Atus 12:1-25
12 Taha wahub ꞌremhã apito Erodi hã, nima norĩ isazeiꞌwa hã ma tô sé dazazéb ꞌre, te te sima wẽ wa, te te tãma robꞌmanharĩ wasété zaꞌra da.
2 Tahawa ma tô tiꞌru, Tiagu hã da te wĩrĩ da, sibꞌézé ꞌwapa na Zuwãhã dubꞌrada hã.
3 Ãne hã Zudeu norĩ ma, te te irowẽ na te te ꞌmadâꞌâ wamhã, ma tô duré tiꞌru, Pedruhu zama dazazéb ꞌre, da te sẽrẽ da. Ãne hã iꞌuꞌẽtẽ wapu mapuꞌõ na dasa da te ꞌre ihuri mono zé bâdâ hâimana mono ré, ma tô tiromhâiba.
4 Tawamhã Pedru hã dazazéb ꞌre, te te sẽrẽ parimhã, Erodi hã ma tô sõré dasiꞌwapéi ꞌmanharĩꞌwa norĩ maparane siꞌuiwa na iwaꞌõtõ na, siwaꞌrãmi te te nasi siwi iꞌmadâꞌâ da hã, maparane siꞌuiwa na dasiꞌwapéi ꞌmanharĩꞌwa hâiba na iwaꞌõtõ mono bâ. Erodi hã ma tô sima wẽ, Pedruhu ãma danhoꞌa te te rowairébé da. Tane nherẽ, Pascoa na dato nhisi parip si da.
5 Ãne wa, Pedru hã ma tô siwi tété dazazéb ꞌre, dasiꞌwapéi ꞌmanharĩꞌwa norĩ hã. Tane nherẽ, isazeiꞌwa norĩ hã ma tô ãma rowaptẽrẽ uꞌâsi zaꞌra.
6 Tawamhã ahâmhâ na, za oto awẽm na Erodi hã daꞌahâ nhoꞌa te te ãma irowairébézéb u, Pedru hã te nhono, para wasisi ré isiꞌuwazi nhorõ rutu na, maparane dasiꞌwapéi ꞌmanharĩꞌwa norĩ waꞌwa. Dasiꞌwapéi ꞌmanharĩꞌwa norĩ hã te duré robꞌmadâꞌâ zaꞌra, dazazéb u dazasizé ꞌridawa zaꞌẽtẽ ãma hã.
7 Tawamhã waptu na rosaꞌrese õ ré, ma tô hâiwa hawi Uburé Danhibꞌapito ma romhuriꞌwa hã sihâiꞌré. Duré ma tô rowaꞌa, dazazé ꞌri ꞌre waꞌwa ãma. Hâiwa hawi romhuriꞌwa hã Pedru ma tô upi, isisé ãma. Ma tô duré utu. Ãne ma tô tãma tinha:
— Waptu na aiwahutu!
Tawamhã, ipawasisizé hã ma tô tiwaptãꞌã zahuré, isibꞌrata hawimhã.
8 Tawamhã hâiwa hawi romhuriꞌwa hã te tãma tinha, ãne:
— Asiꞌuza na duré asipara uza na!
Tahawa Pedru hã ma tô ꞌmanha, hâiwa hawi romhuriꞌwa hã te te iꞌruzéb zarina. Te duré tãma tiꞌru, ãne:
— Aiꞌuza ihâpa hã asima sẽrẽ! Taha parimhã ĩzarina we aimorĩ!
9 Tawamhã Pedru hã ma tô watobro, dazazé ꞌriꞌre waꞌwa hawimhã. Hâiwa hawi romhuriꞌwa zarina ma tô mo. Tane nherẽ, te te waihuꞌu õ di, hâiwa hawi romhuriꞌwa te te isõꞌreptu na hã. Ma tô rosaꞌrata, sõtõ ꞌrowim newa uburé marĩ hã.
10 Tawamhã ꞌridawa ꞌmadâꞌâꞌwa imorĩꞌrada duré maparane ãma hã ma tô saꞌre zahuré. Taha pari ma tô aimasisi, isiꞌuwazi na ꞌridawa nhitobzé ꞌri nhiꞌriti u dapusizéb u hã. ꞌRidawa zaꞌẽne hã siꞌuihâ na ma tô siꞌridawa. Tawamhã ma tô rob u tipusi zahuré. ꞌRi nhiꞌriti na te tineb zahuré, misi inomro na. Tane nherẽ, waptu na saꞌrese ãna ma tô hâiwa hawi romhuriꞌwa hã oto aimani.
11 Tawamhã Pedru hã ma tô oto poꞌre puru, iromhâimanazém na hã. Ãne ma tô tinha:
— Ãhã na hã wa tô oto waihuꞌu, ĩsiwawãi ãna. Uburé Danhibꞌapito hã ma tô nare we satõ, tite hâiwa hawi romhuriꞌwa hã. Ta hã ma tô ĩwaze, Erodihi nhibꞌrata ĩhâimana nherẽ, duré uburé Zudeu norĩ hã uburé marĩ ĩzô iwatobrozéb zô isimipari zaꞌra wi.
12 Tãma iromhâimanazé hã Pedru te te waihuꞌu wamhã, ma tô mo, Mariaha nhorõwa u. Ta hã Zuwã Marcusihi na. Tamemhã daꞌahâ na ma tô tasiꞌrãꞌõtõ ni, da te ãma rowaptẽrẽ zaꞌra da hã.
13 Tawamhã Pedru hã ma tô ꞌridawa taꞌa, ꞌri nhoꞌre niwĩmhã. Tahawa romhuriꞌwa piꞌõ Rodi na isisi hã ma tô mo, te te robzabu da.
14 Tawamhã Pedruhu mreme te te waihuꞌu wamhã, tãma rowẽ uptabi di. Apâ ma tô wara, te te ꞌridawa ãna ꞌridawa hã. Ma tô tãma wasuꞌu zaꞌra, ãne:
— Pedru hã rowi te za!
15 Tane nherẽ, te piꞌõi ma nharĩ zaꞌra, ãne:
— Mare di. Ma aiꞌrãsiwamna!
Tane nherẽ, sadahutu ãna te tãma wasuꞌu zaꞌra, tô sena Pedru isam na hã.
Tahawa te ãne tãma nharĩ zaꞌra, ãne:
— Ãté ite hâiwa hawi romhuriꞌwa!
16 Taha ré hã, Pedru te nasi ꞌridawa taꞌa. Ma tô oto sô ꞌridawa zaꞌra. Te te siwi ꞌmadâꞌâ wamhã, ma tô ãma titobꞌuzu pese zaꞌra.
17 Tawamhã tinhibꞌrata na ma tô tãma ꞌmanharĩ zaꞌra, ariꞌiwi simasab da. Taha pari, ma tô tãma siwasuꞌu zaꞌra, Uburé Danhibꞌapito dazazém hawi te te iwazerezém na hã, ãne:
— Ã hã ĩma iromhâimanazé hã Tiaguhu ma, rowasuꞌu zaꞌra waꞌaba za duré wasisãnawã norĩ isiré isazeiꞌwa norĩ ma zama.
Taha pari, ma tô watobro. Ma tô mo nimomo.
18 Tawamhã awẽ wamhã, dasiꞌwapéi ꞌmanharĩꞌwa norĩ hã ma tô ꞌre siwairõtõ, te te siwi waihuꞌu õ wa, Pedruhu ma iromhâimanazé hã.
19 Tawamhã Erodi hã ma tô tiꞌru, sô rĩtĩ zaꞌra da. Tane nherẽ, te te siwi sõpẽtẽ õ di. Tawamhã ꞌridawa ꞌmadâꞌâꞌwa norĩ te te sadanharĩ zaꞌra parimhã, ma tô ꞌru zaꞌra, da te simro da.
Apito Erodi idâꞌâzé
Taha pari apito Erodi hã ma tô mo, Zudéa hawi, Cézaréia u. Tame ma tô nhamra, niha bâtâ na.
20 Tawamhã Apito Erodi hã sahi uptabi di, ꞌri waꞌõno Tiru ãma ꞌre isiꞌubumroi mono norĩ zada hã duré Sidõ ãmam norĩ zada zama. Tahawa ta norĩ hã ma tô siꞌrãꞌõtõ. Taha pari ma tô aiꞌabaꞌré Erodihi u, te te tãma robzanhamri zaꞌra da. Imorĩꞌrata na ma tô Blastuhu wi waptẽrẽ zaꞌra, te te sadawa upari zaꞌra da. Blastu hã apito nhimiromhurizé ꞌri ꞌrãihâ ꞌremhã apito ma, iꞌumnha. Ãne hã te te ãma uwaimrami zaꞌra pari, Erodihi u ma tô oto aihutu, romharé na ꞌre hâimana zaꞌra mono da, te te tiwi waptẽrẽ zaꞌra da, amnho hã tãma ꞌre isihutu mono hã apito nhiptiꞌai hawi wa.
21 Tawamhã bâtâ pisutu ãma, Erodi hã ma tô siꞌuza apito norĩ uza na. Tinhamrazém na ma tô nhamra. Timreme na ma tô duré sãnaꞌrata.
22 Ãne ma tô nasi tahãsi ni, mreme mono ré hã:
— Ã hã ihâibaꞌõi mreme. Aibâ mreme õ di, imreme hã.
23 Tawamhã waptu na awaꞌawi pesere ma tô hâiwa hawi Uburé Danhibꞌapito ma romhuriꞌwa hã azâ, hâzé da, ꞌRe ihâimana uꞌâsi mono ãma si wata õ wa. Tahawa isãna waiꞌu hã ma tô siwi tiꞌrẽ. Ta hã ma tô tiwĩ.
24 Tawamhã ꞌRe ihâimana uꞌâsi mono zadawa wasuꞌu hã ma tô saꞌẽtẽ uꞌâsi. Te duré te te ropéi uꞌâsi.
Barnabé norĩ hã Saruhu me, Ãtioquia u apâ inebzé
25 Tawamhã Barnabé norĩ Sauluhu me romhuri hã te te ꞌrãsutu zahuré pari, ma tô apâ tineb zahuré Ãtioquia u, Zeruzalẽ hawi. Zuwã Marcus hã ma tô siré saprõni zahuré.
