Filipu 4:1-23
4 Ĩsisãnawã norĩ, ĩma iꞌasawi pese zaꞌra waꞌaba norĩ, duré aiꞌãma ĩpẽꞌẽzé uptabi zaꞌra waꞌaba norĩ. A norĩ waꞌwa hã aiꞌãma ĩto zaꞌẽtẽ zaꞌra waꞌaba di. Duré ĩte danhoprezé iwẽ uptabi ne, a norĩ waꞌwa hã. Maꞌãpé, asiptete uꞌâsi ãma ꞌre aihâimana zaꞌra waꞌaba mono, Wanhibꞌapito ãma hã.
2 Ĩhidiba Evodia duré Sĩtiqui, wa za ãma aiwi waptẽrẽ ꞌwa. Maꞌãpé asiré ꞌre aihâimana aba mono da, asima sô ꞌre airĩtĩ uꞌâsi aba mono, Wanhibꞌapito zazeiꞌwai wa.
3 Duré a hã ĩsiré sena na romhuriꞌwa, wa ãma aiwi waptẽ. Maꞌãpé, ã hã maparane piꞌõ norĩ ãma aime zahuré na. Ta norĩ hã ma tô ꞌre sisapẽtẽ zahuré, Rowasuꞌuwẽ ité te te ropé da hã ĩsiré, duré Clemetihi zama duré aimawi norĩ ĩsiré romhuriꞌwa norĩ zama. Ta norĩ nhisi hã te ꞌre hâimana zaꞌra, ꞌRe ihâimana uꞌâsi mono ꞌrata za idahâimana uꞌâsi zaꞌra mono norĩ nhisi ré, ibaihâ ꞌre ihâimana mono na.
4 Maꞌãpé, asima ꞌre rowẽ uꞌâsi zaꞌra waꞌaba mono, Wanhibꞌapito ãma hã! Wa za duré ãma sahu: Maꞌãpé asima ꞌre rowẽ uꞌâsi zaꞌra waꞌaba mono!
5 Maꞌãpé, uburé dama ꞌre hâiꞌré zaꞌra waꞌaba mono, aiwaimri ꞌre idazawi zaꞌra waꞌaba mono zé hã. E marĩ wa. Wanhibꞌapito hã apâ te za wei morĩ su.
6 Marĩ na ꞌre aihâtâꞌâ zaꞌra waꞌaba mono sina ꞌre anomro aba mono tõ. Tazahã, ꞌRe ihâimana uꞌâsi mono wi si ꞌre rowaptẽrẽ zaꞌra waꞌaba mono, sipuꞌu pese na marĩ aiꞌãma ꞌre ihâimana zaꞌra waꞌaba mono na hã. Ãne hã ꞌre ꞌmanharĩ zaꞌra waꞌaba mono, ãma ꞌre aiwata zaꞌra waꞌaba mono sina.
7 Ãne wamhã, ꞌRe ihâimana uꞌâsi mono te rowẽ uꞌâ hã, niꞌwa te te isadaihuꞌu waihuꞌu õ hã, te za aipẽꞌẽ ꞌre duré asimirosaꞌrata ꞌre, te te ꞌre aiꞌabꞌmadâꞌâ ꞌwa, Cristu Zezusihi ãma ꞌre aihâimana zaꞌra waꞌaba mono wa.
8 Ĩsisãnawã norĩ, daꞌrãirẽme ĩnhimiꞌuiꞌéré na wa za ãma aipoꞌre puꞌu zaꞌra waꞌwa. Maꞌãpé asimirosaꞌrada hã uburé marĩ iwẽ na si ꞌre ꞌmasisi zaꞌra waꞌaba mono, uburé ãma idaꞌuzei wẽ na si, duré uburé marĩ iꞌuptabi na si duré uburé marĩ ãma idawazé pese na si duré uburé marĩ iꞌuwaibaba na si duré uburé marĩ iwasété õ na si duré uburé marĩ hã wẽ wa, ãma idatobꞌuzu zaꞌẽtẽ na si duré uburé marĩ iwẽ uptabi na si.
9 Maꞌãpé duré marĩ iwẽ uburé ĩhawi iwaihuꞌu zaꞌra waꞌaba zéb zarina ꞌre ꞌmanharĩ uꞌâsi zaꞌra waꞌaba mono, ĩhawi iwaibui waꞌwa hã duré ĩhawi iwapari zaꞌra waꞌwa hã duré te ꞌre abꞌmanharĩ mono ré, ãma asiwi ĩꞌmadâꞌâ aba zéb zarina. Ãne wamhã, ꞌRe ihâimana uꞌâsi mono, wama rowẽ nhomriꞌwa hã te za asiré ꞌre hâimana uꞌâsi zaꞌra waꞌwa.
Paulu hã, Filipu ãma isazeiꞌwa norĩ te te isawi zaꞌra zé
10 Wanhibꞌapito ãma, wa saꞌẽtẽ uptabi na ꞌre ĩwata, ĩꞌãma iꞌaipoꞌre puꞌu zaꞌra waꞌaba zém na ãma sitéb zaꞌra waꞌaba wa. Ma tô aré tô ĩꞌãma aipoꞌre puꞌu zaꞌra waꞌwa. Tane nherẽ, bâdâ hã aima wisi zaꞌra waꞌaba õ di, ihâiꞌré zaꞌra waꞌaba da hã.
11 E marĩ zô ĩwi roꞌwanhiꞌriti wa, wa ãne hã tinha. Mare di. E marĩ wa. Uburé marĩ ĩma ꞌre ihâimana zaꞌra mono na te ĩsima ꞌre irowẽ mono zé hã, te waihuꞌu wa.
12 Ĩma waihuꞌu pese di, marĩ zô ĩwi ꞌre rowaptâꞌâ mono wa, ꞌre ĩhâimana mono zé hã, duré tane ĩma waihuꞌu pese di, saꞌẽtẽ na marĩ ĩma ꞌre hâimana zaꞌra mono ré, ꞌre ĩhâimana mono zé hã. Wa tô duré waihuꞌu, sipuꞌu pese na ĩma ꞌre iromhâimana mono zém na te ãma ĩsima ꞌre irowẽ mono zé hã, ĩsa zô ĩwi rowaptâꞌâ õ wamhã, duré mra te sépata wamhã, duré marĩ saꞌẽtẽ na ĩma hâimana zaꞌra wamhã, duré marĩ suru na ĩma hâimana zaꞌra nherẽ.
13 Uburé marĩ hã te ꞌre abꞌmanharĩ waihuꞌu pese mono di, ꞌre ĩnhiptete mono ꞌwa hã* te te ꞌre ĩnhiptete mono wa.
14 Ãne nherẽ, ma tô ĩma iꞌmanharĩ wẽ zaꞌra waꞌwa, ĩꞌãma iꞌaime zaꞌra waꞌaba zém na hã te robzépata ré.
15 A norĩ waꞌwa, Filipu ãma isazeiꞌwa ꞌre iꞌaiꞌubumroi waꞌaba mono norĩ, aima waihuꞌu pese zaꞌra waꞌaba di, Masédonia na danhiptiꞌa nhoꞌõmo nhisi hawi ĩmorĩ wamhã, imorĩꞌrata na Rowasuꞌuwẽ itém na te dama rowasuꞌu wamhã, rowahutu u asiré ꞌre iꞌaiꞌrãꞌõtõ aba mono norĩ si ma tô asiwi ĩpawapto waꞌwa.
16 Duré Tesalonica ãma ropire na ĩhâimana ré hã, ma duré ãma asiwi isõmri ꞌwa, asiwi ĩpawapto waꞌaba zé hã. Mare di, misi haré hã. Tazahã maparane.
17 Asõprubzém na asiwi ĩpawapto waꞌaba da, ĩsima sô ĩrĩtĩ wab õ di. Tane nherẽ tô, iwaꞌrãmi ꞌRe ihâimana uꞌâsi mono iwẽ te te aima ꞌre ipisutu zaꞌra waꞌaba mono zé hã aima ꞌre isaꞌẽtẽ uꞌâsi zaꞌra waꞌaba mono da si, aihâiba mono bâ.
18 Uburé wa tô waibu, we ĩma isõmri zaꞌra waꞌwa hã. Ma duré ĩza siꞌatarẽme zaꞌra. Ãhã na hã, sô ĩnhimnhasi nhipai u, te ĩma tihâimana zaꞌra, Epafroditu hã we te te ĩma ãwisi wa, asõprub zaꞌra waꞌaba zé hã. Ta hã aiwa wedewati isazei uptabi na ꞌRe ihâimana uꞌâsi mono ma, ãma ꞌre idanhoprub zaꞌra mono zém ne, danhoprubzé te te ꞌre iꞌawaibui mono, duré te te tãma ꞌre iꞌarowẽ mono.
19 Tahawa, ĩte ꞌRe ihâimana uꞌâsi mono hã isibro wẽ uptabi na tãma ꞌre ihâimana zaꞌra mono zéb zarina, Cristu Zezusihi uꞌâbâ te te wama ꞌre iꞌanhomri mono da hã, te za aima sõmri zaꞌra waꞌwa za, marĩ zô aiwi ꞌre rowaptâꞌâ zaꞌra waꞌaba mono wamhã.
20 Wate ꞌRe ihâimana uꞌâsi mono ãma si ꞌre iwawata uꞌâsi zaꞌra mono da si, Wamama ãma si, õne uꞌâsi! Tane tô!
Paulu hã, Filipu ãma isazeiꞌwa norĩ te te isawi ꞌrãsutu zaꞌra zé
21 Uburé Cristu Zezusihi nhibꞌaꞌuwẽ norĩ, wa ãma asawi zaꞌra waꞌaba ni. Ĩsisãnawã norĩ ãme ĩsiré ihâimana zaꞌra norĩ zama, te duré ãma asawi zaꞌra waꞌwa.
22 Uburé ãme ꞌRe ihâimana uꞌâsi mono nhibꞌaꞌuwẽ na ꞌre ihâimana zaꞌra mono norĩ, te ãma asawi zaꞌra waꞌwa. Apito Cézaha nhorõwa ꞌre, te te ꞌre iromhuri zaꞌra mono norĩ hã te duré danhipai u ãma asawi wapti zaꞌra waꞌwa.
23 Wa te te aiꞌãma ꞌre rowaptẽrẽ uꞌâsi zaꞌra waꞌwa, Wanhibꞌapito Zezu Cristuhu nhimizawizé, aihâiba mono bâ, asiré ꞌre ihâimana uꞌâsi zaꞌra waꞌaba mono da si! Tane tô.
Ĩwaꞌõtõ piꞌreba watsuꞌu mono
^ 4:13 ꞌRe ĩnhiptete mono ꞌwa hã, Cristu te wasuꞌu, Cristuhu si te te ꞌre siptete mono wa.
