Mateus 22:1-46
22 Tawamhã Zezusi hã ma tô duré rowasuꞌu, romnhimiréꞌé na, ãne:
2 — Hâiwa ãma ꞌre Isãmra mono, daꞌãma ꞌre isibꞌaꞌuwẽ mono zé hã, aiwa apito te te irobzaꞌra pese ne, iꞌra hã mro da, dasina damrozém na, dasa isaꞌẽne hã te te ꞌmanharĩ da.
3 Tawamhã te te robzaꞌra parimhã, tite romhuriꞌwa norĩ hã ma tô satõrĩ zaꞌra, te te ipoꞌre puꞌu zaꞌra norĩ zô, sihutu da, iꞌra za imrozéb u. Tane nherẽ, te te sima wẽ zaꞌra õ di, itẽme isihutu da hã.
4 Tahawa, ma tô duré satõrĩ zaꞌra aimawi tite romhuriꞌwa norĩ hã, ãne: “Mo oto aiꞌabaꞌréi waꞌaba, sô ĩhârâ zaꞌra norĩ u. Tãma rowasuꞌu zaꞌra waꞌaba, uburé te irobzaꞌra pese na hã oto, dasa hã za ihâimanazéb da hã. Wa tô simro, powawẽ zapu ihâipese norĩ hã, duré powawẽ ibaꞌu ihâipese norĩ zama. Wa tô robzaꞌra pese. We oto siꞌabaꞌré, dato isaꞌẽne za ihâimana u dasina damrozém na hã.”
5 — Tane nherẽ, sô ihârâ zaꞌra norĩ hã te te ãma rosaꞌrata zaꞌra õ di, sô ihârâ zaꞌra zém na hã. Niꞌwam norĩ hã tiburu u si ma tô aiꞌabaꞌré. Duré ihâiba amo norĩ hã tite marĩ zarina si ma tô tihâimana zaꞌra.
6 Aimawi norĩ hã ma tô romhuriꞌwa norĩ hã waibu zaꞌra. Ma tô hâ zaꞌra. Ma tô duré simro zaꞌra.
7 Tawamhã apito hã ma tô abꞌrui pese. Tahawa, ma tô tiꞌru, dapãrĩꞌwa norĩ hã da te simro da, duré ite zaꞌra ꞌri waꞌõno hã da te ãma tiwi sazu zaꞌra da.
8 Tawamhã tite romhuriꞌwa norĩ ma, ma tô tinha, ãne: “Dasa isaꞌẽne za ihâimanazé hã dasina damrozéb ãma hã tâibâ robzaꞌra hã. Tane nherẽ, sô ĩhârâ zaꞌra norĩ ꞌremhã, niꞌwa hã sada hâimana õ di, sima ꞌmatobꞌuzui õ wa.
9 Tahawa, mo oto ropéi waꞌaba mono, ꞌri nhiꞌriti mono bâ. Dasa isaꞌẽne za ihâimana u we dasihutu da, we dama rowasuꞌu zaꞌra waꞌaba mono, danhopẽtẽ zaꞌra waꞌaba mono sidâpâ.”
10 — Tawamhã ite romhuriꞌwa norĩ hã ma tô ropé, ꞌri nhiꞌriti mono bâ. Ma tô te te daꞌrãꞌõtõ zaꞌra, te te danhopẽtẽ zaꞌra mono sidâpâ, iwẽ norĩ hã duré iwasété norĩ zama. Tawamhã dasa isaꞌẽne ihâimanazé ꞌri ꞌre waꞌwa hã ma tô oto dasina ꞌmasisi ni.
11 Tawamhã apito hã isihutu norĩ te te abꞌmadâꞌâ da, sébré wamhã, ma tô ꞌmadâ, aibâ dasina damro wa daꞌuza ré ihâimana õ hã.
12 Ta hã te apito sadanha, ãne: “Ĩsiwaihu, e niha ma we asé ãwamhã, dasina damro wa, daꞌuza hã asima sẽrẽ õ nherẽ.”
— Tane nherẽ, aibâ hã te te sadaꞌâbâ õ di.
13 Tahawa apito hã tite romhuriꞌwa norĩ ma, ma tô tinha, ãne: “Maꞌãpé, ã hã aibâ hã asiwi pawasisi aba. Duré asiwi hiwasisi aba, rob u asiwi mei waꞌaba da, robra u, tame ꞌre wawai uꞌâsi mono da, duré ꞌre ꞌwasitete uꞌâsi mono da, te te oto ꞌre robzépata zaꞌẽtẽ mono wa.”
14 Tawamhã Zezusi hã ma tô timreme na ꞌrãsutu, ãne:
— ꞌRe ihâimana uꞌâsi mono hã, daꞌahâ uptabi na te tô dazô ꞌre hârâ. Tane nherẽ, daꞌumro na te te sima ꞌre daꞌapisutu.
Robꞌuiprazé, danhibꞌapito ma, da te ꞌre iꞌarĩ zaꞌra mono zé
15 Tawamhã farizeu norĩ hã ma tô oto wairé. Siꞌrãꞌõtõ wamhã, ma tô sima ãma rowaꞌõtõ zaꞌra, Zezusi hã niha na timreme na te te upai wa, te te siwi âri da.
16 Taha pari, Zezusihi u ma tô ꞌmazatõrĩ zaꞌra, tizadawa zapariꞌwa norĩ hã, duré apito Erodihi nhimiroti wẽ ꞌwa norĩ zama. Tawamhã ãne ma tô ta norĩ hã siwi sadanha:
— Rowahutuꞌwa, wama aiwaihuꞌu pese zaꞌra di, iꞌuwaibaba si ꞌre iꞌaihâimana mono na hã. Tô sena te iwẽ na si dama ꞌre irowasuꞌu uꞌâsi mo, ꞌRe ihâimana uꞌâsi mono te bâdâdi na hã. Duré danhimirosaꞌrata zarina ꞌre iꞌaihâimana mono õ na hã. Duré ꞌre daꞌaꞌmadâꞌâ mono õ di, niha na ꞌre idahâimana zaꞌra mono zéb zarina.
17 Tahawa, maꞌãpé wama waihuꞌu zaꞌra na, e niha aima hã. E iꞌuwaibaba robꞌuiprazé arĩ hã, apito Cézaha ma, wa te ꞌre iwaꞌâbâ zaꞌra mono da hã. E mare di.
18 Tane nherẽ, Zezusi hã ma tô waihuꞌu zaꞌra, te te waihuꞌu pese zaꞌra nherẽ, senai õ na te te siwi isadanharĩ na hã. Tahawa, ma tô ãne tãma nharĩ zaꞌra:
— Aihâimana siꞌamoi pese na ꞌre iꞌaihâimana zaꞌra waꞌaba mono! E marĩ da, te asiwi ĩpibui waꞌwa, te iꞌupazéb zô!
19 Maꞌãpé we ĩma ꞌmaiꞌâri aba robꞌuiprazé isapotore hã, Roma ꞌre danhibꞌapito ma, da te ꞌre arĩ zaꞌra mono wa, da te tãma ꞌre iwaꞌâbâ zaꞌra mono zé hã.
Tahawa robꞌuiprazé isapotore hã ma tô tãma ꞌmaiꞌâri zaꞌra.
20 Tawamhã Zezusi hã ma tô ãma sadanharĩ zaꞌra, ãne:
— E ꞌwai podo, robꞌuiprazé isapotore na hã. E ꞌwa nhisi na duré ãma robꞌuiꞌéré.
21 Tawamhã ãne ma tô ãma siwi sadaꞌâ:
— Apito Cézaha podo.
Tawamhã Zezusi hã ma tô tãma waihuꞌu zaꞌra, ãne:
— Apito Cézaha ma ꞌre sõmri zaꞌra waꞌaba mono, marĩ Cézaha te hã. Tane duré, ꞌRe ihâimana uꞌâsi mono ma ꞌre sõmri zaꞌra waꞌaba mono, marĩ ꞌRe ihâimana uꞌâsi mono te hã.
22 Tawamhã farizeu norĩ zadawa zapariꞌwa norĩ hã ãne na te te wapari zaꞌra wamhã, ma tô ãma titobꞌuzu zaꞌra. Tahawa ma tô oto siwi tirẽ, Zezusi hã. Ma tô oto apâ aiꞌabaꞌré.
Dahâiwaꞌutuzém na, Zezusi hã saduceu norĩ te te siwi isadanharĩzé
23 Tô taha bâtâ ꞌremhã, saduceu norĩ hã ma duré itẽme aihutu Zezusihi u, apâ ꞌre idahâiwaꞌutu waihuꞌu zaꞌra mono õ na te te dama ꞌre irowasuꞌu zaꞌra mono norĩ hã.
24 Ta norĩ hã ma tô siwi sadanha, ãne:
— Rowahutuꞌwa, Mozési hã ꞌRe ihâimana uꞌâsi mono nhimiroti zahi na ma tô ãne robꞌuiꞌéré: “Aibâ hã dâꞌâ wamhã, timro, ꞌra ãna te te rẽme wamhã, isisãnawã hã ãma mro da. Tawamhã ꞌra wamhã, iꞌra norĩ hã isisãnawã idâꞌâ ꞌra uptabi ne ꞌre hâimana zaꞌra mono da.”
25 Ãne wa za aima wasuꞌu zaꞌra ni: Waꞌreb zaꞌra hã ma tô ꞌre hâimana zaꞌra, aibâ norĩ 7 na ihâiba zaꞌra sisãnawã si hã. Ipotoꞌrada hã ma tô timro. Tane nherẽ, ma dârâ, ꞌra õ ré. Ãne wamhã, tiꞌamoꞌwa hã ma tô sipara tirẽ, isõsi hã ãma mro da.
26 Isõsibi ma hã tô õne ma duré tiromhâiba, duré inoi ma zama. Tawamhã tô õne si ma tô uburé tãma tiromhâimana zaꞌra.
27 Uburé siꞌutõrĩ parimhã, piꞌõ zama ma duré oto dârâ.
28 Tahawa, ꞌRe ihâimana uꞌâsi mono te te idaꞌahâiwaꞌutuzé bâtâ ãma hã, piꞌõ hã e ꞌwai mro na te za tihâiba, 7 na uburé ãma imro zaꞌra ꞌremhã.
29 Tawamhã Zezusi hã ma ãma sadaꞌâbâ zaꞌra, ãne:
— Ma ãma iꞌupa zaꞌra waꞌwa, aima waihuꞌu zaꞌra waꞌaba õ wa, ꞌRe ihâimana uꞌâsi mono mreme na Ibaihâ iwazé pese na robꞌuiꞌéré hã duré ꞌRe ihâimana uꞌâsi mono waihuꞌu pese uptabi na ꞌre ihâimana mono zé hã.
30 E marĩ wa. ꞌRe ihâimana uꞌâsi mono hã idâꞌâ zaꞌra norĩ te te ahâiwaꞌutu wamhã, hâiwa ãma romhuriꞌwa ne, te za oto ꞌre hâimana zaꞌra. Niꞌwa hã mro õ di za oto.
31 Duré apâ ꞌre idahâiwaꞌutu zaꞌra mono zém na rowaihu hã, e niwa sõré zaꞌra waꞌaba ã bâ, ãne ꞌRe ihâimana uꞌâsi mono te te inharĩzé hã:
32 “Wa hã Abraꞌãhã te ꞌRe ihâimana uꞌâsi mono, duré Izaquihi te ꞌRe ihâimana uꞌâsi mono, duré Zacoho te ꞌRe ihâimana uꞌâsi mono.” ꞌRe ihâimana uꞌâsi mono hã idâꞌâ norĩ tei õ di. Dâꞌâ ãna ꞌre ihâimana zaꞌra mono norĩ te hã.
33 Tawamhã daꞌahâ uptabi na idahâimana zaꞌra, ãne hã da te wapari zaꞌra wamhã, ma tô ãma tatobꞌuzu zaꞌra ni, isimirowahutu na.
ꞌRe ihâimana uꞌâsi mono nhimiroti, danhipai u ipire uptabi
34 Tawamhã, farizeu norĩ hã ma tô siꞌrãꞌõtõ, rowasuꞌu te te wapari zaꞌra wamhã, saduceu norĩ, Zezusi te te siwi isadaꞌâbâ waihuꞌu õ na hã.
35 Tawamhã ꞌRe ihâimana uꞌâsi mono nhimiroti zahi na dama rowahutuꞌwa hã, tô farizeu norĩ siré hã, ma tô Zezusi sadanha, te te ãma tãma upa zô, te te pibu da, ãne:
36 — Rowahutuꞌwa, e ma hã bété, danhipai u ipire uptabi, ꞌRe ihâimana uꞌâsi mono nhimiroti zahi na Mozési te te ãma irobꞌuiꞌérézé hã.
37 Tawamhã Zezusi hã ma ãma sadaꞌâ, ãne:
— “ꞌRe sawi pese mono, Uburé Danhibꞌapito ate ꞌRe ihâimana uꞌâsi mono hã, uburé aipẽꞌẽ na, uburé aihâimanazé aipẽꞌẽ ꞌre iꞌrowi uptabi na, duré uburé asimirowaihuꞌu na zama.”
38 Ã hã ꞌRe ihâimana uꞌâsi mono nhimiroti zahi imorĩꞌrata na ꞌre ihâimana mono, duré danhipai u ipire uptabi.
39 Duré ꞌRe ihâimana uꞌâsi mono nhimiroti zahi isãnaꞌre ãma, imorĩꞌrata ne hã tô, ãne: “ꞌRe daꞌazawi pese mono, ꞌrâwi ꞌre iꞌasisawi pese mono ne.”
40 Ã norĩ hã maparane ihâimana zahuré, ꞌRe ihâimana uꞌâsi mono nhimiroti zahi hã ma tô aꞌrãꞌõtõ zahuré, uburé ꞌRe ihâimana uꞌâsi mono nhimiroti zahi na Mozési te te ãma iꞌarobꞌuiꞌérézé hã duré isadawa ꞌmahârâꞌwa norĩ te te ãma irobꞌuiꞌéré zaꞌra zéb zama.
Cristu hã apito Davihi nhibꞌapito te ꞌre hâimana
41 Tawamhã Farizeu norĩ hã zahadu siré hâimana zaꞌra wa, ma tô Zezusi hã sina sadanharĩ zaꞌra, ãne:
42 — E niha ma tô ãma ꞌre irosaꞌrata zaꞌra waꞌaba mo Danhoꞌreptuiꞌwa da, ꞌRe ihâimana uꞌâsi mono te te ipisutu ãma hã. E ꞌwa sihudu na ma tô ãma ꞌre irosaꞌrata zaꞌra waꞌaba mo.
Tawamhã Farizeu norĩ hã ma tô ãma sadaꞌâbâ zaꞌra, ãne:
— Apito Davihi nhihudu.
43 Tawamhã Zezusi hã ma tô duré apâ sadanharĩ zahu zaꞌra, ãne:
— E niha tawamhã, Davi hã, ꞌRe ihâimana uꞌâsi mono Pẽꞌẽzani te te tãma iwaihuꞌuzéb zarina, ma tô Danhoꞌreptuiꞌwa hã sisi Tinhibꞌapito na. Ãne ma tô tinha:
44 “Uburé Danhibꞌapito hã ma tô Ĩnhibꞌapito ma tinha, ãne:‘Ĩnhimire niwĩ asãmra, asitobꞌru norĩ hã te isõrézéb u, aipara zahâpâ.’ ”
45 Tahawa, Davi hã Danhoꞌreptuiꞌwa Tinhibꞌapito na te te sisi wa, e niha te tawamhã Danhoꞌreptuiꞌwa hã Davihi nhihudu ꞌre mo.
46 Ãne wa, niꞌwa hã te te ãma sadaꞌâbâ waihuꞌu õ di. Tahawa ta hawim haré, niꞌwa hã sada siꞌaibâ õ di, te te isadanharĩ zahu da hã.
