Mateus 23:1-39
23 Tawamhã Zezusi hã ma tô tinha, daꞌahâ uptabi na idahâimana zaꞌra norĩ ma, duré isiré ꞌre inomro mono norĩ ma zama, ãne:
2 — ꞌRe ihâimana uꞌâsi mono nhimiroti zahi na robꞌuiꞌéré na dama rowahutuꞌwa norĩ hã, duré farizeu norĩ hã dama simiroti pire zaꞌra di, ꞌRe ihâimana uꞌâsi mono nhimiroti zarina Mozési te te ãma irobꞌuiꞌérézém na te te dama ꞌre ihâiꞌré zaꞌra mono zéb da hã.
3 Tahawa, maꞌãpé ta norĩ hã ꞌre wapari pese zaꞌra waꞌaba mono. Duré ãma ꞌre anomro pese aba mono, uburé marĩ na te te ꞌre irowasuꞌu zaꞌra mono zém na hã. Taré oto ihâimana zaꞌra zé hã ꞌre sizusi zaꞌra waꞌaba mono tõ. E marĩ wa. Te te ꞌre irowasuꞌu zaꞌra mono zém na ãma ꞌre hâimana zaꞌra mono õ wa.
4 Danhisada ipire ne, te danhisé te te dama ꞌre saꞌra. Tane nherẽ, daꞌãma ꞌre sina mono õ di. Tinhiptõmo hi hã te te ꞌre rési waihuꞌu zaꞌra mono õ di, te te dama ꞌre iꞌwasari mono da hã.
5 Da te ꞌre iꞌmadâꞌâ wẽ zaꞌra mono da si, te uburé marĩ hã te te ꞌre ꞌmanharĩ zaꞌra. Maꞌãpé ꞌmadâꞌâ zaꞌra waꞌaba! Ta norĩ hã te powawẽ hâ ꞌmanharĩ ꞌre, nima norĩ ꞌRe ihâimana uꞌâsi mono mreme na Ibaihâ iwazé pese na robꞌuiꞌéré hã te te siré ꞌre ꞌwasari, ibaihâ nhemezé isaꞌẽtẽ uptabi ꞌremhã. Tiꞌuihâ ãma te sima te te ꞌre wasisi zaꞌra, tipaihi wib zama, ꞌre nomro wẽ mono newa, da te ꞌre ꞌmadâꞌâ ze zaꞌra mono da. Taha da, te duré tiꞌuza ihâpa, isaꞌru pa uptabi na si ꞌre siꞌuza zaꞌra.
6 Tãma iwẽ zaꞌra hã dasimasisizé, dama ipire norĩ nhamrazé, dasa da te dasiré ꞌre ihuri mono zéb ãma hã duré Zudeu norĩ te, rowahutuzé mono na danhamrazé ꞌre isimasa mono na hã.
7 Tãma iwẽ zaꞌra hã wazép sina da te ꞌre isawi zaꞌra mono da si, da te dasina ꞌre iꞌubumroi mono zéb ãma hã, duré “rowahutuꞌwa” na da te ꞌre iꞌmahârâ zaꞌra mono da si.
8 Tazahã, “rowahutuꞌwa” na da te ꞌre asisi zaꞌra waꞌaba mono tõ. Misire ate zaꞌra waꞌwa, Rowahutuꞌwa hã. Tawamhã uburé a norĩ waꞌwa hã asisãnawã te ꞌre anomro aba mo.
9 Tiꞌai ãma hã niꞌwa sisi waꞌaba tõ, aimama ꞌwa isaꞌẽtẽ na hã, misire Aimama ꞌwa isaꞌẽne hâiwa ãma ꞌre sãmra mono wa.
10 Duré “danhibꞌapito” na da te ꞌre asisi zaꞌra waꞌaba mono tõ. E marĩ wa. Misire Asibꞌapito zaꞌra waꞌwa hã, ta hã ꞌRe ihâimana uꞌâsi mono te te ipisudu, Danhoꞌreptuiꞌwa da.
11 Aiꞌreb zaꞌra waꞌaba danhipai u niꞌwa pire na ꞌre ihâimana mono hã za, ta hã daꞌãma ꞌre isiwãrĩ mono, duré dama romhuriꞌwa na ꞌre ihâimana mono.
12 Niꞌwam norĩ hã pire na ꞌrâwi sina ꞌre isõpré mono hã, ꞌRe ihâimana uꞌâsi mono te za te te ãma ꞌre tiꞌawi zaꞌra. Tanei õ di, niꞌwam norĩ hã pire na ꞌrâwi ꞌre isiꞌmadâꞌâ zaꞌra mono õ hã, ꞌRe ihâimana uꞌâsi mono hã te za te te ꞌre anhoré, pire na ꞌre hâimana zaꞌra mono da.
Zezusi hã, farizeu norĩ te te iꞌawẽꞌõzé, hâimana nhipese na ꞌre ihâimana zaꞌra mono hã
13 23:13-14 — Farizeu norĩ, duré dama rowahutuꞌwa norĩ, aihâimana siꞌamoi pese na ꞌre iꞌaihâimana zaꞌra waꞌaba mono hã, aima ꞌre ropipa uptabi zaꞌra waꞌaba mono di za! Te dawi ꞌre isitob zaꞌra waꞌaba mo, ꞌre danhisisi mono tõ da, Hâiwa ãma ꞌre Isãmra mono, daꞌãma ꞌre isibꞌaꞌuwẽ mono zéb u hã. Tane nherẽ, a norĩ waꞌaba zama asisi aba õ di. Te duré dawi ꞌre iroꞌwaꞌrutu zaꞌra waꞌaba mo, ꞌre danhisisi mono tõ da.
14 ꞌMadâꞌâ 23:13
15 — Farizeu norĩ, duré dama rowahutuꞌwa norĩ, aihâimana siꞌamoi pese na ꞌre iꞌaihâimana zaꞌra waꞌaba mono hã, aima ꞌre ropipa uptabi zaꞌra waꞌaba mono di! Â pore na, te datẽme ꞌre isaprĩ zaꞌra waꞌaba mo. Duré daro mono bâ te datẽme ꞌre anomro aba mo, asitẽme ꞌre dapizari zaꞌra waꞌaba mono da, asiniwĩ ꞌre danomro aba mono da. Asiniwĩ ꞌre dapizari zaꞌra waꞌaba mono wamhã, niꞌwam norĩ hã asiniwĩ oto ꞌre inomro aba mono hã, maparane ãma isisiwi na, ropipa u ꞌre inomro mono da hã, te oto ꞌre hâimana zaꞌra, asipai u zaꞌra waꞌaba.
16 — Aima ꞌre ropipa uptabi zaꞌra waꞌaba mono di, atobꞌa nherẽ, ꞌre idanhimroi waꞌaba mono hã. Ãne te dama ꞌre irowasuꞌu zaꞌra waꞌaba mo: “Niꞌwa hã ꞌRe ihâimana uꞌâsi mono nhorõwa nhisi na te te dama ropisutu zahi wamhã, iꞌru zahi õ di, te te iropisutuzé te te ãma iꞌuwaimrami da hã. Tazahã, niꞌwa hã ꞌRe ihâimana uꞌâsi mono nhorõwa ꞌre, ẽtẽ waipo pré oru ꞌre isimasa mono nhisi na, te te ropisutu zahi wamhã, taha si iꞌru zahi, te te ãma iꞌuwaimrami da hã, te te iropisutu zahi zé hã.”
17 Iꞌaihâimana nhimizaꞌrese zaꞌra waꞌaba õ, duré iꞌatobꞌa zaꞌra waꞌwa! E ma hã danhipai u ipire: E ẽtẽ waipo pré oru, e niwamhã ꞌRe ihâimana uꞌâsi mono nhorõwa, ẽtẽ waipo pré oru te te ꞌre iꞌaꞌmanharĩ mono, wazé pese na aimawi ꞌre hâimana zaꞌra mono da hã.
18 Ãne te duré dama ꞌre irowasuꞌu zaꞌra waꞌaba mo: “Niꞌwa hã ꞌRe ihâimana uꞌâsi mono nhorõwa ãma, tãma danhoprubzé, da te ꞌre isaꞌra zaꞌra mono zém nhisi na te te ropisutu zahi wamhã, ta hã tinhimiropisutu zahi te te ãma iꞌuwaimrami da hã, iꞌru zahi õ di, te te iropisutu zahi zé hã. Tazahã, niꞌwa hã danhoprubzé da te ꞌre isaꞌra zaꞌra mono zém nhisiwi danhoprubzé inomro na te te ropisutu zahi wamhã, taha si iꞌru zahi, ropisutu zahi te te iꞌmanharĩzé te te ãma iꞌuwaimrami da hã.”
19 Itobꞌa norĩ, e ma hã danhipai u ipire: E danhoprubzé, e niwamhã danhoprubzé da te ꞌre isaꞌra zaꞌra mono zé wedezane, danhoprubzé te te ꞌre iꞌaꞌmanharĩ mono, wazé pese na aimawi ꞌre hâimana zaꞌra mono da.
20 Tahawa, niꞌwa hã danhoprubzé da te ꞌre isaꞌra zaꞌra mono zém nhisi na te te ropisutu zahi wamhã, te duré uburé danhoprubzé, isisiwi ꞌre isimiꞌwara mono nhisi na zama ropisutu.
21 Duré niꞌwa hã ꞌRe ihâimana uꞌâsi mono nhorõwa nhisi na te te ropisutu zahi wamhã, taha nhisi zarina te duré ropisutu zahi, ꞌRe ihâimana uꞌâsi mono, iwa ꞌre isãmra mono nhisi na zama.
22 Duré niꞌwa hã hâiwa nhisi na te te dama ropisutu zahi wamhã, te duré ꞌRe ihâimana uꞌâsi mono te, danhamrazé iwẽ uptabi nhisi na ropisutu zahi, duré ꞌRe ihâimana uꞌâsi mono, iwa ꞌre isãmra mono nhisi na zama.
23 — Farizeu norĩ, duré dama rowahutuꞌwa norĩ, aihâimana siꞌamoi pese na ꞌre iꞌaihâimana zaꞌra waꞌaba mono hã, aima ꞌre ropipa uptabi zaꞌra waꞌaba mono di za! ꞌRe ihâimana uꞌâsi mono ma, te asõprubzé hã ꞌre ipoꞌo zaꞌra waꞌaba mo, hortelã na wesuirã nhisi hã, duré erva doce na wesuirã nhisi hã duré cominhu na wesuirã nhisi hã. Tane nherẽ, ꞌRe ihâimana uꞌâsi mono nhimiroti zahi na Mozési ipire uptabi na te te ãma irobꞌuiꞌéré hã, ꞌre ꞌmadâꞌâ pese zaꞌra waꞌaba mono õ di, ã hã: Iꞌuwaibaba na dama ꞌre idahâimana zaꞌra mono zé hã, duré dawẽ na dama ꞌre idahâimana zaꞌra mono zé hã, duré sena na dama ꞌre idahâimana zaꞌra mono zé hã. Tazahã, ã norĩ hã iꞌru zahi tô, ꞌre iꞌmanharĩ zaꞌra waꞌaba mono da hã, nima hã ꞌmairẽme aba ãna.
24 Tobꞌa nherẽ, dazaprõniꞌwa norĩ! Upure hã ꞌre sõmri zaꞌra waꞌaba mono tõ da, te â hã ꞌre iwamirĩ pese zaꞌra waꞌaba mo. Tane nherẽ, te awaru baꞌõmore hã ꞌre isõmri zaꞌra waꞌaba mo.
25 — Farizeu norĩ, duré dama rowahutuꞌwa norĩ, aihâimana siꞌamoi pese na ꞌre iꞌaihâimana zaꞌra waꞌaba mono hã, aima ꞌre ropipa uptabi zaꞌra waꞌaba mono di za! Te ꞌre iꞌupsõ zaꞌra waꞌaba mo hâsizé hã, imana wawip si, duré pratu zama. Tane nherẽ, iꞌremhã ꞌmasisi di, marĩ hã asadawa nhipese na dawi ꞌre iwaibui waꞌaba mono hã, duré ãma asima ꞌre irowẽ zaꞌra waꞌaba mono hã, ꞌre asiꞌmadâꞌâ ze zaꞌra waꞌaba mono zéb zarina.
26 Tobꞌa nherẽ, dazaprõniꞌwa norĩ! Hâsizé hã iꞌre uimrehẽne, ꞌre upsõ zaꞌra waꞌaba mono. Tawap si te za imana wawib zama ꞌrerã na hã ꞌre hâimana zaꞌra.
27 — Farizeu norĩ, duré dama rowahutuꞌwa norĩ, aihâimana siꞌamoi pese na ꞌre iꞌaihâimana zaꞌra waꞌaba mono hã, aima ꞌre ropipa uptabi zaꞌra waꞌaba mono di za! A norĩ waꞌwa hã adâꞌâ ꞌru, ꞌmadâꞌâ ze da, imana wawi da te iꞌa ne, te ꞌre aihâimana zaꞌra waꞌaba mo. Iwẽ ne hã imana wawimhã. Tazahã, iꞌremhã dahi si iꞌmasisi ne hã duré iꞌro si.
28 Rowimhã iꞌaiwẽ zaꞌra waꞌaba ne hã. Tane nherẽ, aipẽꞌẽ ꞌremhã iꞌmasi, asadawa nhipese zaꞌra waꞌwa hã duré aiwasété zaꞌra waꞌwa hã.
29 — Aima ꞌre ropipa uptabi zaꞌra waꞌaba mono di, farizeu norĩ, duré dama rowahutuꞌwa norĩ, aihâimana siꞌamoi pese na ꞌre iꞌaihâimana zaꞌra waꞌaba mono hã. ꞌRe ihâimana uꞌâsi mono zadawa ꞌmahârâꞌwa norĩ ꞌru hã te wẽ uptabi na ꞌre iꞌmanharĩ zaꞌra waꞌaba mo. Duré niꞌwam norĩ iꞌuwaibaba na ꞌre inomro mono norĩ ꞌru zama te ꞌmadâꞌâ ze da, ꞌre ipese zaꞌra waꞌaba mo.
30 Te duré ꞌre inharĩ zaꞌra waꞌaba mo, ãne: “Wahiꞌrata norĩ ꞌre hâimana zaꞌra mono ré, ꞌre wahâimana zaꞌra mono ꞌwaꞌâhã, ta norĩ siré, wa te aré ꞌre simroi mono õ di, ꞌRe ihâimana uꞌâsi mono zadawa ꞌmahârâꞌwa norĩ hã.”
31 Ãne na, te tô sena ꞌre asiwasuꞌu zaꞌra waꞌaba mo, a norĩ waꞌwa ꞌRe ihâimana uꞌâsi mono zadawa ꞌmahârâꞌwa norĩ te te ꞌre isimroi mono norĩ nhihudu na hã.
32 Tahawa, maꞌãpé ãma uzusi zaꞌra waꞌaba, ꞌrãsutu zaꞌra waꞌaba da, aihiꞌrata norĩ waꞌwa te te ãma isãnaꞌrata zaꞌra zé hã.
33 Wahi isé uptabi norĩ! E niha asisõꞌreptu zaꞌra waꞌaba da bâ, ꞌRe ihâimana uꞌâsi mono te te asatõrĩ zaꞌra waꞌaba wa, ropipa u hã.
34 Tahawa, wa za we satõrĩ zaꞌra ꞌRe ihâimana uꞌâsi mono zadawa ꞌmahârâꞌwa norĩ hã, rowaihuꞌu pese ꞌwa norĩ hã, duré rowahutuꞌwa norĩ hã. Tawamhã nima norĩ hã te za isimroi waꞌwa. Duré nima norĩ hã wedepoꞌo nhonhiꞌrãmi na te za isasõmri zaꞌra waꞌwa. Duré nima norĩ hã romhâ nhorõ ꞌmanharĩ na dapréꞌézém na te za ꞌre ihâ zaꞌra waꞌaba mo, ate zaꞌra waꞌwa rowahutuzé ꞌre isimasa mono ãma hã. ꞌRi waꞌõtõ mono na te za duré sô ꞌre anomro aba mo, tãma ꞌre robꞌmanharĩ zaꞌra waꞌaba mono da hã.
35 Tahawa, ꞌRe ihâimana uꞌâsi mono hã te za aima robꞌmanharĩ wasété zaꞌra waꞌwa, aihiꞌrata norĩ hã te te ꞌre simroi mono wa, marĩ, te te ꞌre iꞌupa zaꞌra mono õ norĩ hã, Abéu hã ꞌre morĩ wẽ nherẽ, te te siwi iwĩrĩzém hawi, Zacaria Baraquiaha ꞌra hã asiwi iwĩrĩ aba zéb u, ꞌRe ihâimana uꞌâsi mono nhorõwa ꞌri ꞌrãihâ norĩ waꞌwa danhoprubzé da te ꞌre isaꞌra zaꞌra mono zé me.
36 Tô sena wa za ãne hã aima waihuꞌu zaꞌra waꞌwa: ꞌRe ihâimana uꞌâsi mono nhimihâzé hã te za waptãrã, ãhã na ꞌre idahâimana zaꞌra mono norĩ nhisiwimhã.
Zezusi hã, Zeruzalẽ ãma ꞌre idasiꞌubumroi mono norĩ ãma ipẽꞌẽzézé
37 Tawamhã Zezusi hã ma ãma ꞌrãsutu, ãne:
— Zeruzalẽ, Zeruzalẽ, a hã te ꞌre iꞌanhimroi mo, ꞌRe ihâimana uꞌâsi mono zadawa ꞌmahârâꞌwa norĩ hã! Ẽtẽ na te duré ꞌre iꞌanhimroi mo, ꞌRe ihâimana uꞌâsi mono timreme ꞌwapéiꞌwa te te atẽme ꞌre iꞌazatõrĩ mono hã! Wa tô aré õne uꞌâ te ĩsima ꞌre wẽ uꞌâsi, uburé aiꞌra norĩ hã te ubumro da, siꞌa hã tiꞌra zawi te, ꞌre ipapo zaꞌra mono ne. Tane nherẽ, asima wẽ zaꞌra waꞌaba õ di
38 Tahawa, ꞌRe ihâimana uꞌâsi mono hã asõrõwa na sapaꞌa zaꞌra waꞌaba õ di za oto.
39 Tahawa, tô sena wa za aima waihuꞌu zaꞌra waꞌwa. Niwa oto asiwi ĩꞌmadâꞌâ waꞌaba õ di za, bâdâ hã iwisizéb u, ãne inharĩ zaꞌra waꞌaba zéb u: “ꞌRe ihâimana uꞌâsi mono hã iwẽ si te te tãma ꞌre ipisutu uꞌâsi mono da si, Uburé Danhibꞌapito nhisi na we imorĩ ma hã.”
