Zuã 8:1-59
8 Tawamhã Zezusi hã ma tô mo, Olivera na ẽtẽ ꞌrãihâ nhisi u.
2 Duré apâ awẽm na hã ma tô mo, ꞌRe ihâimana uꞌâsi mono nhorõwa ꞌri ꞌrãihâ u. Tame ma tô daꞌahâ na imana wawi aiꞌrãꞌõtõ ni. Tawamhã tiꞌai wa, ma tô nhamra, te te dama rowahutu da hã.
3 Te te dama rowahutu ré, ꞌRe ihâimana uꞌâsi mono nhimiroti zahi na robꞌuiꞌéré na dama rowahutuꞌwa norĩ hã* duré farizeu norĩ me, ma tô siwi ãwisi, piꞌõ hã mro ré nherẽ, aibâ aimawi ré nomro ré, da te isõpẽne hã. Tawamhã danhoꞌre u ma tô hâiwi siwi tisã.
4 Taha pari te Zezusihi ma wasuꞌu zaꞌra, ãne:
— Rowahutuꞌwa, ã hã piꞌõ hã mro ré nherẽ, aibâ aimawi ré nomro ré, ma tô dasiwi sõpẽtẽ ni.
5 Mozésihi nhimiroti zahi hã te tiꞌru, ãne wamhã, ẽtẽ na wa te ꞌre simroi mono da, piꞌõ norĩ hã. A hã bété, e niha te za ãma irowaihu.
6 Tô õne si ma tô nasi ãma tãma sahu zaꞌra isadanharĩ na hã, te te ãma upai wa, taha na te te iwasédé hã ãma hiri zaꞌra da. Tane nherẽ, Zezusi hã ma tô aiwẽꞌẽ. Tinhiptõmohi na ma tô robꞌuiꞌéré, tiꞌa na.
7 Ma tô nasi siwi sadanha, õne si. Tahawa Zezusi hã ma tô oto za hâiwi. Ãne te tãma nharĩ zaꞌra:
— Niꞌwa aiꞌreb zaꞌra waꞌaba hã wasété ãna ꞌre morĩ wamhã, te te dama simrimi ꞌrata, ẽtẽ na.
8 Taha pari ma tô duré apâ aiwẽꞌẽ. Apâ te duré robꞌuiꞌéré, tiꞌa na.
9 Tawamhã te te iwapari zaꞌra norĩ hã ma tô nasi wairé misisi, ihâiba prédum hawi sidâpâsi, ipréduptéb u. Tawamhã Zezusihi si ma tô oto siꞌatarẽ. Duré piꞌõ si te isõꞌre za oto.
10 Tawamhã Zezusi hã ma tô duré wahudu. Ãne te piꞌõ sadanha:
— E mahãta te te we siwi iꞌasaprõni norĩ hã. E niꞌwai õ di, aiwasédé te te aiꞌãma ihiri wasété da hã, da te aima robꞌmanharĩ wasété da.
11 Tawamhã piꞌõ hã ma sadaꞌâ, ãne:
— Maze di. Niꞌwa hã sab õ di.
Tawamhã Zezusi hã te tãma tinha, ãne:
— Tane tô. Wa hã te duré aiwasédé hã aiꞌãma hiri õ di za, da te aima robꞌmanharĩ wasété da hã. Mo oto aimorĩ. Aiwasédé hã ꞌre ꞌmanharĩ zahu mono tõ.
Zezusi hã, dama rowaꞌaꞌwa na isiwasuꞌuzé
12 Tawamhã Zezusi hã te te duré dama rowasuꞌu wamhã, te ãne dama siwasuꞌu:
— Wa hã dama rowaꞌaꞌwa, tiꞌai ãma ꞌre idahâimana zaꞌra mono norĩ ma hã. Niꞌwa hã ĩzarina morĩ wamhã, niwa robra na ihâimana da hã, mare di. Rowaꞌa si ꞌre ihâimana uꞌâsi mono zéb ꞌremhã te za tãma ꞌre hâimana.
13 Tahawa te farizeu norĩ hã tãma nharĩ zaꞌra, ãne:
— Asihawim na te ꞌrâwi asiwasuꞌu. Tahawa iꞌasiwasuꞌuzé hã marĩ dai õ di.
14 Tawamhã Zezusi hã ma sadaꞌâbâ zaꞌra, ãne:
— Ĩsihawim na ĩsiwasuꞌu nherẽ, tô sena wa ĩsiwasuꞌu. E marĩ wa. Ĩma waihuꞌu pese di, nima hawi we ĩmorĩzé hã duré nimomo za ĩmorĩzé hã. Tazahã, aima waihuꞌu zaꞌra waꞌaba õ di, nima hawi we ĩmorĩzé hã duré nimomo za ĩmorĩzé hã.
15 Tiꞌai ãma danhimirobꞌmadâꞌâ na si te dahâimanazéb zarina daꞌãma ꞌre irowairébé zaꞌra waꞌaba mo. Tane nherẽ, wa hã te daꞌãma ꞌre arowairébé mono õ di.
16 Tane nherẽ, dahâimanazéb zarina te daꞌãma ꞌre arowairébé mono da wamhã, tô sena wa za dahâimanazéb zarina te daꞌãma ꞌre arowairébé, ĩsiwaprosi õ wa. E marĩ wa. Ĩmama we ĩzatõrĩꞌwa hã ĩsiré ꞌre hâimana mono wa.
17 Ate zaꞌra waꞌwa roti zahi na hã, niꞌwam norĩ hã sisazei wẽ zahuré wamhã, te te irowasuꞌu zahuré zé hã, tô sena.
18 Tane wa hã ĩsihawim na wa ꞌre ĩsiwasuꞌu. Ĩmama we ĩzatõrĩꞌwa zama te duré te te ꞌre ĩwasuꞌu.
19 Tawamhã farizeu norĩ hã te siwi sadanha, ãne:
— E mahãta tawamhã, aimama.
Zezusi hã ma sadaꞌâbâ zaꞌra, ãne:
— Aima ĩwaihuꞌu zaꞌra waꞌaba õ di. Duré Ĩmama zama aima waihuꞌu zaꞌra waꞌaba õ di. Aima ĩwaihuꞌu pese zaꞌra waꞌaba ꞌwaꞌâhã, Ĩmama hã te aré duré asiwi iwaihuꞌu ꞌwa.
20 Ãne ma tô Zezusi hã tinha, ꞌRe ihâimana uꞌâsi mono nhorõwa ꞌri ꞌrãihâ ãma ꞌri ꞌwawi waꞌra ꞌre, te te dama rowahutu ré, robꞌuiprazém na danhoprubzé, da te ꞌre iséme mono zéb ꞌrata sab ré. Tane nherẽ, niꞌwa hã te te âri õ di, zahadu ite bâdâ hã iwa waptãꞌã õ wa, ꞌRe ihâimana uꞌâsi mono te te tãma ipisutuzé hã.
“E ꞌwa hã a hã.” Ãne Zezusi hã da te dasiwi isadanharĩzé
21 Tawamhã Zezusi hã te duré dama sina tinha, ãne:
— Wa za oto mo. Tawamhã te za ĩzô airĩtĩ zaꞌra waꞌwa. Tane nherẽ, aiwasété ré te za atâꞌâ zaꞌra waꞌwa za. Ĩmorĩzéb u hã, ãma aiꞌabaꞌréi waihuꞌu aba õ di za.
22 Tahawa te Zudeu norĩ hã sima nharĩ zaꞌra, ãne:
— Ãté te za siwĩ. Ãté tahawa te ãne tinha, “Ĩmorĩzéb u hã, ãma aiꞌabaꞌréi waihuꞌu aba õ di za.”
23 Tawamhã Zezusi hã te duré tãma nharĩ zaꞌra, ãne:
— A norĩ waꞌwa hã ãme tiꞌai ãma hã. Tazahã, wa hã hâiwa hawi, we ĩmorĩ. A norĩ waꞌwa hã tiꞌai ãma aꞌuwẽ, ꞌre iꞌaihâimana zaꞌra waꞌaba mono. Tazahã, wa hã tiꞌai ãma aꞌuwẽ na ꞌre ĩhâimana mono õ di.
24 Tahawa, wa tô aima nharĩ zaꞌra waꞌwa, aiwasété ré, za ꞌre iꞌatâꞌâ zaꞌra waꞌaba mono na hã. “Wa hã tô Wa hã” na asiwi ĩzazei waꞌaba õ wamhã, aiwasété ré, te za tô ꞌre atâꞌâ zaꞌra waꞌaba mo.
25 Tahawa te siwi sadanha, ãne:
— E ꞌwa hã a hã.
Zezusi ma sadaꞌâbâ zaꞌra, ãne:
— Rowahutu na te sãnaꞌrata hawim haré, wa tô ꞌre ĩsiwasuꞌu, tô õ hã ꞌre ĩhâimana mono na hã.
26 Marĩ na aihâimanazéb zarina, zahadu te aima irowasuꞌu zaꞌra waꞌaba da hã ahâ di, marĩ hã duré te aiꞌãma irowairébé zaꞌra waꞌaba da hã. We ĩzatõrĩꞌwa hã umnhasi zaꞌẽtẽ di. Tahawa, ta hã te te ĩma ꞌre irowasuꞌu mono zéb zarina si, wa te tô te dama ꞌre rowasuꞌu, tiꞌai ãma ꞌre idahâimana zaꞌra mono norĩ ma hã.
27 Tawamhã te te siwi sadaihuꞌu õ di, Timama te te tãma iwasuꞌu zaꞌra zém na hã.
28 Tahawa Zezusi hã te tãma nharĩ zaꞌra, ãne:
— Tiꞌai ãma Dasiré Ipodo hã asiwi sasõmri aba wapsi, te za iwaihuꞌu zaꞌra waꞌwa, Wa Hã na hã, duré marĩ hã ĩsihawi te ꞌre iꞌabꞌmanharĩ mono õ na hã duré Ĩmama hã te te ĩma iwaihuꞌuzéb zarina si te ꞌre irowasuꞌu mono na hã.
29 We ĩzatõrĩꞌwa hã te ĩsiré ꞌre hâimana uꞌâsi. Ĩsiwaprosi ĩhâimana da hã te te ꞌre ĩrẽme mono õ di, te te tãma ꞌre irowẽ mono zéb zarina si, te ꞌre abꞌmanharĩ mono wa.
30 Tawamhã ãne hã imreme da te wapari zaꞌra wamhã, daꞌahâ na ma tô saze zaꞌra ni.
Isazei uptabi ꞌwa, ꞌre idanomro mono zé
31 Tawamhã Zezusi hã te Zudeu norĩ ma tinha, te te isaze zaꞌra norĩ ma, ãne:
— Asiptete sina ĩnhimiroti na ꞌre aihâimana zaꞌra waꞌaba mono wamhã, ĩzaze uptabi ꞌwa te za ꞌre anomro aba mo.
32 Tawap si te za tô sena ꞌRe ihâimana uꞌâsi mono nhimiroti hã iwaihuꞌu zaꞌra waꞌwa. Tawamhã tô sena ta hã te za aiwasété hawi asani zaꞌra waꞌwa, asima iwẽ na ꞌre aihâimana zaꞌra waꞌaba mono da.
33 Tawamhã Zudeu norĩ hã ma tô ãne siwi sadaꞌâ:
— Wa norĩ hã Abraꞌãhã nhihudu, wa ꞌre wanomro. Niwa wawadaꞌuri zarina watedeꞌwai ma, wa te ꞌre romhuri zaꞌra mono õ di. E niha te tane nherẽ, wama inharĩ zaꞌra, wasima iwẽ na, za ꞌre iwahâimana zaꞌra mono na hã.
34 Tawamhã Zezusi hã ma ãma sadaꞌâbâ zaꞌra, ãne:
— Tô sena wa za aima waihuꞌu zaꞌra waꞌwa, ãne: Dawasédé hã da te ꞌre ꞌmanharĩ uꞌâsi zaꞌra mono wamhã, dawasété wi hã ꞌre dawairébé waihuꞌu mono õ di, wadaꞌuri zarina titedeꞌwai ma romhuriꞌwa norĩ hã tinhibꞌihâꞌa wi ꞌre iwairébé waihuꞌu mono õ ne.
35 Wadaꞌuri zarina titedeꞌwai ma romhuriꞌwa hã tinhibꞌihâꞌa sipoto na ꞌre ihâimana uꞌâsi mono da hã waihuꞌu õ di. Iꞌra uptabi si te za isiré hã ꞌre hâimana uꞌâsi.
36 Tahawa, Iꞌra hã aiwasété hawi te te asani zaꞌra waꞌaba wamhã, te za tô asima iwẽ na ꞌre aihâimana zaꞌra waꞌaba mo oto.
37 A norĩ waꞌwa hã Abraꞌãhã nhihudu na ĩma aiwaihuꞌu pese zaꞌra waꞌaba di. Tane nherẽ, te asõpré waꞌwa, bâdâ hã aima ihâimana zaꞌra waꞌaba zô, asiwi ĩwĩrĩ aba da hã, ĩnhimirowasuꞌu na ĩzaze zaꞌra waꞌaba õ wa.
38 Ĩmama te te ĩma iwaihuꞌuzéb zarina, wa te tô te aima ꞌre rowasuꞌu zaꞌra waꞌwa. Tane nherẽ, a norĩ waꞌwa hã aimama ꞌre iwapari zaꞌra waꞌaba mono zéb zarina te ꞌre iꞌmanharĩ zaꞌra waꞌaba mo.
39 Tawamhã te Zezusihi ma duré nharĩ zaꞌra, ãne:
— Wa norĩ hã, Abraꞌãhã nhihudu.
Zezusi hã ma sadaꞌâbâ zaꞌra, ãne:
— Abraꞌãhã nhihudu ꞌwaꞌâhã, isine romhuri hã te aré ꞌre iꞌmanharĩ zaꞌra waꞌwa.
40 Tane nherẽ, te asima iwẽ zaꞌra waꞌwa asiwi ĩwĩrĩ aba da hã, tô sena ꞌRe ihâimana uꞌâsi mono te iwaparizéb zarina, te aima rowasuꞌu zaꞌra waꞌaba nherẽ. Abraꞌã hã, ãne hã te te ꞌmanharĩ õ di.
41 Aimama zaꞌra waꞌaba nhimiromhuri hã te iꞌmanharĩ zaꞌra waꞌwa.
Tane nherẽ, ma Zudeu norĩ hã sadaꞌâbâ zaꞌra, ãne:
— Wa norĩ hã siwaꞌru daꞌra na ꞌre wahâimana zaꞌra mono õ di. Wamama zaꞌra hã misire, ta hã ꞌRe ihâimana uꞌâsi mono.
42 Tawamhã Zezusi hã te duré tãma nharĩ zaꞌra, ãne:
— ꞌRe ihâimana uꞌâsi mono hã, Aimama zaꞌra waꞌaba ꞌwaꞌâhã, te aré asiwi ꞌre ĩzawi pese aba mo. E marĩ wa. ꞌRe ihâimana uꞌâsi mono hawi we ĩmorĩ wa. Tahawa ãhã na hã wa ãme ĩhâiba. Ĩsiꞌuihâ na we ĩmorĩ õ di. Õ hã ma tô we ĩzatõ.
43 E niha bâ, aima ĩzadaihuꞌu zaꞌra waꞌaba õ di. Ĩnhimirowasuꞌu hã wapari zaꞌra waꞌaba da, asima wẽ zaꞌra waꞌaba õ wa, te ꞌre irowasuꞌu mono zé hã.
44 A norĩ waꞌwa hã te aimama ꞌra na ꞌre aihâimana zaꞌra waꞌaba mo, Waꞌuburé ꞌra na. Te duré asima iwẽ zaꞌra waꞌwa, te te sima iwẽzé hã ꞌmanharĩ zaꞌra waꞌaba da. Ta hã te romnhanaꞌrata hawim haré dapãrĩꞌwa na ꞌre hâimana. Duré tô sena rowasuꞌu iwẽ hã tãma wẽ õ di, tô sena ihâimanazé hã tãma hâimana õ wa. Dama sadawa nhipese wamhã, tô ꞌre ihâimana mono zéb zarina, te za ꞌmanha. E marĩ wa. Ta hã isadawa nhipe, dazadawa nhipese mama.
45 Tane nherẽ, asiwi ĩzazei waꞌaba õ di, tô sena te ꞌre rowasuꞌu mono wa.
46 Aiꞌreb zaꞌra waꞌaba hã, e ꞌwa hã ĩwasédé te te ĩꞌãma hiri waihuꞌu pese di. Tô sena te ꞌre rowasuꞌu mono wamhã, e niha bâ bété asiwi ĩzazei waꞌaba õ di.
47 Niꞌwa hã, ꞌRe ihâimana uꞌâsi mono nhibꞌaꞌuwẽ ꞌre hâimana mono wamhã, te za wapa, ꞌRe ihâimana uꞌâsi mono mreme hã. Tazahã, a norĩ waꞌwa hã wapari zaꞌra waꞌaba õ di, ꞌRe ihâimana uꞌâsi mono tei õ wa.
Zezusi duré Abraꞌã hã
48 Tawamhã Zudeu norĩ hã te duré tãma nharĩ zaꞌra, ãne:
— E tawamhã wa te ãma uwaimrami zaꞌra õ di, a hã Samaria hawim na hã duré waꞌuburé ré, ꞌre iꞌaihâimana mono na hã.
49 Tahawa Zezusi hã ma sadaꞌâbâ zaꞌra, ãne:
— Mare di. Waꞌuburé ré, ꞌre ĩmorĩ õ di. Ĩmama hã wa tô te ꞌre wazé pese. Tane nherẽ, a norĩ waꞌwa hã asiwi ꞌre ĩwazé waꞌaba mono õ di.
50 Ĩꞌãma ꞌre dawata zaꞌra mono zô, ĩsina ꞌre ĩnhimnhasi mono õ di, wa hã. Misire ma tô te te sima ꞌre wẽ ĩma, ĩꞌãma ꞌre dawata zaꞌra mono da. Ta hã, Daꞌãma Rowairébéꞌwa.
51 Tô sena wa za aima waihuꞌu zaꞌra waꞌwa, ãne: Niꞌwa hã ĩnhimiroti te te ꞌre ꞌmadâꞌâ pese mono wamhã, niwa idâꞌâ da hã, mare di.
52 Tawamhã Zudeu norĩ hã te Zezusihi ma nharĩ zaꞌra, ãne:
— Wa tô oto aiwaihuꞌu pese zaꞌra ni, Waꞌuburé ré, ꞌre aimorĩ na hã. Abraꞌã hã ma tô dârâ. Uburé ꞌRe ihâimana uꞌâsi mono zadawa ꞌmahârâꞌwa norĩ zama ma tô duré tidâꞌâ zaꞌra. Tane nherẽ, te inha, ãne: “Niꞌwa hã ĩnhimiroti te te ꞌre ꞌmadâꞌâ pese mono wamhã, niwa dâꞌâ õ di za.”
53 E wamama Abraꞌãhã nhipai u aipire na aihâimana bâ. Ta hã ma tô dârâ. ꞌRe ihâimana uꞌâsi mono zadawa ꞌmahârâꞌwa norĩ zama ma tô duré tidâꞌâ zaꞌra. E ꞌwa hã bété, a hã. E aipire na te ãne hã asina irosaꞌra.
54 Tawamhã Zezusi hã te duré tãma nharĩ zaꞌra, ãne:
— ꞌRâwi ĩsiꞌãma ꞌre ĩwata mono wamhã, ĩsiꞌãma ꞌre ĩwata mono zé hã, marĩ dai õ di. Ĩmama si te ĩꞌãma ꞌre wata, ate ꞌRe ihâimana uꞌâsi mono zaꞌra waꞌaba na ꞌre iwasuꞌu zaꞌra waꞌaba mono hã.
55 Tane nherẽ, ta hã aima waihuꞌu zaꞌra waꞌaba õ di. Tazahã ĩma hã waihuꞌu pese di. Ĩma iwaihuꞌu õ na aima ĩsiwasuꞌu zaꞌra waꞌaba ꞌwaꞌâhã, wa aré sadawa hapese, asine zaꞌra waꞌaba. Tane nherẽ, ĩma waihuꞌu pese di tô. Duré isimiroti hã wa te te ꞌre ꞌmadâꞌâ pese.
56 Aihiꞌrata zaꞌra waꞌwa Abraꞌãhã ma, ma tô tirowẽ pese, aptoꞌo ré we ĩmorĩzé bâdâ hã te te ꞌmadâꞌâ da, ꞌre simipari mono wa. Ta hã ma tô ꞌmadâ we ĩmorĩzé hã. Tahawa tãma rowẽ uptabi di.
57 Tawamhã Zudeu norĩ hã te duré tãma nharĩ zaꞌra, ãne:
— Zahadu 50 na aiꞌãma wahub õ di. E niha ma te merẽ tawamhã iꞌmadâ, Abraꞌã hã.
58 — Tô sena, wa za aima ĩsiwasuꞌu zaꞌra waꞌwa. Abraꞌã hã poto õ ré, wa ꞌre ĩhâimana uꞌâsi, Wa Hã Tô. — Ãne ma tô Zezusi hã tãma siwasuꞌu zaꞌra.
59 Tahawa ẽne hã ma tô sada waibu zaꞌra. Tane nherẽ, Zezusi hã ma tô aimaꞌu. Ma tô oto watobro, ꞌRe ihâimana uꞌâsi mono nhorõwa ꞌri ꞌrãihâ ꞌwawi waꞌra hawimhã.
Ĩwaꞌõtõ piꞌreba watsuꞌu mono
^ 8:3 ꞌRe ihâimana uꞌâsi mono nhimiroti zahi na dama rowahutuꞌwa norĩ hã, mestre da lei norĩ
