Daniéu 7:1-28
7 Béusazaha ãma imorĩꞌrata na ãma iwahub ãma Babilonia ꞌre, te te ꞌre idaꞌaꞌmadâꞌâ mono na ma tô Daniéu hã nimahã mara na tinhimiwaptâ wa nomro. Sõtõ wamhã, ma tô te te saho. Tame ma tô marĩ sõtõ ꞌrowi ꞌmadâꞌâ zaꞌra. Topoꞌo wamhã, ma tô duré te te isahoi mono na marĩ te te iꞌmadâꞌâ zaꞌra norĩ na hã ãma robꞌuiꞌéré.
2 Ãne ma tô ãma robꞌuiꞌéré:
Bara na te sahoi mono wamhã, wa tô ꞌmadâ, maparane siꞌuiwa na rowaꞌuꞌu zaꞌẽne sitẽme siré iwairébé, âporé te te siwi iꞌâzasisi zaꞌẽtẽ zaꞌra mono hã.
3 Taha ré ropoto siwamnarĩ isaꞌẽtẽ uptabi norĩ hã ma tô wairé, sipuꞌu pese na âporé hawi.
4 Imorĩꞌrada hã huꞌu zérépa hâiba ne, siꞌõmo wawẽ zaripi ré hã. Ta hã te ꞌmadâꞌâ ré, ma tô isaribi hã tiwi sani ni. Tahawa, ma tô hâiwi sab da, dasiwi sãrĩ ni, aꞌuwẽ hâiwi ꞌre isimasa mono ne. Ma tô duré aꞌuwẽ nhimirosaꞌrata ne hã oto tãma sõmri ni.
5 Tawamhã ropoto siwamnarĩ isãnaꞌreb ãma hã wa tô duré ꞌmadâ, ursu hâiba ne hã. Ta hã ma tô duré para na hâiwi za wahu na, tizadawa ꞌre, tiꞌwa na marĩ waihi te te tété sina. Taha ré, te niꞌwa tãma tinha ãne: “Aiwahutu, asima iwẽ na romnhi hã ꞌmairẽne da.”
6 Taha pari siꞌubdatõ ãma ropoto siwamnarĩ wa tô duré ꞌmadâ, huꞌu hâiba ne hã. Iba na isaribi hã maparane siꞌuiwa na, tô si norĩ zaripi ne. Duré maparane siꞌuiwa na iꞌrã hã. Taha ma, pire na iꞌrãnhoꞌõmo na te te ꞌre idaꞌaꞌmadâꞌâ mono zéb da hã ma tô tãma pisutu ni.
7 Tawamhã barana ĩnhotõ ꞌrowim ne, wa tô ꞌmadâ, maparane siꞌuiwa na ãma ropoto siwamnarĩ ipipa uptabi hã, duré isiptete uptabi hã. Isiꞌuwazi tete ꞌmanharĩ na iꞌwa zaꞌẽne hã. Taha na ma tô tinhisõpãrĩ te te ꞌre anhiwazu, te te ꞌre aꞌmasi mono da. Duré tinhisõpãrĩ nhi te te ꞌre iꞌatarẽme mono hã ma tô tipara na te te ꞌre anhizu pese. Ta hã aimawi uptabi, iwana ropoto siwamnarĩ iwairébé nei õ di. 10 na iꞌu hã.
8 Tawamhã iꞌõmo norĩ te ꞌmadâꞌâ ré, wa tô duré ꞌmadâ, iꞌõmo hâiba amo iꞌup surure hã, iꞌõmo zaꞌẽtẽ norĩ waꞌwa iwatobro hã. Tahawa, iꞌõmo zaꞌẽne siꞌubdatõ hã ma tô õmo zani zaꞌra ni, iꞌõmo surure ma, ropese da. Taha ma, te oto aꞌuwẽ tõmo ne hã tãma tihâimana zahuré. Duré isadawa hã ꞌrâwi ꞌre isiꞌmadâꞌâ zei mono zéb zarina te te ãma ꞌre inharĩ mono da hã te tãma tihâiba.
Daniéu hã, ꞌRe ihâimana uꞌâsi mono te te iꞌmadâꞌâzé wasuꞌu
9 Wa hã zahadu te isahoi mono ꞌre, robꞌmadâꞌâ na te ãma uzusi mono ré, ma tô danhibꞌapito simasisizé hã dasiwi sãrĩ ni. Tawamhã nimahã dasimasisizém na te oto we Duréi ꞌre Ihâimana mono hã ãma nhamra. Iꞌuza hã ihâirã uptabi. Duré iséré hã, irã uptabi, poneꞌẽrebâ zéré ne hã. Isimasisizé hã duré isimasisizé para hã tô unhama roꞌo zoto ne iꞌmanharĩ hã.
10 Taha nhoꞌremhã ma tô duré unhama na â hã tipraba. Tamemhã te duré daꞌahâ uptabi na tahâimana zaꞌra ni, marĩ, da te tãma iꞌmanharĩ zaꞌra da hã. Nemo te daꞌahâ uptabi na duré dazaꞌrata waihuꞌu ãna isõꞌre aimasam ni. Tawamhã daꞌãma rowairébézé oto sãnaꞌrata wamhã, ma tô ibaihâ hã sõzi zaꞌra ni.
11 Duré wa zahadu ꞌmadâ. E marĩ wa. Iꞌõmo surure zahadu te te sina nharĩ wa, ꞌre isiꞌmadâꞌâ zei mono na hã. Te ꞌmadâꞌâ ré, ma tô maparane siꞌuiwa na ãma ropoto siwamnarĩ hã dasiwi wĩrĩ ni. Ma tô duré ihâiba hã da te dasiwi waꞌõtõ pese. Taha pari ma tô duré unhama roꞌo u dasiwi sãmra ni.
12 Duré ropoto siwamnarĩ hâiba amo norĩ wi hã ma tô isiptede tiwi sani zaꞌra ni. Tane nherẽ, ta norĩ hã da te dasiwi simroi õ di. Ma tô tãma pisutu zaꞌra ni, bâdâ suru na aꞌâ ãma ꞌre ihâimana zaꞌra mono zéb da hã.
13 Tawamhã tô taha mara na ĩnhotõ ꞌrowim na, wa tô duré niꞌwa hã ꞌmadâ, tiꞌai ãma aꞌuwẽ hâiba ne hâiwa nhirõtõ na we imorĩ hã. Ta hã ma tô Duréi ꞌre Ihâimana mono u we sina rotété. Tahawa, ma tô ta hã dasiwi saprõni ni, Duréi ꞌre Ihâimana mono nhoꞌre u.
14 Ma tô isimiroti pire na ꞌre ihâimana mono zé, duré apito wa, da te ãma ꞌre iwazé mono zé duré te te ꞌre idaꞌaꞌmadâꞌâ mono zé hã tãma pisutu ni. Tawamhã dapoto mono bâ, duré daro mono bâ ꞌre idahâimana zaꞌra mono hã, duré damreme mono bâ ꞌre idamreme zusi mono hã ma tô uburé ãma ꞌre dawata zaꞌra. Ĩsiptetezé hã isiꞌutõrĩ waihuꞌuꞌõ. Duré te te ꞌre idaꞌaꞌmadâꞌâ mono zé isiꞌutõrĩ waihuꞌuꞌõ na.
Daniéu, marĩ te te iꞌmadâꞌâzém na te te ãma isaprĩzé wasuꞌu
15 Wa hã Daniéu ĩnhotõ ꞌrowim ne, marĩ te iꞌaꞌmadâꞌâ mono zé hã te te ĩpẽꞌẽwara pese wa, wa tô hâtârâ.
16 Tahawa, isimasisizém nhoꞌre daꞌahâ uptabi na tame idasimasam norĩ u, wa tô ꞌrâwi ĩsina rotété, marĩ te iꞌaꞌmadâꞌâ mono na te te ĩma ãma iꞌmazaprĩzé hã te tiwi ꞌmaiwaptẽrẽ da. Tahawa, ma tô õ hã ãma ĩma saprĩ ãne:
17 — Maparane siꞌuiwa na ropoto siwamnarĩ isaꞌẽtẽ uptabi norĩ hã maparane siꞌuiwa na za apito norĩ siptete na te te ꞌre idaꞌaꞌmadâꞌâ zaꞌra mono zé, te wasuꞌu.
18 Tane nherẽ, daꞌmadâꞌâzé hã te za uburé danhipai u Isiptede ꞌRe ihâimana uꞌâsi mono tinhibꞌaꞌuwẽ da, te te ipisutu norĩ ma sõmri zaꞌra ni, õne uꞌâ tãma ꞌre ihâimana zaꞌra mono da.
19 Wa tô duré ĩsima wẽ, maparane siꞌuiwa na ãma ropoto siwamnarĩ na isaprĩzé te waihuꞌu da, siꞌubdatõ ropoto siwamnarĩ norĩ hâiba nei õ hã. Ta hã aimawi ipipa uptabi, duré isiꞌuwazi tete na iꞌwa hã, duré ẽtẽ topsata na isipo hã, duré tinhisõpãrĩ te te ãma ꞌre inhiwazu mono, duré isisõpãrĩ nhi ꞌre isiꞌatarẽme mono tipara na te te ꞌre iꞌanhizu pese mono hã.
20 Wa tô duré tiwi waptẽ, ropoto siwamnarĩ ꞌrã na iꞌu 10 na ihâimana zaꞌra na zama te te ĩma ãma isaprĩzé hã, duré iꞌõmo hâiba amo iwatobro na isaprĩzé hã. Ta hã siꞌubdatõ iꞌu te te iꞌmarõpãrĩ zaꞌra hã, iꞌõmo hâiba amo norĩ nhipai u isiptete uptabi, ito duré tãma ihâiba hã, duré ꞌre isiꞌmadâꞌâ zei mono na tizadawa na te te ꞌre inharĩ mono.
21 Tawamhã zahadu te ꞌmadâꞌâ ré, ma tô iꞌu hã ꞌRe ihâimana uꞌâsi mono nhibꞌaꞌuwẽ aꞌwapé. Tawamhã ropoto siwamnarĩ upsuru, zahadu we te te tô daꞌãma aiꞌuté,
22 duréi ꞌre Ihâimana mono hã we datẽme iwisizéb u. Ta hã ma tô uburé danhipai u Isiptede ꞌRe ihâimana uꞌâsi mono nhibꞌaꞌuwẽ norĩ ma, iwẽ na hã rowairébé. E marĩ wa. Bâdâ hã tô oto iwa waptãꞌã wa, isibꞌaꞌuwẽ norĩ, siptete na za ꞌre isiꞌiꞌrãnhoꞌõmo zaꞌra mono zém na te te ãma isãnaꞌrata zaꞌra zéb da hã.
23 Tawamhã ãne te te ĩma ãma isaprĩzé hã ma tô ĩma wasuꞌu:
— Maparane siꞌuiwa na ãma ropoto siwamnarĩ hã, maparane siꞌuiwa na ãma tiꞌai ãma daꞌmadâꞌâzé hã te wasuꞌu. Tiꞌai ãma isimiꞌmadâꞌâzé hã ihâiba amo norĩ nhimiꞌmadâꞌâ zaꞌra zém nei õ di. Ta hã te za uburé tiꞌai mono bâ ꞌre idahâimana zaꞌra mono hã aꞌuprosi. Te za duré te te daꞌanhiwazui pese. Te za duré tipara na te te daꞌanhinhizu pese.
24 10 na iꞌõmo norĩ hã, te 10 na apito norĩ hã wasuꞌu, za iꞌrãnhoꞌõmo na ꞌre hâimana zaꞌra mono wa, te te ꞌre idaꞌmadâꞌâ zaꞌra mono zé hã. Tawamhã ta norĩ parimhã te za apito ihâiba amo hã duré sihâiꞌré, imorĩꞌrata na apito norĩ nei õ na, za ꞌre ihâimana mono hã. Ta hã te za siꞌubdatõ apito norĩ ãma aiꞌuté zaꞌra.
25 Ta hã te za uburé danhipai u Isiptede ꞌRe ihâimana uꞌâsi mono zada hã ꞌre hâimana. Te za duré isibꞌaꞌuwẽ norĩ ma hã te te ꞌre arobꞌmanharĩ wasété. Duré te za ꞌRe ihâimana uꞌâsi mono nhimiroti na duré isibꞌaꞌuwẽ nhibâtâ norĩ na te te ãma tiwi saprĩ zaꞌra da hã, te te ꞌre pibui uꞌâsi zaꞌra, Te za duré siꞌubdatõ wahu aiwa ãma isipoꞌo na ꞌRe ihâimana uꞌâsi mono nhibꞌaꞌuwẽ norĩ isibꞌratamhã aꞌâ tihâimana zaꞌra.
26 Tane nherẽ, ãne na romhâimana parip si, te za daꞌãma rowairébéꞌwa norĩ, niha hã tãma pisutu zaꞌra. Taha zarina te za tinhimiꞌmadâꞌâzé hã siwi simini. Te za duré isiptetezé hã õne uꞌâ tiwi ꞌre siꞌutõrĩ.
27 Tawamhã tiꞌai ãma daꞌmadâꞌâzé hã duré danhimiroti nhiptetezé hã te za uburé danhipai u Isiptede ꞌRe ihâimana uꞌâsi mono nhibꞌaꞌuwẽ ma hã tãma sõmri zaꞌra ni. Ta norĩ hã te za tiꞌai mono bâ uburé pese õne uꞌâ te te ꞌre daꞌmadâꞌâ zaꞌra. Tahawa, uburé pese dapoto mono bâ te za tãma ꞌre dahâimana zaꞌra. Te za duré isimiroti hã uburé da te ꞌre wapari pese zaꞌra.
28 Ãme ma oto tiꞌrãsutu, ĩnhotõ ꞌrowim ne, te marĩ iꞌaꞌmadâꞌâ mono zé hã. Tane nherẽ, wa hã Daniéu wa tô duré tãma ĩpẽꞌẽwara pese, te ãma irosaꞌratazéb zarina. Tahawa, wa tô duré ĩꞌubuꞌa pese. Tane nherẽ, wa ꞌrâwi ĩsima si tété.
