Mateus 28:1-20
28 Tawamhã sabadu hawi iꞌawẽ na hã, dumigu na mararé uptabi, Maria Madalena duré Maria ihâiba amoi me, ma tô tineb zahuré, abꞌre hã te te sabu zahuré da.
2 Tawamhã waptu na rosaꞌrese õ ré, ma tô tiꞌai popo saꞌẽtẽ uptabi na watobro. Hâiwa hawi Uburé Danhibꞌapito ma romhuriꞌwa hã ma tô siꞌra. Ẽne hã ma saꞌré. Isisi ma tô nhamra.
3 Tã siꞌubuzi ne, ihâiba hã. Duré iꞌuza hã rã uptabi di, hâiwaꞌa ne.
4 Tawamhã dasiꞌwapéi ꞌmanharĩꞌwa norĩ, abꞌre te te iꞌmadâꞌâ zaꞌra hã ma tô tirẽrẽꞌẽ zaꞌra, pahi pese zaꞌra wa. Tahawa dadâꞌâ wa ꞌre idanhimiꞌwara mono ne, ma tô dabaꞌwara.
5 Tawamhã hâiwa hawi romhuriꞌwa hã ma tô piꞌõ norĩ ma tinha, ãne:
— Aipahi waꞌaba tõ! Ĩma waihuꞌu pese di, Zezusihi zô iꞌairĩtĩ aba na hã, wedepoꞌo nhonhiꞌrãmi na da te dasiwi isasõmri zô.
6 Tane nherẽ, ãme hâimana õ di. Apâ ma tô hâiwaꞌudu, te te sina irotizéb zarina. Maꞌãpé we ane waꞌaba, sabui waꞌaba da, inomrozé hã.
7 Maꞌãpé duré saꞌẽtẽ ane waꞌaba. Isiré ꞌre inomro mono norĩ ma, rowasuꞌu zaꞌra waꞌaba, ãne: “Apâ ma tô hâiwaꞌudu. Asõwa te oto timorĩ zaꞌra waꞌwa, Galiléia u. Tame te za asiwi iꞌmadâꞌâ ꞌwa.” Ãne si wa aima rowasuꞌu waꞌwa.
8 Tawamhã waptu na ma tô tipusi zahuré abꞌre hawi, pahi uptabi zahuré wa. Tane nherẽ, tãma irowẽ uptabi zahuré. Ma tô asamro, isiré ꞌre inomro mono norĩ ma, te te rowasuꞌu zahuré da.
9 Tawamhã waptu na rosaꞌrese õ ré, Zezusi hã ma tô sõpẽtẽ zahuré. Ãne te tãma nharĩ zahuré:
— Rowẽ na ꞌre aihâimana aba mono.
Tawamhã piꞌõ norĩ hã ꞌrâwi ma tô itẽme tineb zahuré. Ipara ãma ma tô sawi zahuré. Ma tô duré ãma tiwata zahuré.
10 Tawamhã Zezusi hã te tãma nharĩ zahuré, ãne:
— Aipahi waꞌaba tõ! Mo oto ane waꞌaba, ĩsisãnawã norĩ ma, ĩwasuꞌu waꞌaba da, Galiléia u siꞌabaꞌré da. Tame te za siwi ĩꞌmadâ za.
Abꞌre ꞌmadâꞌâꞌwa norĩ, isadawa nhipese zaꞌra zé
11 Tawamhã piꞌõ norĩ hã zahadu bâdâdi na hâimana zahuré ré hã, nima norĩ dasiꞌwapéi ꞌmanharĩꞌwa norĩ, abꞌre te te siwi iꞌmadâ hã ma tô ꞌri waꞌõtõ u aiꞌabaꞌré. Ta norĩ hã ma tô sasedoti ipire norĩ ma, rowasuꞌu pese zaꞌra, uburé iromhâimanazém na hã.
12 Tawamhã sasedoti ipire norĩ hã ma tô duré siꞌrãꞌõtõ, Zudeu norĩ ma rotiꞌwa norĩ me. Rowaꞌõno hã ma tô siwi ꞌmanha. Tahawa, robꞌuiprazé hã saꞌẽtẽ na ma tô sõmri zaꞌra, dasiꞌwapéi ꞌmanharĩꞌwa abꞌre ꞌmadâꞌâꞌwa norĩ ma.
13 Ãne ma tô tãma roti zaꞌra:
— Ãne dama rowasuꞌu zaꞌra waꞌaba za: Isiré ꞌre inomro mono norĩ hã, barana ma tô we aiꞌabaꞌré, wanhotõ zaꞌra ré. Tahawa ma tô siwi simiꞌu, Zezusihi hâiba hã.
14 Ãne hã, Zudéa ãma apito hã rowasuꞌu te te wapari wamhã, wamreme na wa za ãma aiꞌuté zaꞌra ni za, tô ãne iromhâimana na hã. Ãne wamhã, marĩ ipire asada hâimana zaꞌra waꞌaba õ di za.
15 Tawamhã dasiꞌwapéi ꞌmanharĩꞌwa abꞌre ꞌmadâꞌâꞌwa norĩ hã ma tô robꞌuiprazé hã waibu. Sasedoti, tisiré norĩ ma ipire norĩ hã te te tãma iꞌru zaꞌra zéb zarina, ma tô ꞌmanharĩ zaꞌra. Tahawa, ã hã rowasuꞌu zadawa nhipe hã ma tô ropé Zudeu norĩ ꞌremhã. Ã bâtâ na zama te ꞌre hâimana.
Zezusi hã tisiré ꞌre inomro mono norĩ 11 na ihâiba zaꞌra ma, isihâiꞌrézé
16 Tawamhã Zezusihi siré ꞌre inomro mono 11 na ihâiba zaꞌra norĩ hã ma tô aiꞌabaꞌré, Galiléia u. Tame ẽtẽ ꞌrãihâ u ma tô aihutu, Zezusi te te tãma ipisutu zaꞌra zéb u.
17 Tawamhã Zezusi hã te te siwi sãmri wamhã, ma tô ãma tiwata zaꞌra. Tane nherẽ, nima norĩ hã ma tô ãma siwawã zaꞌra.
18 Tawamhã Zezusi hã ma tô ꞌrâwi itẽme timorĩ zaꞌra. Ãne ma tô tãma siwasuꞌu zaꞌra:
— Ĩmama ꞌRe ihâimana uꞌâsi mono hã ma tô ĩpisutu, isadawa para ĩpire na ꞌre ĩhâimana mono da, hâiwa ãma duré tiꞌai ãma zama.
19 Tahawa, mo oto ropéi waꞌaba, uburé aꞌuwẽ mono bâ. Dama ĩzadawa wasuꞌu zaꞌra waꞌaba mono, ĩnhimiroti ꞌmadâꞌâꞌwa ꞌre danomro mono da. Duré ĩzazeiꞌwa norĩ ma, â dawabzuri hã ꞌre ꞌmanharĩ zaꞌra waꞌaba mono, Ĩmama nhisi na, duré Ĩnhisi na duré Ĩmama Pẽꞌẽzani nhisi na.
20 Duré tãma ꞌre roti pese zaꞌra waꞌaba mono, ĩnhimiroti uburé te aima iꞌru zaꞌra waꞌwa hã te te ꞌre ꞌmadâꞌâ pese zaꞌra mono da. Duré ãma aipoꞌre simrami zaꞌra waꞌaba tõ, ãne na hã: Bâtâ sidâpâ wa za asiré ꞌre ĩhâimana uꞌâsi zaꞌra waꞌwa, irobꞌrãsutuzéb u.
