Zuã 6:1-71
6 Ronomro pari, Zezusi hã ma tô duré ubaꞌre na saprĩ, Galiléia isõꞌu na, Tiberiadi na isõꞌu nhisi amo hã.
2 Tawamhã daꞌahâ uptabi na ma tô isarina dasiꞌré, marĩ dama iꞌmanharĩ waihuꞌuꞌõ te te ꞌre iꞌaꞌmanharĩ mono zé hã, da te ꞌre ꞌmadâꞌâ zaꞌra mono wa, ihâzé ré norĩ hã te te ꞌre iꞌapese mono zém na.
3 Tahawa, ẽtẽꞌrãihâ na ma tô saiꞌu, Zezusi hã. Tame ma tô nhamra. Isiré ꞌre inomro mono norĩ zama, ma tô isiré asimro.
4 Tawamhã romhutu di oto, Zudeu norĩ te, Pascoa na dato nhisi ihâimanazéb da hã.
5 Tawamhã Zezusi, itẽme da te dasina irotété zaꞌra na simana wawi te te daꞌaꞌmadâꞌâ wamhã, ma tô Filipihi ma tinha, ãne:
— E mame wa za dasa hã dama uipra zaꞌra ni, ã hã daꞌahâ uptabi na idahâimana zaꞌra hã, dasaihuri da.
6 Tãma waihuꞌu pese uptabi di, marĩ za te te iꞌmanharĩzé hã. Tane nherẽ, ma tô ãne hã sadanha, niha hã Filipi te te ãma sadaꞌâbâ zô.
7 Tawamhã Filipi hã ma sadaꞌâ, ãne:
— 200 na robꞌuiprazé isapotore hâimana nherẽ hã aré, ibâ na wa te aré uipra zaꞌra õ di, iꞌuꞌẽtẽ wapu iwaꞌõno dahâiba mono bâ da te ihuri da hã.
8 Tawamhã Ãdré, Simau Pedru sisãnawã hã isiré ꞌre inomro mono norĩ siré hã, ma tô Zezusihi ma tinha, ãne:
9 — ꞌWatébrémi hã te ãme dame tihâiba, imrotõ na iꞌuꞌẽtẽ wapu cevada ꞌmanharĩ ite hã, duré maparane peꞌare ite hã. Tane nherẽ, e dawab da bâ, daꞌahâ uptabi ma hã.
10 Tawamhã Zezusi hã ma tô tãma nharĩ zaꞌra, ãne:
— Dama nharĩ zaꞌra waꞌaba, tiꞌai wa dasiꞌubumroi mono da.
Tahawa ma tô uburé tiꞌai wa asimro ni. Tame rob ãma hã, duiroire hã nomro zaꞌẽtẽ di. Tame duré aibâ norĩ dasiré ihâimana zaꞌra hã, 5 miu na ihâiba zaꞌratazé hã.
11 Taha pari Zezusi hã ma tô waibu, iꞌuꞌẽtẽ wapu hã. ꞌRe ihâimana uꞌâsi mono ãma te tiwata. Taha pari, ma tô te te dama sõmri. Tane peꞌa ma hã ma tô duré robꞌmanha. Tawamhã uburé ma tô dasima iwẽ na tasaihuri ni.
12 Da te ꞌmahâpãrĩ mono wamhã, Zezusi hã ma tô isiré ꞌre inomro mono norĩ ma tinha, ãne:
— Isiꞌatarẽme hã ubumroi pese zaꞌra waꞌaba, taré siwamnarĩ zaꞌra tõ da.
13 Tahawa, ma tô ubumro zaꞌra, isiꞌatarẽme hã. 12 na siꞌõno hã ma tô ãma ꞌmasisi zaꞌra, iꞌuꞌẽtẽ wapu wẽꞌẽ na hã.
14 Ãne hã marĩ dama iꞌmanharĩ waihuꞌuꞌõ, Zezusi te te iꞌmanharĩzé, da te ꞌmadâꞌâ zaꞌra wamhã, ma tô ãne nharĩ zaꞌra ni:
— Tô ã hã, ꞌRe ihâimana uꞌâsi mono zadawa ꞌmahârâꞌwa, tiꞌai u we imorĩ da hã.
15 Siꞌapito da, danhiptete na da te dasiwi pisutu da, Zezusi hã te te sina waihuꞌu wamhã, apâ ma tô sina siri siwaprosi, ẽtẽꞌrãihâ u.
Zezusi hã, â nhisi baba imorĩzé
16 Tawamhã robrazéb u, isiré ꞌre inomro norĩ hã ma tô siꞌra zaꞌra, âi bâ.
17 Ubaꞌre wa, ma tô asisi, Cafarnau u sisaꞌrei mono da. Mara nherẽ oto, Zezusi hã zahadu itẽme wisi zaꞌra õ di, isiꞌubumrozéb u hã.
18 Tawamhã rowaꞌu hã ma tô rowapõ, waꞌuꞌu nhiptete uptabi na. Tahawa ma tô oto tiꞌâsisasisi ꞌrãihâ.
19 Tawamhã isiré ꞌre inomro mono norĩ hã niwamhã imrotõ na duré niwamhã imropâ na tiꞌai pibuzém* na te te siré sari zaꞌra parimhã, ma tô siwi ꞌmadâ Zezusi hã, â nhisi baba itẽme imorĩ zaꞌra na ꞌrâwi. Tahawa ma tô tipahi pese zaꞌra.
20 Tane nherẽ, ma tô Zezusi hã ꞌmahârâ zaꞌra, ãne:
— Aipahi zaꞌra waꞌaba tõ. Wa hã wa we atẽme ĩmorĩ ꞌwa.
21 Tawamhã Zezusi itẽme imorĩ zaꞌra na te te siwi waihuꞌu wamhã, ubaꞌre u ma tô siwi ꞌmazé, to sina. Taha pari, ma tô aihutu â zadaꞌré ãma supara ꞌré u, itẽme isisaꞌrei mono u.
Zezusihi zô idanhopré mono zé
22 Awẽm na hã, bâtâ pusizé â zara niwĩ daꞌahâ uptabi na idahâimana zaꞌra hã Zezusihi siré ꞌre inomro mono norĩ zaꞌu ma tô ãma rosaꞌrata waihuꞌu zaꞌra ni, tame ubaꞌre misi ĩsurure si inomro na hã. Ma tô duré waihuꞌu zaꞌra ni, Zezusi hã isiré ꞌre inomro mono norĩ siré, ubaꞌre wa isébré õ na hã, duré ta norĩ hã hâiba pisutu Zezusihi zamai ãna isisaꞌrei mono na hã.
23 Taha ré hã, ꞌri waꞌõno Tiberiadi hawi nima norĩ ubaꞌre hã ma tô sina rotété zaꞌra, daꞌahâ uptabi na idahâimana zaꞌra hã iꞌuꞌẽtẽ wapu, da te ihurizéb u, Wanhibꞌapito Zezusi hã ꞌRe ihâimana uꞌâsi mono ãma wata parimhã.
24 Tawamhã Zezusi hã duré isiré ꞌre inomro mono norĩ me, õme ihâimana zaꞌra õ na da te waihuꞌu zaꞌra wamhã, ma tô ubaꞌre wa asisi ni, Cafarnau u dasisaꞌrei mono da, sô darĩtĩ zaꞌra mono da.
Zezusi hã, dasai uptabi na isiwasuꞌuzé
25 Tawamhã Zezusi hã â zara niwĩ, da te dasiwi sõpẽtẽ wamhã, ma tô dasiwi sadanharĩ ni, ãne:
— Rowahutuꞌwa, e niwa ma tô we ãwamhã aiwi.
26 Tahawa Zezusi hã ma daꞌazadaꞌâ, ãne:
— Tô sena wa za aima waihuꞌu zaꞌra waꞌwa, ãne: Iꞌuꞌẽtẽ wapu hã huri aba wẽ te, duré ꞌmahâpãrĩ aba mono wẽ te, te we ĩzô asõpré waꞌaba mo. Mare di, marĩ dama iꞌmanharĩ waihuꞌuꞌõ hã ꞌmadâꞌâ zaꞌra waꞌaba wẽ te hã.
27 Dasa hã ꞌre isiwamnarĩ suꞌu zaꞌra mono zô si, ꞌre romhuri zaꞌra waꞌaba mono tõ. Dasa, ꞌre ihâimana uꞌâsi zaꞌra mono zô si, ꞌre romhuri zaꞌra waꞌaba mono, dahâimana isiꞌutõrĩꞌõ ãma hã. Ta hã dasa hã Tiꞌai ãma Dasiré Ipoto si, te za te te aima ꞌre anhomri ꞌwa. E marĩ wa. ꞌRe ihâimana uꞌâsi mono Imama hã ma tô ꞌmanha, te te iwẽsãmri na, da te iwaihuꞌu zaꞌra zéb da hã, isadawa para te te ꞌre aꞌmanharĩ mono da.
28 Tawamhã ma tô asa siwi sadanha, ãne:
— E marĩ wa za ꞌmanharĩ zaꞌra ni, ꞌRe ihâimana uꞌâsi mono nhimiromhuri, wa te ãma uwaimrami zaꞌra da wamhã, te te wama iwẽ zaꞌra hã.
29 Tawamhã Zezusi hã ma tãma waihuꞌu zaꞌra, ãne:
— ꞌRe ihâimana uꞌâsi mono nhimiromhuri hã, ã hã tãma iwẽ, iꞌmanharĩ zaꞌra waꞌaba da hã: We te te isatõrĩ hã saze zaꞌra waꞌaba da.
30 Tahawa te duré tãma nharĩ zaꞌra, ãne:
— E marĩ te za tawamhã iꞌmanha, dama iꞌmanharĩ waihuꞌuꞌõ hã, wa te ꞌmadâꞌâ zaꞌra wa, wa te ãma iꞌasaze zaꞌra zéb da hã. E marĩ te za tô iꞌmanha.
31 Wahiꞌrata norĩ hã mana na dasa nhisi hã ma tô te te huri, rop si ꞌre irosaꞌwari mono ãma. Ãne ꞌRe ihâimana uꞌâsi mono mreme na Ibaihâ iwazé pese na robꞌuiꞌéré: “Hâiwa hawi ma tô ĩsa hã te te tãma sõmri zaꞌra, ãma isaihuri mono zéb da hã.”
32 Tahawa, Zezusi hã ma tô tãma nharĩ zaꞌra, ãne:
— Tô sena wa za aima waihuꞌu zaꞌra waꞌwa, ãne: Mozésihi õ di, dasa hâiwa hawimhã te te aima ꞌre iꞌanhomri aba mono hã. Tazahã, Ĩmama si ma tõ te te aima ꞌre anhomri ꞌwa, hâiwa hawi dasai uptabi hã.
33 ꞌRe ihâimana uꞌâsi mono hawimhã dasa hã, hâiwa hawi we imorĩ, dahâimanazé te te dama ꞌre iꞌanhomri mono da hã, tiꞌai ãma ꞌre idahâimana zaꞌra mono norĩ ma hã.
34 Tahawa ma tô tiwi waptẽrẽ zaꞌra, ãne:
— Wa wasima wẽ zaꞌra ni, tô õ hã dasai uptabi hã wama ꞌre anhomri uꞌâsi mono da.
35 Tawamhã Zezusi hã te oto tãma siwasuꞌu zaꞌra, ãne:
— Wa hã dasai uptabi, dahâimana uꞌâsi zém nhomriꞌwa. Niꞌwa hã we ĩtẽme morĩ wamhã, mrab ãna te za oto ꞌre mo. Duré niꞌwa te te ĩzazei wamhã, ꞌrubu ãna te za oto ꞌre mo.
36 Tane nherẽ, wa tô nharĩ pa, asiwi ĩꞌmadâꞌâ aba nherẽ, ĩzaze zaꞌra waꞌaba õ di.
37 Ĩmama hã te te ĩma ꞌre iꞌapisutu mono si, te za we ĩtẽme ꞌre nomro. Tawamhã we ĩtẽme ꞌre inomro mono norĩ hã te wẽꞌõ waihuꞌu zaꞌra õ di za.
38 E marĩ wa. Hâiwa hawi wa tô wei mo, we ĩzatõrĩꞌwa te te sima ꞌre iwẽ mono zé hã te ꞌre abꞌmanharĩ mono da. Mare di, te ĩsima iwẽzéb zarina, te ꞌre iꞌabꞌmanharĩ mono da hã.
39 We ĩzatõrĩꞌwai ma iwẽ hã, ã hã: Te te ĩma ipisutu zaꞌra norĩ hã te ꞌmanhimini tõ da, duré uburé te aihâiwaꞌutu da, robꞌrãsutu ãma hã.
40 E marĩ wa. Ĩmama ma iwẽ hã, Iꞌra titõmo na te te ꞌre ꞌmadâꞌâ zaꞌra mono wa, te te ꞌre isaze zaꞌra mono norĩ ma, dahâimanazé isiꞌutõrĩꞌõ hã tãma ꞌre hâimana zaꞌra mono da. Tawamhã ta norĩ hã wa za ahâiwaꞌutu, robꞌrãsutu ãma hã.
41 Tahawa Zudeu norĩ hã ma tô Zezusi hã siwi mreme wẽꞌõ, te te sina nharĩ wa, ãne: “Wa hã dasai uptabi, hâiwa hawi we ĩmorĩ.”
42 Ãne te dasima nharĩ zaꞌra ni:
— Oro ã hã Zezusi, Zuzéhé ꞌra za. Oro wama waihuꞌu pese zaꞌra za, imama hã duré ina zama. E niha te tane nherẽ, sina tinha, hâiwa hawi we imorĩ na.
43 Tahawa, te Zezusi hã asa tãma nharĩ zaꞌra, ãne:
— Tôꞌã. Tane hã asadawa ꞌrasi na ĩma inharĩ zaꞌra waꞌwa hã sahâri zaꞌra waꞌaba!
44 Niꞌwa hã we ĩtẽme morĩ waihuꞌu õ di, we ĩzatõrĩꞌwa Ĩmama hâiwa ãma ꞌre isãmra mono hã te te we ĩtẽme saprõni õ nherẽ. Tawamhã ta hã wa za hâiwaꞌutu, robꞌrãsutu ãma hã.
45 Ãne ꞌRe ihâimana uꞌâsi mono zadawa ꞌmahârâꞌwa norĩ hã ma tô ãma robꞌuiꞌéré zaꞌra: “ꞌRe ihâimana uꞌâsi mono si te za uburé te te dama ꞌre awaihuꞌu.” Uburé Imama mreme te te ꞌre iwapari zaꞌra mono hã duré te te ãma ꞌre iwaihuꞌu zaꞌra mono norĩ hã, ta norĩ hã te za we ĩtẽme ꞌre nomro.
46 Niwa, niꞌwa Imama hã te te ꞌmadâꞌâ õ di. Timama hawi we imorĩ si ma tô ꞌmadâ. Taha si ma tô Timama hã ꞌmadâ.
47 — Tô sena wa za ãne hã aima waihuꞌu zaꞌra waꞌwa: Niꞌwa hã te te ĩzazei wamhã, dahâimanazé isiꞌutõrĩꞌõ te za sina uwaimra.
48 Wa hã dasai uptabi, dahâimana uꞌâsi zém nhomriꞌwa.
49 Aihiꞌrata norĩ waꞌwa hã, dasa ma tô te te huri mana na isisi hã, rop si ꞌre irosaꞌwari mono ãma hã. Tane nherẽ, ma tô ta norĩ hã tidâꞌâ zaꞌra.
50 Ãhãta te ãme tihâiba, hâiwa hawi dasai uptabi hã. Ta hã dasa, niꞌwa te te ꞌrẽne wamhã, niwa idâꞌâ da hã, mare di.
51 Wa hã dasai uptabi, dahâimana uꞌâsi zém nhomriꞌwa, hâiwa hawi we ĩmorĩ. Ã hã dasa na ꞌre dasaihuri mono wamhã, dadâꞌâ ãna te za ꞌre dahâimana uꞌâsi zaꞌra. Dasai uptabi hã ĩhâiba te wasuꞌu. Ta hã wa za uburé dazawi te, dazada tisõ, dahâimanazé isiꞌutõrĩꞌõ hã da te ꞌre sõpẽtẽ zaꞌra mono da.
52 Ãne siwasuꞌu wa, te Zudeu norĩ hã ꞌrâwi sima nharĩ zaꞌra, ãne:
— E niha te za ã hã aibâ hã tihâiba wama sõmri zaꞌra, ãma ꞌre wasaihuri mono da hã.
53 Tahawa te Zezusi hã duré tãma nharĩ zaꞌra, ãne:
— Tô sena wa aima waihuꞌu zaꞌra waꞌwa, ãne: Tiꞌai ãma Dasiré Ipoto hâiba na ꞌre asaihuri aba mono õ wamhã, duré iwapru, ꞌre âhuri aba mono õ wamhã, rowẽ uꞌâsi ꞌre iꞌaihâimana zaꞌra waꞌaba mono zé hã, aima ꞌre hâimana zaꞌra waꞌaba mono õ di za.
54 Niꞌwa hã ĩhâiba na ꞌre sai uꞌâsi mono wamhã, duré ĩwapru te te ꞌre hâsi uꞌâsi mono wamhã, dahâimanazé isiꞌutõrĩꞌõ hã te za tãma ꞌre hâimana. Tawamhã ta hã wa za hâiwaꞌutu, robꞌrãsutu ãma hã.
55 Ĩhâiba hã, ta hã dasai uptabi. Duré ĩwapru hã, ta hã â uptabi.
56 Niꞌwa hã ĩhâiba na ꞌre sai uꞌâsi mono wamhã, duré ĩwapru te te ꞌre hâsi uꞌâsi mono wamhã, te za ĩꞌãma ꞌre hâimana uꞌâsi. Tawamhã taha siré wa za duré õne uꞌâsi ꞌre ĩhâimana.
57 Ĩmama, dahâimana uꞌâsi zém nhomriꞌwa we ĩzatõrĩꞌwai uꞌâbâ, wa ꞌre ĩhâimana. Tane duré, niꞌwa hã ĩꞌãma ꞌre sai uꞌâsi mono wamhã, te za ĩꞌuꞌâbâ ꞌre hâimana uꞌâsi.
58 Ã hã dasai uptabi, hâiwa hawi we imorĩ. Aihiꞌrata norĩ waꞌwa hã dasa ma tô te te huri, mana na isisi hã. Tane nherẽ, ma tô tidâꞌâ zaꞌra. Tazahã, ã hã dasai uptabi na niꞌwa ꞌre sai mono wamhã, te za ꞌre hâimana uꞌâsi.
59 Zezusi hã Cafarnau ãma Zudeu norĩ te rowahutuzéb ãma te te dama rowahutu ré, ma tô ãne na rowasuꞌu.
Zezusi hã, daꞌahâ na da te dasiwi irẽmezé
60 Tawamhã daꞌahâ na Zezusihi siré ꞌre idanomro mono hã, ãne hã da te wapari zaꞌra wamhã, ma tô ãne nharĩ zaꞌra ni:
— Isimiroti hã pire uptabi di, ãma idahâimana da hã. E ꞌwa hã te te ꞌwapé da bâ.
61 Ãne hã isiré ꞌre inomro mono hã te te sima inharĩ zaꞌra zé, Zezusi te te waihuꞌu wamhã, ma tô ãne tãma nharĩ zaꞌra:
— E te irowasuꞌuzém na hã ma asiwi ĩmreme wẽꞌõ waꞌwa.
62 E niha te aré tiromhâiba, Tiꞌai ãma Dasiré Ipodo hã ꞌre isãmra mono zéb u, apâ hâiwa u morĩ ré, asiwi ꞌmadâꞌâ aba wamhã.
63 ꞌRe ihâimana uꞌâsi mono Pẽꞌẽzani hã, ta hã dahâimana uꞌâsi zém nhomriꞌwa. Tazahã, tiꞌai ãma ꞌre idahâimana zaꞌra mono hã, ta hã da te ꞌmanharĩ waihuꞌu õ di. Te aima irowasuꞌu zaꞌra waꞌaba zé hã dapẽꞌẽzani isiꞌutõrĩꞌõ na duré dahâimana uꞌâsi zém na.
64 Tane nherẽ, niꞌwam norĩ hã saze zaꞌra waꞌaba õ di.
Ãne ma tô Zezusi hã tãma nharĩ zaꞌra, romhuri na te te isãnaꞌrata hawim haré, te te waihuꞌu pese wa, niꞌwam norĩ hã te te isaze zaꞌra õ na hã, duré za niꞌwa hã te te dama ihâiba nhomri na hã.
65 — Ãne wa, wa tô aima nharĩ zaꞌra waꞌwa, niꞌwa hã te te ĩzaze waihuꞌu õ di, Ĩmama hã te te pisutu õ nherẽ. — Ãne Zezusi hã ma tô ãma tãma uzusi zaꞌra.
66 Ãne na Zezusi te te tãma nharĩ zaꞌra parimhã, daꞌahâ na aré isiré ꞌre idanomro mono hã ma tô oto dasiwi rẽme ni. Isiré oto ꞌre danomro mono õ di.
67 Tawamhã Zezusi hã ma tô sadanharĩ zaꞌra, 12 na isiré ꞌre inomro mono norĩ hã, ãne:
— E a norĩ waꞌaba zama, asima wẽ zaꞌra waꞌaba õ di, asiwi ĩrẽme aba da hã.
68 Tawamhã Simau Pedru ma tô sadaꞌâ, ãne:
— Wanhibꞌapito, e ꞌwa sarina, wa za aiꞌabaꞌré ni. Aiwétési asimirowasuꞌu hã, dahâimanazé isiꞌutõrĩꞌõ nhomriꞌwa na.
69 Wa tô asaze zaꞌra ni, duré wama aiwaihuꞌu pese zaꞌra di, aiwazé pese na ꞌre iꞌaihâimana mono na, ꞌRe ihâimana uꞌâsi mono we te te iꞌasatõrĩ na hã.
70 Tawamhã Zezusi hã te asa tãma nharĩ zaꞌra, ãne:
— Wa hã wa tô aipisutu zaꞌra waꞌwa, 12 na iꞌaihâiba zaꞌra waꞌwa hã. Tane nherẽ, aiwazarib zaꞌra waꞌaba hã, niꞌwa misi hã waꞌuburé.
71 Ãne hã ma tô Zudasihi hâiba na tinha, Simau Iscariotihi ꞌra na. E marĩ wa. Zudasi hã 12 na ihâiba zaꞌra norĩ siré ꞌre morĩ nherẽ, za te te hâiba nhomri wa.
Ĩwaꞌõtõ piꞌreba watsuꞌu mono
^ 6:19 Tiꞌai pibuzé hã, quilometru te wasuꞌu
