Atus 15:1-41
15 Tawamhã nima norĩ aibâ norĩ hã ma tô aihutu, Zudéa hawimhã Ãtioquia u. Ta norĩ hã ma tô isazeiꞌwa norĩ ma rowahutu zaꞌra, ãne:
— ꞌRe ihâimana uꞌâsi mono nhimiroti zahi na Mozési te te irobꞌuiꞌérézéb zarina asisihâiwata nhihâri zaꞌra waꞌaba õ wamhã, asõꞌreptuzé hã asina uwaimrami zaꞌra waꞌaba õ di za.
2 Tawamhã Paulu norĩ Barnabéhé me hã, te te ãma dazaze zahuré õ di. Tahawa, ma tô ãma siwasu zaꞌra, mreme tete na. Ãne wa, isazeiꞌwa norĩ hã ma tô siwi waihuꞌu, Paulu, Barnabé duré niꞌwam norĩ isazeiꞌwa norĩ hã siꞌabaꞌré da Zeruzalẽ u, te te ãma romnhoré zaꞌra da, Zezusihi zadawa wasuꞌuꞌwa norĩ me duré isazeiꞌwa norĩ ꞌmadâꞌâꞌwa norĩ me zama.
3 Tawamhã Ãtioquia ꞌre isazeiꞌwa norĩ hã ma tô satõrĩ zaꞌra, tô siꞌabaꞌré da. Fenisia na duré Samaria na te te roꞌrahâri zaꞌra ré, ma tô te te dama rowasuꞌu zaꞌra mono, zudeuꞌõ norĩ te te ꞌre isaze zaꞌra mono na hã. Ã hã rowasuꞌu hã isazeiꞌwa norĩ ma, ma tô te te rowẽ pese zaꞌra.
4 Tawamhã Zeruzalẽ u sihutu wamhã, isazeiꞌwa norĩ hã Zezusihi zadawa wasuꞌuꞌwa norĩ hã duré isazeiꞌwa norĩ ꞌmadâꞌâꞌwa norĩ hã ma tô siwi waibui wẽ. Tawamhã ma tô tãma rowasuꞌu pese zaꞌra, ꞌRe ihâimana uꞌâsi mono uburé marĩ te te iꞌaꞌmanharĩ mono zém na ihâiba zaꞌra na hã.
5 Tane nherẽ, niꞌwam norĩ farizeu norĩ niwĩ ꞌre ihâimana zaꞌra mono te te isaze zaꞌra norĩ hã ma tô hâiwi aimasa. Ãne te nharĩ zaꞌra:
— Tô iꞌru zahi, zudeuꞌõ norĩ hã isisihâiwata nhihâri zaꞌra da hã duré ꞌRe ihâimana uꞌâsi mono nhimiroti zahi na Mozési te te irobꞌuiꞌérézé te te iꞌmadâꞌâ pese zaꞌra da hã.
6 Tawamhã Zezusihi zadawa wasuꞌuꞌwa norĩ hã duré daꞌmadâꞌâꞌwa norĩ me, ma tô siꞌrãꞌõtõ, te te ãma romnhoré zaꞌra da.
7 Tawamhã te te ãma sima romnhoré ahâ zaꞌra pari, ma tô Pedru hã hâiwi za. Ãne te tãma nharĩ zaꞌra:
— Ĩsisãnawã norĩ, aima waihuꞌu pese zaꞌra waꞌaba di, duréi ꞌRe ihâimana uꞌâsi mono aihawib zaꞌra waꞌaba te te sima ĩpisutu na hã, Zezusihi wasuꞌuwẽ na zudeuꞌõ norĩ ma, te ꞌre rowasuꞌu mono da, ta norĩ hã te te ꞌre wapari zaꞌra mono da duré te te ꞌre saze zaꞌra mono da zama.
8 ꞌRe ihâimana uꞌâsi mono ma hã, uburé dapẽꞌẽ ꞌremhã tãma dawaihuꞌu pese di. Ta hã ma tô dama hâiꞌré, zudeuꞌõ norĩ hã te te wẽ na iwaibu na hã, Tipẽꞌẽzani hã ta norĩ ma zama te te tãma isõmri zaꞌra zéb zarina, te te wama isõmri zaꞌra ne hã.
9 ꞌRe ihâimana uꞌâsi mono ma hã, õ norĩ hã duré wa norĩ hã nima hãi õ di. Ta norĩ hã ma tô hâiba pese zaꞌra, iꞌumnhasizé hã tãma ꞌre ihâimana zaꞌra mono zéb zarina.
10 Tawamhã ãhã na hã e marĩ da, te asima iwẽ zaꞌra waꞌwa, ꞌRe ihâimana uꞌâsi mono hã asiwi pibui waꞌaba da. Isisada te oto tãma isaꞌra zaꞌra waꞌwa ãhã na hã, te te isaze zaꞌra norĩ ma hã. Ã hã danhisada hã wa norĩ hã duré wahiꞌrata norĩ zama te te ꞌwasari waihuꞌuꞌõ di.
11 Mare di, wa saze zaꞌra ni, wanhoꞌreptuzé hã iwaꞌâbâ õ na wa te wasina iꞌuwaimrami zaꞌra zém na hã, Wanhibꞌapito Zezusihi nhimizawizéb zarina, zudeuꞌõ norĩ tinhoꞌreptuzé te te sina iꞌuwaimrami zaꞌra ne, aiwa.
12 Tawamhã tame uburé isiꞌubumro norĩ hã ma tô ariꞌiwi asimro, Barnabé duré Paulu norĩ mreme hã te te wapari zaꞌra da, te te iꞌawasuꞌu zahuré hã, ꞌRe ihâimana uꞌâsi mono, uburé marĩ dama iꞌmanharĩ waihuꞌuꞌõ duré isimipawaptobzé, ihâiba na zahuré te te iꞌabꞌmanharĩzé hã, zudeuꞌõ norĩ ma.
13 Tawamhã timreme te te ꞌrãsutu zahuré parimhã, Tiagu hã ma tô ãne tinha:
— Ĩsisãnawã norĩ, ĩwapari zaꞌra waꞌaba.
14 Simau hã ma tô wama wasuꞌu zaꞌra, imorĩꞌrata na niha na ꞌRe ihâimana mono tinhimizawizé te te ihâiꞌrézé hã zudeuꞌõ norĩ ãma hã. Ta norĩ hã ma tô sima pisutu iꞌreb zaꞌra hã, aꞌuwẽ ite na tãma ꞌre hâimana zaꞌra mono da.
15 Ãne na tô isarina ꞌRe ihâimana uꞌâsi mono zadawa ꞌmahârâꞌwa norĩ hã ma tô ãma robꞌuiꞌéré siromo zaꞌra, ãne:
16 “Ãne parimhã, apâ wa za ĩsina siri, Davi te te ꞌre idaꞌaꞌmadâꞌâ mono zé apâ para na te sãrĩ da. Ta hã ꞌri isiprum ne.Apâ wa za ubumroi pese, isiprubzé hã. Tawamhã apâ hâiwi wa za tisã,
17 idasiꞌatarẽme hã Uburé Danhibꞌapito zô ꞌre danhopré mono da, da te ꞌre waihuꞌu zaꞌra mono da, uburé zudeuꞌõ norĩ ĩnhibꞌaꞌuwẽ da, te ĩsima ipisutu zaꞌra norĩ hã.
18 Wa hã Uburé Danhibꞌapito, wa tô ãne dama waihuꞌu, isãnaꞌrata hawimhã.”
19 Tawamhã Tiagu hã ma duré ãma uzusi, ãne:
— Ĩnhimirosaꞌrada hã, ãne: Wa te tiwi roꞌwaꞌrutu zaꞌra õ di za zudeuꞌõ norĩ wi hã, ꞌRe ihâimana uꞌâsi mono u isipizari zaꞌra norĩ wi hã.
20 Ĩnhimirosaꞌrada hã wa te tãma robꞌuiꞌéré zaꞌra da, ãne, abaze hã romhâiba ꞌmanharĩ ma, da te ꞌre izata zaꞌra mono nhi hã te te ꞌre huri mono tõ da, duré dasina dahâimana wasété na ꞌre hâimana wasété zaꞌra mono tõ da, duré abaze da te ꞌre isõꞌreti zaꞌra mono nhi hã te te ꞌre huri tõ mono da, duré iwapru te te ꞌre huri mono tõ da zama.
21 E marĩ wa. Duréi hawim haré, ꞌRe ihâimana uꞌâsi mono nhimiroti zahi na Mozési te te irobꞌuiꞌérézé hã ma tô da te dasima ꞌre wasuꞌu zaꞌra ꞌri waꞌõtõ mono na hã. Ma tô duré da te dasima ꞌre sõré zaꞌra, Zudeu norĩ te rowahutuzé mono na hã.
Robꞌuiꞌéré Zezusihi zazeiꞌwa norĩ zudeuꞌõ norĩ ma hã
22 Tawamhã Zezusihi zadawa wasuꞌuꞌwa norĩ hã duré isazeiꞌwa norĩ ꞌmadâꞌâꞌwa norĩ me, ma tô uburé ãma sisaze zaꞌra isazeiꞌwa norĩ me, tisiré zaꞌra te te siwi ꞌmaipisutu da, Ãtioquia u te te siwi ꞌmazatõrĩ zahuré da, Paulu duré Barnabé norĩ siré. Da te dasiwi ipisutu zahuré hã ã norĩ hã: Zudasi, Barsaba na isisi amo hã duré Silas. Ã norĩ hã isazeiꞌwa norĩ ma hã wazé pese zahuré di.
23 Isiré zahuré robꞌuiꞌéré hã ma tô siwi tisõ, ãne:
“Wa norĩ, Zezusihi zadawa wasuꞌuꞌwa norĩ duré daꞌmadâꞌâꞌwa norĩ, asisãnawã zaꞌra waꞌaba norĩ, wa ãma asawi zaꞌra waꞌaba ni, wasisãnawã norĩ zudeuꞌõ norĩ Ãtioquia ãma ꞌre iꞌaihâimana zaꞌra waꞌaba mono norĩ duré Siria ãma duré Silisia ãmab zama.
24 “Wa waihuꞌu zaꞌra ni, wasiré norĩ hã ãma isihutu na hã duré te te aima irowasuꞌu zaꞌra waꞌaba na hã ropire te te aima ihiri zaꞌra waꞌaba na hã. Tazahã ãne hã wa te tãma iꞌru zaꞌra zéb zarinai õ di, te te iꞌmanharĩ zaꞌra hã.
25 Tahawa, uburé wa tô ãma wasisaze zaꞌra ni, aibâ norĩ hã wa te wasiwi pisutu zahuré da, wa te ãma atẽme satõrĩ zaꞌra waꞌaba da. Wasisãnawã norĩ wama isawi uptabi zahuré siré te za ãma ne, Barnabé duré Paulu norĩ siré.
26 Ta norĩ hã sina hâtâꞌâ zahuré ãna, ma tô te te ꞌre romhuri zahuré, Wanhibꞌapito Zezu Cristuhu uꞌâbâmhã.
27 Tahawa wa ãma wasiwi satõrĩ zahuré ni Zudasi norĩ Silaha me, siꞌuihâ na te te aima wasuꞌu zaꞌra waꞌaba da, wa te ãma aima irobꞌuiꞌéré zaꞌra waꞌaba zé hã.
28 ꞌRe ihâimana uꞌâsi mono Pẽꞌẽzani hã duré wa norĩ hã wa wasiwi waihuꞌu ni, danhisada pire wa, iꞌwapéi waihuꞌu õ ne, wa te aima saꞌra zaꞌra waꞌaba tõ da. Ã norĩ si isawi zahi hã ꞌre ꞌmanharĩ zaꞌra waꞌaba mono tõ da:
29 ꞌRe huri aba mono tõ, abaze romhâiba ꞌmanharĩ ma, da te ꞌre izata zaꞌra mono norĩ nhi hã. ꞌRe huri aba mono tõ, abazei da te ꞌre isõꞌreti zaꞌra mono norĩ wapru hã duré inhi hã. Duré dasina dahâimana wasédé hã ꞌre ꞌmanharĩ zaꞌra waꞌaba mono tõ. Ãne hã ꞌre ꞌmanharĩ zaꞌra waꞌaba mono õ wamhã, rowẽ uꞌâsi te za ꞌre aihâimana zaꞌra waꞌaba mo. Wa ãma asawi zaꞌra waꞌaba ni.”
30 Tawamhã maparane siꞌuiwa na ihâiba zaꞌra norĩ hã ma tô satõrĩ zaꞌra. Ma tô oto aiꞌabaꞌré, Ãtioquia u hã. Sihutu wamhã, ma tô ꞌrãꞌõtõ zaꞌra isazeiꞌwa norĩ hã. Robꞌuiꞌéré ma tô duré tãma sõmri zaꞌra.
31 Te te sõré zaꞌra wamhã, ma tô ãma sima rowẽ pese, timreme na te te ipawaptob zaꞌra na hã.
32 Zudasi duré Silaha me hã, ꞌRe ihâimana uꞌâsi mono zadawa ꞌmahârâꞌwa zahuré hã ma tô timreme hã tãma ꞌmanharĩ zaꞌra, saꞌẽtẽ na wasisãnawã norĩ te te ãma anhiptete zahuré da hã.
33 Niha bâtâ na tame hâimana zahuré parimhã, isazeiꞌwa norĩ hã ma tô rowẽ sina neb da hã apâ satõrĩ zaꞌra, te te siwi isatõrĩ zahuré norĩ u hã.
34 [Tane nherẽ, Sila hã ma tô sima wẽ, tame sãmra da aꞌâ.]
35 Tawamhã Paulu duré Barnabéhé me hã ma tô niha bâtâ na tihâimana zahuré, Ãtioquia ãma hã. Tame simasisi ré, ma tô nasi rowasuꞌu zaꞌra, Uburé Danhibꞌapito zadawa wasuꞌu na hã niꞌwam norĩ isazeiꞌwa norĩ me.
Paulu norĩ Barnabéhé me sima isiwãnhizari zahuré zé
36 Niha bâdâ siꞌutõrĩ parimhã, Paulu hã ma tô Barnabéhé ma tinha, ãne:
— Oto apâ wa te wasina siri, wasisãnawã norĩ hã wa te azabui mono da, ꞌri waꞌõtõ mono na, Uburé Danhibꞌapito wa te dama isadawa wasuꞌu mono zéb ãma hã, niha hâimana zaꞌra mono zô.
37 Tawamhã Barnabé hã ma tô aré sima wẽ, Zuwã Marcus hã te te saprõni da, siré zahuré.
38 Tane nherẽ, Paulu hã te te sima wẽ õ di, imorĩꞌrata na isiré morĩ zahuré wamhã, te te rẽme zahuré wa, Pãfilia ãma, isiré morĩ ꞌrãsutu zahuré wa.
39 Tahawa saꞌẽtẽ ãma sisadaꞌâbâ zahuré wa, ma tô sima aiwãnhiza. Barnabé hã ma tô Zuwã Marcus siré saprõ. Ubaꞌre na ma tô asamro, robꞌré zaꞌidi Chipri u.
40 Tawamhã Paulu hã ma tô Silas pisutu, te te siré saprõni da. Isazeiꞌwa norĩ hã Uburé Danhibꞌapito ma, ãma mreme zusi pari te te saprõni wẽ zahuré da, ma tô oto tineb zahuré.
41 Tawamhã Paulu norĩ hã, Siria na duré Silisia na ma tô te te roꞌrahâri zahuré. Ma tô te te apawaptob zahuré, isazeiꞌwa norĩ hã.
