Atus 25:1-27
25 Tiꞌai waꞌõtõ nhoꞌõmo u iwisizém na siꞌubdatõ bâdâ ãma siꞌutõrĩ parimhã, Festu hã ma tô mo Cézaréia hawi, Zeruzalẽ u.
2 Tame sasedoti tisiré norĩ nhipai u ipire norĩ hã duré Zudeu norĩ ma rotiꞌwa norĩ zama ma tô hâiꞌré zaꞌra, Paulu te te siwi iwasuꞌu wasété zé hã. Tawamhã Festuhu wi ma tô duré waptẽrẽ zaꞌra,
3 Paulu hã te te tãma satõrĩ zaꞌra da, Zeruzalẽ u. Ta norĩ hã bâdâdi wãi wa, te te siwi wĩrĩ da, aré ãma siwadaꞌuri zaꞌra dâꞌâsina, ma tô ãne hã tiwi waptẽrẽ zaꞌra, Zeruzalẽ u te te satõrĩ da.
4 Tane nherẽ, apito Festu hã ma tô ãne tãma nharĩ zaꞌra:
— Paulu hã Cézaréia ãma te dazazéb ꞌre za. Tamomomhã apâ wa za ĩsina siri suꞌu.
5 Tahawa, iwẽ hã aima ipire norĩ zaꞌra waꞌwa, ĩsiré ãma isiꞌabaꞌré da hã, te te siwi wasuꞌu wasété da, marĩ iꞌupa te te ꞌmanharĩ wamhã.
6 Tawamhã Festu hã ma tô tihâiba, 8 na ãté niwamhã 10 bâtâ na isiré zaꞌra hã. Taha pari ma tô sina siri, Cézaréia u hã. Awẽm na hã ma tô nhamra, daꞌãma rowairébézéb ãma. Tawamhã ma tô tiꞌru, Paulu da te dasiwi ãwisi da, itẽme.
7 Paulu hã oto wisi wamhã, Zudeu norĩ Zeruzalẽ hawi isihudu hã ma tô imana wawi sina ubumro. Tawamhã te te ãma siwi iwasuꞌu wasété zé ipire uptabi na ma tô ãma sãnaꞌrata zaꞌra. Tane nherẽ, te te siwi hâiꞌré waihuꞌu õ di, te te iwasuꞌu wasété zara zé hã sena iꞌuptabi da wamhã.
8 Tawamhã Paulu hã ma tô timreme na siꞌwawi aimapa. Ãne te siwasuꞌu:
— Marĩ hã iꞌupa te ꞌmanharĩ õ di, Zudeu norĩ te, roti zahi waꞌrãmimhã. ꞌRe ihâimana uꞌâsi mono nhorõwa ꞌri ꞌrãihâ ãma ĩwasédé hã te ꞌmanharĩ õ di. Duré Roma ãma apito Cézaha zada hã, marĩ hã te ꞌmanharĩ õ di.
9 Tawamhã Festu hã, Zudeu norĩ ma, te te sina rowẽ wazere da, ma tô Paulu sadanha, ãne:
— E asima rowẽ õ di, Zeruzalẽ u ãma iꞌaimorĩ da hã, tame rowairébé hã wa hã te aiꞌãma ꞌmanharĩ da, ã hã da te dasiwi iꞌaiwasuꞌu wasété zém na hã.
10 Tawamhã Paulu hã ma sadaꞌâ, ãne:
— Ãhã na hã wa ĩhâiba daꞌãma rowairébézé, Roma ãma apito Cézaha te ãma. Ãme te za tô ĩꞌãma tihâiba, iꞌuwaibaba na ĩꞌãma rowairébé hã. Marĩ iꞌupa te ꞌmanharĩ õ di, Zudeu norĩ ma hã. Ãne hã aima waihuꞌu pese di.
11 Roti zahi te wazéb õ wamhã, duré marĩ te ꞌmanharĩ wamhã, taha zarina da te ꞌre idanhimroi mono hã, ĩdâꞌâ tõ da hã, ĩsisawi õ di za. Tazahã ĩwasuꞌu iwasédé hã ihâimana tô senai õ wamhã, niꞌwa hã hâimana õ di, te te tãma ĩhâiba nhomri zaꞌra da hã. Tahawa, apito Cézaha si te te ĩꞌãma rowairébé da, wa ĩsima wẽ.
12 Tawamhã Festu hã roti na te te siwi ꞌre ipawapto mono norĩ ma, te te robzanhamri parimhã, ma tô ãne tãma tinha, Pauluhu ma:
— Asima wẽ wa, apito Cézaha si te te aiꞌãma rowairébé da, tamomo te za tô itẽme aimo.
Paulu hã isabzé apito Agripaha norĩ nhoꞌre Berenisihi me
13 Niha bâdâ siꞌutõrĩ parimhã, apito Agripa hã duré ihidiba Berenisihi me, ma tô aimasisi Cézaréia hawi, apito Festu hã te te sawi zahuré da.
14 Tawamhã niha bâtâ na hâimana zahuré parimhã, Festu hã apito ma, ma tô wasuꞌu, Pauluhu ãma iromhâimanazé hã, ãne:
— Ãmemhã te aibâ hã za dazazéb ꞌre, apito Félis te te irẽme hã dazazéb ꞌre sisaꞌu.
15 Zeruzalẽ u ĩmorĩ wamhã, sasedoti ipire norĩ hã duré Zudeu norĩ ma rotiꞌwa norĩ hã, ma tô siwi wasuꞌu wasété. Tawamhã ma tô duré ĩwi waptẽrẽ zaꞌra, te te iꞌupazém na iwasédé hã te ãma hiri da.
16 Tane nherẽ, wa tô tãma nharĩ zaꞌra, ãne: Romanu norĩ hã niꞌwa da te ihâiba zaꞌré da hã, te te ꞌre ꞌmanharĩ zaꞌra mono õ di, dawasuꞌu wasété ꞌwa norĩ hã te te ꞌre iwasuꞌu wasété zaꞌra mono norĩ nhoꞌre, ꞌre simasa mono õ ré hã. Ãne wamhã, bâdâ hã te tãma tihâiba, timreme na siꞌwawi isimapa da hã.
17 Tahawa, we sihutu wamhã ãwa, bâdâ hã te simini ãna, wa tô awẽm na nhamra, daꞌãma rowairébézéb ãma hã. Wa tô duré tiꞌru, da te dasiwi saprõni da, aibâ hã ĩtẽme.
18 Iwasuꞌu wasété ꞌwa norĩ hã sada simasa wamhã, marĩ te te iꞌupazé ipire na hã te te siwi wasuꞌu õ di, te ãma irosaꞌratazéb zarina hã.
19 Te te siwi iwasuꞌu wasété zé hã, tinhimizaze zaꞌra na si duré aibâ Zezusi na isisi hã dâꞌâ nherẽ, apâ ihâiwaꞌutu na Paulu te te dama ꞌre iwasuꞌu mono na hã.
20 Te waihuꞌu õ di, niha te isarẽi wẽ da hã, ã hã romhâimanazé hã. Tahawa Paulu hã wa tô sadanha, te te sima rowẽ zô, Zeruzalẽ u ãma imorĩ da hã, tame ãma rowairébé hã te ãma ꞌmanharĩ da, da te dasiwi iwasuꞌu wasété zém na hã.
21 Tane nherẽ, Paulu hã ma tô ĩwi waptẽ, dazazéb re aꞌâ sab da, Roma ãma apito Céza rowairébé, te te ãma iꞌmanharĩzéb u ãma romhâimanazé hã. Tahawa, wa tô tiꞌru, dazazéb ꞌre aꞌâ sab da, apito u te isatõrĩzéb u.
22 Tawamhã Agripa hã ma tô tinha, Festuhu ma, ãne:
— Wa ĩsima wẽ, aibâ hã te wapari da.
Festu hã ma sadaꞌâ, ãne:
— Tane tô, awẽ te za iwapa za.
23 Tawamhã awẽm na hã apito Agripa duré Berenisihi me, ma tô aimasisi, uza wẽ ré duré sima sipese na, dama pire wẽ te, ãma datobꞌuzu zaꞌra da. Tawamhã ma tô tizasi zahuré, apito te, dasiꞌrãꞌõtõzé daꞌãma rowairébézéb u, dasiꞌwapéi ꞌmanharĩꞌwa norĩ nhibꞌapito norĩ me duré ꞌri nhoꞌõmo ãma dama ipire norĩ me. Tawamhã Festu ma tô tiꞌru, Paulu da te itẽme dasiwi saprõni da.
24 Taha pari, te dama tinha, ãne:
— Apito Agripa duré ãme iꞌaihâimana zaꞌra waꞌwa wasiré, maꞌãpé ꞌmadâꞌâ zaꞌra waꞌaba, ã hã aibâ hã. Uburé Zudeu norĩ hã ma tô ĩwi waptẽrẽ zaꞌra, Zeruzalẽ ꞌremhã duré ãme Cézaréia ꞌreb zama. Sadawa zaꞌréi ãna ma tô ĩwi waptẽrẽ zaꞌra, dâꞌâ da, ã hã aibâ hã.
25 Tane nherẽ, ĩma hã marĩ te te upai õ di, da te dasiwi iwĩrĩ da hã. Siꞌuihâ na te te ĩwi iwaptẽrẽzéb zarina, Roma ãma apito Céza hã te te ãma rowairébé da, tahawa, wa tô ãma saze.
26 Tane nherẽ, ãhã na hã marĩ iꞌuptabi hã ĩma hâimana õ di, te ãma irobꞌuiꞌéré da hã, Roma ãma apito ma hã. Tahawa, wa tô we ãwisi ãwa, asõꞌre u zaꞌra waꞌaba duré aimawi atẽme apito Agripa, marĩ hã ãma asiwi sarẽi waꞌaba parip si, niha na te ãma irobꞌuiꞌéré da hã iré hã.
27 Ĩma hã ibâi õ di, dazazéb ꞌre isa hã da te isatõrĩ da hã daꞌãma rowairébézéb u, marĩ na da te dasiwi iwasuꞌu wasété zé hã, pibui pese õ nherẽ.
