Romanu 5:1-21
5 Wanhibꞌapito Zezu Cristu hã ma tô te te sima ꞌre waꞌawẽ, wa te wasina ꞌre iꞌumnhasi zaꞌra mono zéb zarina. Tahawa, ꞌRe ihâimana uꞌâsi mono hã ma tô te te sima waꞌãma ꞌre aroti, wa te ꞌre isazei pese zaꞌra mono na, wawasédé hã te te oto waꞌãma ꞌre aꞌmadâꞌâ tõ mono da, taha zarina si te te duré ꞌre waꞌawẽsãmri mono da, wawasété na ꞌre wanomro mono nherẽ, te te ꞌre waꞌahâ zaꞌra mono tõ da. Tahawa, rowẽ uꞌâsi, wa oto ãma ꞌre wanomro, ꞌRe ihâimana uꞌâsi mono ãma hã.
2 Zezusi hã wa te wasina ꞌre umnhasi zaꞌra mono wa, te ꞌRe ihâimana uꞌâsi mono hã iwẽ si te te wama ꞌre aꞌmadâꞌâ. Taha na si, wa oto wa norĩ hã ꞌre wahâimana zaꞌra. Niwapsi te za ꞌRe ihâimana uꞌâsi mono hã te te wama ꞌre apisutu, iwaihuꞌu pese zarina ihâiba na rowaꞌa zaꞌẽtẽ na isiré ꞌre wahâimana uꞌâsi zaꞌra mono da, rowẽ uptabi na. Tahawa, wato sina, wa sô ꞌre wanhimipari zaꞌra, wa te ꞌre sazei utõrĩ zaꞌra mono ãna.
3 Duré Cristuhu zazeiꞌwa, ꞌre wanomro mono ꞌru te, da te wama ꞌre robꞌmanharĩ zaꞌra mono wa, wa te ꞌre robzépata zaꞌra mono ré, wa za watoi uꞌâsi ꞌre wahâimana zaꞌra, wa te ꞌre irobzépata zaꞌra mono zéb zarina, õhõ ãma si wanhiptete sina ꞌre iwahâimana zaꞌra mono zéb da hã, wa te wasima ãma ꞌre saꞌẽtẽ zaꞌra mono wa. Ãne hã wa te wasina ꞌre waihuꞌu pese zaꞌra mono wa, wa za watoi uꞌâsi ꞌre wahâimana zaꞌra.
4 Ropire nherẽ, danhimiꞌẽ na ꞌre idahâimana zaꞌra mono na, te ꞌRe ihâimana uꞌâsi mono te te sima daꞌãma ꞌre arowẽ. Duré te te sima daꞌãma ꞌre iꞌarowẽ mono zéb zarina, te za ꞌRe ihâimana uꞌâsi mono nhimiropisutuzéb zô dato sina ꞌre danhimipari zaꞌra, da te ꞌre sazei utõrĩ zaꞌra mono ãna.
5 Ãhã zô, taré sô ꞌre wanhimipari baba zaꞌra mono õ di za. E marĩ wa. ꞌRe ihâimana uꞌâsi mono hã Tipẽꞌẽzani te te wama ꞌre iꞌanhomri mono na, tinhimizawi pese zé hã te te wama ꞌre awaihuꞌu mono wa. Tahawa, taré sô ꞌre wanhimipari zaꞌra mono õ di za, marĩ iwẽ hã te te wama ꞌre iꞌapisutu mono zéb zô hã.
6 Duréihã ꞌre idahâimana zaꞌra mono naꞌrata zém hawimhã, marĩ da te ꞌre iꞌmanharĩ wẽ zaꞌra mono zém na hã ꞌRe ihâimana uꞌâsi mono te te daꞌãma sima ꞌre aroti mono õ di, taha zarina dawasédé hã te te oto daꞌãma ꞌre aꞌmadâꞌâ tõ mono da, duré dapoꞌreꞌõ nherẽ, te te ꞌre daꞌahâ zaꞌra tõ mono da. Ta hawim haré, dahâimana wẽ zém na ꞌrâwi ꞌre dasiꞌmadâꞌâ waihuꞌu zaꞌra mono õ di, dawasédé hã te te daꞌãma ꞌre iꞌaꞌmadâꞌâ mono õ zarina, te te ꞌre idaꞌawẽsãmri mono zéb da hã, ꞌRe ihâimana uꞌâsi mono hã. Taha ré, ma tô Cristu hã dazada dârâ, uburé dawasété na ꞌre idahâimana zaꞌra mono norĩ zada, ꞌRe ihâimana uꞌâsi mono, bâdâ te te ãma ipisutuzé hã iwa iwaptãꞌãzém na.
7 Niꞌwa hã uburé danhimiroti wẽ hã te te ꞌre ꞌmadâꞌâ pese mono nherẽ, taha upana idaꞌmatâꞌâ da hã, mare di. Niꞌwa hã daꞌãma ꞌre isiwamri mono, ꞌre ꞌmaihâimana mono wamhã, taha upana si idaꞌmatâꞌâ da hã, ãté te za ꞌre siꞌmadâꞌâ zaꞌra.
8 Tanei õ di, ꞌRe ihâimana uꞌâsi mono nhimizawizé hã. Wa norĩ hã wawasété na ꞌre wahâimana zaꞌra mono nherẽ, ma tô Cristu hã pisutu, wazada dâꞌâ da, waꞌupana. Ãne hã ma tô ꞌRe ihâimana uꞌâsi mono hã te te wama ꞌre awaihuꞌu, te te ꞌre iwaꞌazawi pese mono zém na hã.
9 Zezusi wazada idâꞌâzém na, ma tô ꞌRe ihâimana uꞌâsi mono hã te te ꞌre waꞌawẽsãmri, wawasédé hã te te oto waꞌãma ꞌre iꞌaꞌmadâꞌâ mono õ zarina. Ãne wa, te za duré Zezusi hã tidâꞌâzém na te te ꞌre waꞌanhoꞌreptu, ꞌRe ihâimana uꞌâsi mono nhimihâzé wi, ro hã za isiꞌutõrĩzéb ãma hã.
10 ꞌRe ihâimana uꞌâsi mono nhitobꞌru, wa aré ꞌre wanomro. Tane nherẽ, tiꞌra dâꞌâzém na ma tô waꞌãma ꞌre siwadi zaꞌra oto. Tawamhã isiwadi oto ꞌre wahâimana zaꞌra mono wa, te za tô oto Zezusi hã te te ꞌre waꞌanhoꞌreptu, dâꞌâ nherẽ, apâ hâiwaꞌutu wa, dâꞌâ ãna ꞌre hâimana uꞌâsi mono wa za oto.
11 Tane nherẽ, taha si õ di. ꞌRe ihâimana uꞌâsi mono ãma, wa duré watoi uꞌâsi ꞌre wahâimana zaꞌra, Wanhibꞌapito Zezu Cristu dâꞌâzém na, waꞌãma ꞌre siwadi zaꞌra mono wa oto.
Adãhã wasuꞌu, Cristuhu wasuꞌu me
12 Dawasédé ma tô tizébré naꞌrata, Adã iwasétézém hawi. Ta hawimhã ma tô duré dawasédé hã te te ropé, uburé dapoto mono bâ. Ta hawim haré, te aihĩni pese oto ꞌre dadâꞌâ zaꞌra, dawasété na ꞌre danomro mono wa.
13 5:13-15 Dawasété ãna ꞌre idahâimana zaꞌra mono zéb da, ꞌRe ihâimana uꞌâsi mono nhimiroti hã dama ꞌre hâimana zaꞌra mono õ nherẽ, dawasédé hã te te daꞌãma ꞌre azaꞌra mono õ di, ꞌRe ihâimana uꞌâsi mono hã. Tane nherẽ, duréihã Mozésihi ma, tinhimiroti hã te te waihuꞌu õ ré, duré te te robꞌuiꞌéré õ ré, te dawasété na si ꞌre dahâimana uꞌâsi zaꞌra. Isimiroti na robꞌuiꞌéré hã dama ꞌre hâimana zaꞌra mono õ nherẽ, dawasété na si ꞌre dahâimana zaꞌra mono wa, ma tô Adãhã wasété naꞌrata hawim haré ꞌre dadâꞌâ uꞌâsi zaꞌra, ꞌRe ihâimana uꞌâsi mono nhimiroti hã dapẽꞌẽ ꞌre, dama ꞌre hâimana zaꞌra mono nherẽ, da te dasina tãma ãma ꞌre uwaimrami zaꞌra mono õ wa. Mozésihi ma, za oto ꞌRe ihâimana uꞌâsi mono, tinhimiroti te te iwaihuꞌuzéb u hã, dawasété na si ꞌre danomro uꞌâsi mono wa, ma tô ꞌre dadâꞌâ uꞌâsi zaꞌra. Adãhã wi, ꞌRe ihâimana uꞌâsi mono, robꞌrã te te sawi nherẽ, te te sadawa ꞌmadâꞌâ ãna, ma tô tiwasédé hã ꞌmanha. Ãne hã Adãhã wasété ne, aiwa da te ꞌre ꞌmanharĩ zaꞌra mono õ nherẽ, ma tô aihĩni ꞌre dadâꞌâ uꞌâsi zaꞌra, ꞌRe ihâimana uꞌâsi mono te te dama irotizé hã, sõꞌawi dama ꞌre hâimana zaꞌra mono õ nherẽ.
Adã hã wasédé sãnaꞌrata wamhã, ma tô ipire uptabi hã ꞌmanha, tiwasédé hã. Taha uirĩ na si, ma tô Zezusi hã marĩ ipire uptabi hã ꞌmanha duré iwẽ hã, tiꞌai ãma ꞌre morĩ ré. Tahawa, Zezusihi ne Adã hã, marĩ isine ipire hã te te ꞌmanharĩ wa. Tane nherẽ, aiwab õ di, isimiꞌmanharĩzé hã. ꞌRe ihâimana uꞌâsi mono hã iwẽ te te dama ꞌre iꞌanhomri mono hã, Adãhã wasété nei õ di. Adã hã tiwasédé te te iꞌmanharĩzém hawi, ma tô oto uburé ꞌre dadâꞌâ uꞌâsi zaꞌra, tô sena. Tane nherẽ, ꞌRe ihâimana uꞌâsi mono iwẽ hã te te dama ꞌre iꞌabꞌmanharĩ mono zé hã pire uptabi di, Adã hã tiwasédé te te iꞌmanharĩzém nhipai u. Wẽ uptabi di. E marĩ tawamhã, ꞌRe ihâimana uꞌâsi mono, iwẽ hã te te dama ꞌre iꞌabꞌmanharĩ mono zé hã. Zezusi hã sisawi ãna tihâiba na te te ꞌre idaꞌazawi pese mono na, ma tô te te dama ꞌre abꞌmanharĩ wẽ, tinhoprubzéb zarina.
14 ꞌMadâꞌâ 5:13
15 ꞌMadâꞌâ 5:13
16 Adã hã tiwasédé te te iꞌmanharĩzém hawim haré, te dawasédé hã da te ꞌre ꞌmanharĩ uꞌâsi zaꞌra oto. Taha zarina, ma tô ꞌRe ihâimana uꞌâsi mono hã te te siwi ꞌre daꞌawẽꞌõ pese, dawasédé hã te te daꞌãma ꞌre iꞌawaihuꞌu mono zéb zarina. Tane nherẽ, ta hawim haré, dawasédé hã da te ꞌre ꞌmanharĩ uꞌâsi zaꞌra mono nherẽ, dama isõprubzém na te oto daꞌahâ na te te ꞌre daꞌawẽsãmri ꞌRe ihâimana uꞌâsi mono hã, iꞌra dazada idâꞌâzém na. Ãne wa, ꞌRe ihâimana uꞌâsi mono, dama ꞌre isõpru mono zé hã, pire uptabi di, Adãhã nhimiꞌmanharĩzé ma hã.
17 Tô sena aibâ hã misi, tiwasédé te te iꞌmanharĩ naꞌrata hawi, ma tô oto ꞌre dadâꞌâ uꞌâsi zaꞌra. Tane nherẽ, Zezu Cristu hã aibâ misi nherẽ, isimiꞌmanharĩzé hã pire uptabi di, aibâ tiwasédé te te iꞌmanharĩ naꞌrata zém nhipai u. Wẽ uptabi di. ꞌRe ihâimana uꞌâsi mono hã iwẽ uptabi hã te te tãma ꞌre iꞌapisutu mono norĩ si, te za hâimana pire na isiré ꞌre hâimana uꞌâsi zaꞌra, tinhoprubzé hã te te tãma ꞌre iꞌanhomri mono norĩ si. Isõprubzé hã te te ꞌre idaꞌawẽsãmri mono zé, te wasuꞌu. Cristu idâꞌâzém na te za dahâimana pire na isiré ꞌre dahâimana uꞌâsi zaꞌra.
18 Aibâ hã misi tiwasédé hã te te iꞌmanharĩzém hawi, ma tô ꞌRe ihâimana uꞌâsi mono hã uburé te te ꞌre daꞌawẽꞌõ pese, dawasédé hã te te daꞌãma ꞌre iꞌawaihuꞌu mono zéb zarina. Tane, misi Zezusihi nhimiꞌmanharĩ wẽ zém na, te za oto ꞌRe ihâimana uꞌâsi mono hã te te ꞌre daꞌanhoꞌreptu, dapẽꞌẽ ꞌre, dadâꞌâ uꞌâsi ne ꞌre idanomro mono zém hawi, iꞌrata ꞌre dahâimana uꞌâsi zaꞌra mono da oto.
19 Aibâ hã misi nherẽ, ꞌRe ihâimana uꞌâsi mono te te iwapari õ hawimhã, ma tô oto uburé dawasété na si ꞌre dahâimana zaꞌra. Tane duré, aibâ hã misi nherẽ, ꞌRe ihâimana uꞌâsi mono te te iwapari pese zém hawi te za oto ꞌRe ihâimana uꞌâsi mono hã te te ꞌre daꞌawẽsãmri, Zezu Cristu te te iwapari pese zém hawimhã.
20 Duréihã ꞌRe ihâimana uꞌâsi mono ma tô Mozésihi ma tinhimiroti hã waihuꞌu, te te ãma robꞌuiꞌéré da, ãma ꞌre dasipoꞌre puꞌu zaꞌra mono wa, dawasédé hã da te oto dasina ꞌre waihuꞌu zaꞌra mono da. Tane nherẽ, ma tô dawasédé hã da te dasima ꞌre saꞌẽtẽ uꞌâsi zaꞌra. Tane nherẽ, dawasédé da te dasima ꞌre isaꞌẽtẽ zaꞌra mono zém nhipai u, ma tô ꞌRe ihâimana uꞌâsi mono hã te te dama ꞌre arobꞌmanharĩ wẽ, daꞌãma ꞌre isiwamri uꞌâsi mono zéb zarina.
21 Ãne na rowasuꞌu na, wa za oto aima ꞌrãsutu zaꞌra waꞌwa. Dawasété na si ꞌre danomro uꞌâsi mono wa, ma tô aré dapẽꞌẽ ꞌremhã, dadâꞌâ ne ꞌre dahâimana uꞌâsi zaꞌra, ꞌRe ihâimana uꞌâsi mono nhiti. Tane nherẽ, tinhimizawi pese zéb zarina, ma tô ꞌRe ihâimana uꞌâsi mono hã Wanhibꞌapito Zezu Cristu dâꞌâzéb zarina te te sima ꞌre waꞌawẽ, taha zarina si rowẽ uptabi na ꞌre wanomro uꞌâsi mono da oto.
