Atus 11:1-30
11 Tawamhã Zezusihi zadawa wasuꞌuꞌwa norĩ duré isazeiꞌwa norĩ uburé Zudéa tiꞌai ꞌre, ꞌre isiꞌubumroi mono norĩ hã ma tô rowasuꞌu hã wapari zaꞌra, zudeuꞌõ norĩ zama ꞌRe ihâimana uꞌâsi mono mreme te te isaze zaꞌra na hã.
2 Tawamhã Pedru hã Zeruzalẽ u apâ morĩ wamhã, niꞌwam norĩ hã ꞌre idasisihâiwata nhihâri zaꞌra mono niwĩ ꞌre ihâimana zaꞌra mono norĩ hã ma tô siwi wasu.
3 Ma tô tãma nharĩ zaꞌra, ãne:
— A hã ma tô asé, aibâ ꞌre isisihâiwata nhihâri zaꞌra mono õ norĩ nhorõwa u. Te duré isiré asa zaꞌra.
4 Tawamhã Pedru hã ma tô ãma tãma rowasuꞌu zaꞌra, isãnaꞌrata hawi uburé iromhâimanazém na hã. Ãne te tãma rowasuꞌu zaꞌra:
5 — Zopi ãma ĩnhamra ré hã, te rowaptẽrẽ ré, wa tô marĩ hã ꞌmadâ, ĩnhotõ ꞌrowim ne. Wa ꞌmadâ marĩ hã zazahâ hâi wawẽ ne, hâiwa hawi we te te isiꞌra hã, maparane siꞌuiwa na ihâ ꞌrãsutu na iwasi hã. Ta hã ĩꞌrata ma tô mazazâ.
6 Iꞌremhã wa tô ꞌmadâꞌâ pese. Abaze da te ꞌre itébré zaꞌra mono hã wa tô ꞌmadâ duré rom na abaze zahi hã duré abaze diꞌi na ꞌre inomro mono duré si norĩ zama.
7 Taha pari damreme hã wa tô wapa, ãne te te ĩma inharĩ hã: “Pedru, aiwahutu! Asima ꞌmaiwĩrĩ, ꞌmaiꞌrẽne da.”
8 Tahawa wa sadaꞌâ, ãne: “Ĩnhibꞌapito, mare di! Niwa marĩ te ꞌrẽne õ di iwasétére hã, ꞌRe ihâimana uꞌâsi mono nhimiroti zahi na Mozési te te irobꞌuiꞌérézém na te te wawi isawi zaꞌra hã.”
9 Tawamhã hâiwa hawi damreme te duré ĩma tinha, ãne: “Marĩ hã wasété newa, sisisi tõ, ꞌRe ihâimana uꞌâsi mono wẽ na hâimana da, te te oto iꞌmanharĩ hã.”
10 Ãne hã siꞌubdatõ ma tô ãma ĩma sahu. Taha pari ma tô apâ hâiwa u âri ni.
11 Tawamhã tô taha bâtâ pibuzém na ma tô aibâ norĩ siꞌubdatõ aihutu ĩzaꞌwarizéb u, da te ãma ĩzô isatõrĩ zaꞌra hã Cézaréia hawi.
12 Tawamhã ꞌRe ihâimana uꞌâsi mono Pẽꞌẽzani hã ma tô ĩma tinha, isiré ĩmorĩ zaꞌra da, ĩsiti ãna. Ã hã ĩsisãnawã norĩ 6 na ihâiba zaꞌra hã ma tô we ĩsiré aiꞌabaꞌré. Tawamhã wa tô asisi ni, Cornéliu nhorõwa u.
13 Ta hã ma tô duré wama siwasuꞌu zaꞌra, hâiwa hawi ꞌRe ihâimana uꞌâsi mono ma romhuriꞌwa tãma isihâiꞌré na hã, ãne te te tãma inharĩ na hã: “Maꞌãpé, daꞌmazatõrĩ Zopi u, Simau Pedru na isisi zô.
14 Ta hã te za rowasuꞌuwẽ na aima rowasuꞌu zaꞌra waꞌwa, taha zarina ꞌRe ihâimana uꞌâsi mono hã te te asõꞌreptu da, duré uburé asõrõwa ꞌre, ꞌre isiꞌubumroi mono norĩ zama.”
15 — Tawamhã rowasuꞌu na te ãma tãma sãnaꞌrata zaꞌra wamhã, ꞌRe ihâimana uꞌâsi mono Pẽꞌẽzani hã ma tô we isisiwib zaꞌra siꞌra, wanhisiwib zaꞌra te te isiꞌra ne isãnaꞌrata hawimhã.
16 Tawamhã Wanhibꞌapito mreme na wa tô poꞌre puru, ãne te te inharĩzém na: “Zuwã Batista hã ma tô â uptabi na si te te ꞌre daꞌahâiba ubu, â dawabzuri te te dama ꞌre abꞌmanharĩ mono wamhã. Tanei õ di oto. ꞌRe ihâimana uꞌâsi mono hã te za Tipẽꞌẽzani na te te ꞌre aihâiba ubu zaꞌra waꞌwa, iré ꞌre anomro uꞌâsi aba mono da.”
17 Tahawa zudeuꞌõ norĩ zama ma tô waibu, ꞌRe ihâimana uꞌâsi mono nhoprubzé iwẽ uptabi hã, Wanhibꞌapito Zezu Cristu, wa te saze zaꞌra wamhã, wa te iwaibu ne aiwa. E ꞌwa hã, wa hã tawamhã, ꞌRe ihâimana uꞌâsi mono zada ĩzab da hã.
18 Tawamhã ãne hã te te wapari zaꞌra wamhã, niha hã te te nharĩ waihuꞌu zaꞌra õ di. ꞌRe ihâimana uꞌâsi mono ãma si ma tô tiwata zaꞌra, ãne:
— ꞌRe ihâimana uꞌâsi mono hã ma tô nare pisutu, bâdâ hã zudeuꞌõ norĩ ma tiwasété wi isipizari zaꞌra zéb zarina, dahâimanazé isiꞌutõrĩꞌõ hã te te sina uwaimrami zaꞌra da.
Ãtioquia ãma Zezusihi zazeiꞌwa norĩ ꞌre ihâimana zaꞌra mono zé
19 Estevã hã da te dasiwi iwĩrĩ hawi, isazeiꞌwa norĩ ãma, da te irowasété zaꞌra zéb zarina, niꞌwam norĩ te te iropéi mono hã ma tô aihutu, Fenisia na tiꞌa nhisi u, robꞌré zaꞌidi Chipri u, ꞌri nhoꞌu Ãtioquia u zama. Tame ꞌRe ihâimana uꞌâsi mono zadawa wasuꞌu hã ma tô nasi wasuꞌu zaꞌra, Zudeu norĩ ma si.
20 Tane nherẽ, nima norĩ Chipri hawimhã duré ꞌri waꞌõno Cireni hawimhã, ma tô duré aiꞌabaꞌré, Ãtioquia u hã. Ta norĩ hã ma tô zudeuꞌõ norĩ ma zama rowasuꞌu zaꞌra, Rowasuꞌuwẽ ité Wanhibꞌapito Zezusihi wasuꞌu na hã.
21 Uburé Danhibꞌapito nhibꞌrada hã ma tô isisiwi tihâimana zaꞌra. Tahawa ma tô ahâ na saze zaꞌra. Ma tô duré Wanhibꞌapito u hã aipizari zaꞌra.
22 Ã hã romreme hã ma tô wi, isazeiꞌwa norĩ Zeruzalẽ ãma siré ꞌre isiꞌrãꞌõtõ mono norĩ u. Taha zarina ma tô siwi satõ Barnabé hã, Ãtioquia u.
23 Ta hã tamomo wisi wamhã, duré ꞌRe ihâimana uꞌâsi mono hã iwẽ na dama ꞌre isõpru mono zé hã te te ꞌmadâꞌâ wamhã, tãma rowẽ uptabi di, Barnabéhé ma hã. Ta hã ma tô uburé pawaptob zaꞌra, siptete sina sena na Wanhibꞌapito ãma hâimana uꞌâsi zaꞌra da, tipẽꞌẽ na hã.
24 Barnabé hã aibâ iwẽ. ꞌMasisi na, ꞌRe ihâimana uꞌâsi mono Pẽꞌẽzani ré, ꞌre ihâimana mono Duré isimiꞌumnha hã te tãma ꞌre hâimana. Tawamhã daꞌahâ na ma tô aipizari zaꞌra ni, Wanhibꞌapito u hã.
25 Taha pari Barnabé hã ma tô mo Tarsu u, Sauluhu zô rĩtĩ da.
26 Te te sõpẽtẽ wamhã, ma tô saprõ, Ãtioquia u. Tame misi wahub ꞌre, ma tô siré aimasisi zahuré, isazeiꞌwa norĩ me. Daꞌahâ na ma tô te te ꞌre daꞌapawaptob zahuré, rowasuꞌu iwẽ na hã. Ãtioquia ãma imorĩꞌrata na Zezusihi nhirã zarina ꞌre inomro mono norĩ hã ma tô sisi zaꞌra ni, Cristuhu nhibꞌaꞌuwẽ na.
27 Tawamhã taha bâtâ mono na hã, ꞌRe ihâimana uꞌâsi mono zadawa ꞌmahârâꞌwa norĩ nima norĩ hã ma tô aiꞌabaꞌré, Zeruzalẽ hawi, Ãtioquia u.
28 Isiré zaꞌra hã, Agabu na isisi hã ma tô wahudu. ꞌRe ihâimana uꞌâsi mono Pẽꞌẽzani zadawa para, te ãne rowasuꞌu:
— Amnho zô te za rowaptâ, uburé tiꞌai mono bâ hã.
Ãne hã ma tô tiromhâiba, Claudiu hã danhibꞌapito na ꞌre hâimana mono ré, Roma ꞌremhã.
29 Tahawa, Zezusihi zazeiꞌwa norĩ hã ma tô sima waihuꞌu zaꞌra, te te pawaptob zaꞌra da, isazeiꞌwa norĩ Zudéa ãma ꞌre isiꞌubumroi mono norĩ hã. Tawamhã ma tô ꞌrãꞌõtõ zaꞌra hâiba mono bâ, marĩ hã tãma iwapu zaꞌra zarina.
30 Ta hã ma tô ꞌmanharĩ zaꞌra. Tinhoprubzé hã ma tô tãma sõmri zaꞌra, Barnabé duré Sauluhu norĩ nhibꞌrata, isazeiꞌwa norĩ ꞌmadâꞌâꞌwa norĩ ma hã.
