Mateus 10:1-42
10 Tawamhã Zezusi hã ma tô sitẽme sô tihârâ zaꞌra, isiré ꞌre inomro mono 12 na ihâiba zaꞌra norĩ zô. Tame ma tô tãma sõmri zaꞌra isadawa para simiroti pire na, waꞌuburé ma, te te robꞌru zaꞌra mono da, duré dahâzé sipuꞌu pese na daꞌãma ꞌre ihâimana zaꞌra mono hã te te dapese zaꞌra mono da, dahâzé ipire daꞌãma ꞌre ihâimana zaꞌra mono norĩ zama.
2 Ãne 12 na isiré ꞌre inomro mono norĩ nhisi hã: Imorĩꞌrada hã, Simau Pedru na isisi amo hã. Duré ino hã Ãdré na isisi. Tiagu, duré ino hã Zuwã. Ta norĩ hã Zebedeu ꞌra zahuré.
3 Filipi, duré Bartolomeu. Tome duré Mateus. Ta hã robꞌuiprazé arĩ ubumroiꞌwa aré. Duré Tiagu, Afeuhu ꞌra. Duré Tadeu.
4 Duré Simau, zeloti norĩ niwĩ ꞌre ihâimana mono. Duré Zudasi Iscarioti, Zezusihi hâiba nhomriꞌwa da hã.
5 Tawamhã Zezusi hã, ã hã 12 na aibâ ihâiba zaꞌra norĩ hã ma tô datẽme satõrĩ zaꞌra. Ãne ma tô tãma roti zaꞌra:
— Aiꞌabaꞌréi waꞌaba tõ, zudeuꞌõ norĩ ꞌre isiꞌubumroi mono zéb u hã. Duré asisisi aba tõ, ꞌri waꞌõtõ norĩ Samaria ꞌre, ꞌre idasiꞌubumroi mono zéb u hã.
6 Maꞌãpé sô airĩtĩ zaꞌra waꞌaba, Izaraéu nhihudu norĩ siwaꞌru ꞌre ihâimana zaꞌra mono norĩ zô si, poneꞌẽrebâ norĩ, siwaꞌru ꞌre inomro mono ne.
7 Mo oto aiꞌabaꞌréi waꞌaba, dama rowahutu zaꞌra waꞌaba mono da, ãne: “Hâiwa ãma ꞌre Isãmra mono, daꞌãma ꞌre isibꞌaꞌuwẽ mono zé hã romhuture di oto.”
8 Ihâzé ré norĩ hã pese zaꞌra waꞌaba mono. Dadâꞌâ zaꞌra mono nherẽ, apâ dahâiwaꞌutu zaꞌra waꞌaba mono. Iꞌwaꞌre ré norĩ hã hâiba pese zaꞌra waꞌaba mono. Waꞌuburé hã dama sãmra zaꞌra waꞌaba mono. Waꞌâbâ ãna wa tô ĩwaihuꞌu pe hã aima sõmri zaꞌra waꞌwa. Tane, te za waꞌâbâ ãna dama iꞌmanharĩ zaꞌra waꞌaba mo.
9 Robꞌuiprazé isapotore hã asiré ꞌwasari aba tõ, ẽtẽ waipo pré oru ꞌmanharĩ hã, ẽtẽ waipo prã prata ꞌmanharĩ hã duré ẽtẽ topsada cobri ꞌmanharĩ zama.
10 ꞌWasari aba tõ, romramizé hã. Aiꞌuza ihâpa misi ré si te za aiꞌabaꞌréi waꞌwa, duré aiparaꞌuza misi ré si. Wedehu asiwazusizé hã misire te za iꞌwasari ꞌwa. E marĩ wa. Romhuriꞌwa hã uburé marĩ zô tiwi irowaptâ hã, tô iꞌru zahi, da te tãma isõmri da hã, ãma hâimana da.
11 — ꞌRi nhoꞌõmo u niwamhã duré ꞌri waꞌõtõ u aihutu aba wamhã, sõ airĩtĩ zaꞌra waꞌaba mono, niꞌwa hã itẽme aihutu aba wa, za asô itobꞌuzu zaꞌra waꞌaba zô. Tawamhã tame isõrõwa ãma aꞌâ aihâimana zaꞌra waꞌaba mono, za ta hawi iꞌaiwairébé aba mono zéb u.
12 ꞌRi para u asisisi aba mono wamhã, ꞌri ꞌre, idahâimana zaꞌra norĩ hã sawi zaꞌra waꞌaba mono.
13 ꞌRi ꞌre, idahâimana zaꞌra hã asô datobꞌuzu zaꞌra waꞌaba mono wamhã, rowẽ na idazawi zaꞌra waꞌaba mono zé hã, dasiré ihâimana zaꞌra mono da si, iwẽ hã. Tazahã, asô datobꞌuzu zaꞌra waꞌaba mono õ wamhã, rowẽ na idazawi zaꞌra waꞌaba mono zé hã te za apâ dawi iwaibui waꞌaba mo.
14 Nimame ꞌri ꞌremhã, niwamhã duré nimame ꞌri waꞌõtõ ãma datẽme asisi aba da, asô datobꞌuzu zaꞌra waꞌaba õ wamhã, niwamhã duré irowasuꞌu zaꞌra waꞌaba zém na da te aiwapari zaꞌra waꞌaba da, da te dasima wẽ zaꞌra õ wamhã, maꞌãpé ta hawimhã tô aiwairébé aba mono. Duré oto ta hawi aiwairébé aba zéb u hã, aipara zapru hã asisaꞌu tataꞌa zaꞌra waꞌaba mono, tiꞌai u rereꞌe mono da.
15 Tô sena wa za aima waihuꞌu zaꞌra waꞌwa, ãne: Bâdâ ꞌRe ihâimana uꞌâsi mono, dahâimanazéb zarina uburé te te daꞌãma iꞌarowairébézéb ãma hã Sodoma ãma duré Gomora ãma ꞌre idahâimana wasété uptabi zaꞌra mono norĩ ma, te te irobꞌmanharĩ pipa zém nhipai u, te za ꞌri waꞌõtõ ꞌre, asô itobꞌuzu zaꞌra waꞌaba õ norĩ ma hã robꞌmanharĩ zaꞌẽtẽ zaꞌra.
Zezusi hã tizazeiꞌwa norĩ te te ipoꞌre puꞌu zaꞌra zé, za da te tãma ꞌre irobꞌmanharĩ wasété zaꞌra mono zém na
16 — Maꞌãpé ĩwapari pese zaꞌra waꞌaba. Wa oto asatõrĩ zaꞌra waꞌwa datẽme, poneꞌẽrebâ iꞌrare norĩ hã abaze zahi waꞌwa u ꞌre isisisi mono ne. Tahawa, maꞌãpé aihâimana nhimizaꞌrese ꞌre aihâimana zaꞌra waꞌaba mono, wahi ne. Duré aiwaimri na te za ꞌre aihâimana zaꞌra waꞌaba mo, utuꞌu ne.
17 Tahawa, maꞌãpé ãma ꞌre pibui pese zaꞌra waꞌaba mono. E marĩ wa. Daꞌãma rowairébézéb u te za da te ꞌre asimroi waꞌwa. Romhâ ꞌmanharĩ nhorõ na dapréꞌézém na te za duré da te ꞌre aihâ zaꞌra waꞌwa, Zudeu norĩ te rowahutuzé, ꞌre ihâimana zaꞌra mono ꞌremhã.
18 Ĩꞌuꞌâbâ te za da te ꞌre asimroi waꞌwa, rotiꞌwa norĩ nhoꞌre u hã duré apito norĩ nhoꞌre u zama. Tawamhã tame bâdâ hã te za aima ꞌre hâimana zaꞌra waꞌwa, ta norĩ ma, ꞌre ĩwasuꞌu zaꞌra waꞌaba mono zéb da hã, zudeuꞌõ norĩ ma zama.
19 Dama ipire norĩ u, da te ꞌre asimroi waꞌaba mono wamhã, ꞌre aihâtâꞌâ zaꞌra waꞌaba mono tõ, za ꞌre inharĩ zaꞌra waꞌaba mono zém na hã duré niha na za ꞌre inharĩ zaꞌra waꞌaba mono zém na hã. Za iꞌasiwasuꞌu waꞌaba zéb da hã, bâdâ aima wisi aba wamhã, ꞌRe ihâimana uꞌâsi mono si te za aima sõmri ꞌwa, aimreme aba zéb da hã.
20 Aimreme aba wamhã, a norĩ waꞌwa hã nharĩ aba dai õ di. Tazahã, Aimama waꞌaba Pẽꞌẽzani si te za asadawa na nharĩ ꞌwa.
21 — Dasisãnawã nherẽ, te za da te ꞌre hâiba zaꞌré zaꞌra, da te ꞌre simroi mono da hã. Damama norĩ zama te za tiꞌra hã te te ꞌre hâiba zaꞌré zaꞌra. Daꞌra norĩ hã timama norĩ da, te za ꞌre hâimana zaꞌra. Te za duré te te ꞌre simro.
22 Uburé te za da te ꞌre aiꞌruiwapari zaꞌra waꞌwa, ĩꞌuꞌâbâ. Tane nherẽ, niꞌwa hã ro iꞌrãsutuzéb u siptete sina ĩꞌãma ꞌre hâimana uꞌâsi mono wamhã, ta hã te za tinhoꞌreptuzé hã sina uwaimra.
23 Nimame ꞌri waꞌõtõ ꞌre, da te aima ꞌre robꞌmanharĩ wasété zaꞌra waꞌaba mono wamhã, maꞌãpé ta hawimhã ꞌre aiwairébé aba mono, ꞌre aimani zaꞌra waꞌaba mono da, ꞌri waꞌõtõ amoi u. Tô sena wa za ãne hã aima waihuꞌu zaꞌra waꞌwa: Izaraéu nhihudu norĩ nhiptiꞌai ꞌre, ꞌri waꞌõtõ mono bâ asimiromhuri hã ꞌrãsutu zaꞌra waꞌaba õ ré, te za wei mo apâ, Tiꞌai ãma Dasiré Ipodo hã.
24 — Niꞌwa romnhoréꞌwa hã pire na hâimana waihuꞌu õ di, tãma iromnhoréꞌwa nhipai u hã. Duré, dama romhuriꞌwa hã pire na hâimana waihuꞌu õ di, tinhibꞌihâꞌa nhipai u hã.
25 Tahawa, romnhoréꞌwa hã te za te te sima ꞌre rowẽ, tite tãma iromnhoréꞌwa ne, ꞌre ihâimana mono zém na hã, duré dama romhuriꞌwa hã tinhibꞌihâꞌa ne ꞌre ihâimana mono zém na hã. ꞌRi tedeꞌwa hã Beuzebu na da te ꞌre sisi zaꞌra mono wamhã, ꞌri ꞌre, isiré ꞌre ihâimana zaꞌra mono hã, taha nhipai u te za tô iwasété uptabi na da te ꞌre wamri zaꞌra.
ꞌRe ihâimana uꞌâsi mono ma si, wa za ꞌre wapahi zaꞌra
26 — Tahawa, dama hã ꞌre aipahi zaꞌra waꞌaba mono tõ. Bâdâ hã te za wi, ꞌRe ihâimana uꞌâsi mono uburé marĩ piꞌuriwi ꞌre ihâimana zaꞌra mono hã, za te te iꞌahâiꞌrézé hã. Marĩ hã piꞌuriwi tiwi ꞌmaihâimana waihuꞌu õ di za.
27 Marĩ hã aima zaꞌra waꞌaba si, robra na te aima ꞌre iwasuꞌu zaꞌra waꞌaba mono hã, bâtâ na iwasuꞌu na, ãma dama ꞌre sahu zaꞌra waꞌaba mono. Uburé piꞌuriwi aima waꞌaba si, te aima ꞌre iwasuꞌu zaꞌra waꞌaba mono hã, maꞌãpé sõꞌawi dama ꞌre wasuꞌu zaꞌra waꞌaba mo.
28 ꞌRe aipahi zaꞌra waꞌaba mono tõ, dahâiba te te ꞌre isimroi mono norĩ ma hã. E marĩ wa. Ta norĩ hã dapẽꞌẽzani dahâiba uptabi hã te te ꞌre simroi waihuꞌu mono õ di. ꞌRe ihâimana uꞌâsi mono ma si, te za ꞌre aipahi zaꞌra waꞌaba mo. Ta hã dapẽꞌẽzani dahâiba uptabi hã te te uprosi waihuꞌu pese di, dahâiba zama ropipa ãma hã.
29 E maparane sire hã da te dasima ꞌre wede zaꞌra mono ã bâ, misi robꞌuiprazé isapotore isurure na hã. Tane nherẽ, niwa tiꞌai u hã ꞌmaiwaptãꞌã õ di, dâꞌâ siromo, Aimama ꞌwa hã ãne tãma ꞌmairomhâimana da hã, te te tãma ꞌmaiꞌrui õ nherẽ.
30 Tane duré aséré zaꞌra waꞌwa hã, aiꞌrã na ꞌre isimasa mono hã saꞌrata pese na te ꞌre hâimana zaꞌra.
31 Tahawa, maꞌãpé ꞌre aipahi zaꞌra waꞌaba mono tõ, a norĩ waꞌwa hã aiwaꞌâbâ zaꞌẽtẽ uptabi zaꞌra waꞌaba wa, si norĩ iꞌahâ uptabi nhipai u.
Zezusihi zazeiꞌwa na ꞌre idasiwasuꞌu zaꞌra mono zé, duré da te ꞌre iꞌudâ zaꞌra mono zé
32 — Niꞌwa hã ĩzazeiꞌwa na sõꞌawi dama ꞌre siwasuꞌu mono wamhã, Robꞌrãsutu ãma Daꞌãma rowairébé ihâimana ãma hã, ĩzama wa za wasuꞌu sõꞌawi ĩzazeiꞌwa na hã, Ĩmama hâiwa ãma ꞌre isãmra mono nhoꞌa.
33 Tazahã, niꞌwa hã ĩzazeiꞌõꞌwa na danhoꞌa ꞌre siwasuꞌu mono wamhã, ĩzama te wasuꞌu õ di za ĩzazeiꞌwa na hã, Ĩmama hâiwa ãma ꞌre isãmra mono nhoꞌa hã, Robꞌrãsutu ãma Daꞌãma rowairébé ihâimana ãma hã.
Zezusihi uꞌâbâ dasina ꞌre idasipoꞌo zaꞌra mono zé
34 — Ĩꞌãma rosaꞌrata zaꞌra waꞌaba tõ, rowẽ, te we iꞌâri na hã, tiꞌai u. Rowẽ, te wei âri õ di. Tazahã, wa tô we tiꞌâ, sibꞌézé ꞌwa pa*.
35 Daꞌra norĩ hã timama da, ꞌre hâimana zaꞌra mono da, wa tô wei mo tiꞌai u hã, daꞌra sipiꞌõ norĩ hã tina norĩ da, duré dasaniꞌaba norĩ hã timaprebaba sipiꞌõ norĩ da, ꞌre hâimana zaꞌra mono da.
36 Ãne wa, te za dasisada ꞌre dahâimana zaꞌra, damama sipoto hawi aꞌuwẽ nherẽ.
37 — Niꞌwa hã ĩzawi nhipai u, timama duré tina, te te ꞌre sawi pese uptabi zahuré mono wamhã, ta hã sadai õ di, ĩzazeiꞌwa ꞌre imorĩ da hã. Duré niꞌwa hã ĩzawi nhipai u, tiꞌra siꞌaibâ duré tiꞌra sipiꞌõ te te ꞌre sawi pese uptabi zahuré mono wamhã, ta hã duré sadai õ di, ĩzazeiꞌwa ꞌre imorĩ da hã.
38 Niꞌwa hã ĩzazeiꞌwa na ꞌre morĩ da, wedepoꞌo nhonhiꞌrãmi tizaꞌozéb da, te te âri õ wamhã, ĩzazeiꞌwa ꞌre imorĩ da hã, waihuꞌu õ di.
39 Niꞌwa hã tinhoꞌreptuzé te te sina uwaimrami da wamhã, ꞌrâwi tihâimanazé hã te te sima sawi tõ. Tazahã, niꞌwa hã ꞌrâwi tihâimanazé ĩꞌuꞌâbâ te te sima sawi õ wamhã, ta hã te za tinhoꞌreptuzé hã sina uwaimra.
ꞌRe ihâimana uꞌâsi mono, za te te ꞌre idaꞌapawaꞌâbâ mono zé, Cristuhu zazeiꞌwa ꞌre danomro mono wa
40 — Niꞌwa hã te te ꞌre aiwaibui wẽ waꞌaba mono wamhã, ta hã te za aiꞌuꞌâbâ waꞌaba, ĩꞌâri wẽ. Tane niꞌwa hã te te ĩꞌâri wẽ wamhã, we ĩzatõrĩꞌwa zama te za âri wẽ.
41 Niꞌwa hã ꞌRe ihâimana uꞌâsi mono zadawa ꞌmahârâꞌwa hã te te âri wẽ wamhã, tô ꞌRe ihâimana uꞌâsi mono zadawa ꞌmahârâꞌwai wa, te za ꞌRe ihâimana uꞌâsi mono hã tãma waꞌâ, tizadawa ꞌmahârâꞌwai ma, za te te iwaꞌâbâ ne. Duré niꞌwa hã ꞌRe ihâimana uꞌâsi mono nhimiroti ꞌmadâꞌâ pese ꞌwa te te âri wẽ wamhã, tô ꞌRe ihâimana uꞌâsi mono nhimiroti ꞌmadâꞌâ pese ꞌwai wa, ꞌRe ihâimana uꞌâsi mono hã te za tãma waꞌâ, tizadawa ꞌmadâꞌâ pese ꞌwai ma, za te te iwaꞌâbâ ne.
42 — Niꞌwa hã, ĩzazeiꞌwa norĩ wapu na dama ꞌre ihâimana zaꞌra mono norĩ ma, hâsizé wa, â wahâzé hã tô ĩzazeiꞌwa ꞌre nomro mono wa, ĩnhisi uꞌâbâ te te tãma õb zaꞌra wamhã, ꞌRe ihâimana uꞌâsi mono te te tãma iwaꞌâbâzé te te isimini da hã, mare di za.
Ĩwaꞌõtõ piꞌreba watsuꞌu mono
^ 10:34 Sibꞌézé ꞌwa pa hã dasiꞌwapé te wasuꞌu.
