha:
— Oro a hã te isiré aiꞌmadâꞌâ õm ne, rowede zaꞌiti ãma hã.
27 Tane nherẽ, Pedru hã ma tô duré dawi aiꞌudâ. Tame awaꞌawi siꞌa hã ma tô oto hâ.
Zezusi hã Pilatuhu u da te isaprõnizé
28 Taha pari, Zudeu norĩ hã ma tô Zezusi siwi saprõ, Caifasihi nhorõwa u, romanu na dawamri na apito nhorõwa ꞌri ꞌrãihâ u hã. Mararé oto. Tane nherẽ, Zudeu norĩ hã sisisi õ di, apito nhorõwa ꞌri ꞌrãihâ u hã, Pascoa na dato nhisi ihâimana ãma siwasété ãna saihuri da, barana hã.
29 Tawamhã Pilatu hã ma tô rob u itẽme tiwatobro zaꞌra. Ãne ma tô sadanharĩ zaꞌra:
— E marĩ na te te iꞌupazém na te za asiwi iwasuꞌu wasété ꞌwa, ã hã aibâ hã.
30 Tawamhã ãne ma tô sadaꞌâbâ zaꞌra:
— Marĩ ꞌmanharĩ wasété ꞌwai õ ꞌwaꞌâhã, wa te aré wei wasiwi ãwisi õ di atẽme, ãma roti da hã.
31 Tawamhã Pilatu hã ma tô tãma nharĩ zaꞌra, ãne:
— Ãma asiwi saprõni aba. Asiꞌuihâ na ãma asiwi rowairébé aba, ate zaꞌra waꞌwa roti zahi zarina.
Tane nherẽ, ma tô ãne siwi sadaꞌâ:
— Mare di. Wama ꞌru zahi zaꞌra õ di, niꞌwa hã wa te wasiwi iwĩrĩ da hã.
32 Ãne hã ma tô tiromhâiba, Zezusi hã za tidâꞌâzém na te te sina inharĩzé hã te te sina uwaimrami da.
33 Tawamhã Pilatu ma tô apâ duré ãzé, ꞌri ꞌrãihâ u. Zezusihi zô ma tô hâ. Ãne te duré sadanha:
— E a hã, Zudeu norĩ nhibꞌapito.
34 Tawamhã Zezusi hã te asa tãma tinha, ãne:
— E asiꞌuihâ na te tane na hã ĩzadanha. E niwamhã, ma tô tane na aima ĩwasuꞌu zaꞌra ni.
35 Tawamhã Pilatu hã ma sadaꞌâ, ãne:
— E wa hã Zudeu bâ. Asiré Zudeu norĩ ma rotiꞌwa norĩ hã duré sasedoti ipire norĩ me, ma tô we siwi aiꞌãwisi ĩma. E marĩ, ma bété iꞌmanha.
36 Tawamhã Zezusi hã te tãma siwasuꞌu, ãne:
— Apito na dama ꞌre ĩhâimana mono zéb da hã, tiꞌai ãma dai õ di. Apito na dama ꞌre ĩhâimana mono zé hã ãmeb da ꞌwaꞌâhã, ĩma romhuriꞌwa norĩ hã te aré ĩꞌwawi aiꞌwapé zaꞌra, Zudeu norĩ te rotiꞌwa norĩ ma, da te ĩhâiba nhomri tõ da hã. Tane nherẽ, Apito na ꞌre ĩhâimana mono zé hã, ãmeb õ di.
37 Tahawa, Pilatu hã ma tô duré sadanha, ãne:
— E tawamhã, a hã apito.
Zezusi hã te duré tãma tinha, ãne:
— A hã te inha, wa hã apito na hã. Taha da, wa tô podo. Taha da, wa tô wei mo tiꞌai u, tô sena uptabi hã te ꞌre wasuꞌu mono da. Tawamhã niꞌwam norĩ tô sena ꞌRe ihâimana uꞌâsi mono nhimiroti niwĩ, ꞌre ihâimana zaꞌra mono norĩ hã te za ĩmreme hã te te ꞌre wapari zaꞌra.
38 Tawamhã Pilatu hã te duré sadanha, ãne:
— E marĩ, tô sena uptabi hã.
Pilatu hã Zezusi, da te wĩrĩ da, te te iwaprosizé
Tawamhã Pilatu hã te te sadanharĩ parimhã, ma tô apâ watobro, Zudeu norĩ u. Ãne ma tô tãma nharĩ zaꞌra:
— Marĩ te te iꞌupazé hã te ãma sõpẽtẽ õ di, da te wĩrĩ da, te iꞌru da hã.
39 Tane nherẽ, aihâimana zaꞌra waꞌaba zéb zarina, wa tãma te ꞌre arobꞌru misisi, dazazéb ꞌre, ꞌre isimasa mono hã tinhorõwa u ꞌre nomro mono da, Pascoa na dato nhisi ꞌre hâimana mono nhidâpâsi. E ãhã na hã te asima iwẽ zaꞌra waꞌwa, Zudeu norĩ nhibꞌapito ma, te robꞌru da, morĩ da hã.
40 Tawamhã ma tô dahârâ na sãnaꞌrata zaꞌra ni, ãne:
— Mare di. Taha ma, robꞌru õ di za, morĩ da hã. Barabasihi ma si robꞌru na, taha si morĩ da.
Barabas hã, ta hã rowasété ꞌmanharĩꞌwa.
